Matiye 18 - Mbede Lə Luba Kone Gə Sigi

ƊƏW TO NJENETƆJI Na ɓa to dəw gə to ɓəəl ya̰ wa?

¹ Dɔ kar-ɛ gə əng ja, ngan njenendoje ꞌɗəm gə rɔ Jeju gə ɗaa dəji-e na: Na ja ɓa to dəw gə to ɓəəl ya̰ mə ɓeko̰ gə dara wa?

² Be ɓa, Jeju ɓar ngon gə njɛ̰ ila-a horo-je gə dana ngaɓa təl un tar pa ar-je na:

³ M-pa tar gə tɔgərɔ ja m-ar-si, to gə ꞌmbəl-je mə-si ar-ɛje to gə kar gə nganje gə njɛ̰-njɛ̰ be ang nama, a kandə-je mə ɓeko̰ gə dara ang magə.

⁴ Ngaɓa dəw gə ɗa rɔ-ɛ njɛ̰ baa to gə ngon gə ar nee nama nj-ɛ nee ɓa a to dəw gə to ɓəəl ya̰ mə ɓeko̰ gə dara.

⁵ Cibi dəw gə uwa ngon gə njɛ̰ kara to gə ye gə ar nee gə rɔ-ɛ gə gə ri-m nama, ꞌma ja uwa-m gə rɔ-ɛ gə əng.

⁶ Ngaa to gə ɓo dəw gə to jigi tuga koso lə ngon gə njɛ̰ kara horo nganje gə njɛ̰-njɛ̰ gə ꞌta kagə ꞌne nama, kar ꞌtɔ ər kusu ne gɔb-e gə, d-ila mə babo gə d-ar-ɛ n-njuwi man le, to nokarə lə-a ja cibi.

⁷ Tuji to kar dəwje gə dɔ nangə nee mba ɗəw gə dəw a koso dan neɗa gə kṵra̰y gə. Ɗəw gə dəw a koso ne dan neɗaje gə kṵra̰y gə le a to ja, ngaa tuji uba dəw gə to ɗəw koso dan neɗa gə kṵra̰y gə!

⁸ To gə ɓo ji-i ose gɔl-i ɓa to ɗəw koso dan neɗa gə kṵra̰y gə lə-i nama may kar ꞌgangə ila kɔrɔ; mba kinga kaji gə ji-i kara ose gə gɔl-i kara, may unda ye gə kar aw gɔl-i gə joo ose ji gə joo to gə maj-ɛ ja ɓa aw ne kəm pər gə a to gə ndɔ gə ndɔ.

⁹ To gə ɓo kəm-i to ɗəw koso dan neɗa gə kṵra̰y gə nama ɔr-ɛ ila-a kɔrɔ əw. May ya̰ mba kinga təbə kəm-i kara, unda kar kəm-i ga̰ joo kɛm ɓa d-un-i d-ila-i dan pər gə a kṵy ang gə.

¹⁰ Oje gə maj-ɛ, əwje rɔ-si dabəje ngon kara dasəra horo nje gə d-o-je gə ne ang gə mba m-pa m-ar-si to gə, anjije lə-je gə dara d-a lo gə kəm Bɔy gə isi mə dara jaga ja.

¹¹ Mba ꞌma gə Ngon lə dəw m-ɗe mba kaji nje gə d-igi.

Gusutar gə ɔji dɔ ngon badəm gə igi

¹² To gə dəw kara badəmje lə-a tɔl kara, ɗaa ꞌye gə kara igi, se n-a kiya̰ nje gə dɔg ji nay kara gə gir-e gə ji nay kara dɔ ər gə mba kaw sangə ꞌye gə igi le ang wa? Əjije kəne to gə ban wa?

¹³ To gə ɓo n-təl n-inga badəm lə-a gə kara le nama, tɔgərɔ ja m-pa m-ar-si, rɔ-ɛ ləl-e ya̰ dɔ-ɛ gə unda nje gə dɔg ji nay kara gə gir-e gə ji nay kara gə d-igi ang.

¹⁴ Ɗəw kara baa, to gə Bɔ-sijee gə isi dara kara njigi kar nje gə d-o-je gə ne ang nee le mar-ɛ kara baa ja kara igi ang.

Tar kɔr tar neɗa gə kṵra̰y dɔ dəw gə

¹⁵ To gə ɓo ngon ko̰-i ɗa neɗa gə kṵra̰y nama, aw inga-a gə kar-ɛ ja ꞌpa tar-ɛ kəm-e gə. To gə ɓo n-o tar ta-i gə ɗaa, ꞌi le inga ngon ko̰-i le nam.

¹⁶ Ngaa to gə ɓo n-mbadə ko tar ta-i gə ɗaa, təl aw sangə dəw kara ose dəwje j-o um-je dɔ-i gə ja cibi ɓa gə mba kar ꞌgɔlje ne tar nee le, kar dəwje gə joo ose munda nee le ꞌto njetar naj-ɛje.

