Romaindjé 1 - Mbede Lə Luba Kone Gə Sigi

Tar gə May gə Pɔl ila mbər-e

¹ Pɔl, ngon njekula lə Kirisi Jeju, gə ꞌɓar-m kar m-to njeka̰ykula ngaɓa d-unda-m gə lo-e ɓədə kar m-ila mbərə Tar gə May lə Luba;

² Tar gə May nee le, n-uwa dɔ gɔl-ɛ ɗəw gə lə pajambərəje lə-a mə mbede gə to gə losang-ɛ gə,

³ ɔji dɔ ngon-e gə d-uji-e gəl kuji gə lə Dabidi, ɗəw darɔ gə,

⁴ ngaɓa, ꞌɓar-ɛ Ngon lə Luba ɗəw singamongə gə lə Njil Njerɔsangə Jeju Kirisi to Mbayɓe lə-sijee go kuy gə uy ɓa ndol horo nje gə d-uy gə;

⁵ ɗəw gə lə-a ɓa j-inga ne mənuji ja to ne njeka̰ykulaje mba kar mbɔr dɔ ri-a ɗaa, j-a təl ne gəl dəwje tɔ̰y kar d-ila ne kɔji gə go takagə,

⁶ sisəy gə ꞌɓar-si mba kar ꞌtoje nje kar Jeju Kirisi le, ꞌga̰-je horo-je gə tɔ,

⁷ m-ɗa mbede nee m-ar-sisəy tɔ̰y gə isije Rɔm, gə Luba njigi-si ya̰, gə ꞌɓar-si kar ꞌtoje gə losang-ɛ le: May kar Bɔ-sijee Luba gə Mbayɓe Jeju Kirisi d-ar-si mənuji gə ɗɛgɛgɛ!

Njigi lə Pɔl gə ɔji dɔ njetakagəje gə Rɔm

⁸ Kede nam ɗaa m-ɗa Luba lə-m oyo mba sisəy tɔ̰y, gə ri Jeju Kirisi mba ꞌpa tar takagə lə-sisəy gə dɔ nangə nee ja tɔ̰y.

⁹ Luba gə m-aw m-pol-e mə njil gə tɔgərɔ ɗəw kila mbərə Tar gə May gə lə Ngon-e le, to njetar naji lə-m, to gə gə ndɔ-ndɔ ja,

¹⁰ ɓo m-aw m-dəji Luba nama m-ila ri sisəy kəne taar-taar, m-dəj-e m-pa na ɓo to mə njigi lə-a nama, n-ar-m m-inga ɗəw m-aw ɓə lə-si.

¹¹ Mba m-njinga rɔ-m ya̰ mba ko-si, mba kar-si inga-je ne gusu gə ɗəw njil gə ɓəəl ɓa, mba kar uba-je ne singa,

¹² ose bənəng ɓa mba kar j-inga-je ne singa naa gə ngaɓa kar j-ula-je ne jingaw mə naa gə dɔ takagə gə, gə yo gə nee.

¹³ Ngan ko̰-m, m-njigi kar-si ꞌgərəje to gə taar-taar ja m-gɔl mba kaw ɓə lə-si, mba kaw ɗa kula kinga ne dəwje kar Kirisi to to gə m-ɗa ne horo nje gə kɛm gə to Jiibije ang, ngaa saar ɓogəne kara m-inga ɗəw ang ja ɓi.

¹⁴ Njekəm karəje gə njekəm karə angje nəm, baw ne gərəje gə mbəje nəm le, ɓangə lə-je to dɔ-m gə:

¹⁵ Be ɓa ɓo-e ɔsə-m ngug-ngug mba kar m-aw m-ila mbərə Tar gə May m-ar-sisəy gə isije Rɔm tɔ.

¹⁶ Mba m-ɗa rɔ kul ɔji dɔ Tar gə May ang, mba to singamongə lə Luba mba kar dəw gə ɗa-ɗa gə takagə nama aji ne, Jiibi ja dɔngɔr, ngaɓa dəw gə to Jiibi ang tɔ.

¹⁷ Ɗəw lə Tar gə May nee le ɓa gadə-gadə lə Luba kila ne rɔ-ɛ gə ɗaga gə ɗəw takagə ngaɓa ɗəw takagə ja kara baa, to to gə ꞌɗa mə mbede gə na: Dəw gə gadə-gadə a kaw kəm baa ɗəw gə lə takagə.

