Matiye 15 - Mbede Lə Luba Kone Gə Sigi

Parijiyɛ̰je gə nejiɓe

¹ Be ɓa Parijiyɛ̰je gə njekɔr gəl toronduje d-ḭ Jerujalɛm ꞌɗe d-inga Jeju ɗaa ꞌpa na:

² Mba ɗi ɓa ngan njenendoje lə-i d-ila kuji dɔ nejiɓe gə lə ka-sijee ang wa? Mba ꞌtogo ji-je gə go ɗəb-e ang baa ja d-usa ne ne.

³ Jeju ila-je kəne na: A sisəy, mba ɗi ɓa ilaje kuji dɔ ndu Luba gə ang mba nejiɓe lə-si wa?

⁴ Mba Luba pa na: Ila kuji dɔ bɔ-ije gə dɔ ko̰-ije gə, cibi dəw gə taji bɔ-ɛje ose ko̰-ɛje nama d-a tɔl-ɛ gə tɔl.

⁵ Ngaa sisəy ja ꞌpaje na: Dəw gə a pa kar bɔ-ɛje ose ko̰-ɛje na: Ne gə kəm kar m-la ne sə-i le to ne gə to mba Luba, dəw gə nee le ɗəw to mba kar ila kuji dɔ bɔ-ɛje gə ose dɔ ko̰-ɛje ang baa.

⁶ Be ɓa ɗəw to mba kar dəw ila kuji dɔ nje kuj-eje gə ja ngaa sisəy ꞌcḭje tar lə Luba mba nejiɓe lə-si.

⁷ Njetar mulaje, Ejay ila mbərə gə ɔji dɔ-si gə maj-ɛ na:

⁸ Dəwje gə nee le ꞌɗɔyi-m ta-je gə baa, Ngaa mə-je to sə-m əw ya̰;

⁹ Polo-mje baa ja Neje gə ꞌtɔji le To torondu dəwje baa .

¹⁰ Go-e gə ɗaa, Jeju ɓar bula dəwje ɗaa pa ar-je na:

¹¹ ꞌTuga-je mbi-si ɓo oje gə maj-ɛ. Ne gə andə mə kil dəw gə ɓa dəw mina ne ang, ngaa ne gə ḭ mə kil dəw gə le ɓa ɗa dəw ar-ɛ mina.

¹² Be ɓa, ngan njenendoje ꞌɗəm gə mbɔr Jeju gə ꞌpa d-ar-ɛ na: Tar lə-i gə ꞌpa le to Parijiyɛ̰je ya̰ le, ꞌi gərə ang wa?

¹³ Jeju ila-je kəne na: Kagə gə ɗa-ɗa ɓa ɓo to kagə gə Bɔ-mje gə dara ɓa maa ang nama d-a kɔr gə ngira-a mɔgɔgɔ.

¹⁴ Iya̰-jeje, ꞌto nje kəm tɔje gə d-ila kagə ji nje kəm tɔje gə. To gə ɓo nje kəm tɔ ɓa ila kagə ji nje kəm tɔ mar-ɛ gə nama, d-a koso buwa gə joo kɛm.

¹⁵ Piyɛr un tar ila Jeju kəne na: Ɔr gəl kuji tar nee le ar-si joo.

¹⁶ Jeju pa ar-ɛ na: Sisəy ja kara aw-je lal gərə gəl ne ja ɓi wa?

¹⁷ ꞌGərəje ang wa? Ne gə andə mə kil dəw gə le, aw kəy sḭbo-e gə ngaɓa aw ne dɔ lo gə aw ila kɔrɔ.

¹⁸ Ngaa ne gə ce mə kil dəw gə le ḭ m-e gə, ye ɓa ar dəw mina ne.

¹⁹ Mba mə dəw ja ɓa kəjije gə kṵra̰y, tɔl dəw, ɓogo lo to, kaya, ɓogo, gangə tar kunda ta dəw gə, taji Luba ḭ kəne.

²⁰ Ye ɓa to neje gə ar dəw mina ne, ɓo kusa ne lal togo ji ɓa dəw mina ne ang.

Jene gə dɔ nangə gə Kana

²¹ Jeju ɔdə lo-e gə nee ɗaa ɔr rɔ-ɛ aw dɔ nangə gə Tir gə Sido̰.

