Matiye 5 - Mbede Lə Luba Kone Gə Sigi

JEJU ILA MBƏRƏ DƆ ƏR GƏ Rɔ ləlje

¹ Logə Jeju o bula dəwje ɗaa uba dɔ ər aw taar, aw isi nangə, ngaɓa ngan njenendoje lə-a ꞌɗe d-isi mbɔr-ɛ gə.

² Ɗaa Jeju un kudu tɔji dəwje ne na:

³ Nokarə to kar njendooje mə kəji gə lə-je, Mba ɓeko̰ gə dara to karə-je.

⁴ Nokarə to kar njenoje, Mba Luba a bɔrə man kəm-je gə!

⁵ Nokarə to kar njeməmayje, Mba Luba a karə-je d-isi gə maj-ɛ lo gə uwa dɔ gɔl-ɛ mba je!

⁶ Nokarə to kar nje gə ɓo neɗa gə dana gadə-gadə ɔrə-je ngaɓa d-aw ndoo-e, Mba Luba a kar mə-je oso nangə po̰.

⁷ Nokarə to mba nje ko kəmtondoo lə ngan marəje-je, Mba Luba a ko kəmtondoo lə-je tɔ!

⁸ Nokarə to mba nje gə mə-je arə ngadə, Mba d-a ko kəm Luba!

⁹ Nokarə to kar nje gɔl lo kar-ɛ to ɗɛgɛgɛ, Mba Luba a ɓarə-je ngan-ɛ!

¹⁰ Nokarə to kar nje gə d-ula kəm-je ndoo mba neɗa gə gadə-gadə, Mba ɓeko̰ gə dara a to karə-je!

¹¹ A to-je njenokarəje, lo gə d-a taji si, d-a kula kəm-si ndoo gə d-a pa gə si tarje gə kṵra̰y dang-dang mba tar lə-m.

¹² ꞌƊa-je rɔləl ngaɓa ar-je rɔ-si ndɔɔ, mba ne dɔ ji lə-si a bo ya̰ mə dara gə, pajambərəje lə Luba gə kede ja kara d-ula kəm-je ndoo to gə be tɔ.

Kadə gə lokarə gə dɔ nangə nee

¹³ Sisəy ja ꞌtoje kadə gə dɔ nangə nee. Ngaa to gə ɓo kadə do̰o̰ ang le, se d-a ɗa ban ɓa kar-ɛ təl do̰o̰ wa? May kum kɔrɔ kar dəwje ꞌtuba gə gɔl-je.

¹⁴ Sisəy ja ꞌtoje lokarə gə dɔ nangə nee. Ɓe gə to dɔ wuri gə taar le iya rɔ-ɛ ang.

¹⁵ Dəw a kunda pər lambe gə mba təl kun ne dəbə ne ang, ngaa d-a kunda dɔ ne gə taar kar ndogo ar dəwje tɔ̰y gə mə kəy gə d-o ne lo.

¹⁶ Be ɓa ar-je pər lə-si ndogo no dəwje gə, mba kar d-o ne neɗa-sijee gə may-may, ngaɓa d-a kɔsə ne gaji Bɔ-sijee Luba gə isi mə dara gə.

Jeju pa tar torondu lə Moyiji

¹⁷ Əji-je to gə m-ɗe mba tuji torondu lə Moyiji ose gə mba cḭ tarje lə pajambərəje lə Luba ang. M-ɗe mba cḭ ang, ngaa m-ɗe gə mba tɔl t-ɛ.

¹⁸ Tɔgərɔ ja, m-pa m-ar-si, saar kar dara gə nangə ꞌnday le, ngaɓa kar neje tɔ̰y gə dɔ nangə nee d-unda ngangəje le, ne gə njɛ̰ gə kəne a godo ang, ngaɓa ta torondu mbiday a ti koso nangə ɓɛdə ang ɓa ngon mbadə kar-ɛ a ti mbid ang nəm.

