Matiye 8 - Mbede Lə Luba Kone Gə Sigi

NEMISIJE DANG-DANG Jeju aji njebənji

¹ Logə Jeju ḭ dɔ ər gə, aw ɗisi gə nangə ɗaa bula bo dəwje ꞌndole go-e.

² Ɗaa njebənji kara ce ɔsə ta kəj-e nangə no Jeju gə ngaɓa pa na: Mbayɓe, to gə ɓo mə-i njigi nama ar rɔ-m arə ngadə.

³ Be ɓa Jeju ula ji-a ɔr ne rɔ-ɛ ngaɓa pa na: M-njigi ja, may kar rɔ-i arə ngadə. Logə Jeju pa be ɗaa, gə lo-e gə əng ja bənji ɔr rɔ-ɛ gə ar rɔ-ɛ arə ngadə.

⁴ Cibi ɓa Jeju təl pa ar-ɛ na: ꞌNgom ta-i, ɓo ꞌpa ar dəw ang, ɗaa ɔdə aw ar njekapolo o-i, ngaɓa aw un nepolo to gə Moyiji pa tar-ɛ mə mbede gə le, mba kar to tar naji ar-je ꞌgərə to gə rɔ-i arə ngadə.

Jeju aji Ngon njekula lə mbay lə njeɗɔje

⁵ Jeju andə gə mə ɓe gə Kapɛrənom. Logə n-aw n-andə ɗaa, njekun dɔ njeɗɔje gə tɔl ɗe inga-a ɗ-ɛ kɔgərɔ na:

⁶ Mbayɓe, ngon njekula lə-m to nangə kəy ar rɔ-ɛ uy wɔ-wɔ, ngaɓa o mɛr ya̰.

⁷ Jeju ila kəne na: ꞌMa, m-a kaw kaj-ɛ.

⁸ Njekun dɔ njeɗɔje gə tɔl le təl ila kəne na: Mbayɓe, ꞌMa m-asə kar-i andə mə kəy gə lə-m ang, ar lo gə nee gə ja ꞌpa tar ta-i kara baa ja ɗaa ngon njekula lə-m le a kaji.

⁹ Mba, ꞌma kara njeko̰ dɔ-mje ga̰ ja, ngaɓa ꞌma kara, m-o̰ dɔ njeɗɔje tɔ. To gə m-pa na: ꞋI gə nee aw be, nama n-aw, ngaɓa m-pa na: ꞋI gə nee ꞌɗe ne, nama n-ɗe ja tɔ, ngaɓa ɓo m-ula ngon njekula nəm pa na: ꞌƊa ne gə be nama ɗa ja tɔ.

¹⁰ Logə Jeju o tar gə njekun dɔ njeɗɔje gə tɔl le pa to gə be, ɗaa lo tar ig-e sɛl gə rɔləl, cibi ɓa təl pa ar dəwje gə ꞌndole go-a na: Tar gə tɔgərɔ ja m-pa m-ar-si to gə horo dəw mə ɓeje gə Ijirayɛl nee tɔ̰y ja kara m-o takagə gə bo to gə be ang.

¹¹ M-pa m-ar-si to gə, dəwje bula d-a kḭ lo ce gə lə kar gə lo kuru nangə lə kar, mba kisi ta ka nekusa gə gə Abəraham, gə Ijagə, gə Jakobo mə ɓeko̰ gə dara.

¹² Ngaa nganje gə ɓeko̰ gə nee le, d-a kum-je mə cil ciməri gə gə ɗaga, lo-e gə nee le d-a no gə d-a kusa ngangəje kəne pəgərə-pəgərə.

¹³ Cibi ngaɓa Jeju təl pa ar mbay lə njeɗɔje le na: Aw, may kar Luba ɗa sə-i gə go takagə lə-i. Be ɓa go tar gə Jeju pa to gə be ja ɗaa ngon njekula le aji kəbərə dɔ kar-ɛ əng ja.

Jeju aji dəwje dang-dang

¹⁴ Go-e gə ɗaa Jeju ɔdə aw kəy lə Piyɛr ɗaa, o mum Piyɛr-je gə jene to nangə ngaɓa rɔ-ɛ ta pər lam-lam.

¹⁵ Logə Jeju uwa ji-a baa ja ɗaa, rɔ-ɛ gə ta pər lam-lam le təl kul mbɔ̰y ar-ɛ n-uba nangə n-ḭ taar, n-ar-je nekusa.

¹⁶ Kar kumatagə ɗaa, ꞌɗe gə dəwje bula gə njilje gə kṵra̰y ɗa ɓe mə-je gə. Logə Jeju pa tar ja ɗaa njilje le ce, ar nj-ɛje d-inga kaji.

