Pilimo 1 - Mbede Lə Luba Kone Gə Sigi

Tɔji rɔ gə ko naa

¹ ꞌMa Pɔl gə m-to kəy kula gə lə Kirisi Jeju gə je gə ngon ko̰-si Timoce ja ɗa mbede nee j-ar Pilimo, nje baa kula m-ar-si gə j-a njigi-e ya̰,

² j-ar ko̰ nan-si Apiya je gə njebaɗɔ lə sijee Arəsipə, gə Mbo̰ naa lə njetakagəje gə to mə kəy gə lə-i.

³ May kar mənuji gə ɗɛgɛgɛ lə Bɔ-sijee Luba je gə Mbayɓe Jeju Kirisi nay gə si.

⁴ M-ar oyo Luba lə-m ngaɓa m-ila-i, mə dəjije gə lə-m taar-taar nəm tɔ,

⁵ mba m-o tar njigi gə takagə lə-i gə ɔji dɔ Mbayɓe Jeju ngaɓa ɔji dɔ njerɔsangəje tɔ̰y.

⁶ May kar takagə lə-i gə j-a ɗa mə kara kəne le ɓar mii ɗəw gərə ne tɔy gə may ɔji dɔ sijee mba Kirisi.

⁷ Be ɓa rɔ-m ləl-m ya̰ ngaɓa singa-m oso dɔ mar-ɛ gə ɔji dɔ njigi lə-i, ngon ko̰-m, mba ɗəw gə lə-i ɓa mə njerɔsangəje oso nee nangə po̰.

Pilimo uwa Onejim gə rɔ-ɛ gə

⁸ Gəl-e gə nee ɓa, mə Kirisi ɗaa, dɔ-m to doy mba kar-m m-un ndu m-ar-i ꞌɗa ne gə a ɗa,

⁹ m-njigi koso kul no-i gə ri njigi, m-dəji ne kara. ꞌMa Pɔl, gə m-tɔgə ngaɓa mə kar gə ne ɗaa m-to kəy kula gə lə Kirisi Jeju,

¹⁰ m-oso kul no-i mba ngon-m Onejim gə m-uj-e kəy kula gə,

¹¹ kede le, n-to dəw gə baa ta kəm-i gə, ngaa ɓisine ɗaa, n-to nemay lə-si joo kɛm.

¹² M-təl m-ula-a gə ɓə lə-i, ꞌne gə to dəbə rɔ-m ꞌma ja.

¹³ M-njigi ngom-e rɔ-m gə nee mba kar n-ɗa kula tor-i gə, logə m-isi mə kəy kula gə mba Tar gə May.

¹⁴ Ngaa m-njigi ko tar keji lə-i kede nam ɓa gə mba ɗa ɓi, mba kar m-uwa-i gə singa m-ar-i ꞌɗa neɗa may lə-i ang, ngaa kar-i ꞌɗa ne gə go mə njigi lə-i.

¹⁵ Be ɓa, bayɛ̰ Onejim cḭ sə-i kəm ndɔ njɛ̰ baa mba təl ɗe nay sə-i gə ndɔ gə ndɔ,

¹⁶ ꞌi a ko-e gə ɓərə baa ang ngaa, ngaa ꞌne ɗaa n-nday ɓərə, n-to gə ngon ko̰-si gə j-a njigi-e ya̰. N-to ngon kəm-m ngaɓa kar-i ɗaa asə pa ang, ɗəw darɔ gə ose ɗəw gə lə Mbayɓe.

¹⁷ To gə ɓo, o-m gə nje baa kula lə-i nama uwa Onejim gə rɔ-i gə to gə ꞌma ja be tɔ.

¹⁸ Ngaa to gə ɓo n-ɗa sə-i ne gə kṵra̰y ose ɓangə lə-i to dɔ-ɛ gə nama ꞌi ḭya̰ mə ji-m gə.

¹⁹ ꞌMa Pɔl ja m-ɗa mbede nee gə ji-m mba pa nee kar-i to gə ꞌma ja m-a kunga-i, ꞌma ɗaa m-njigi mba kole mə-i dɔ ɓangə gə lə-m gə to dɔ-i gə le ang, mba to darɔ-i ja.

²⁰ Oyo, ngon ko̰-m, m-ɗa kɔgərɔ, ila kəm-m toro gə mba tar lə Mbayɓe. Ar mə-m oso nangə po̰ mə Kirisi gə.

²¹ M-ɗa mbede nee m-ar-i mba m-gərə som to gə a kila ngon kuji dɔ ne gə m-dəji gə, ngaɓa m-gərə to gə a ɗa kar al dɔ yə gə m-dəji.

Ko naa

²² Cibi, ꞌgɔl lo to ꞌngəbə-m, mba m-unda mə-m to gə gə go dəji lə-si ɗaa m-a ce dɔ-si gə.

²³ Epapəras gə d-uwa-a sə-m mba tar lə Jeju Kirisi le na m-o-i m-ar ꞌne,

²⁴ ngaɓa Marəke, gə Arisətarəkə, gə Demas, gə Lugu gə ꞌto nje baa kulaje lə-m d-o-si.

²⁵ May kar mənuji lə Mbayɓe Jeju Kirisi nay gə njil-si.