Matiye 28 - Mbede Lə Luba Kone Gə Sigi

Jeju Kirisi ce mə buwa yo gə

¹ Go ndɔ kuwa kɔr gə, gə to dɔmasi ɗaa, Məri gə Magədala je gə Məri gə kara ꞌce gə ji dɔɔɓe baa, d-aw mba ko dɔbarə.

² Logə d-aw ɗaa dɔ nangə yəgə to gə boy, mba anji lə Mbayɓe kara ḭ dara uru nangə, ɗe nduburu pil ər gə d-ila ta buwa gə le isi dɔ-ɛ gə.

³ N-ndogo to to gə nji gə təl be ngaɓa kubu lə-a nda kələw-kələw to to gə kuji be.

⁴ Njegəm loje d-isa ɗɛgə-ɗɛgə gə ɓəəl ngaɓa ꞌtudu wɔ to gə dəwje gə uy gə kuy be.

⁵ Ngaa anji le un tar pa ar jeneje le na: ꞌƁəəl-je ang, mba m-gərə to gə aw sangəje Jeju gə ɓər-e kagə dəsə gə le.

⁶ Ɗaa n-godo nee, n-ndol ɗɔdə, to to gə n-pa ne kede le. ꞌƊeje, ɓo oje lo gə d-ila-a kəne le ɓa nee.

⁷ Ɗaa awje gə tɔg-ɛ aw ꞌpaje ar-je ngan njenendoje lə-a to gə n-ndol horo nje d-uy gə ɗɔdə. Ɗaa n-aw no sisəy gə kede Galile nam. Lo gə əng ɓa a ko-eje kəne. Tar gə kar m-pa m-ar-si le, ye ja m-pa kən.

⁸ Be ɓa jeneje le d-ɔdə gə tɔg-ɛ ta buwa yo gə, gə ɓəəl nəm, gə rɔləl gə boy, d-a̰y ngɔdə d-aw d-ila tar le mbi ngan njenendoje gə.

⁹ Be ɓa, oje, Jeju ɗe inga-je ɗaa, pa na: M-o-si ɓa. Ɗaa ꞌɗəmje gə kede d-um takəjije nangə no-ɛ gə ngaɓa ꞌpolo-e.

¹⁰ Ɗaa Jeju pa ar-je na: ꞌƁəəlje ang, awje aw paje ar-je ngan ko̰-mje ar-je d-aw dɔ nangə Galile: Ye ɓa d-a kinga-m kəne.

¹¹ Logə jeneje le d-aw ɗəw boo ɗaa, jingawje gə kɛm horo njengəm loje gə d-aw mə ɓe gə, ɗaa d-aw ꞌpa tar neje gə nday le d-ar buba njekapoloje.

¹² Buba njekapoloje le ꞌmbo̰ naa gə buba ɓeje ꞌgɔl tar horo naa gə ɗaa d-ar njeɗɔje gə ngəm ta dɔbarə le lar to gə boy ja,

¹³ ngaɓa ꞌtəl pa d-ar-je dɔ-ɛ gə mba kar ꞌpa d-ar dəwje na: Logə j-aw cibi cil nee ɗaa ngan njenendoje lə-a ꞌɗe d-ɔr nin-e le.

¹⁴ Be ɓa ɓo njeko̰ ɓe Pilad o tar-ɛ nama ja gərə gusu gə ja pa ne mba kar nejɔgə ɗe dɔ si ang.

¹⁵ Njeɗɔje ꞌta lar le ɗaa ɗa to to gə ꞌpa d-ar-je le ja tɔ. Be ɓa tar gə njeɗɔje pa le ta lo gə kede-kede horo Jiibije saar ce ɓogəne.

¹⁶ Ngan njenendoje gə dɔg gə gir-je gə kara le d-aw dɔ nangə gə Galile, d-aw dɔ ər gə Jeju pa ar-je kede le.

¹⁷ Logə d-o-e ɗaa, ꞌpolo-e. Ngaa nje gə kɛm ꞌpəngə gə pəngə baa.

¹⁸ Jeju ɗəm gə rɔ-je gə pa ar-je na: M-inga singa ko̰ dɔ neje mə dara gə gə dɔ nangə nee tɔ̰y.

¹⁹ Awje, ɓo ꞌturuje gəl kuji dəwje tɔ̰y gə ngan njenendoje ngaɓa ꞌɗaje-je batɛm gə ri Bɔ, gə Ngon, gə Njil Njerɔsangə,

²⁰ ɗaa ndo-jeje ar-je ɗa neje tɔ̰y gə m-un ndu-m kəne m-ar-si le. Oje m-ga̰ gə si naa gə gə ndɔje tɔ̰y saar ndɔ gə nangə nee a kunda ne ngang-ɛ.