¹⁷ Be ɓa tar lə pajambərə Ejay gə pa le oso kəne paragə na: N-ta məndəje dɔ si gə Ngaɓa rɔko̰je gə d-aw d-ula kəm-si ndoo kara n-ta dɔ si gə nəm.

Ɗəw kun rɔ karə Jeju

¹⁸ Ndɔ kara Jeju o bula dəwje gə gugu dɔ-ɛ. Logə n-oje ɗaa n-un ndu n-ar ngan njenendoje lə-a karəje d-aw tura man gə ər kara gə.

¹⁹ Be ɓa njekɔr gəl torondu kara ɗe inga-a pa ar-ɛ na: Njenetɔji, aw gə ɗa ja kara m-a kaw sə-i.

²⁰ Jeju pa ar-ɛ na: Njaje gə ꞌto daje baa kara buja lə-je ga̰, ngaɓa əlje gə d-aw dara əng kara kinga lə-je ga̰, ngaa ꞌma gə Ngon lə dəw ja baa ɓa lo kula dɔ-m godo.

²¹ Dəw kara horo ngan njenendoje gə pa ar Jeju na: Mbayɓe, iya̰ ɗəw ar-m m-aw ndubu bɔ-mje ɓa, m-təl m-ɗe ɓi.

²² Ngaa Jeju ila-a kəne na: Iya̰ nje gə d-uy ar-je ꞌdubu yo lə-je, ꞌi ɗaa uwa go-m.

Jeju uwa ta ləl

²³ Jeju al to ɗaa ngan njenendoje lə-a d-ore go-e.

²⁴ Logə d-aw dan man babo gə nam ɗaa ləl ula ar ꞌpagəm tuga ngaɓa to ləngə ya̰, ngaa Jeju to aw cibi.

²⁵ Be ɓa ɓəəl unda ngan njenendoje badə gangə-je ar ꞌɗəmje gə mbɔr Jeju gə ngaɓa ꞌndol-e ɗaa ꞌpa na: Mbayɓe, ꞌta si na ja kaw kinga tuji.

²⁶ Jeju ḭ gə je na: ꞌƁəəlje mba ɗi wa? ꞌToje dəwje gə takagə lə-si əngə. Ngaɓa Jeju ḭ ar taar, ndangə ləl je gə babo ɗaa mbi lo pa kəng.

²⁷ Al dɔ ngan njenendoje ar ꞌpa tar horo naa gə na: Dəw gə nee to na ja wa? N-pa tar n-ar ləl-je gə babo ja kara d-o tar t-ɛ gə səmə!

Jeju aji dəwje joo gə njilje gə kṵra̰y ɗusu mə-je

²⁸ Logə Jeju ce tura ɗaga, dɔ nangə gə Gadara ɗaa, dəwje joo gə njilje gə kṵra̰y ɗa ɓe mə-je gə ꞌce horo dɔbarəje gə ꞌɗe d-inga Jeju. Njilje le ɗa-je ar d-uba singa ya̰ ɗaa dəwje ɓəəl mba nday gə ɗəw gə lo to-je gə.

²⁹ D-uru ꞌkuwi na: Ngon lə Luba, ɗi ɓa aw njigi ji-si gə wa? ꞋI ɗe mba bɛ̰ ta-si kede nam ɓa kar ndɔ gangə tar gə Luba ɔji asə wa?

³⁰ Lo gə d-ar kəne əng le, kuduɓe bərəje gə ꞌbula ya̰ d-ar əw ja d-aw d-usa ne,

³¹ ɗaa njilje gə kṵra̰y ꞌdəji Jeju na: Ɓo ꞌi njigi tɔbə-si nama, ar-si j-andə mə bərəje gə d-ar nu kən.

³² Jeju pa ar-je na: ꞌCeje aw-je, ɗaa ꞌceje mə dəwje gə joo gə le d-aw d-andəje mə bərəje, d-ar-je d-a̰y ɗisi kungu babo d-aw ɓugu mə babo gə, d-ay d-uy.

³³ Dəwje gə njekuul bərəje le, d-a̰y d-aw mə ɓe gə, d-aw pa tar neje gə nday nee le d-ar dəwje d-o. Tar gə ɔji dɔ dəwje gə njilje gə kṵra̰y tuji-je le.

³⁴ Be ɓa dəwje gə mə ɓeboje tɔ̰y ja ce cila kəm Jeju, lo gə d-a lo d-o-e ɗaa, ꞌɗa-ɛ kɔgərɔ mba kar-ɛ n-ɔdə dɔ nangə gə lə-je.