Philippiendjé 2 - Mbede Lə Luba Kone Gə Sigi

¹ To gə ɓo kinga singa ɓəəl ɗəw lə Kirisi ga̰, to gə ɓo kula jingaw mə naa gə dan njigi gə ga̰, to gə ɓo ɗa mə kara lə Njil ga̰, to gə ɓo ko kəmtondoo gə ɗa məmay ga̰,

² nama ꞌtɔlje ta rɔləl lə-m ɗəw ko ta naa gə; ꞌnjigi-je naa gə yo gə nee, ar-je mə-si asə naa; ar-je kəji lə-si to kara baa;

³ ɗa-je ne kara kara gə go nər mə ang ose mba riɓar gə baa ang, ngaa gə kula dɔ ngulum, oje nje gə kɛm gə dəwje gə ꞌto ɓəəl unda-si.

⁴ May kar dəw gə ɗa-ɗa gə horo-si gə nama sangə ɗəw may lə-a ye ja gə kar-ɛ baa ang ngaa sangə may lə nje gə kɛm tɔ.

⁵ Ar-je kəji gə to mə Kirisi Jeju gə ɓa uwa mə-si,

⁶ ꞌne gə n-asə naa gə Luba, n-njigi mba kisi lo kasə naa gə lə-a gə Luba ang,

⁷ ngaa n-uba n-ḭya̰ gə dɔ rɔ-ɛ ja, n-turu rɔ-ɛ gə ɓərə, n-təl n-asə naa gə dəwje, go təl gə n-təl n-unda rɔ dəw nee ɗaa,

⁸ n-ula dɔ-ɛ ngulum gə darɔ-ɛ ja, n-oso ne kul saar n-uy ne, n-uy kagə dəsə gə.

⁹ Gəl-e gə nee ɓa, Luba gə to dəw dɔ rɔ-ɛ le, ula riɓar gə al dɔ lo dɔ-ɛ gə, ngaɓa ar-ɛ ri gə tɔy rije tɔ̰y,

¹⁰ mba kar nje gə ɗa-ɗa, mə dara gə, dɔ nangə nee gə gəl nangə ɓa ɓo ri Jeju oso mbi-je gə nama d-um məkəji,

¹¹ ngaɓa ndo̰ tar gə ɗa-ɗa kara a pa gə taar ɓolong to gə Jeju Kirisi to Mbayɓe, mba kila ne riɓar dɔ Luba gə Bɔ gə.

¹² Be ɓa sisəy gə m-njigi-si ya̰, gə go kila kuji lə-si taar-taar le, ꞌɗaje kula kaji gə ingaje le gə ɓəəl gə kisa, to gə m-ga̰ ne gə si baa ang ngaa ɓisine gə m-godo kara ꞌɗaje ar al dɔ lo ja,

¹³ mba Luba ja ɓa ɗa kula mə-si mba kar ꞌɗaje ne ne gə m-e njigi gə maj-ɛ.

¹⁴ ꞌƊaje ne tɔ̰y gə yṵrṵ tar ang nəm, gə ma̰y tar ang nəm,

¹⁵ mba kar d-ila tar dɔ-si gə ang, ngaɓa ar-je ngadə, gə nganje lə Luba gə tar uwa dɔ-je ang, horo gəl kuji gə to dana ang gə, ngaɓa ndṵrḭ nəm; horo-je gə le, ꞌndogoje to to gə pər ngəl be dɔ nangə nee;

¹⁶ uwaje ngəng ɓo ilaje mbərə tar təbə ar-jeje. Ye ɓa a to ne riɓar lə-m ndɔ təl gə lə Kirisi. Mba m-a̰y ngɔdə baa ang nəm ɓa m-jɔgə rɔ-m baa ang nəm tɔ.

¹⁷ Ngaa, le to gə m-nuga rɔ-m kadə m-ɔsə ne dɔ kar-sisəy gə dɔ kula takagə lə-si gə to nepolo gə nenuji kara, m-ɗa rɔləl-e ngaɓa m-təl m-ɗa gə sisəy tɔ̰y;

¹⁸ Sisəy kara ꞌɗaje rɔləl, ngaɓa ꞌɗaje sə-m rɔləl tɔ.

Pɔl gə njebakulaje lə-a

¹⁹ M-um mə-m dɔ Mbayɓe Jeju gə mba kula Timoce ɓə lə-si gə tɔg-e, mba kar m-o no-si ja ɓa m-a kuba ne singa gə maj-ɛ,

²⁰ mba dəw kara ja gə a kay sə-m kəji le godo, m-no rɔ-m ya̰ ɔji dɔ-si;

²¹ dəwje tɔ̰y ja, ꞌsangə ne gə ɔji dɔ-je dɔ-je ɓo ꞌsangə kar Jeju Kirisi ang.

²² Ngaa ꞌgərəje to gə n-tɔji gə ɗaga to to gə ngon gə isi mbɔr bɔb-ɛje gə ja, n-un rɔ-ɛ ɗɔdə n-ila sə-m kula kila mbərə Tar gə May gə.

²³ To gə be ɓa m-unda mə-m mba kula-a ɓə lə-si, logə m-a ko tar gə dɔ-m gə gə maj-ɛ,

²⁴ ngaɓa m-um mə-m dɔ Mbayɓe gə to gə ꞌma gə darɔ-m ja m-a kaw ɓisine baa.

²⁵ Be ɓa kəm kar m-ula Epaporoditə ɓə lə-si, ngon ko̰-m, nje baa kula gə nje baa ɗɔ lə-m, gə ula-aje, ꞌne gə ar-ɛje ne gə a la sə-m;

²⁶ n-njinga rɔ-ɛ ya̰ mba ko-si tɔ̰y ja, kar-ɛ gəd-e gədə mba tar rɔko̰ lə-a gə oje le.

²⁷ Ndɔ-ɛ gə əng le, rɔ-ɛ to-e ja, ar n-əndə ba̰y yo ja ngaa Luba o kəmtondoo lə-a ngaɓa ꞌne baa ang ngaa ꞌma ja kara nəm, mba kar mə-m gangə man gə kede-kede ang.

²⁸ Gəl-e gə nee ɓa m-ula-a gə tɔg-ɛ baa mba kar o-eje ɗaa rɔ-si ləl-si, ngaɓa ꞌma kara kar mə-m oso ne nangə tɔ.

²⁹ Uwa-aje gə rɔ-si gə gə rɔləl lə Mbayɓe ja tɔ̰y ngaɓa dəwje gə to gə be le ilaje kuji dɔ-je gə;

³⁰ mba n-əndə ba̰y yo mba kula lə Kirisi, n-ila rɔ-ɛ da, n-ta ne toro si n-la ne sə-m.