Romaindjé 11 - Mbede Lə Luba Kone Gə Sigi

Luba mbadə dəw mə ɓeje lə-a ang

¹ M-dəji tar na: Luba mbadə dəw mə ɓeje lə-a wa? N-mbadə-je ang! Mba ꞌma kara, m-to Ijirayɛl tɔ, gə gəl kuji Abəraham gə, gə gəl ka gə lə Bɛnjamɛ̰.

² Luba mbadə dəw mə ɓeje lə-a gə ye gərə-je kede nam le ang. Ose mə-si uy dɔ tar gə Mbede pa ɔji dɔ Eli gə səgə Ijirayɛl no Luba gə le wa:

³ Mbayɓe, ꞌtɔlje pajambərəje lə-i, ꞌcɛdəje no kɔgəje lə-i, ngaɓa ꞌma ja gə kar-m baa m-nay ɗaa ꞌsangə mba tɔl-m

⁴ Ngaa Luba ila-a kəne na ɗi wa? M-unda dəwje tɔl-tɔl dɔg lo siri gə dɔ ji-m gə d-ɔsə məkəji-je nangə no Baal gə ang.

⁵ Ɗəw kara baa ja tɔ ɓa, dɔ ndɔ gə ɓogəne kara kɛsə nje gə ꞌmbərə-je ɗəw mənuji gə ꞌga̰ tɔ.

⁶ Be ɓa, to gə ɓo to gə mənuji nama, ɗəw tura go kula ɗaje godo; ɓo be ang nama mənuji to mənuji ang. Ngaɓa to gə ɓo gə kula ɗaje nama, to gə mənuji ang, be ang nama, kula ɗa kara to kula ɗa ang tɔ.

⁷ Pa na ɗi wa? Ne gə Ijirayɛl sangə le inga ang, ngaa nje gə ꞌmbərə-je ɓa d-inga, nje gə kɛm d-isi gə məkədərə,

⁸ to gə ꞌɗa ne mə mbede gə na: Luba ar njil negərə lə-je to ɓi, ar kəm-je o nembo̰ baa, Ngaɓa n-ar mbi-je o tar ang, Saar ce ɓogəne.

⁹ Ɗaa Dabidi pa na: May kar nekusaje lə-je təl kula uba-je, kar to bandə kuwa-je, gə ɗəw koso lə-je ngaɓa kar to ne kɔr gira kula ɗa-je!

¹⁰ May kar kəm-je ndul njing-njing ar d-o lo ang, Ngaɓa kar kula ɗa-je cɛdə gɛngərɛ̰-je gə gə ndɔ-ndɔ ja!

Kaji lə dəwje gə ꞌgərə Luba ang gə mbəl mə lə Ijirayɛlje

¹¹ M-pa na: Se ꞌtuga-je gɔl-je ɓa ꞌce d-oso-je gə no-je ngaa wa? Be ang baa! Ngaa mbɔr dɔ koso lə-je ɓa d-ar dəwje gə ꞌgərə Luba ang d-inga ne kaji, mba kɔsə neje kar ꞌnər-je ne mə.

¹² Ngaɓa to gə ɓo koso lə-je to nebaw lə dɔ nangə nee, ngaɓa kɔr rɔ gə gugu lə-je to may lə dəwje gə ꞌto Jiibije ang nama, ɗi ɓa a may kunda təl gə d-a təl gə kar ꞌjejee d-inga kaji barang tɔ wa?

¹³ M-pa m-ar-sisəy tɔ̰y ja, sisəy gə ꞌtoje Jiibije ang le, ꞌma gə m-to njeka̰ykula lə dəwje gə ꞌgərə Luba ang, to gə m-ɔsə gaji rɔ-m dɔ kula gə lə-m,

¹⁴ mba kar ɗəw to nama nje gə horo gəl kuji-m gə d-ḭ ꞌnər mə ngaɓa gə mba kaji ne nje gə kara-kara horo-je gə.

¹⁵ Mba to gə ɓo kɔsə gə d-ɔsə-je ngərəng le ɓa ar dɔ nangə nee um ne naa gə gə Luba nama logə d-a təl gə je gugu le ɗi ɓa a ɗa ne wa? Se to to gə d-uy ɓa ꞌtəl d-inga təbə be ang wa?

¹⁶ Be ɓa to gə ɓo dɔngɔr mbə to gə losang-ɛ nama ꞌye gə ꞌmbo̰y tɔ̰y ja to gə losang-ɛ tɔ; ngaɓa to gə ɓo ngira kagə to gə losang-ɛ nama bar kəm-ɛje kara to gə losang-ɛ tɔ.

