Philippiendjé 4 - Mbede Lə Luba Kone Gə Sigi

¹ Gəl-e gə nee ɓa, ngan ko̰-mje, sisəy gə m-njigi-si ya̰, gə ɓo ko kəm-si tɔl-m le, ꞌtoje nerɔləl lə-m gə jɔgə lə-m le, may kar-si ar-je dɔ gɔl si gə njang dɔ Mbayɓe gə ja, sisəy gə m-njigi-si ya̰.

Ndəjije dang-dang

² M-ndəji Ebodi ngaɓa m-ndəji Sɛ̰tisə mba kar kəji lə-je to kara baa dɔ Mbayɓe gə.

³ Ngaɓa ꞌi kara, ꞌto nje baa kula gə ila kuji ɗaa m-dəji-i mba kar ꞌla gə je, ꞌto jeneje gə d-ila kudu-m gə d-ar m-ɗɔ ne mba Tar gə May, gə Kɛləma je gə nje baa kulaje lə-m gə kɛm gə ri-je to mbede təbə gə.

⁴ ꞌƊaje rɔləl jaga-jaga ja ɗəw gə lə Mbayɓe; m-təl m-pa ja cibi, ꞌɗaje rɔləl.

⁵ May kar dəwje tɔ̰y ꞌgərə kila mə dɔ mar-ɛ gə lə-si. Mbayɓe nay dəb baa.

⁶ ꞌNoje rɔ-si ɔji dɔ ne kara ang; ngaa dan neje gə tɔ̰y nama ꞌpaje ar-je Luba gə dəji, ꞌɗaje ne ndoo no-ɛ gə, ar-ɛje ne oyo.

⁷ Be ɓa ɗɛgɛgɛ lə Luba gə nday kəjije tɔ̰y le, a ngom mə-si gə kəjije lə-si dɔ Kirisi Jeju gə.

⁸ Ɗudu tar ɗaa, ngan ko̰-mje, may kar ne gə tɔgərɔ, ne gə kəm ɗɔy, ne tɔ̰y gə gadə-gadə, ne tɔ̰y gə arə ngadə, ne gə kəm njigi, ne tɔ̰y gə kar dəw njigi go-e gə, ne tɔ̰y gə may ta kəm dəwje gə ngaɓa asə pidi, kar ye ɓa to mə kəjije gə lə-si.

⁹ Ye gə ꞌndoje, gə ꞌtaje ta-m gə ngaɓa oje gə mbi-si, gə ye gə oje rɔ-m gə le, ꞌɗaje ne kula, ɗaa Luba gə nje ɗɛgɛgɛ a nay gə si.

Pɔl ɗa oyo

¹⁰ M-ɗa rɔləl gə boy dɔ Mbayɓe gə mba sisəy əjije dɔ-m gə to gə ɗangə ja cibi. Kəji gə nee le to mə-si gə gə maj-ɛ ja ngaa ɗəw ɓa ingaje ang.

¹¹ M-pa tar gə nee le mba neje gə ndoo-e to-m ang baa, mba m-gərə pa kisi dan neje gə tɔ̰y ɗaa ləl-m tɔ.

¹² M-gərə pa kisi dan ndoo gə ngaɓa gə dan may gə nəm tɔ. Dan neje gə tɔ̰y gə lo tɔ̰y le, mə-m ci kara m-gərə pa kisi nəm, ɓo ɔr-m kara m-gərə pa kisi nəm, m-gərə pa kisi dan may gə gə dan labə gə nəm.

¹³ M-asə kar dan neje gə tɔ̰y ɗəw gə lə nje kar-m singa.

¹⁴ Be ja kara may ya̰ mba oje kəmtondoo lə-m dan neməko̰ gə.

¹⁵ Dəwje gə Pilipi, sisəy ja kara ꞌgərəje, kun kudu kila mbərə Tar gə May ja, logə m-ɔdə Masedowan le, Mbo̰ naa lə njetakagəje gə ɗangə kara gə un nekarə baa ɔsə ne kudu-m le godo, sisəy ja gə kar-si baa,

¹⁶ Sisəy ja gə kar-si baa ꞌɗaje, mba logə m-isi Tesaloniki ja, ulaje ꞌlaje sə-m taar-taar ja.

¹⁷ To gə nekarə baa ɓa m-sangə ang, ngaa m-sangə nduji kula lə-si gə ɔsə dɔ mar-ɛ.

¹⁸ M-inga ne tɔ̰y ɗaa m-isi dan may gə ngaa; mə-m ti mbidi, mba ne gə ar-je Epaporoditə ɗe ne le əndə ləl to to gə ba̰y kəndə mambo̰ gə əndə sa̰a̰ be, to gə nepolo gə Luba njigi ngaɓa ta kəm-e tɔ.

¹⁹ Luba lə-m gə njegəl nekinga a da-si daga-daga gə neje tɔ̰y gə ndoo-e to si, gə riɓar gə ɗəw gə lə Kirisi Jeju.

²⁰ May kar riɓar to dɔ Bɔ-sijee Luba gə, gə ɓal gə ɓal. Oyo!

²¹ Oje njerɔsangəje gə ri Kirisi Jeju tɔ̰y.

²² Ngan ko̰ naaje gə d-isi sə-m nee, na d-o si. Nje gə kəy mbay gə, gə njerɔsangəje tɔ̰y ja d-o si tɔ.

²³ May kar mənuji lə Mbayɓe Jeju Kirisi nay gə njil-si!