Matiye 6 - Mbede Lə Luba Kone Gə Sigi

Ɗəw kun ne karə dəw

¹ Jeju təl pa ja cibi, ꞌngomje rɔ-si dɔ neɗa gə gadə-gadə gə ꞌɗaje mba kəm dəwje, mba kar d-o ne si ja baa, be nama Bɔ-sijee gə isi dara le a kuga dɔ ji-si ang baa.

² Lo gə un ne ar dəw ɗaa, uru ꞌkuwi dɔ-ɛ gə ang, to gə njetar mulaje d-aw ɗa mə kəy nendoje gə lə Jiibije, gə dan ɗəw booje gə, mba kar d-ɔsə ne gaji-je. Tar gə tɔgərɔ ja m-ula-si to gə d-inga kug-ɛ nam ngaa.

³ Ngaa logə un ne ar dəw, nama ar ji gəl-i gərə ne gə ji kɔl-i ɗa ang.

⁴ Be ɓa Luba gə o ne gə ar lokiya gə le a kuga dɔ ji-i.

⁵ Logə aw dəji-je Luba nama, əwje rɔ-si ɗaje to gə njetar mulaje be, mba ꞌjeje le ꞌnjigi kar taar mə kəy nendo gə lə Jiibije, gə kar taar mbɔr ɗəw boo ɓa dəji Luba mba tɔji ne rɔ-je kəm dəwje gə. M-pa tar gə tɔgərɔ ja m-ar-si to gə d-inga kuga lə-je nam ngaa.

⁶ Ngaa ꞌi le logə a kaw dəji Luba nama, andə kəy lə-i, kudu ta ɗəw ta-i gə bugum, ngaɓa dəji bɔ-ije Luba lokiya gə, ɗaa bɔ-ije gə to nje ko neje lokiya gə le a kuga dɔ ji-i.

⁷ Logə aw dəji-je Luba nama, tura-je tar baa rad-rad to gə dəwje gə ꞌgərə Luba ang, gə d-əji mə-je gə to gə tar gə pa ya̰ ɓa Luba a ko ne dəji lə-je be.

⁸ ꞌNdəjije kəm-je ang, mba Bɔ-sijee Luba gərə ne gə sisəy awje ndoo-e le kede nam ɓa ꞌdəj-eje ɓi.

⁹ Oje pa dəji Luba gə a dəji-je le ɓa nee: Bɔ-sijee gə isi mə dara gə, May kar ri-i to ɓədə gə losang-ɛ;

¹⁰ May kar ɗe o̰ ɓe dɔ si gə Kar dəwje gə dɔ nangə nee ꞌɗa mə njigi lə-i to gə ꞌɗa ne dara be.

¹¹ Ar-si nekusa ta-si gə ɓogəne,

¹² Kɔgərɔ ja ɔr tar neɗa gə kṵra̰y dɔ si gə, to gə sijee kara j-ɔr tar-ɛ dɔ nje gə ɗa gə sijee kṵra̰y be tɔ.

¹³ ꞌTa-si ji Njekṵra̰y gə, ɓo iya̰ si ar j-oso dan nekərə gə ang. Mba ꞌi ja ɓa ɓeko̰, gə singamongə gə rɔnduba, To kar-i gə ɓal-ɓal, saar gə no. Oyo!

¹⁴ To gə ɓo ɔrəje tar kal tar lə dəwje dɔ-je gə nama, Bɔ-sijee gə isi dara kara a kɔr tar kal tar dɔ sisəy gə tɔ.

¹⁵ Ngaa to gə ɓo ꞌmbadə-je kɔrəje tar kal tar dɔ dəwje gə nama Luba kara a mbadə kɔr tar kal tar dɔ sisəy gə tɔ.

¹⁶ Logə ꞌtɔlje mə-si ɓo ɗaa, ꞌɗaje kəm-si to ndoo ang, to gə njetar mulaje gə ɗa kəm-je to ndoo ɓa gə mba tɔji ne dəwje to gə ꞌtɔl mə-je ɓo. Tɔgərɔ ja, m-pa m-ar-si to gə d-inga nekuga dɔ ji-je nam.

¹⁷ Ngaa ꞌi le, logə ꞌtɔl mə-i ɓo ɗaa, ꞌndəm ubu gə əndə ngaɓa togo kəm-i,

¹⁸ mba kar dəwje ꞌgərə to gə ꞌtɔl mə-i ɓo ang, ngaa mba Bɔ-ije gə isi lokiya gə, be ɓa Bɔ-ije Luba gə o-i lokiya gə le, a kuga dɔ ji-i.