¹⁹ Ndu gə njɛ̰ ja baa kara, dəw gə ila ngon kuji kəne ang ngaɓa tɔji dəwje ar ndəji kəm-e nama d-a ɓar-ɛ ngon gə kasə mə ɓeko̰ gə dara. Ngaa dəw gə ila ngon kuji kəne ngaɓa təl tɔji nje gə kɛm nama d-a ɓar-ɛ dəw gə tɔgə mə ɓeko̰ gə dara.

²⁰ Mba m-pa m-ar-si to gə ɓo neɗa gə gadə-gadə lə-si nday kar njekɔr gəl toronduje gə Parijiyɛ̰je ang nama a kandə-je mə ɓeko̰ gə dara ang.

²¹ Sisəy oje tar-ɛ to gə ꞌpa d-ar bubaje gə ləw na: ꞋI a tɔl dəw ang, a ɓo dəw gə tɔl njemar-ɛ nama d-a gangə tar dɔ-ɛ gə.

²² Ngaa ꞌma, m-a pa kar-si: Dəw gə wungu to-e dɔ ngon ko̰-ɛ gə nama tar a kuwa dɔ-ɛ. Ngaɓa dəw gə taji ngon ko̰-ɛ na to mbə nama d-a kaw sə-a no nje gə no ngɔ gangə tar gə lə Jiibije. Dəw gə ɓar ngon ko̰-ɛ ɛbɛ nama d-a kila kəm pər gə.

²³ Logə ꞌi un nenuji aw ne no kɔgə gə ɓa ɓo mə-i ole dɔ tar gə ngon ko̰-i aw ne sə-i nama,

²⁴ may kar iya̰ nenuji lə-i gə no kɔgə gə ɓo ꞌtəl aw um naa gə gə ngon ko̰-i ɓa təl ɗe un nenuji lə-i le ar Luba ɓi.

²⁵ May kar ꞌgɔl tar gə nje kəm tar lə-i logə aw sə-a ɗəw boo nam ɓa aw-je ɓi, ɓo be ang nama, n-a kar nje gangə tar uwa-i ar njengəm lo ila-i kəy kula gə.

²⁶ Tar gə tɔgərɔ ja m-pa m-ar-i to gə a kuga saar kar sulay kara kara a nay ji-i ang ja ɓa d-a kɔr-i kila-i taar ɓi.

²⁷ Sisəy oje tar-ɛ to gə ꞌpa na: ꞋI a ɓogo lo to ang.

²⁸ Ngaa ꞌma, m-pa m-ar-si to gə: Dəw gə a jene ji ɓa ɓo njinga-a m-e gə ɗaa nj-ɛ ɓogo lo to nam.

²⁹ To gə ɓo kəm-i gə dɔ kɔl to ɗəw koso dan neɗa gə kṵra̰y gə nama, may kar ɔr ila kɔrɔ əw. Mba kar dəbə rɔ-i kara baa tuji may unda darɔ-i tɔ̰y kar-ɛ aw kəm pər gə.

³⁰ To gə ɓo ji kɔl-i to ɗəw koso dan neɗa gə kṵra̰y gə nama, ꞌgangə ila kɔrɔ əw, mba kar dəbə rɔ-i kara baa tuji may unda darɔ-i tɔ̰y kar-ɛ aw kəm pər gə.

³¹ Nje gə ləw ꞌpa na: Dəw gə tɔbə jene lə-a nama ɗa mbede cḭ naa ar-ɛ.

³² Ngaa ꞌma, m-pa m-ar-si to gə: Na-na ɓa tɔbə jene lə-a, ɔji dɔ kila kuji ang ja baa nama ɔs-ɛ ila-a ɓogo lo to gə; ngaɓa dəb-e nee le təl ta jene gə ɗangə nama ɓogo lo to.