¹⁷ Ngaa to gə ɓo ꞌndər bar kəm-ɛje gə kɛm, ngaɓa ꞌi gə kagə olibiye gə muu baa, d-un-i ꞌnam-i toro-je gə, ngaɓa uba may dɔ ngira gə, gə dɔ bodo kagə olibiye gə to kede le nama,

¹⁸ ɔsə rɔ-i dɔ bar kəm-ɛje gə ꞌndər le ang. To gə ɓo ɔsə rɔ-i nama may kar-i ꞌgərə to gə to ꞌi ɓa odo ngira kagə ang ngira ɓa od-i ꞌi.

¹⁹ A kḭ pa na: ꞌNdər bar kəm kagəje gə ɗangə mba kar ꞌnam ꞌma toro-je.

²⁰ Tɔgərɔ ja; ꞌndər-je mba takagə lə-je godo, ngaa ꞌi le, takagə ɓa uwa ji-i joo. May kar ɔsə rɔ-i ang ɗaa ꞌɓəəl gə ɓəəl;

²¹ mba to gə ɓo Luba ɔr kəm bar kəm kagəje gə uba ang nama, ꞌi kara n-a kɔr kəm-i ang tɔ.

²² May kar o məmay lə Luba gə mongə lə-a, ngaɓa mongə lə-a gə ɔji dɔ nje gə d-oso, ɗaa n-ɗa sə-i məmay, ngaa to gə ɓo isi dan məmay gə nee le dɔ-i gə kede ang nama ꞌi kara d-a kɔr-i gə gugu tɔ.

²³ ꞌJejee nee kara to gə ɓo d-ḭya̰ go məkədərə nama d-a təl ɗɔdə-je ɓi. Mba Luba asə mba təl ɗɔdə-je to gə sigi.

²⁴ To gə ɓo ꞌi, gə ꞌto bar kəm kagə olibiye gə muu, gə lo kunda rɔ-i gə uba ne, ɓa ꞌgang-i ꞌɗe ꞌnam-i dɔ kagə olibiye gə ɓee gə, ngaa ɓədə ɓa ꞌjejee gə ꞌto bar kəm-eje gə kuji kəy ne le d-a təl nam-je kəne gugu ang wa?

²⁵ Ngan ko̰-mje, mba m-njigi kar ne gə to lokiya gə le, aw-je kəne dɔ mbə gə ang, mba a kḭ koje rɔ-si gə njekəm karəje. Məkədərə lə Ijirayɛl le, kur-e a kəw ang saar kar dəwje gə ꞌto Jiibije ang tɔ̰y ja d-andə ne lo kaji gə.

²⁶ Ngaɓa be ɓa Ijirayɛl tɔ̰y a kinga kaji, to gə ꞌɗa ne mə mbede gə na: Njekɔr dəwje kila-je taar a kḭ Siyo̰, N-a kɔsə kal tar dɔ gəl kuji Jakobo gə ngərəng gə ɗangə;

²⁷ Ngaɓa kone gə m-a riya gə je le, a to to gə be Logə m-a kɔr tar neɗa gə kṵra̰y dɔ-je gə.

²⁸ Ɔji dɔ Tar gə May le ɗaa ꞌtoje njeba̰a̰je mba sisəy; ngaa ɓo ɔji dɔ mbərə ɗaa ꞌnjigi-je, ngaɓa mba tar lə ka-jeje.

²⁹ Mba nekarə baa lə Luba gə ɓar lə-a le tḭ ang.

³⁰ Ɗəw kara baa to gə sisəy kara kede ila-je kuji dɔ Luba gə ang, ɗaa gə go kila kuji ang lə-ꞌjejee ɓa ɗa ne gə sisəy məmay,

³¹ ɗəw kara baa ɓisine ꞌjejee kara d-ila kuji ang, gə go ko gə d-o ne kəm to ndoo lə-sisəy, mba ꞌjejee kara ko kəmtondoo nee le d-a kuba maj-ɛ ɓisine tɔ.

³² Mba Luba ja ḭya̰ ɗəw ar dəwje tɔ̰y d-ila kuji ang ɓa gə mba ɗa ne məmay gə je tɔ̰y.

³³ Əy, nebaw lə Luba to ɓəəl ya̰, kəm karə gə negərə lə-a nəm! Kila kagə dɔ tarje gə lə-a na ɓa asə gərə wa? Ngaɓa na ja a kasə gərə neje gə n-gɔl mba ɗa wa?

³⁴ Na ɓa gərə kəji lə Mbayɓe Ose na ɓa ar-ɛ tar ndəji wa?

³⁵ Na ɓa ar-ɛ ne dɔngɔr mba kar n-ɔr gira-a wa?

³⁶ Ne tɔ̰y ḭ mə ji-a gə, ne tɔ̰y ɗe ɗəw gə lə-a ngaɓa to mb-ɛ ꞌne ja! Rɔnduba to k-ɛ ja gə ɓal-ɓal. Oyo!