Romaindjé 12 - Mbede Lə Luba Kone Gə Sigi

TAR NDƏJIJE DANG-DANG Kun rɔ kar Luba

¹ Be ɓa, ngan ko̰-mje, m-ndəji-si gə go məmayje lə Luba, mba kar unje darɔ-si ja arje Luba gə nepolo gə aw kəm baa, gə to gə losang-ɛ, ngaɓa ta kəm Luba, ye ɓa gə polo gə gə dɔ gɔl-ɛ.

² May kar-si ꞌndajije pa neɗa lə dəwje gə d-aw ɗa dɔ nangə nee ɓisine ang ngaa ḭya̰je rɔ-si yag arje kəji negərə lə-si turu to gə sigi, mba kar-si ꞌgərəje ne mə njigi lə Luba, ne gə may, gə ta kəm-e ngaɓa may pɛdə.

³ Be ɓa m-pa m-ar-si gə go nuji gə d-uwa sə-m le ɗaa, mba kar dəw kara ja kəji lə-a to kəji kəsə tar gə kəji dɔ godo ang, ngaa kar kəji tar lə-a to gə maj-ɛ gə go ɗəb-e, na-na kara gə go singa takagə gə Luba ar-ɛ.

⁴ Mba ɗəw kara baa to gə darɔ-si kara baa ja ngaa bar kəm-eje bula, ngaɓa bar kəm rɔ-sijee nee le kula ɗa-je dang-dang,

⁵ be ɓa sijee gə j-a bula le j-a to darɔ gə kara baa ɗəw gə lə Kirisi ngaɓa j-a to bar kəm rɔ naa gə yo gə nee.

⁶ Ngaa, gusu lə-si dang-dang gə go mənuji gə j-inga, ɓo to gə gusu kila mbərə lə Luba nama may kar uwa buwa takagə ɓa;

⁷ to gə ɓo to gusu ɗa kula nama kar uwa buwa kəji kula tɔ ɓa, ngaa ɓo to kar netɔji nama kar njenetɔji uwa netɔji le ji-a joo;

⁸ Kar njendəji dəwje nama ore kəm-e kəne; ɓo nje kun ne kar dəwje nama un gə kɔsə rɔ ang; ɓo nje kun dɔ kulaje nama may kar rɔ-je ɔlɛ kəne pɛl-pɛl; kar nje ɗa məmay nama ɗa məmay gə rɔləl.

⁹ May kar njigi to njigi gə tɔgərɔ, ɔsəje ne gə kṵra̰y ngərəng, oreje kəm-si ndəng dɔ ne gə may gə.

¹⁰ Ɔji dɔ njigi gə horo ngan ko̰ naaje gə le ɗaa, may kar-si ꞌnjigije naa gə yo gə nee, may kar-si ꞌɗɔy-je naa gə gə yo gə nee ar-je al dɔ mar-ɛ.

¹¹ Ar-je rɔ-si ɔlɛ kəne pɛl ɓo ꞌdabəje ang. Uwaje gədərə mə kəji gə lə-si, ꞌɗaje kula ar-je Mbayɓe.

¹² ꞌƊaje rɔləl dɔ kunda mə gə lə-si. Uwaje gədərə dan nekəm ndooje gə. Uwaje dəji Luba gədərə.

¹³ May kar-si ꞌlaje gə njerɔsangəje gə neje gə d-aw ndoo-e. May kar uwa-je mbaje gə kede-kede.

¹⁴ ꞌTɔrəje ndu-si dɔ njekula kəm-si ndooje gə, ɔr-je ndu ar-jeje ɓo uguje ne ar-jeje ang.

¹⁵ Nje gə d-aw ꞌɗa rɔləl nama ꞌɗaje gə je rɔləl, ɓo nje gə d-aw no nama ꞌnoje gə je.

¹⁶ Ar-je mə-si to gə maj-ɛ dɔ naa gə to to gə na-na gə yo gə nee. Undaje dɔ-si taar gəgəgə ang ngaa ar-je kula dɔ ngulum ɓa uwa mə-si. Oje rɔ-si gə njekəm karəje ta kəm-sisəy gə ja ang.

¹⁷ ꞌDalje ba̰a̰ məyɛr gə dəw ang. ꞌSangəje ne gə may no dəwje gə tɔ̰y.

¹⁸ To gə ɓo ɗəw to, gə to ne gə kəm kar-si ꞌɗaje nama, ar-je ɗɛgɛgɛ to horo-si gə gə dəwje tɔ̰y.

¹⁹ Ngan ko̰-mje gə m-njigi-si ya̰, ꞌdalje ba̰a̰ lə-si gə darɔ-si ang, ngaa ḭya̰je wungu lə Luba ar-je ɗa kula, mba ꞌɗa mə mbede gə na: Dal ba̰a̰ to kar ꞌma, kɔr gira to kar ꞌma, ɓa Mbayɓe pa be.

²⁰ Ngaa To gə ɓo ɓo ɔr njeba̰a̰ lə-i nama ar-ɛ ne usa; To gə ɓo kunda ɔr-ɛ nama ar-ɛ man n-ay; Mba logə ꞌɗa to gə be le, To gə yɛl pərje gə ta pər yɛg-yɛg ɓa ɔsə um dɔ-ɛ gə.

²¹ Ar ɗa məyɛr uwa mə-i ang, ngaa uwa t-ɛ gə ɗa may.