Matiye 27 - Mbede Lə Luba Kone Gə Sigi

Nje gə no ngɔ gangə tar gə lə Jiibije d-uwa dɔ naa gə ndɔɔ-sḭ

¹ Gə ndɔɔ-sḭ baa ja, buba njekapoloje gə buba ɓeje tɔ̰y d-uwa dɔ naa d-un ndu-je mba kar ꞌtɔl ne Jeju.

² Logə ꞌtɔ-ɛ ɗɔdə ɗaa, d-aw sə-a d-aw d-ula-a ji njeko̰ ɓe gə ri-a na Pilad.

Judas ila kula

³ Be ɓa Judas gə njekun dɔ Jeju le, logə o to gə ꞌgangə tar dɔ Jeju gə ɗaa, m-e gangə man ar təl gə mbɛl ka munda le aw ne ar buba njekapoloje gə buba ɓeje,

⁴ n-pa ne tar na: Dəw gə tar uwa dɔ-ɛ ang ja m-un dɔ-ɛ m-ar d-um məs-e nangə, ɗaa m-ɗa neɗa gə kṵra̰y. ꞌTəl d-ila-a kəne na: A ɗi ɓa ɔsə-sije kəne wa? To tar lə-i ꞌi ja.

⁵ Be ɓa Judas ja̰rɛ̰ lar le mə kəy gə lə Luba, ɗaa ɔdə aw ila kula gɔb-e gə tɔl rɔ-ɛ.

⁶ Buba njekapoloje d-odo lar le ɗaa ꞌpa na: Kəm kum naa gə gə lar gə kəy gə lə Luba ang, mba to lar məsə.

⁷ Gə go ndu-je gə asə naa ɗaa, d-odo lar le d-aw ndogo ne ndɔ lə nje kuba jo, mba kar-ɛ to lo dubu mbaje.

⁸ Gəl-e gə ne ɓa ꞌɓar ne ndɔ nee le na: Ndɔ məsə saar ce ɓogəne.

⁹ Be ɓa tar lə pajambərə Jurumi gə pa le oso ne lo-e na: D-odo mbɛl ka munda, to gad-ɛ ngan Ijirayɛlje d-uji kar ndog-e ne

¹⁰ d-ar mba ndogo ne ndɔ lə nje kuba jo, to to gə Mbayɓe un ne ndu-e ar-m.

Jeju ar no Pilad gə

¹¹ D-aw gə Jeju no njeko̰ ɓe gə. Ɗaa njeko̰ ɓe le dəji-e na: ꞌTo mbay lə Jiibije wa? Jeju ila-a kəne na: ꞌI ja ꞌpa.

¹² Ngaa tar gə buba njekapoloje gə buba ɓeje ꞌgangə d-um t-ɛ gə le, n-ar t-ɛ munduru.

¹³ Be ɓa Pilad le pa ar-ɛ na: Tarje tɔ̰y gə ꞌgangə d-um ta-i gə nee le o ang wa?

¹⁴ Ngaa Jeju ar t-ɛ munduru ɗaa, lo tar igi Pilad sɛl.

¹⁵ Ndɔ ɗa nay ja taar nama, njeko̰ ɓe ɔr dəw kara kəy kula gə ila-a taar-taar, mba to pa ɗ-ɛ lə-a. Dəw gə bula dəwje ꞌdəji-e ɓa n-ɔr-ɛ n-ɔr-ɛ.

¹⁶ Be ɓa, dɔ ndɔ-ɛ gə əng le, dəw kara to kəy kula gə, ri-a na Jeju Barabas gə dəwje ꞌpa tar lə-a ya̰.

¹⁷ Pilad dəji bula dəwje gə d-ar le na: Na ɓa ꞌnjigije kar m-ɔr-ɛ m-ar-si wa? Jeju Barabas ose Jeju gə ꞌɓar-ɛ Kirisi le wa?

¹⁸ Mba n-gərə to gə nər mə ɓa d-uwa ne Jeju d-ula-a ji-a gə.

