Philippiendjé 1 - Mbede Lə Luba Kone Gə Sigi

Tɔji rɔ gə ko gə Pɔl o-je

¹ ꞌMa Pɔl, je gə Timoce, njekulaje lə Kirisi Jeju, j-a ɗa mbede nee j-ar njerɔsangəje gə mə Kirisi Jeju gə, gə d-isi Pilipi, gə nje ka dɔ njetakagəje ngaɓa gə diyakərəje tɔ.

² May kar Luba gə Bɔ-sijee, gə Mbayɓe Jeju Kirisi d-ar-si mənuji gə ɗɛgɛgɛ.

Ɗa oyo gə dəji Luba

³ Logə mə-m ole dɔ-si taar ja nama m-ɗa Luba lə-m oyo;

⁴ Taar-taar ja ɓo m-aw m-dəji Luba mba-si tɔ̰y nama, m-dəji gə rɔləl,

⁵ mba kum gə um-je mə-si naa gə gə sijee dɔ Tar gə May gə, un kud-e dɔngɔr ndɔ gə ja saar ɓisine.

⁶ M-gərə gə maj-ɛ to gə ꞌye gə un kudu kula gə may mə-si gə le, a kaw ne saar mba tɔl t-ɛ ndɔ təl gə lə Kirisi Jeju.

⁷ To gə dɔ gɔl-ɛ ja mba kar ꞌma m-əji tar gə to gə be dɔ-si gə tɔ̰y, mba mə-m uy dɔ-si ang, mba m-ar njang ngaɓa m-ɗa ɗɔ mba Tar gə May gə m-ila mbər-e le ɗaa ɓogəne gə m-to kəy kula gə kara sisəy ingaje sə-m mənuji lə Luba naa gə kara baa.

⁸ Be ɓa no gɔl Luba gə ja, m-njigi-si gə njigi gə ḭ rɔ Kirisi Jeju gə, to gə ngon kəm-m be.

⁹ Ngaɓa m-dəji Luba mba kar njigi lə-si ɔsə dɔ mar-ɛ gə kede-kede, kar kəm-si unja ar ꞌgərəje ne ne gə may ngaɓa kar ɔrəje ne kəm ne gə may gə ne gə kṵra̰y.

¹⁰ To gə be ɓa mba kar ꞌgərəje ne ɗəw kɔr kəm ne gə may, gə ar-je ne ngadə ngaɓa kar tar uwa ne dɔ-si ndɔ təl gə lə Kirisi ang.

¹¹ May kar pa nja gə may gə ingaje ɗəw gə lə Jeju Kirisi le, ila riɓar gə dɔ Luba gə, gə ɔsə gaji-ɛ.

Kuwa gə d-uwa Njeka̰y kula

¹² Ngan ko̰-mje, m-njigi mba kar ꞌgərəje to gə ne gə ce dɔ-m gə le, ɔsə kudu Tar gə May ar-ɛ aw gə kede.

¹³ Be ɓa, dəwje tɔ̰y gə d-aw ɗa kula kəy mbay gə, gə nje gə ɗangə tɔ̰y ja kara ꞌgərə to gə ꞌma le d-uwa-m d-ila-m kəy kula gə mba tar lə Kirisi.

¹⁴ Ngaɓa, kuwa gə d-uwa-m d-ila-m kəy kula gə nee le, ɗa ar ngan ko̰-mje bula d-inga ne singa dɔ mar-ɛ gə ɗəw gə lə Mbayɓe, mba kila ne mbərə gə ɓəəl ang.

¹⁵ Nje gə kɛm ɗaa, tɔgərɔ ja, d-ila mbərə lə Kirisi gə ne nər mə gə ne tɔsə tar, ngaa nje gə naaje d-ila mbərə nee le gə kəji gə arə ngadə.

¹⁶ Nje gə ꞌɗa gə go njigi ɗaa, ꞌgərə to gə m-isi nee gə nje ɗa ɗɔ mba Tar gə May,

¹⁷ ngaa nje gə kɛm d-ila mbərə lə Kirisi le gə kəji tɔsə tar; neje gə uwa mə-je kar ꞌɗa le, kud-e arə ang ngaɓa d-əji to gə d-ila neməko̰ dɔ kuwa gə d-uwa-m d-ila-m kəy kula gə nəm.

¹⁸ D-unda gusu ɓa d-ila ne mbərə lə Kirisi ose gə kəji gə tɔgərɔ kara, Kirisi le ja d-ila mbərə lə-a əng, ɗaa m-ɗa ne rɔləl ngaɓa m-a təl ɗa ne ja cibi,

¹⁹ mba m-gərə to gə mbɔr dɔ dəji Luba lə-sisəy ɗaa m-aji ne ngaɓa Njil Jeju Kirisi kara a la sə-m tɔ;

²⁰ gə go ne gə m-aw ngina ngaɓa gə go kunda mə lə-m ɗaa rɔ kul kara kara a kuwa-m ang. Ngaa ɓisine saar gə kede le d-a pidi Kirisi ɗəw gə lə-m gə ɓəəl ang, uji ne kuy lə-m ose kisi gə təbə lə-m;

²¹ mba ꞌma le, Kirisi ɓa to təbə lə-m ɗaa yo to gə may lə-m.

²² Ngaa ye gə uji dɔ kula lə-m le se may kar m-aw gə dɔ-m taar ɓa may ose ɗi wa? Ye gə ɗa ɓa m-a mbərə kara m-gərə ang ngaa.

²³ M-ndəbə ɓe joo kɛm: m-njigi ya̰ mba kɔdə kaw kisi gə Kirisi, mba ye ja ɓa may unda neje tɔ̰y;

²⁴ ngaa kaw kəm baa lə-m le to may lə-sisəy.

²⁵ Mə-m to kəne ja ngaɓa m-gərə to gə ga̰ gə m-a ga̰ gə si le, a kɔsə kudu-si kar takagə lə-si aw ne gə kede gə rɔləl.

²⁶ Təl gə m-a təl kaw ɓə lə-si a təl to ne riɓar lə-si gə boy ɔji dɔ-m ɗəw gə lə Kirisi Jeju.

Pɔl ndəji-je kar d-uwa takagə gədərə

²⁷ Ne kara baa le ɗaa, ar-je pa nja-si uwa buwa Tar gə May lə Kirisi, gə mba kar le m-aw m-o-si ose m-godo kara kar m-o tar-ɛ to gə ar-je njang mə kəji gə kara baa, umje mə-si naa gə kara, ꞌɗɔje mba takagə gə ɔji dɔ Tar gə May,

²⁸ ngaɓa njil-si ce njɛ̰ ja kara ɔji dɔ nje kəm tarje lə-si ang. Ye ɓa tɔji tuji lə-je ngaa sisəy ɗaa tɔji kaji gə ingaje, ye gə nee le ḭ rɔ Luba gə,

²⁹ mba d-ar-si ɗəw gə go mənuji lə Kirisi, kar ꞌtaje kag-ɛ ja kara baa ang ngaa kar oje məsərə mba tar lə-a tɔ,

³⁰ kar ɔsə gəl ɗɔ gə kara gə o-mje lo ɗɔ-ɛ gə le, oje tar-ɛ to gə m-aw m-ɗɔ ɓisine ja ɓi.