¹⁷ To gə ɓo n-mbadə ko tar ta-je gə cibi nama aw pa Mbo̰ naa lə njetakagəje, a ɓo n-mbadə ko tar ta njetakagəje gə ja cibi nama o-e gə dəw gə njegərə Luba ang ngaɓa gə njembo̰ lar gədə ɓe nəm.

¹⁸ Tɔgərɔ ja, m-pa m-ar-si, ne tɔ̰y gə a tɔ-je dɔ nangə nee nama d-a tɔ dara tɔ, a ɓo neje tɔ̰y gə a tudu-je dɔ nangə nee nama d-a tudu dara tɔ.

¹⁹ Tɔgərɔ, m-təl m-pa m-ar-si ja cibi, ne gə ban-ban ja ɓa ndu dəwje joo asə naa kəne dɔ nangə nee, ɓa ꞌdəji nama, Bɔy gə isi dara a kar-je ja.

²⁰ Mba lo gə dəwje joo ose munda ꞌmbo̰ naa kəne gə ri-m, nama m-ga̰ horo-je gə.

²¹ Be ɓa, Piyɛr ngɛsə ɗe mbɔr Jeju gə ngaɓa təl dəji-e na: Mbay, logə ngon ko̰-m ɗa sə-m neɗa gə kṵra̰y le, m-a kɔr tar dɔ-ɛ gə gɔl kandə wa? Se saar gɔl siri wa?

²² Jeju təl ila-a kəne na: M-pa m-ar-i na: Gɔl siri baa ang, ngaa saar gɔl dɔg siri, lo siri.

Ngon njekula gə o kəmtondoo lə dəw ang

²³ To gə be ɓa, ɓeko̰ gə dara to ɗəw kara baa to gə mbay gə njigi kar njekulaje lə-a ꞌtura go nekingaje gə um ji-je d-ar-ɛ.

²⁴ Logə n-un kudu tura neje le ɗaa, ꞌɗe gə ngon njekula kara gə ɓangə lar to dɔ-ɛ gə to ɓəəl gə asə kuga ang.

²⁵ Ngaa ngon njekula nee le, ne kara gə a kuga ne ɓangə le godo, ɗaa ꞌɓəə-eje le un ndu ar-je na: D-uwa-a gə jene lə-a gə ngan-ɛ gə nekingaje lə-a tɔ̰y ja d-aw ꞌɗabə-je ɓo ꞌɗe d-uga ne ɓangə le.

²⁶ Ngon njekula le ce oso no gɔl ɓəə-eje gə burugə unda ꞌburamba ngaɓa pa na: Mbay, ila mə-i dɔ mar-ɛ gə, ɗaa m-a kuga ɓangə lə-i le tɔ̰y ja.

²⁷ Be ɓa mbay le o kəmtondoo lə ngon njekula lə-a, ɗaa ɔr ɓangə le dɔ-ɛ gə iya̰ ar-ɛ n-aw.

²⁸ Logə ngon njekula le aw, ɗaa inga njeba-ɛ lə-a kara gə ɓangə lar lə-a asə ye n-a kuga ɓəə-eje ang to dɔ-ɛ gə gubay. N-al n-uwa, n-um ji-a gɔb-e gə mbḭrḭ na: Uga ɓangə lə-m.

²⁹ Njeba-ɛ lə-a le təl oso nangə no gɔl-ɛ gə no na: Ila mə-i dɔ mar-ɛ gə ɗaa, m-a kuga ɓangə lə-i ja.

³⁰ Ngaa ngon njekula nee le mbadə kɔ̰y ja; cibi uwa njeba-ɛ lə-a aw ila kəy kula mba kar-ɛ uga ɓangə lə-a le gə no ja ɓa.

³¹ Logə njeba-ɛje lə-a gə kɛm d-o ne gə n-ɗa le be ɗaa mə-je ləl-je ang ar ꞌtəl d-aw ꞌpa tar-ɛ tɔ̰y d-ar ꞌɓəə-jeje o.

³² Be ɓa ꞌɓəə-ejeje le təl ula ɓar ngon njekula nee le ngaɓa pa ar-ɛ na: ꞌTo ngon njekula gə mə-i kṵra̰y, logə ꞌi ce oso no gɔl-m le ꞌma m-iya̰ go ɓangə gə to dɔ-i gə le tɔ̰y ja m-ar-i.

³³ Ɗaa asə ko kəmtondoo lə njemar-i to gə ꞌma m-ɗa ne sə-i ang wa?

³⁴ Mə ꞌɓəə-jeje le o̰-ɛ ya̰, ɗaa ar-je d-uwa-a d-ila-a kəy kula gə mba kar-ɛ n-təl n-uga ɓangə le ja ɓa.

³⁵ To gə be ja tɔ ɓa Bɔ-sijee gə dara a ɗa ne gə dəw gə mbadə kɔr tar dɔ ngon ko̰-ɛ gə gə mə nda.