²² Be ɓa jene gə ɓe gə Kana, ḭ dɔ nangə ɓe gə əng le, ce uru ꞌkuwi na: O kəmtondoo lə-m, Mbayɓe, Ngon ka mbay Dabidi, njil gə kṵra̰y ula kəm ngon-m gə jene ndoo ya̰.

²³ Jeju ila-a kəne ang. Ɗaa ngan njenendoje lə-a ɗəm gə rɔ-ɛ gə dəji-e na: ꞌTɔb-ɛ ar-ɛ n-aw mba n-uru ꞌkuwi go si gə.

²⁴ Jeju təl ila kəne na: Luba ula-m horo badəmje gə d-igi gə to ngan Ijirayɛlje.

²⁵ Ngaa jene le ɗe unda ꞌburamba no Jeju gə, pa ar-ɛ na: Mbayɓe, kɔgərɔ ja ꞌla sə-m.

²⁶ Jeju ila kəne na: May kun mbə ta nganje kila kar ngan bisije ang.

²⁷ Jene le təl ila kəne na: Tɔgərɔ ja Mbayɓe, ngaa ngan bisije le d-usa bum ne gə um nangə kɔy yira nekusa ne gə lə ꞌɓəə-jeje ja tɔ.

²⁸ Ɗaa Jeju təl ila-a kəne na: Jene, takagə lə-i to ɓəəl ya̰ may kar inga ne gə aw ndoo-e. Ɗaa dɔ kar-ɛ əng ja ngon-e gə jene aji kəbərə.

Jeju aji njerɔko̰je dang-dang

²⁹ Jeju ɔdə lo-e gə ɗaa uwa mbo kar man bo gə Galile. Ngaɓa uba dɔ ər aw isi kəne taar.

³⁰ Be ɓa bula bo dəwje ꞌɗe rɔ-ɛ gə gə nje nja məndəje, gə nje kəm tɔje, gə njeməndəje gə mbigije nəm ngaɓa gə njerɔko̰je gə kɛm bula ya̰ nəm tɔ. ꞌƊe gə je ꞌɗe d-umje no gɔl Jeju gə ɗaa aji-je.

³¹ Logə bula dəwje d-o ɗaa cɛdə singa-je mba mbigije gə pa tar, gə njeməndəje dang-dang gə rɔ-je təl to gə maj-ɛ, gə nje nja məndəje kara nja gə maj-ɛ nəm, gə nje kəm tɔje gə d-o lo ɗaa d-ɔsə ne gaji Luba lə Ijirayɛlje tɔ.

Jeju arə jingawje tɔl dɔg lo sɔɔ nekusa

³² Jeju ɓar ngan njenendoje lə-a ɗaa pa ar-je na: M-o kəmtondoo lə bula dəwje nee mba ndɔ munda ja ngaa d-isi sə-m, ngaa d-inga ne d-usa ang. M-njigi kun ɗəw kar d-aw ɓe baa ang na d-a kaw koso labə ɗəw boo.

³³ Ngan njenendoje ꞌpa d-ar-ɛ na: J-a ɗa ban ɓa j-a kinga mbə ndag lo gə nee kar bula bo dəwje nee le d-usa d-ar mə-je ci wa?

³⁴ Jeju pa ar-je na: Mbə kandə ɓa to ji-si gə əng wa? D-ila kəne na: Siri gə ngan kənjije njɛ̰ kəne.

³⁵ Be ɓa n-un ɗəw n-ar bula dəwje le d-isi nangə,

³⁶ ngaɓa n-odo mbə gə siri gə kənji le n-tɔr ndu-e dɔ-ɛ gə ngaɓa n-cɛdə dana n-ar ngan njenendoje lə-a kay-je.

³⁷ Dəwje tɔ̰y d-usa ne d-ar mə-je ci, ɗaa d-odo dɔ dum-e karɛ siri.

³⁸ Dəwje tɔ̰y gə d-usa ne le d-asə jingawje tɔl dɔg lo sɔɔ, lal tura jeneje gə nganje.

³⁹ Jeju tɔbə bula dəwje ar-je d-aw ɗaa ɔdə al to, aw dɔ nangə gə Magada̰.