Matiye 17 - Mbede Lə Luba Kone Gə Sigi

Jeju mbəl rɔ-ɛ dɔ ər gə

¹ Ndɔ misa̰ go-e gə ɗaa, Jeju ɔr Piyɛr je gə Jagə, gə Ja̰ gə ngon ko̰ Jagə n-aw gə je nganga̰ dɔ ər gə ndəw gə.

² N-mbəl rɔ-ɛ kəm-je gə: Ngo no-ɛ ndogo to gə kar be, ngaɓa kubuje lə-a kara nda kələw-kələw to gə lokarə be.

³ Cibi Moyiji je gə Eli ꞌce d-ar d-o-je ngaɓa ꞌto̰ sə-a tam.

⁴ Piyɛr un tar pa ar Jeju na: Mbayɓe, to may ya̰ kar j-isije lo gə nee gə; to gə ɓo ꞌi njigi nama m-a ɗa kəy lo munda kara a to kar-i, kara a to kar Moyiji, ngaɓa kara a to kar Eli tɔ.

⁵ Logə Piyɛr aw pa tar be ja ɓi ɗaa, kil lə nji gə kasə rogo-rogo ɗe dəbə dɔ-je gə rigim. Ɗaa ndu dəw ɓar mə kil lə nji gə le na: ꞌNe gə nee le n-to Ngon njigi lə-m, gə n-to ngira rɔləl lə-m, oje tar t-ɛ gə.

⁶ Logə ngan njenendoje d-o be ɗaa, ɓəəl unda-je badə gangə-je, ar ce d-oso dəbə kəm-je nangə.

⁷ Ngaa Jeju təl ɗe, uwa-je gə ji-a ngaɓa pa na: ꞌƁəəl-je ang, ḭ-je taar!

⁸ Logə d-ɔr dɔ-je taar ɗaa d-o Jeju gə kar-ɛ baa.

⁹ Logə d-aw ɗisi dɔ ər dɔ-je gə nangə ɗaa, Jeju un ndu ar-je na: Ne gə oje nee le, a paje tar-ɛ kar dəw o ang saar mba kar ꞌma gə Ngon lə dəw m-a ndol horo nje gə d-uy gə.

¹⁰ Ngan njenendoje dəji-e tar to gə be: Mba ɗi ɓa njekɔr gəl toronduje ꞌpa na may kar Eli ɗe kede ɓa wa?

¹¹ Jeju ila-je kəne na: Tɔgərɔ ja, Eli ɗe ngaɓa a gɔl neje tɔ̰y.

¹² Ngaa m-pa m-ar-si to gə Eli ɗe nam ja, ngaa ꞌgər-e ang ɗaa ꞌɗa sə-a ne gə mə-je njigi. Be ɓa ꞌma gə Ngon lə dəw kara m-a ko ꞌməsərə ji-je gə tɔ.

¹³ To gə be ɓa Ngan njenendoje gərə to gə Jeju aw pa tar lə Ja̰ Njeɗabatɛm.

Jeju aji ngon gə njil gə kṵra̰y ula kəm-ɛ ndoo

¹⁴ Logə Jeju je gə ngan njenendoje lə-a ɗe dəb gə bula dəwje ɗaa, jingaw kara ɗe rɔ Jeju gə ngaɓa um məkəji-e nangə no-ɛ gə, ɗaa pa na:

¹⁵ Mbay, o kəmtondoo lə ngon-m na to njeməngərə ngaɓa o ko̰ ne ya̰. N-aw n-oso pədə ose n-aw n-oso man taar-taar nəm tɔ.

¹⁶ Be ɓa m-ɗe sə-a m-ar ngan njenendoje lə-i, ngaa d-asə kaj-ɛ ang.

¹⁷ Jeju ila kəne na: ꞌToje dəwje nje məkədərəje, ꞌtoje njetula pa nja-je naa gə je, m-a ga̰ gə si saar ndɔ gə ɗa gə wa? Ose m-a kore uru-m dɔ si gə saar ndɔ gə ɗa gə wa? ꞌƊe-je gə ngon le ar-mje.

¹⁸ Jeju ndangə njil gə kṵra̰y le gə singa ɗaa njil le ce mə ngon gə le ar-ɛ aji gə lo-e gə əng ja.

¹⁹ Be ɓa, ngan njenendoje ꞌɗe mbɔr Jeju gə ngaɓa pa sə-a tar gə kar-ɛ baa na: Mba ɗi ɓa j-asə tɔbə ne njil gə kṵra̰y nee ang wa?

²⁰ Jeju pa ar-je na: Mba takagə lə-si njɛ̰ baa. Tɔgərɔ, m-pa m-ar-si, to gə ɓo takagə lə-si to yəm-yəm baa to to gə kandə kam nay gə ri-a na mutarədə ja kara, ꞌpaje ar-je ər gə ar na: Ɔdə gə nu nama n-a kɔdə; ne gə a kal dɔ-si kara kara a godo.

²¹ Ngaa njil gə kṵra̰y gə be le a ce ɗəw gə lə dəji gə ɗəw tɔl mə ɓo.

²² Ndɔ kara, ngan njenendoje mbo naa dɔ nangə gə Galile ɗaa, Jeju pa ar-je na: ꞌMa gə Ngon lə dəw le d-a kuwa-m kula-m ji dəwje gə;

²³ kar-je d-a tɔl-m, ndɔ gə njekum gə munda lə-a ɗaa, m-a təl ndol gugu. Gə go tar gə nee le ɗaa mə ngan njenendoje ila kasə baragə.

Jeju uga lar gədə ɓe

²⁴ Jeju gə ngan njenendoje ce mə ɓe gə Kapɛrənom, njembo̰ lar mba kəy gə lə Luba ꞌɗe dəji Piyɛr tar na: Njenetɔji lə-si le uga lar mba kəy gə lə Luba ja wa?

²⁵ Piyɛr ila kəne na: Oyo, n-uga ja. Logə n-andə kəy ɗaa Jeju ja un tar kede pa na: Simo Piyɛr, ꞌi əji kəne ban wa? Na ɓa a kuga lar gədə ɓe ose ne ndu kar mbayje gə dɔ nangə ne wa? Ngan njeɓeje ose njembaaje wa?

²⁶ Piyɛr ila kəne na: Njembaaje. Jeju təl ila kəne na: Ɗaa ngan njeɓeje d-uga ang.

²⁷ Gəl-e gə nee ɓa mba kar j-a tuji mə lar gədə ɓeje le ang ɗaa, ɔdə aw ta man bo gə, aw ila kuwi, ɗaa kənji gə a kuwa dɔngɔr ja, cɛ̰ t-ɛ ɗaa a kinga sulay kəne kara. Ɗaa un ɗe uga ne dɔ ꞌma gə ꞌi.