¹⁹ Dɔ kar-ɛ gə njeko̰ ɓe gə ri-a na Pilad le aw isi ngəndəng gangə tar gə ɗaa, jene lə-a ula-je ar d-aw ꞌpa d-ar-ɛ na: Əw rɔ-i kula rɔ-i mə tar lə dəw gə gadə-gadə nee le, mba m-o ko̰ ne ɓogəne ya̰ gə nḭ mba tar lə-a.

²⁰ Buba njekapoloje gə buba ɓeje ꞌsula bula dəwje mba kar ꞌdəji Barabas ɓa d-ar d-ɔr-ɛ ɗaa ꞌtɔl Jeju.

²¹ Njeko̰ɓe təl un tar dəji-je na: Horo dəwje gə joo nee le, na ɓa ꞌnjigije kar m-ɔr-ɛ m-ar-si wa? Ɗaa ꞌpa na: Barabas.

²² Pilad le təl dəji-je na: A ɗi ɓa m-a ɗa gə Jeju gə ꞌɓar-ɛ Kirisi le wa? Ɗaa d-ila kəne tɔ̰y gə ndu-je kara baa ja na: Kar ꞌɓər-e kagə dəsə gə ja!

²³ Pilad le təl pa na: Ngaa ɗi ɓa to ne gə kṵra̰y gə n-ɗa wa? Ɗaa ꞌtəl d-uru ꞌkuwi gə singa-je ja cibi na: ꞌƁər-e kagə dəsə gə ja!

²⁴ Logə Pilad o to gə n-asə ɗa ne kara ang, ngaɓa dəwje d-unda bula gə kede-kede kar ce wungu ɗaa, uba nangə ḭ taar, ta man, togo ne ji-a kəm dəwje gə tɔ̰y ja ngaɓa pa na: Tar məsə dəw gə gadə-gadə gə ar nee le uwa dɔ-m ang. Tar-ɛ uwa dɔ sisəy ja.

²⁵ Ɗaa dəw mə ɓeje d-ila kəne na: May kar tar məs-e uwa dɔ sijee gə dɔ ngan si ja!

²⁶ Be ɓa Pilad ɔr Barabas ila-a taar ɗaa, ar-je ꞌlabə Jeju gə ndəy abəlay ɗaa ula-a ji-je gə mba karəje ꞌɓər-e kagə dəsə gə.

²⁷ Be ɓa d-ar njeɗɔje lə njeko̰ ɓe Pilad d-aw gə Jeju kəy mbay gə ɗaa, ꞌmbo̰ njeɗɔje gə kɛm tɔ̰y ja d-ar gugu dɔ-ɛ mbugu.

²⁸ ꞌTɔrə kubu rɔ-ɛ gə ngaɓa d-un kubu gə kasə gə boy yul d-ula-a.

²⁹ D-uji kun gə jɔgə d-ula dɔ-ɛ gə ngaɓa ꞌcɛdə kɔb d-ula ji kɔl-ɛ gə; ngaɓa ꞌtəl d-um məkəji-je nangə no-ɛ gə ꞌkog-e na: J-o si ɓa ɓo mbay lə Jiibije!

³⁰ Ngaɓa ꞌcibi yoro dɔ-ɛ gə, cibi ɓa ꞌta kɔb gə ji-a gə le d-unda ne dɔ-ɛ.

³¹ Go kogo gə kog-e ɗaa ꞌtəl d-ɔr kubu gə boy yul gə ꞌdəb-e ne le, ngaɓa ꞌtəl d-ula-a kubuje lə-a ɗaa d-aw sə-a mba kaw ɓər-e kagə dəsə gə.

ꞌƁərə Jeju kagə dəsə gə

³² Logə d-aw ꞌce mə ɓebo gə gə ɗaga ɗaa, d-inga dəw kara gə ɓe lə-a Sirɛn, ri-a na Simo, ɗaa d-uwa gə singa d-ar-ɛ odo kagə dəsə lə Jeju.