Ɓər nekinga

¹⁹ ꞌƁərəje nekingaje lə-si umje dɔ nangə nee ang, na to lo gə sɔlɔlɔje gə ɔgəɓar d-aw tuji neje kəne nəm ɓa nje ɓogoje kara d-aw cɛdə ta kəyje d-aw ɓogo nəm tɔ,

²⁰ be ɓa may kar-si ꞌɓərəje nekingaje lə-si umje dara, lo gə sɔlɔlɔ ose ɓɔgəɓar a tuji ne kəne ang, ngaɓa nje ɓogoje kara d-a kasə cɛdə ta kəyje kəne ang nəm tɔ.

²¹ Mba lo gə nekinga lə-i to kəne ja ɓa, mə-i a to kəne.

²² Kəm dəw to lambe lə darɔ-ɛ. To gə ɓo kəm-i to gə maj-ɛ nama darɔ-i a nja dan lokarə gə tɔ.

²³ Ngaa ɓo kəm-i ja tuji nam ɗaa darɔ-i tɔ̰y a kisi dan cil ciməri gə. To gə ɓo lambe gə to rɔ-i ja təl cil ciməri nama, ꞌi a kisi dan cil ciməri gə gə al dɔ lo!

Ɗa kula kar Luba ja kara baa

²⁴ Dəw gə gə kar-ɛ baa ja ꞌɓəə-eje d-a kḭ joo ang, mba n-a njigi dəw gə kara ang gə kɔrɔ ɗaa, dəw gə kara ɓa n-a njigi-e ose n-a kiyi rɔ-ɛ rɔ dəw gə kara gə ɗaa n-a dabə dəw gə kara dasəra. Sisəy a poloje Luba je gə lar joo kɛm ang.

²⁵ Gəl-e gə ne ɓa m-pa m-ar-si na: ꞌNoje rɔ-si mba kisi kəm baa ɔji dɔ nekusa ta-si ang nəm ɓa, mba kubuje gə a kulaje rɔ-si gə ang tɔ. Kaw kəm baa nday nekusa nəm, darɔ dəw kara nday kubu nəm tɔ.

²⁶ Oje əlje gə d-aw d-ḭ gə bagəje taar ngaa ꞌdubu ne ang nəm, d-unja ne ang nəm, ngaɓa dam lə-je kara godo nəm ja, ngaa Bɔ-sijee gə dara ar-je ne d-usa. Sisəy ꞌmayje undaje əlje ang wa?

²⁷ Na ɓa horo-si əng asə no rɔ-ɛ kar ndɔ-ɛ oso dɔ mar-ɛ gə njɛ̰ be wa?

²⁸ Ngaa se mba ɗi ɓa ꞌnoje rɔ-si mba kubu kula-si wa? Aje lo oje pudu kiro gə aw uba mə ndɔɔ gə: ꞌƊa kula ang nəm, d-uji kubu ang nəm;

²⁹ ngaa m-a pa kar-si to gə Salomo gə riɓar lə-a tɔ̰y ja kara ula kubu to gə ꞌjee be ang.

³⁰ To gə ɓo mu gə to ne gə ce mə ndɔɔ gə ɓogəne baa ngaɓa bara nama a pər a ko̰ ɓa ɓo Luba ula-a kubu le se, Luba asə kula sisəy kubu ang wa? Njeməkəngəje!

³¹ ꞌNoje rɔ-si ang ngaɓa ꞌpaje na: Ɗi ɓa ja kusa wa? Ose j-a kinga man ɗa ɓa ja kay wa? Ose ɗi ɓa ja kula kar-si gə wa?

³² Mba neje gə to gə be le, dəwje gə ꞌgərə Luba ang ɓa ꞌsangə. Ngaa Bɔ-sijee gə dara gərə neje gə aw-je ndoo-e.

³³ ꞌSangəje ɓeko̰ lə Luba gə gadə-gadə ja dɔngɔr ɗaa neje gə sisəy aw-je ndoo-e nee le, Luba a kar-si dɔ-ɛ gə.

³⁴ ꞌNoje rɔ-si mba ndɔ gə bara ang mba ndɔ gə bara to gə lo-e dang ja tɔ. Ngaɓa kɔr gə ɓogəne asə kəm ndɔ gə ɓogəne ja tɔ.