³³ Sisəy oje to gə ꞌpa d-ar bubaje gə ləw na: ꞋI a tula rɔ-i nangə dɔ ndu kun gə lə-i ang ngaa ndu gə ꞌi un no Mbayɓe gə le a ɗa kul-ɛ.

³⁴ Ne ꞌma, m-pa m-ar-si kar ꞌnaji-je ang: a najije gə dara ang mba to dɔ ngəndəng mbay lə Luba,

³⁵ A najije gə nangə ang nəm mba Luba um gɔl-ɛ kəne, ɓa gə ri ɓe gə Jerujalɛm ang mba to ɓe lə mbay gə boy.

³⁶ ꞋI a kuwa dɔ-i naji ne ang, mba ꞌi asə ɗa bḭ dɔ-i kara baa be kar-ɛ nda ose təl ndul ang.

³⁷ Ɓo tar ce ta-si gə na oyo nama oyo ja, a ɓo ə̰ə̰ə̰ nama ə̰ə̰ə̰ ja, ɓo tar gə ɗangə ore go-e nama to tar gə ḭ ta njekṵra̰y gə.

³⁸ Sisəy oje tar-ɛ to gə ꞌpa na: Dəw gə tɔ kəm njemar-ɛ nama, d-a tɔ kəm-e, a ɓo dəw gə cɛdə ngangə njemar-ɛ nama d-a cɛdə ngang-ɛ tɔ.

³⁹ Ngaa ꞌma, m-ndəji-si kar ꞌdalje ba̰a̰ məndul gə dəw ɗa gə si ang ne ɓo dəw unda kambɔr-i gə dɔ kɔl nama ꞌturu ye gə dɔ gəl ar-ɛ tɔ.

⁴⁰ To gə ɓo dəw njigi kaw sə-i lo gangə tar mba ta ne kubu gə kar-i nama iya̰ kubu kul lə-i ar-ɛ dɔ mar-ɛ gə.

⁴¹ To gə ɓo dəw uwa-i kar-i nja sə-a kula mɛdərɛ kara nama n-nja aw sə-a kula mɛdərɛ jo.

⁴² Dəw dəji-i ne nama ar-ɛ, ngaɓa dəw njigi tuna-i ne kara ɔg-ɛ ang.

⁴³ Sisəy oje tar-ɛ to gə ꞌpa kede na: ꞋI a njigi njemar-i a ɓo njeba̰a̰ lə-i nama a njigi-e ang gə kɔrɔ ja.

⁴⁴ Ngaa ꞌma, ɗaa m-pa m-ar-si: ꞌNjigije njeba̰a̰je lə-si, ꞌtɔrəje ndu-si dɔ nje gə d-ugu ne d-ar-si, ꞌɗaje may gə nje gə ꞌnjigi-si ang gə kɔrɔ ja ꞌdəjije Luba mba nje gə d-ula kəm-si ndoo nəm tɔ.

⁴⁵ Be ɓa sisəy a toje ne nganje lə Bɔ-sijee gə isi mə dara gə, mba n-ar kar ɔsə dɔ njeməndulje gə nəm gə njeməmayje gə nəm tɔ, ngaɓa n-ar nji ər ndɔɔ lə dəwje gə gadə-gadə gə nje ɗa ne dɔ buguruje naa gə tɔ.

⁴⁶ To gə ɓo nje gə ꞌnjigi-si ɓa ꞌnjigi-jeje le se ɗi ɓa a kinga-je gə nekuga dɔ ji wa? Njembo̰ lar gədə ɓeje kara ꞌɗa bənəng tɔ.

⁴⁷ To gə ɓo ngan ko̰-sisəy ɓa unje ji-si arje-je le se ɗi ɓa to ne gə sigi gə sisəy ꞌɗaje wa? Dəwje gə ꞌgərə Luba ang kara, ꞌɗa bənəng tɔ.

⁴⁸ To gə Bɔ-sijee gə isi mə dara gə may pɛdə-pɛdə le, sisəy kara ꞌmay-je pɛdə-pɛdə tɔ.