Matiye 4 - Mbede Lə Luba Kone Gə Sigi

ꞌSɛ̰ngərɛ̰ na Jeju Kirisi

¹ Be ɓa Njil Luba aw gə Jeju ndag lo gə, mba kar ꞌSɛ̰ngərɛ̰ ɗe n-ɛ.

² N-tɔl m-e ɓo kar dɔg sɔɔ gə cil dɔg sɔɔ, ɗaa ɓo ɔr-ɛ.

³ Nje kərə dəwje le ɗe inga-a ɗaa pa ar-ɛ na: To gə ɓo ꞌto Ngon lə Luba nama, un ndu-i ar kɔr ərje gə nee le ꞌtəl mbə d-ar-i usa.

⁴ Jeju ila kəne na: ꞌƊa mə mbede gə na: Dəw a kaw kəm baa mba mbə ja baa ang ngaa, tarje tɔ̰y gə ce ta Luba gə ɓa dəw a kaw ne kəm baa.

⁵ Cibi ꞌSɛ̰ngərɛ̰ ɔr-ɛ aw sə-a mə ɓe gə Jerujalɛm gə to ɓe gə to gə losang-ɛ, aw ila dɔ sam kəy gə lə Luba

⁶ ngaɓa pa ar-ɛ na: To gə ɓo ꞌi to ngon lə Luba nama, ḭ taar ꞌce oso nangə, mba ꞌɗa mə mbede gə na: Luba a kun ndu kar anjije lə-a mba-i; Ɗaa d-a kunda ji-je ta-i nee, Mba kar gɔl-i dar ər ang.

⁷ Jeju pa ar-ɛ na: ꞌƊa mə mbede gə na: ꞋI a na Mbayɓe, Luba lə-i ang.

⁸ ꞌSɛ̰ngərɛ̰ ɔr-ɛ aw sə-a dɔ ər gə ndəw ya̰ ɓa tɔj-ɛ ɓeko̰je tɔ̰y gə dɔ nangə nee gə nemayje gə kəne,

⁹ ɗaa pa ar-ɛ na: To gə ɓo ɔsə takəji nangə no-m gə, ꞌpolo-m nama m-a kar-i tɔ̰y ja.

¹⁰ Jeju pa ar-ɛ na: ꞌSu ɔdə gə ɗangə! Mba ꞌɗa mə mbede gə na: ꞋI a polo Mbayɓe, Luba lə-i, ngaɓa ꞌne ja gə kar-ɛ baa ɓa a kun rɔ-i kar-ɛ.

¹¹ Be ɓa ꞌSɛ̰ngərɛ̰ ɔdə ḭya̰ Jeju, ɗaa anjije ꞌɗe gə nekusa d-ar Jeju.

Jeju aw dɔ nangə gə Galile

¹² Jeju o tar kuwa gə d-uwa Ja̰ d-ila kəy kula gə, ɗaa ɔdə aw dɔ nangə gə Galile.

¹³ Jeju ɔdə mə ɓe gə Najarɛd aw isi mə ɓe gə Kapɛrənom, to ər gə ta man bo gə ɗəw nim dɔ nangə gə Jabulo̰ gə Nɛpətali,

¹⁴ be ɓa gə mba kar tar gə pajambərə Ejay pa le aw ne lo-e gə:

¹⁵ Dɔ nangə gə Jabulo̰ gə dɔ nangə gə Nɛpətali, Go lo gə to mbɔr babo gə, tura man baa Jurədɛ̰ gə, Dɔ nangə gə Galile gə dəwje gə ꞌgərə Luba ang d-isi kəne;

¹⁶ Dəwje gə d-isi dan cil ciməri gə, A d-o lokarə gə boy, Ngaɓa dəwje gə d-isi dɔ nangə gə Galile. Gə d-isi cil ciməri mba kuy, Ɓa lo ar dɔ-je gə.

¹⁷ Dɔ kar-ɛ gə Jeju ila mbərə ngaɓa pa na: ꞌTuruje kəji lə-si mba ɓeko̰ gə dara nay əw ang baa.

¹⁸ Ndɔ kara be Jeju aw nja ta babo gə Galile, n-o ngan ko̰ naaje joo, Simo gə ɓar-ɛ Piyɛr, je gə ngon ko̰-ɛ Andəre gə d-aw d-ila bura man, mba ꞌto mbawje.

¹⁹ Jeju pa ar-je na: Uwaje go-m, m-a turu-si gə njendo̰ dəwje.

²⁰ Lo-e gə nee ja, ꞌtusu buraje d-ḭya̰ ɗaa d-uwa go Jeju.

²¹ Logə Jeju ɔdə nja gə kede njɛ̰ ɗaa, n-o ngan ko̰ naaje gə ɗangə joo ɓi, Jagə je gə Ja̰ ngan lə Jebede, d-aw gɔl kəm buraje gə bɔ-jeje mə to gə.

²² Jeju ɓar-je ɗaa, lo-e gə nee ja, d-iya̰ to gə bɔ-jeje, d-uwa go Jeju.

²³ Jeju nja dɔ nangə gə Galile tɔ̰y, tɔji dəwje ne mə kəy nendoje gə lə Jiibije, ngaɓa ila mbərə Tar gə May ɔji dɔ ɓeko̰ nəm, aji njerɔko̰je ɓədə-ɓədə gə njeməndəje ɓədə-ɓədə horo dəw mə ɓeje nəm tɔ.

²⁴ No kula lə Jeju oso dɔ nangə gə Siiri ja tɔ̰y. ꞌƊe gə dəwje tɔ̰y gə rɔko̰je bula ula kəm-je ndoo gə naməje dang-dang, nje gə njilje gə kṵra̰y ula gərəng mə-je gə, njeməngərəje, gə nje gə dəbə rɔ-je uy ɗaa n-aji-je.

²⁵ Bula bo dəwje gə d-ḭ dɔ nangə gə Galile, gə Dekapɔl gə to ɓe mbo̰ gə dɔg, gə ɓe gə Jerujalɛm, gə dɔ nangə gə Jude nəm ngaɓa ɓeje gə tura baa Jurədɛ̰ gə ꞌndole go-e.