Matiye 14 - Mbede Lə Luba Kone Gə Sigi

Nemisije gə tar pa lə Parijiyɛ̰je

¹ Dɔ kar-ɛ gə əng le, Erɔdə Antipas gə to njeko̰ ɓe gə Galile, o tar gə ɔji dɔ Jeju

² ɗaa pa ar njeka̰ykulaje lə-a na: To Ja̰ Njeɗabatɛm gə uy le ɓa təl ndol ɗaa ye ɓa inga ne singa ɗa ne nemisije.

³ Erɔdə pa to gə be mba ꞌne ja n-ar-je d-uwa Ja̰ ꞌtɔ-ɛ gə kula lar, d-ila-a kəy kula gə mba tar lə Erɔdiyadə gə to jene lə ngon ko̰-ɛ Pilibi.

⁴ Mba Ja̰ pa ar Erɔdə na: D-un ɗəw d-ar-i kar ꞌta jene lə ngon ko̰-i ang baa.

⁵ Be ɓa Erɔdə sangə ɗəw mba kar ꞌtɔl-ɛ, ngaa ɓəəl bula dəwje mba d-o Ja̰ gə pajambərə gə tɔgərɔ ja.

⁶ Logə ndɔ ɗa nay kuji Erɔdə asə ɗaa, ngon lə Erɔdiyadə gə jene uru dana gə la ɗaa la le ləl Erɔdə ya̰,

⁷ ar n-un ndu-a n-ar ngon mandə le na: Ne gə ꞌdəji ja nama m-a kar-i.

⁸ Gə go sula gə ko̰-ɛje sula-a le ɗaa ngon mandə le pa na: Ila dɔ Ja̰ Njeɗabatɛm ja mə ka gə gə tɔg-ɛ ar-m.

⁹ Rɔ mbay ləl-e ang, ngaa mba n-un ndu-a ɗɔdə no bula dəwje gə ꞌɓar-je nəm tɔ ɗaa, n-un ɗəw kar d-ar ne gə ngon mandə dəji le.

¹⁰ Be ɓa n-ula-je n-ar-je d-aw gangə dɔ Ja̰ le mə kəy kula gə;

¹¹ ɗaa d-ila mə ka gə ꞌɗe nee d-ar ngon mandə le ta aw ne ar ko̰-ɛje.

¹² Ngan njenendoje lə Ja̰ ꞌɗe d-un nin-e ꞌdubu, ngaɓa d-aw ꞌpa tar-ɛ d-ar Jeju.

Jeju ar nekusa dəwje tɔl-tɔl dɔg lo mi

¹³ Logə Jeju o tar yo Ja̰ Njeɗabatɛm le ɗaa ɔdə lo-e gə, al to aw ər gə ndag lo gə ngərəng. Logə bula dəwje d-o tar-ɛ ɗaa d-ɔdə mə ɓebo gə, ꞌndole go Jeju gə gɔl-je.

¹⁴ Logə Jeju ḭ mə to gə uru nangə ɗaa, o bula dəwje, ɗaa o kəmtondoo lə-je, ngaɓa aji njeməndəje gə d-ar kəne.

¹⁵ Kar kumatagə ɗaa ngan njenendoje ꞌɗəm gə rɔ-ɛ gə ꞌpa d-ar-ɛ na: Lo gə nee le to ndag lo, ngaɓa kar kara nday ya̰ nəm tɔ ɗaa, ꞌtɔbə bula dəwje le ar-je d-aw mə ɓeje gə d-aw ꞌndogo neje d-usa.

¹⁶ Jeju ila-je kəne na: Kəm kar d-aw ang; sisəy ja ar-jeje ne d-usa.

¹⁷ Ngaa ꞌpa d-ar-ɛ na: Mbə mi gə kənji joo ja baa ɓa to ji-si gə nee.

¹⁸ Jeju pa na: ꞌƊe-je ne ar-mje.

¹⁹ N-un ndu n-ar dəwje kar d-isi nangə dɔ mu gə, ɗaa n-odo mbə gə mi gə kənji gə joo le, ɗaa n-un kəm-e gə dara, n-tɔr ndu-e kəne, cibi n-cɛdə n-ar ngan njenendoje ꞌkay bula dəwje le.

²⁰ Dəwje tɔ̰y d-usa d-ar mə-je ci, ɗaa d-odo dɔ dum-e gə nay karɛ dɔg gə gir-e gə joo.

²¹ Dəwje tɔ̰y gə d-usa ne le d-asə tɔl dɔg lo mi, lal tura jeneje gə nganje.

Jeju nja dɔ man bo gə

²² Go-e gə ɗaa, Jeju ɔsə ngan njenendoje ar d-al to mba kar d-aw tura əər kara gə kede, logə n-a nay mba tɔbə bula dəwje kar-je d-aw.

²³ Logə Jeju tɔbə dəwje ɗaa, uba dɔ ər gə mba kaw kisi ngərəng, dəji Luba. Kar kumatagə ɗaa, Jeju ar gə kar-ɛ baa.

²⁴ To le aw əw ya̰ gə kar mbal, ləl ula tila kəm-e ɗaa ꞌpagəm tuga ar to ləngə.

²⁵ Aw gə ji dɔɔɓe gə ɗaa, Jeju nja dɔ man gə, aw dɔ-ɛ gə ɓə lə-je.

²⁶ Logə ngan njenendoje d-o-e n-aw n-nja dɔ man gə ɗaa, kəji lə-je turu buguju ar ꞌtəl ꞌpa na: To uma! Ɓəəl unda-je badə gangə-je ar d-uru ꞌkuwi.

²⁷ Jeju pa ar-je gə tɔg-ɛ baa na: Isije ɗɛgɛgɛ, to ꞌma ja, ꞌɓəəlje ang!

²⁸ Piyɛr təl ila-a kəne na: Mbayɓe, ɓo to ꞌi ja nama un ndu-i ar-m m-nja dɔ man gə m-aw m-inga-i.

²⁹ Jeju pa ar-ɛ na: Ḭ ꞌɗe. Piyɛr ḭ mə to gə, nja dɔ man gə, aw gə rɔ Jeju gə.

³⁰ Ngaa Piyɛr ɓəəl mba ləl gə ula gə singa ya̰ ɗaa n-un kudu njuyi man, ngaɓa n-uru ꞌkuwi na: Mbayɓe, ꞌta-m ɓo.

³¹ Jeju ula ji-a gə tɔg-ɛ baa uwa ne Piyɛr ngaɓa təl pa ar-ɛ na: ꞋI ꞌto dəw gə takagə lə-i əngə, ꞌma̰y tar mba ɗi wa?

³² Logə d-al to ɗaa, ləl gangə njɛd.

³³ Be ɓa ngan njenendoje tɔ̰y gə d-isi mə to gə le d-unda ꞌburamba no Jeju gə ngaɓa ꞌpa na: ꞋI to Ngon lə Luba to gə tɔgərɔ ja.

³⁴ Logə ꞌgangə man tɔ̰y ɗaa, ꞌce dɔ nangə gə Jenejarɛd.

³⁵ Dəwje gə njeɓeje ꞌgərə Jeju, ɗaa d-ula kula d-ar ɓeje gə gugu dɔ-je ɗaa ꞌɗe gə njerɔko̰je tɔ̰y d-ar-ɛ.

³⁶ ꞌƊa Jeju kɔgərɔ kar iya̰ ɗəw ar d-uwa ta kubu lə-a ja baa. Be ɓa dəwje tɔ̰y gə d-ɔr rɔ-ɛ le, d-aji kəbərə ja tɔ.