Matiye 7 - Mbede Lə Luba Kone Gə Sigi

ꞌGangəje tar dɔ dəwje gə ang

¹ ꞌGangəje tar dɔ dəwje gə ang, mba kar ꞌgangə tar dɔ si ang tɔ.

² Pa gangə tar gə aw gangəje ne tar dɔ dəwje gə ja tɔ d-a gangə ne tar dɔ si gə, ngo gə sisəy ɔjije ne ne ja tɔ d-a kɔji ne ne kar-si.

³ Mba ɗi ɓa ꞌi o biya̰ mu gə to dɔ kəm ngon ko̰-i gə ɗaa kagə gə kəm-i gə le o ang wa?

⁴ Ose to gə ban ɓa ꞌi pa ar ngon ko̰-i na: Ar-m m-un mu gə to kəm-i m-ar-i, ngaa ne gə boy gə to kəm-i gə ɓa o ang wa?

⁵ Njetar mula, un kagə gə to kəm-i kede nam ɓa, a ko ɗəw kun ne mu gə kəm ngon ko̰-i gə ɓi.

⁶ Unje ne gə to gə losang-ɛ ar-je bisije ang, mba d-a təl to̰ si. Unje mər kila gɔsə gə lə-si ila no bərəje gə ang n-a d-a tuba nangə gə mba ꞌtəl kɔsə si.

⁷ ꞌDəjije ne nama d-a kar-si, ꞌsangəje ne nama a kingaje, undaje ta kəy nama d-a kɔr kar-si.

⁸ Mba dəw gə dəji ne ɗaa d-ar-ɛ, dəw gə sangə ne ɗaa inga, ngaɓa dəw gə unda ta kəy ɗaa d-ɔr d-ar-ɛ.

⁹ Dəw gə ɗa ja ɓa horo-si gə ɓo ngon-e dəji-e mbə nama a kun kɔr ər kar-ɛ wa?

¹⁰ Ose dəji-e kənji ɗaa a kar-ɛ li wa?

¹¹ To gə ɓo sisəy gə ꞌtoje dəwje gə kṵra̰y baa ja, ꞌgərəje karəje ngan si neje gə may-may ngaa ɓədə ɓa Bɔ-sijee Luba gə isi dara a kar ne gə may dəwje gə ꞌdəji-e ang wa?

Ɗa ne kar njemar-i

¹² Be ɓa neje tɔ̰y gə sisəy njigije kar dəwje ꞌɗa mba-si le, sisəy kara ꞌɗaje bənəng ja mba-je tɔ, mba to torondu Moyiji nəm ɓa to tarje lə pajambərəje nəm tɔ.

¹³ Andəje gə ta ɗəw kəy gə njondəro̰ mba ta ɗəw kəy gə tadə ngaɓa ɗəw gə to bəndəng le aw gə lo tuji gə, ɗaa ye ɓa dəwje bula d-andə ne.

¹⁴ Ngaa ta ɗəw kəy gə məm gə ɗəw gə to njondəro̰ le ɓa aw ce lo kisi kəm baa gə, ngaa dəwje bula d-andə ne ang.

¹⁵ Aje rɔ-si rɔ pajambərəje gə gə mbɔr-ɛ baa. ꞌƊa rɔ-je to gə badəmje be ngaa ꞌto njagəmanjɛrje njekusa da dɔngɔr gə je dɔ ɓəngərə-je gə.

¹⁶ Kula ɗa-je ja sisəy a gərəje neje. Dəw a kunja kandə tungu dɔ kagə ꞌngɔgɔrɔ gə ang nəm ɓa, a kunja kandə sam dɔ kagə madə gə ang tɔ.

¹⁷ Kagə gə may nama kand-e may tɔ, a ɓo kagə gə kṵra̰y nama kand-e kṵra̰y tɔ.

¹⁸ Be ɓa kagə gə may le kand-e a kṵra̰y ang nəm ɓa, kagə gə kṵra̰y kara kand-e a may ang nəm tɔ.

¹⁹ Kagə gə ɗa-ɗa ja ɓa kand-e kṵra̰y nama d-a tuga kula pədə.

²⁰ To gə be ɓa a gərəje ne pajambərəje gə gə mbɔr-ɛ baa gə go kula ɗa-je.

²¹ Dəw gə pa t-ɛ gə na: Mbayɓe, Mbayɓe baa ɓa a kandə ne mə ɓeko̰ gə dara ang, ngaa dəw gə ɗa mə njigi lə Bɔy gə isi mə dara gə ja ɓa a kandə ɓeko̰ gə lə-a.

²² Dɔ ndɔ gangə tar nama dəwje bula d-a pa kar-m na: Mbayɓe, Mbayɓe, j-a pa tar lə Luba gə ri-i ang wa? J-a tɔbə njilje gə kṵra̰y gə ri-i ngaɓa j-a ɗa nemisije dang-dang gə ri-i ang wa?

²³ Lo-e gə əng ɗaa m-a pa karəje təsərə na: M-gərə-si ndɔ kara ang, sə-i nje ɗa ne dɔ buguruje, ɔdəje ta-m gə gə nu.

²⁴ Gəl-e gə nee ɓa, dəw gə ɗa-ɗa gə o tar gə m-pa nee ɓa ɓo ta ɗa ne kula nama, nj-ɛ nay ɗəw kara baa gə dəw gə unda kəm karə dɔ rɔ-ɛ gə, ɗa kəy lə-a dɔ ranga gə.

²⁵ Nji ər, ar man nji ula gə singa ya̰ unda kəy le ngaɓa ləl kara ula gə singa ya̰ nəm nee kəy lə-a nee le oso ang, mba n-unda dɔ ranga gə.

²⁶ Ngaa ɓo dəw gə o tar gə m-pa nee le ɓa ɗa ne kula ang nama, nj-ɛ to asə naa gə mbə gə unda kəy lə-a dɔ ꞌnangəra̰ gə.

²⁷ Lo gə nji ər, ngaɓa ləl kara ula gə singa ya̰ nəm ɗaa kəy lə-a le unda nangə mburugu ar tor-e to to gə kəm wəəl be.

²⁸ Logə Jeju tɔl ta tar lə-a to gə be tɔ̰y ɗaa dəwje tɔ̰y gə d-o le, lo tar igi-je sɛl,

²⁹ mba n-tɔji ne gə dəw gə inga singamongə ɓo to gə njekɔr gəl toronduje be ang.