Matiye 19 - Mbede Lə Luba Kone Gə Sigi

KḬ GALILE KAW GƏ JERUJALƐM Jeju pa tar cḭ naa lə jingaw je gə jene

¹ Logə Jeju pa tarje nee le tɔ̰y ila nangə ɗaa, ɔdə dɔ nangə gə Galile, aw dɔ nangə gə Jude, tura man Jurədɛ̰ gə.

² Bula bo dəwje gə kobəre ꞌndole go-e, ɗaa n-aji-je gə lo-e gə ja.

³ Parijiyɛ̰je ꞌɗe ꞌdəji-e tar mba n-ɛ nena: Ɗəw to kar jingaw tɔbə jene lə-a ɔji dɔ ne gə ban-ban gə jene ɗa gə ləl ta kəm-e gə ang wa?

⁴ Jeju təl ila-je kəne na: ꞌGərəje to gə lo kun kudu neje gə ja Luba gə Nje ɗa neje ɗa jingaw je gə jene ang wa?

⁵ Ngaɓa n-pa na: Gəl-e gə nee ɓa, jingaw a kiya̰ bɔ-ɛje je gə ko̰-ɛje ɗaa a mbo̰ naa gə jene lə-a, ꞌjeje joo kɛm d-a ɗe to darɔ gə kara baa.

⁶ Be ɓa, d-a to darɔ gə kara baa ɓo dəwje joo ang ngaa, may kar ne gə Luba tɔ naa gə le dəw tudu ang.

⁷ Parijiyɛ̰je le ꞌtəl ꞌpa d-ar-ɛ na: Mba ɗi ɓa Moyiji un ndu mba kar jingaw ar jene mbede cḭ naa ngaɓa tɔb-ɛ ne wa?

⁸ Jeju ila-je kəne na: Mba məkədərə lə-si ɓa Moyiji un ne ɗəw mba kar ꞌtɔbəje ne jeneje lə-si; ɓo lo kun kud-e gə le to gə be ang baa.

⁹ Ngaa m-pa m-ar-si: Na-na ɓa tɔbə jene lə-a, ɔji dɔ kila kuji ang ja baa, ngaɓa dəb-e nee le ta jene ɗangə nama ɓogo lo to.

¹⁰ Ngan njenendoje lə-a ꞌtəl pa d-ar-ɛ na: Ɓo p-ɛ gə be ɓa kar jingaw ɗa ne gə jene nama may ta jene ang.

¹¹ Jeju təl pa ar-je na: Dəwje tɔ̰y ꞌgərə gəl tar gə nee le ang, ngaa nje gə kɛm gə Luba ar-je ɗəb-e ja ɓa ꞌgərə.

¹² Mba dəwje gə kɛm le ꞌto mbakuduje mə ko̰-jeje gə nam ɓa d-uji-je ne to gə be, nje gə dəwje ɓa təl-je mbakuduje ngaɓa nje gə ye-je ja təl darɔ-je gə mbakuduje mba ɓeko̰ gə dara. Dəw gə asə njigi go tar gə nee le nama njigi.

Tar lə nganje gə njɛ̰-njɛ̰

¹³ Dəwje ꞌɗe gə nganje gə njɛ̰-njɛ̰ d-ar Jeju mba kar ila ji-a dɔ-je gə ngaɓa dəji Luba mba tar lə-je tɔ, ngaa ngan njenendoje d-ḭ gə je.

¹⁴ Ɗaa Jeju pa na: Iya̰je nganje ar-je ꞌɗe rɔ-m gə ɓo ɔgəje-je ang, mba ɓeko̰ gə dara le to mba nje gə to to gə nganje be.

¹⁵ N-ila ji-a dɔ-je gə ɗaa n-ɔdə lo-e gə nee n-aw.

Ngon basa̰ gə to njenekinga

¹⁶ Dəw kara ɗe inga Jeju ɗaa dəji-e na: Njenetɔji, se ne gə may gə ban ɓa m-a ɗa mba kinga ne təbə gə gə ndɔ gə ndɔ wa?