³³ ꞌCe lo gə ꞌɓar-ɛ Gɔləgota, gə kɔr gəl-e na: Lo Ka dɔ.

³⁴ D-ar-ɛ man bḭyə̰ gə ꞌpolo ne gə adə ɓa mba kar-ɛ n-ay, ngaa logə n-na n-o ɗaa, n-njigi kay ang.

³⁵ Logə ꞌɓər-e kagə dəsə gə ɗɔdə ɗaa ꞌɗa ꞌya̰a̰ ꞌkay ne naa kubuje lə-a be ɓa gə mba kar tar gə pajambərə pa na: ꞌKay naa kubuje nəm, cibi ɓa ꞌɗɔ-je ne mbay le aw ne lo-e gə.

³⁶ Ngaɓa ꞌtəl d-isi nangə gə lo-e gə əng ꞌngəm t-ɛ.

³⁷ D-unja ne bəgərə gə d-unda dɔ-ɛ gə taar ꞌtɔji ne gəl tar gə d-ila dɔ-ɛ gə na: Dəw gə nee le to Jeju, mbay le Jiibije.

³⁸ ꞌƁərə gayimje joo kagə dəsə gə mbɔr Jeju gə, ꞌye gə kara dɔ ji kɔl, ꞌye gə kara dɔ ji gəl tɔ.

³⁹ Nje nday ɗəw booje ꞌtaj-ɛ ꞌtuga ne dɔ-je,

⁴⁰ ꞌpa na: ꞋI gə na a cḭ kəy lə Luba, ɗaa ndɔ munda baa ja a təl kunda gugu le, aji darɔ-i ngaa ləma! To gə ɓo ꞌto ngon lə Luba ja nama, ḭ kagə dəsə gə ꞌɗisi nangə!

⁴¹ Buba njekapoloje, gə njekɔr gəl toronduje, gə buba ɓeje kara d-unda Jeju ꞌkogo ne ngaɓa ꞌpa na:

⁴² N-aji dəwje gə ɗangə, ɗaa n-asə kaji darɔ-ɛ ang! To gə ɓo n-to mbay lə Ijirayɛlje ja nama, n-ḭ kagə dəsə gə n-uru nangə ja ɓa ja ta kag-ɛ ɓi.

⁴³ N-unda m-e dɔ Luba gə le ɗaa, may kar Luba le t-ɛ ta yo ngaa, to gə ɓo Luba njigi-e. Mba n-pa na: N-to ngon lə Luba.

⁴⁴ Gayimje gə ꞌɓərə-je sə-a kagə dəsə gə le kara ꞌtaj-ɛ to gə bənəng tɔ.

⁴⁵ Un kud-e dɔ kar gə ar lum dɔ gə saar ce ne kar gə ila mbɔr-ɛ gə ja cil ciməri oso dɔ nangə nee tɔ̰y.

⁴⁶ Logə kar ila mbɔr-ɛ ɗaa Jeju uru ꞌkuwi ɓolong na: Eli, Eli, lama sabakətani kɔr m-e na: Luba lə-m, Luba lə-m, na ɗi ngaa ꞌmbadə-m wa?

⁴⁷ Nje gə kɛm horo dəwje gə d-ar lo-e gə le d-o ndu-e ɗaa ꞌpa na: N-ɓar Eli.

⁴⁸ Gə ngɔdə baa, dəw kara a̰y aw ula nekibi man mə man bḭyə̰ gə masə, ɗe ula ta kɔb gə ngaɓa ula ta Jeju gə mba kar-ɛ ibi.

⁴⁹ Ngaa nje gə kɛm ꞌpa na: Ar-si j-oje, se Eli a ɗe kaj-ɛ wa?

⁵⁰ Jeju təl uru ꞌkuwi ɓolong to gə ɗangə ngaɓa kəm lə-a oso.