NEƊA GƏ KṴRA̰Y TA DƆ NANGƏ ꞌLom dɔ Tar gə tɔgərɔ

¹⁸ Mba wungu lə Luba kila rɔ-ɛ mə dara gə uru dɔ nje ꞌɓəəl Luba ang gə ɗa-ɗa ngaɓa dɔ neɗa gə dɔ buguru gə ɗa-ɗa lə dəwje gə ꞌlom dɔ tar gə tɔgərɔ dɔ buguru baa;

¹⁹ mba ne gə asə kəm gərə ɔji dɔ Luba le to ɗaga ta kəm-je gə, mba Luba kila gə ɗaga ɗang-ɗang ar-je d-o.

²⁰ Mba neje gə ɔji dɔ Luba gə kəm dəw o ang, singamongə lə-a gə to saar gə no ngaɓa lo kunda rɔ lə-a le, un kud-e lo kunda dara gə nangə gə ja, n-tɔji gə ɗaga ɗang-ɗang kəm dəwje gə, gə go neɗa-ɛje, ɗaa ɗəw gə tar a kuwa ne dɔ-je ang godo.

²¹ Mba ꞌgərə Luba ja, ngaa d-ula rɔnduba dɔ-ɛ ang nəm, d-ula rɔnduba ose d-ar-ɛ oyo gə Luba ang nəm, ngaa ꞌto neje gə baa ja go kəji kɔr kəm ne lə-je ngaɓa mə-je gə lal negərə le, ar-je d-uru ne dan cil ciməri gə.

²² ꞌƊa rɔ-je gə njekəm karəje ngaa ꞌtəl mbəje,

²³ ngaɓa d-uwa ndaji neje gə tɔji dəw gə a kuy, ꞌtaje ne toro rɔnduba lə Luba gə njekuy ang, əlje, daje gə gɔl-je sɔɔ sɔɔ ngaɓa daje gə d-agə nangə.

²⁴ Gəl-e gə nee ɓa Luba ḭya̰ neje yag dan neje gə mina gə gə go ɓo neje gə uwa mə-je ar d-ila ne rɔ kul dɔ naa gə gə yo gə nee;

²⁵ ꞌjejee gə d-uwa tar gə ɗəgərə ꞌtaje ne toro tar gə tɔgərɔ lə Luba, ngaɓa neje gə Luba unda-je ɓa ꞌpolo-je ngaɓa ꞌɗa kula d-ar-je ɗaa d-ḭya̰ Njekunda-je gə ndu tɔr to k-ɛ gə ɓal-ɓal! Oyo!

²⁶ Gəl-e gə nee ɓa Luba ḭya̰-je ne ar ɓo neje gə to rɔ kul uwa-je ne ɓərə gə. Mba jeneje lə-je d-uba ji neje gə gə dɔ gɔl-ɛ d-ḭya̰ ɗaa, ꞌturu ꞌto gə naa to gə jingaw to ne gə jene be,

²⁷ jingawje kara ɗa ɗəw kara baa to gə bənəng, d-uba ji neje gə gə dɔ gɔl-ɛ kar jingaw to gə jene d-ḭya̰ ɗaa ɓo to gə jingaw mar-jeje ɓa oso ur-je, gə yo gə nee, ar ꞌɗa ne nekɔbə ne, dəw gə jingaw ja to gə jingaw mar-ɛ, ɗaa d-inga kuga-a gə ɔji dɔ-je ja gə ne gə ꞌɗa d-uru ne mu le.

²⁸ Be ɓa, mba d-o-je to gə gərə Luba ang ɓa gə ne gə may le ɗaa, Luba ḭya̰-je dan tar kəji lə-je gə gə mbɔr-ɛ baa nee le, ar-je ꞌɗa ne neje gə kəm ɗa ang;

²⁹ neɗaje gə dɔ buguru dang-dang ja ɗusu mə-je njḭ, məndul, ɓo lar, ɗa məyɛr, mal neje ɗusu mə-je, tɔl naa, tɔsə tar, kərə naa, məngo̰y; tuji riɓar lə naa,

³⁰ pa tar gə kṵra̰y dɔ naa gə, ꞌto njeba̰a̰je lə Luba, ɗa gasəra, kunda kar, kɔsə rɔ, kəji ɗa kṵra̰y, gə ɗa dɔ ngang gə nje kuji-jeje,

³¹ ꞌlal kəji negərə, tar paje uwa man ang, njigi dəw gə ko kəmtondoo godo mə-je gə;

³² ꞌgərə-je ndu Luba gə maj-ɛ, to gə dəwje gə ꞌɗa neje gə to gə bənəng le d-asə kuy, ꞌɗa gə ɗa baa ang ngaa njeɗa-ɛje kara ꞌjejee d-um gə je naa gə kara baa.