Romaindjé 10 - Mbede Lə Luba Kone Gə Sigi

¹ Ngan ko̰-mje, ne gə mə-m uwa ngaɓa ne gə m-dəji Luba mba tar lə-je ɗaa mba kar d-inga kaji.

² Mba m-ɗa tar naji lə-je to gə tar kuwa Luba mə-je gə o̰-je ya̰ ja, ngaa ꞌgərə ɗəb-e gə tɔgərɔ ang.

³ Mba ꞌgərə go ɗəw gə Luba o ne dəw, gə dəw gə gadə-gadə ang, ɗaa ꞌjejee ja ꞌsangə ɗəw lə-je mba to ne gadə-gadə, ngaɓa ꞌnjigi-je go ɗəw gə Luba o ne dəw gə dəw gə gadə-gadə le ang;

⁴ mba Kirisi ja tɔl ta torondu mba kar dəw gə ɗa-ɗa gə takagə to ne dəw gə gadə-gadə.

⁵ Mba Moyiji ɗa mə mbede gə ɔji dɔ neɗa gə gadə-gadə gə ɗe ɗəw gə lə torondu le na: Dəw gə a ɗa ne tɔy gə go torondu nama a kaw ne kəm baa.

⁶ Ngaa, oje ɗəw gə neɗa gadə-gadə ɗe ne gə go takagə le ɓa to nee: Əw rɔ-i dəji rɔ-i tar mə-i gə na: Na ɓa a kḭ kaw dara wa? Mba ɗa kar Kirisi ɗisi ɗe nangə nee wa?

⁷ Ose: Na ɓa a ɗisi mə buwa wəl gə sṵra̰ godo gə wa? Mba ɗa kar Kirisi ndol horo nje gə d-uy gə.

⁸ Ngaa mbede le pa na ɗi wa? Tar le to sə-i əw ang, to ta-i gə ngaɓa to mə-i gə əng. Ye le ɓa to tar takagə gə sijee j-ila mbər-e.

⁹ To gə ɓo ꞌpa gə ta-i ja to gə Jeju to Mbayɓe, ngaɓa ꞌta kagə mə-i gə to gə Luba ndol-e horo nje gə d-uy nama, a kinga kaji.

¹⁰ Mba dəw gə ta kagə m-e gə ja ɓa to dəw gə gadə-gadə, ngaɓa dəw gə t-ɛ ce ja ɓa inga kaji.

¹¹ Mba mbede pa na: Dəw gə ɗa-ɗa gə ta kag-ɛ le rɔ kul a kuwa-a ang.

¹² Mba kɔr kəm dəw godo horo Jiibije gə dəw gə to Jiibi ang gə, mba Mbayɓe lə-je kara baa, gə nebaw lə-a to ɔji dɔ dəwje gə d-ila ndu-je nangə ꞌɓar-ɛ ne.

¹³ Mba dəw gə ɗa-ɗa gə ila ndu-e nangə ɓar ne ri Mbayɓe nama a kinga kaji.

Tar gə ɔji dɔ pa tar lə Luba

¹⁴ Dəw gə ꞌta kag-ɛ ang ja baa d-a kila ndu-je nangə ɓar-ɛ ne to gə ban wa? Ngaɓa dəw gə ꞌpa tar lə-a d-ar-je ang ja baa, d-a ta kag-ɛ to gə ban wa? Ngaɓa nje pa tar-ɛ godo ngaa d-a ko to gə ban wa?

¹⁵ Ngaɓa to gə ɓo d-ula-je ang le njepatar-ɛje d-a ga̰ to gə ban wa? Gə go tar gə ꞌɗa mə mbede gə na: To ne rɔləl ya̰ mba ko njekila mbərə Tar gə Mayje le Lo ɗe gə lə-je.

¹⁶ Ngaa, ꞌjejee tɔ̰y d-ila kuji dɔ Tar gə May gə ang baa. Ngaɓa Ejay pa na: Mbayɓe, tar gə j-a pa j-ar d-o le, na ɓa ta kag-ɛ wa?

¹⁷ Be ɓa takagə ɗe ɗəw ko tar gə, ngaɓa tar gə d-o le ḭ mə tar gə lə Kirisi.

¹⁸ Ngaa m-pa na: Ko ɓa d-o ang wa? Ngaa gə Ndu-je ta lo dɔ nangə nee tɔ̰y le, Ngaɓa tarje gə ꞌpa le ɔr sṵra̰ dɔ nangə njal.

¹⁹ Ngaa m-pa na: Oso mbi Ijirayɛlje gə ang ja wa? Moyiji pa dɔngɔr na: M-a kar a nər-je mə gə dəwje gə ꞌto gəl kuji gə tɔgərɔ ang; M-a kun gəl kuji gə kəji negərə lə-a godo ja mba kula ne wungu mə-si gə.

²⁰ Ngaɓa Ejay ɔsə kud-e nangə ngug ja aw saar pa na: Nje gə ꞌndole-m ang ja baa d-inga-m, Nje gə d-ila nduje nangə ꞌɓar-m ne ang ja baa m-kila rɔ-m gə ɗaga m-ar-je.

²¹ Ngaa ɔji dɔ Ijirayɛl ɗaa n-pa na: Dəw mə ɓeje gə to nje kila kuji angje gə nje dɔ ngangəje nee le, gə ndɔ-ndɔ ja m-ula ji-m m-ar-je.