⁵¹ Be ɓa bal dɔ kubu gə mə kəy gə lə Luba ḭ taar ja cir dana njarara uru nangə, ngaɓa dɔ nangə yəgə, ərəje kara tɔ dana ɓəgəgə-ɓəgəgə,

⁵² ta dɔbarəje cɛ̰ ngaɓa dəwje bula gə ꞌto njerɔsangəje gə d-uy le, ꞌtəl ndol tɔ̰y.

⁵³ Ngaɓa ꞌce mə buwa yo gə, ngaa gə go ce gə Jeju ce mə buwa yo gə, d-aw d-andə mə ɓebo gə to gə losang-ɛ, ngaɓa ꞌtɔji rɔ-je d-ar dəwje bula d-o-je.

⁵⁴ Njekun dɔ njeɗɔje gə tɔl gə nje gə d-ar sə-a mba ngəm ta Jeju le, d-o dɔ nangə gə yəgə gə neje gə nday le ɗaa ɓəəl unda-je bad gangə-je ngaɓa ꞌpa na: Dəw gə nee ɗaa, to Ngon lə Luba ja tɔgərɔ.

⁵⁵ Lo-e gə əng le jeneje bula d-ar dɔ ji ndə̰w̰ ɓa d-a lo: To jeneje gə d-ḭ gə Jeju dɔ nangə gə Galile nu ja, ꞌdan-ɛ mba la sə-a.

⁵⁶ Horo jeneje gə əng le Məri gə Magədala, gə Məri gə ko̰ Jagə je gə Jəjəb je ngaɓa ko̰ nganje lə Jebede.

D-ila yo Jeju mə buwa yo gə

⁵⁷ Kar kumatagə ɗaa, dəw gə njenekinga kara, Jəjəb gə Arimate gə to ngon njenendo lə Jeju ɗe.

⁵⁸ N-aw n-inga Pilad, n-dəj-e mba kar iya̰ ɗəw ar-ɛ n-un nin Jeju le. Be ɓa Pilad un ndu ar-je d-ar-ɛ.

⁵⁹ Jəjəb un nin Jeju, ɓiri gə ta kubu gə sigi.

⁶⁰ Ngaɓa n-aw n-ila mə buwa yo gə ꞌsɔɔ sigi ɓi. To buwa gə Jəjəb ar-je ꞌsɔɔ mə ər gə ɔji dɔ darɔ-ɛ ja. Cibi, n-nduburu pil ər n-ila t-ɛ gə ɓa n-ɔdə n-aw.

⁶¹ Məri gə Magədala je gə Məri gə kara d-isi ta buwa yo gə le.

⁶² Ndɔ kara nday, ndɔ gə or-e go ndɔ gɔl rɔ mba ndɔ kuwa kɔr ɗaa, buba njekapoloje gə Parijiyɛ̰je mbo̰ naa d-aw d-inga mbay Pilad

⁶³ ɗaa ꞌpa na: Mbay, mə-si ole dɔ tar gə nje kərə dəwje le pa, logə isi ne gə təbə baa ɓi na: To gə ɓo ndɔ munda go kuy gə lə ne nama, n-a kɔsə lo ce buwa yo gə.

⁶⁴ May kar un ndu-i ar-je ꞌngəm ta buwa yo le gə maj-ɛ saar ndɔ gə munda le ja nday tɔ̰y ɓa na, ngan njenendoje lə-a d-a ɗe kɔr nin-e gugu baa kaw kiya ngaɓa təl ɗe kula dəw mə ɓeje na: N-ndol n-ce buwa yo gə tɔgərɔ ja. Be ang nama tar gə ɗəgərə lə-je gə dɔ gugu nee ɗa, a nday ꞌye gə kede piyu.

⁶⁵ Pilad ila-je kəne na: M-ar-si njeɗɔje, ɗaa awje gə je ar-je ꞌngəm ta buwa yo le gə maj-ɛ to gə mə-si njigi.

⁶⁶ Be ɓa d-ɔdə d-aw ꞌgɔl njeɗɔje kar ꞌngəm ta buwa le. Ɗaa ꞌrɛ̰ ta buwa le gə pil ər ngaɓa d-unda njengəm loje t-ɛ gə.