Matiye 22 - Mbede Lə Luba Kone Gə Sigi

Gusutar gə ɔji dɔ ɗa ndam ta naa

¹ Jeju təl pa gə je tar gə gusutar to gə ɗangə na:

² Ɓeko̰ gə dara le to ɗəw kara baa gə mbay gə ɗa ndam ta naa mba ngon-e.

³ N-ula ngan njekulaje lə-a n-ar-je ꞌɓar dəwje gə ꞌɓar-je lo ta naa gə nee le, ngaa dəwje le ꞌnjigi ɗe ang.

⁴ N-təl n-ula ngan njekulaje gə kɛm ja cibi na: ꞌPaje ar-je dəwje gə ꞌɓar-je le na m-gɔl nekusa lə-m, m-tɔl bɔ mangəje gə daje lə-m gə ər ndub-ndub, neje tɔ̰y to kɛgɛgɛ ngaa ꞌɗeje lo ɗa ndam ta naa gə le.

⁵ Ngaa kəm-je cɛdə kəne ang, d-ɔdə d-aw, dəw gə nee aw ndɔɔ lə-a, dəw gə kən aw lo ɗabə ne ndogo gə lə-a.

⁶ Ngaɓa nje gə kɛm d-uwa ngan njekulaje le ꞌɗaje məyɛr ngaɓa ꞌtɔl-je.

⁷ Mə mbay o̰-ɛ; ɗaa ula njeɗɔje lə-a, ar ꞌrəndə nje tɔl dəwje nee le tɔ̰y ngaɓa ꞌɗo ɓebo lə-je tulug-tulug.

⁸ Be ɓa mbay le təl pa ar ngan njekulaje lə-a na: Nekusa ɗa ndam ta naa le to jəbə, ngaa dəwje gə ꞌɓarje kəne le m-o-je unja-m ang.

⁹ Awje tɔ ɗəwje gə, ɓo dəwje tɔ̰y gə a kingaje-je ja nama ꞌɓarəje-je ar ꞌɗe lo ndam ta naa gə nee le.

¹⁰ Ngan njekulaje le d-ɔdə d-aw tɔ ɗəwje gə, ꞌmbo̰ dəwje tɔ̰y gə d-inga-je, njeməyɛrje gə njeməmayje, ar njekusa neɗa ndam ta naaje ꞌɗusu lo pur-pur.

¹¹ Logə mbay le andə lo ɗa ndam gə mba tən dəwje gə ꞌɓarəje le ko ɗaa, a lo o dəw kara horo-je gə ula kubu kaw lo ndam ta naa gə ang.

¹² N-pa n-ar-ɛ na: Njekura lə-m, ɗa ban ɓa ꞌi andə lo gə nee gə lal kula kubu gə kar ndam ta naa wa? Dəw nee le isi t-ɛ munduru.

¹³ Be ɓa mbay pa ar ngan njekulaje na: ꞌTɔje gɔl-ɛ gə ji-a, ɗaa ila-je cil ciməri gə ɗaga, lo gə dəwje d-a no kəne gə d-a kusa ngangəje kəne mɔr-mɔr.

¹⁴ Mba ꞌɓar dəwje bula, ngaa nje gə ꞌmbərə-je njɛɓərɛ baa.

Lar gədə ɓe lə Sejar

¹⁵ Be ɓa Parijiyɛ̰je d-aw d-uwa dɔ naa ꞌsangə ɗəw mba pa tar kuwa ne Jeju gə go tar gə a ce t-ɛ gə ja.

¹⁶ D-ula ngan njenendoje lə-je gə nje koso gəl Erɔdə gə je ɓə lə Jeju na: Njenetɔji, j-a gərə to gə ꞌto nje pa tar gə tɔgərɔ nəm, ꞌtɔji dəwje ɗəw lə Luba gə tɔgərɔ, ꞌɓəəl ne kəm dəw ang, mba ꞌi o pa kun darɔ lə dəwje gə ɗaga baa ang.

¹⁷ ꞌPa tar gə mə kəji gə lə-i ɔji dɔ tar gə nee ar-si j-o: Ɗəw to kar dəw uga lar gədə ɓe lə Sejar ose uga ang wa?

¹⁸ Ngaa Jeju gərə kəji lə-je gə kṵra̰y ɗaa, ila-je kəne na: Njetar mulaje, mba ɗi ɓa ꞌna-mje ne wa?

¹⁹ ꞌTuji-mje lar gə d-aw d-uga ne lar gədə ɓe le ar-mje m-o. Ɗaa ꞌtɔj-ɛ sulay kara.

²⁰ Jeju təl dəji-je na se: Ndaji njil dɔ na, gə ri na ɓa d-uja kəne wa?

²¹ D-ila-a kəne na: To kar Sejar. Be ɓa Jeju pa ar-je na: Ne gə to kar Sejar nama ar-je Sejar, ne gə to kar Luba nama ar-je Luba.