¹⁷ Jeju ila kəne na: Mba ɗi ɓa ꞌdəji-m tar gə ɔji dɔ ne gə may wa? Luba ja gə kar-ɛ baa ɓa to dəw gə may. To gə ɓo ꞌi njigi mba kinga təbə nama, ꞌngom toronduje lə Luba.

¹⁸ Ngon basa̰ le təl dəji-e na: Toronduje gə ɗa wa? Jeju təl ila kəne na: ꞌTɔl dəw ang; ꞌɓogo lo to ang, ꞌɓogo ang, ꞌɗa tar naji mbə ang

¹⁹ kila ngon kuji dɔ bɔ-ije je gə ko̰-ije gə ngaɓa ꞌnjigi njeməri to gə darɔ-i be tɔ.

²⁰ Ngon basa̰ le pa ar-ɛ na: Toronduje gə nee le m-ila kuji kəne gə maj-ɛ ja tɔ̰y, a ɗi ɓa nay kar-m ɗa cibi wa?

²¹ Jeju pa ar-ɛ na: To gə ɓo ꞌi njigi mba to dəw gə may pɛdə nama, aw odo neje lə-i tɔ̰y ꞌɗabə n-ndogo ɓo iya̰ lar-ɛ aw ar njendooje, ɗaa a kinga nebaw mə dara gə, ɓo ꞌɗe uwa go-m.

²² Logə ngon basa̰ le o tarje gə Jeju pa nee ɗaa rɔ-ɛ ləl-e ang, ar ɔdə aw mba nekingaje lə-a bula ya̰.

²³ Jeju pa ar ngan njenendoje lə-a na: Tɔgərɔ ja, m-pa m-ar-si, to ngangə ya̰ gə njenekinga kar-ɛ andə mə ɓeko̰ gə dara.

²⁴ M-təl m-pa m-ar-si ja cibi to gə, a to ngangə ya̰ kar da gə ɓar-ɛ jambal nday kəm ɗəw libi gə, ngaa njenekinga kar andə ɓeko̰ gə dara le ngangə ya̰ ja cibi.

²⁵ Logə ngan njenendoje d-o tarje gə nee le ɗaa dum kəji lə-je ar ꞌpa na: Na ja ɓa a kasə kinga kaji wa?

²⁶ Jeju a-je ji ɗaa təl pa ar-je na: To ne gə dum dɔ dəwje ngaa Luba le ne gə dum dɔ-ɛ godo.

²⁷ Be ɓa, Piyɛr un tar dəji Jeju na: A o, sijee gə j-uba neje tɔ̰y j-iya̰ ɓa j-uwa go-i nee le, ɗi ɓa a to mba-si wa?

²⁸ Jeju ila-je kəne na: Tɔgərɔ, m-pa m-ar-si, ndɔ gə ꞌma gə Ngon lə dəw m-a kisi dɔ ngəndəng mbay rɔnduba gə lə-m dɔ kar gə neje tɔ̰y d-a təl to gə sigi le, sisəy gə unje go-m le, a kisije dɔ ngəndəngje gə dɔg gə gir-e gə joo mba gangə tar dɔ gəl kuji Ijirayɛlje gə dɔg gə gir-e gə joo.

²⁹ Dəw gə ɗa-ɗa gə mba-m ꞌma ɓa uba ne mə kəy lə-a iya̰, gə ngan ko̰-ɛje, gə ko̰ nan-ɛje, gə bɔ-ɛje, gə ko̰-ɛje, gə ngan-ɛ ose mə ndɔje lə-a nama a kinga mar-ɛ bula dɔ-ɛ gə ngaɓa a kinga təbə gə gə ndɔ gə ndɔ gə nenduba.

³⁰ Be ɓa, nje gə dɔngɔr bula d-a təl to nje gə dɔ gugu ngaɓa nje gə dɔ gugu d-a təl to nje gə dɔngɔr.