Matiye 3 - Mbede Lə Luba Kone Gə Sigi

Ja̰ Njeɗabatɛm ila mbərə

¹ Dɔ kar-ɛ gə əng le Ja̰ Njeɗabatɛm ce ila mbərə ndag lo gə dɔ nangə gə Jude.

² N-pa na: ꞌTuruje kəji lə-si, mba ɓeko̰ gə dara nay əw ang baa.

³ Ye ɓa pajambərə Ejay pa tar lə-a na: To ndu dəw gə ɓar mə ndag lo gə ꞌGɔl-je ɗəw lə Mbayɓe le, ꞌNduji-je kila ɗəwje lə-a ar-ɛje nduji rad-rad.

⁴ Ja̰ ula kubu gə to bḭ jambal. Gagəra tɔ ur-e to ndaar. ꞌKulije gə ubu təji ɓa to nekusa t-ɛ.

⁵ Dəw mə ɓeje gə Jerujalɛm, gə dəwje gə dɔ nangə gə Jude tɔ̰y nəm ɓa nje gə go lo gə Jurədɛ̰ gə nəm, ꞌɗe rɔ-ɛ gə,

⁶ ɗaa ꞌce gəl rɔ-je dɔ neɗa gə kṵra̰y gə lə-je gə ɗaga ngaɓa Ja̰ ɗa-je batɛm mə babo gə Jurədɛ̰ gə.

⁷ Logə n-o to gə Parijiyɛ̰je gə Sadusiyɛ̰je ꞌɗe bula ya̰ mba batɛm ɗaa n-pa n-ar-je na: Sisəy gə ꞌtoje to gə kondɔtɔlje be, na ɓa tɔji-si pa ka̰y wungu lə Luba gə aw ɗe le wa?

⁸ ꞌƊa-je kulaje gə may-may ꞌtɔji-je ne to gə ꞌturu-je kəji lə-si tɔgərɔ ja.

⁹ Ɓo əw-je rɔ-si kunda-je mə-si na: Abəraham to ka-sijee! To gə be ɓa m-pa m-ar-si to gə ərje gə to nee ja kara Luba asə mba təl-je gə nganje kar Abəraham.

¹⁰ Tina to gəl kagəje gə nam: kagə gə ɗa-ɗa gə andə ɓa kand-e may ang nama d-a tuga gangə kila pədə.

¹¹ ꞌMa m-ɗa-si batɛm mə man gə, ɔji dɔ turu kəji, ngaa dəw gə njekore go-m le singamong-ɛ nday-m, ngaɓa m-asə kɔr sabɔgɔ gɔl-ɛ gə ang. ꞌNe ɓa n-a ɗa si batɛm lə Njil Njerɔsangə gə pər.

¹² N-ar ta ɓalaa gə gir lə-a ji-a gə, n-to ne waa lə-a mba kodo kum mə dam gə, ngaɓa n-a təl kula pər gə a kuy ang tisa gə.

Ja̰ Njeɗabatɛm a ɗa Jeju Kirisi batɛm

¹³ Jeju ḭ dɔ nangə gə Galile aw inga Ja̰ ta man babo gə Jurədɛ̰ gə mba kar n-ɗ-ɛ batɛm.

¹⁴ Ngaa Ja̰ njigi sə-a ang na: ꞌMa ɓa m-aw ndoo kar-i ɗa-m batɛm ɗaa ꞌi təl ɗe kar-m ꞌma ɓa m-ɗa-i wa?

¹⁵ Jeju təl ila kəne na: Dɔ kar gə nee ɗaa iya̰ ar to to gə be. Mba j-a ɗa ne ne tɔ̰y gə to gadə-gadə. Ɗaa n-njigi sə-a.

¹⁶ Logə Ja̰ ɗa Jeju batɛm, ngaɓa Jeju aw ce mə man gə gə ɗaga ɗaa kəm dara cɛ̰ bərərə, ar n-o Njil Luba ɗisi to to gə dər kuul be isi dɔ-ɛ gə.

¹⁷ Cibi, ndu ḭ dara pa tar na: ꞌNe gə nee le, to Ngon njigi lə-m, gə to ngira rɔləl lə-m.