²² Tar gə d-o le dum dɔ-je ɗaa d-iya̰ Jeju d-ɔdə d-aw.

Sadusiyɛ̰je gə tar gə ɔji dɔ ndol lə nje gə d-uy

²³ Mə ndɔ-ɛ gə əng ja, Sadusiyɛ̰je gə kɛm ꞌɗe d-inga Jeju. Sadusiyɛ̰je gə ꞌpa na dəw uy nama ndol ang le, ꞌdəji-e tar na:

²⁴ Njenetɔji, Moyiji pa na: To gə ɓo dəw uji nganje ang baa ɓa uy nama, ngon ko̰-ɛ a ta jene nduba lə-a mba kunda ne ko ngon ko̰-ɛ gə uy le.

²⁵ To gə be ɓa, ngan ko̰ naaje siri d-isi mə ɓe gə lə-si ɗaa, dəw gə dɔngɔr ta jene ɗa uy, lal kuji ne nganje, ɗaa ngon ko̰-ɛ ɗe t-ɛ gə jene nduba.

²⁶ Ye gə njekum gə joo le kara to gə bənəng, ngaɓa njekum gə munda nəm, to gə be ja saar ce ne dɔ njekum gə siri gə.

²⁷ Go-je gə tɔ̰y ɗaa, jene le kara uy tɔ.

²⁸ Ngaa ndɔ gə dəwje gə d-uy d-a ndol le, se na ɓa horo ngan ko̰ naaje gə siri ne le n-a to jene lə-a wa? Mba t-ɛje gə ta ja gə kəm-je gə siri tɔ̰y.

²⁹ Jeju ila-je kəne na: ꞌndəəmje, mba ꞌgərəje Mbede lə Luba ang nəm, gə singamongə lə Luba ang nəm tɔ.

³⁰ Mba ndɔ gə dəwje gə d-uy d-a ndol le, jingawje gə jeneje d-a ta naa ang, ngaa d-a kaw to gə anjije gə dara be.

³¹ Tar gə ɔji dɔ kuy ɓa ndol le, ꞌturaje tar gə Luba pa mə mbede gə ar-si ang wa?

³² ꞌMa m-to Luba lə Abəraham, Luba lə Ijagə, gə Luba lə Jakobo. Luba to Luba lə nje gə d-uy ang, ngaa n-to Luba lə dəwje gə d-isi kəm baa.

³³ Tar gə Jeju pa le ɗa kula rɔ bula dəwje gə d-o le gə maj-ɛ ja.

Ndu gə bo unda mar-ɛje tɔ̰y

³⁴ Parijiyɛ̰je d-o to gə Jeju bɛ̰ ta Sadusiyɛ̰je ɗaa, d-uwa dɔ naa,

³⁵ Dəw kara horo njekɔr gəl toronduje gə, ɗe dəji Jeju tar to gə be mba na ne m-e:

³⁶ Njenetɔji, ndu gə ɗa ɓa bo unda mar-ɛje tɔ̰y mə torondu gə lə Moyiji wa?

³⁷ Jeju ila kəne na: Njigi Mbayɓe, Luba lə-i, gə ngaw ur-i ja tɔ̰y, gə kəm lə-i tɔ̰y, ngaɓa gə kəji lə-i tɔ̰y.

³⁸ To ndu gə dɔngɔr gə bo unda mar-ɛje tɔ̰y.

³⁹ Njekum gə joo gə ta sə-a naa ɓa nee: ꞌNjigi njemar-i to gə darɔ-i be.

⁴⁰ Nduje gə joo ne ja to ngira torondu lə Moyiji tɔ̰y gə ne tɔ̰y gə pajambərəje tɔji dəwje.

Kirisi to ngon ka Dabidi

⁴¹ Logə Parijiyɛ̰je d-uwa dɔ naa ɗaa, Jeju dəji-je tar to gə be na:

⁴² Tar gə ban ɓa əjije dɔ Kirisi gə wa? N-to gə gəl kuji gə lə na wa? D-ila kəne na: N-to gə gəl kuji gə lə Dabidi.

⁴³ Ɗaa Jeju təl pa ar-je na: Na ban cibi ɓa logə Njil Njerɔsangə ɗusu mə Dabidi ɗaa, ɓar-ɛ Mbayɓe, logə ye pa na:

⁴⁴ Mbayɓe Luba pa ar Mbayɓe lə-m na: Isi nangə dɔ ji kɔlə-m gə. Saar gə mba kar-m m-a kar-i a lagə njeba̰a̰je lə-i gə gɔl-i.

⁴⁵ To gə ɓo Dabidi ɓar-ɛ Mbayɓe nama, n-a təl to ngon-e to gə ban cibi wa?

⁴⁶ Dəwje ꞌɓəəl mba dəji-e tar. Un kud-e dɔ ndɔ-ɛ gə əng le, dəw kara kara asə dəji-e tar ang ngaa.