Matiye 13 - Mbede Lə Luba Kone Gə Sigi

GUSUTAR GƏ ƆJI DƆ ƁEKO̰ GƏ DARA Gusutar gə ɔji dɔ njendɔ gə aw ila kər

¹ Dɔ ndɔ-ɛ gə əng le, Jeju ɔsə lo kəy ce, aw isi ta babo gə.

² Bula dəwje ꞌɗe ꞌmbo̰ naa mbɔr-ɛ gə ar n-al n-isi mə to gə. Bula dəwje tɔ̰y d-ar dɔ ꞌnangəra̰ gə.

³ Jeju pa gə je tar kur-e əw ya̰ gə gusutarje, na:

⁴ Dəw gə njendɔ ce aw mba kaw kila kər. Logə n-aw n-ila kər le ɗaa kand-e gə kɛm um mbɔr ɗəw boo njal-njal, əlje ꞌɗe d-o̰.

⁵ Kandə kər gə kɛm um dɔ ranga gə nangə ndər kəne ang ɗaa ce gə tɔg-ɛ baa ngira inga lo kandə nangə ya̰ ang baa,

⁶ ngaa logə kar ɔsə ngaɓa tunga ɗaa ɗa kər gə ce le ar-ɛ tudu mba ngira-a andə nangə ang.

⁷ Kandə kər gə kɛm um horo kunje gə, logə kunje ḭ ɗaa udu dɔ-ɛ.

⁸ Mar-ɛje gə kɛm um dɔ nangə gə may gə, ɔr dɔ, ɗaa dɔ-ɛ gə kara unda kand-e tɔl, ye gə nee unda dɔg misa̰, ye gə ɗangə unda dɔg munda.

⁹ May kar dəw gə mbi-a ga̰ nama o ne.

¹⁰ Ngan njenendoje lə Jeju ꞌɗe mbɔr-ɛ gə ngaɓa ꞌdəji-e na: Mba ɗi ɓa ꞌpa ne gə je tar gə gusutar wa?

¹¹ Jeju ila-je kəne na: Luba ar-sisəy ꞌgərəje tar ɓeko̰ gə dara gə to lokiya gə, ngaa n-ar ꞌjeje ꞌgərə ang,

¹² mba dəw gə ne ga̰ ji-a gə ɓa d-a kar-ɛ mar-ɛ ɗaa a ɗusu ji-a, ngaa dəw gə ne godo ji-a gə le, ye gə ga̰ ji-a gə njɛ̰ ja kara d-a ta ɗɔdə.

¹³ Gəl-e gə nee ɓa, m-pa ne gə je tar gə gusutar, mba d-a ne nda̰a̰ kara d-o ang ngaɓa ꞌtuga mbi-je d-o ne tar kara tar le andə mbi-je ang nəm, ɓa gərə gəl-e ang nəm tɔ.

¹⁴ Mba tar lə-jeje ja ɓa tar gə pajambərə Ejay pa kede nam le aw ne lo-e gə na: A koje tar gə maj-ɛ ngaa a gərəje gəl-e ang magə A kaje lo gə maj-ɛ ngaa a koje lo ang

¹⁵ Mba mə dəw mə ɓeje nee le təl kədərə D-udu mbi-je jigi, ngaɓa ꞌɓiri kəmje mbḭ, Na d-a kḭ ko gə kəm-je ngaɓa gə mbi-je, Mba gərə gəl-e dɔ ɓəngərə-je gə, Ɗaa d-a mbəl kəji lə-je mba kar m-aji-je ne .

¹⁶ Ngaa sisəy le nokarə to kar-si mba oje gə kəm-si, mba tuga-je mbi-si oje ne.

¹⁷ Tɔgərɔ, m-pa m-ar-si, pajambərəje bula, gə dəwje gə gadə-gadə ꞌnjigi mba ko ne oje nee gə kəm-je ngaa d-o ang baa, ꞌnjigi ko tar neje nee gə mbi-je ngaa d-o tar-ɛ ang baa.

¹⁸ ꞌTugaje mbi-si oje ne gəl gusutar gə ɔji dɔ njekila kər le.

¹⁹ Kandə kər gə um mbɔr ɗəw boo njal-njal le, to dəwje gə ꞌtuga mbi-je d-o ne tar gə ɔji dɔ ɓeko̰ ɗaa ꞌgərə gəl-e ang. Njeməkṵra̰y ɗe ɔr tar gə ꞌdubu mə-je gə le ɗɔdə.

²⁰ Dɔ ranga to asə naa gə dəw gə o tar ɗaa ta gə tɔg-ɛ baa gə rɔləl,

²¹ ngaa tar le ula ngira-a m-e gə gə maj-ɛ ang, to dəw gə m-e to dɔ tar waga baa, a ɓo lo gə kula kəm naa ndoo ose nekəmandoo gə ɔji dɔ tar lə Luba ce dɔ-ɛ gə nama ꞌmbadə takagə lə-a.

²² Kandə kər gə um mə kunje gə le nay ɗəw kara baa gə dəw gə tuga mbi-a o ne tar lə Luba, ngaa no rɔ gə ɔji dɔ kəji neje gə nangə nee, gə ɓo nekingaje, ɗe udu dɔ tar lə Luba gə n-o le ngaɓa ɗa ar kand-e godo.

²³ Kandə kər gə um dɔ nangə gə may gə le to dəw gə tuga mbi-a o ne tar lə Luba ngaɓa gərə gəl-e. Kand-ɛ gə kara andə tɔl, ye gə ɗangə dɔg misa̰, ngaɓa ye gə ɗangə andə dɔg munda.

Gusutar gə ɔji dɔ waa da̰w

²⁴ Jeju təl un gusutar gə ɗangə pa ar-je na: Ɓeko̰ gə dara to asə naa gə dəw gə aw dubu ko wa gə may mə ndɔ gə lə-a.

²⁵ Ngaa logə dəwje tɔ̰y d-aw cibi ɗaa, njeba̰a̰ lə-a ɗe dubu waa da̰w horo wa gə le ɗaa ɔdə aw lo lə-a

²⁶ Logə waa ce gə unda ɗaa, waa da̰w to hor-e gə tɔ.

²⁷ Ngan njekulaje ꞌɗe ꞌpa d-ar njendɔ le na: ꞌƁəə-sijee, se ꞌi dubu ko gə may ɓa mə ndɔ gə ang wa? Waa da̰w ḭ ɗa cibi ɓa ɗe to mə ndɔ gə ne wa?

²⁸ N-ila-je kəne na: To njeba̰a̰ ɓa ɗe ɗa kula kən. Ngan njekulaje ꞌtəl ꞌpa d-ar-ɛ na: ꞋI njigi kar-si j-aw tɔr wa?

²⁹ Njendɔ le təl pa na: Əw-je rɔ-si mba logə aw tɔr-je waa da̰w nama a kḭ tɔr-je ne gə wa naa gə.

³⁰ Iya̰-je ar-je tɔgə naa gə kara baa ɗaa, ndɔ kunja ko ɓa m-a pa kar njekunjaje d-ɔr waa da̰w le ꞌtɔ mba ro nam ngaɓa, go-e gə ɗaa d-a kiya̰ wa gə may kum mə dam gə lə-m.

Gusutar gə ɔji dɔ kandə mutarədə

³¹ Jeju pa gusutar gə ɗangə ar-je na: Ɓeko̰ lə Luba ta naa gə kandə kam nay gə ri-a na mutarədə gə dəw un aw dubu mə ndɔ gə lə-a.

³² To kandə ko gə na ya̰ unda kandə kam nayje gə kɛm tɔ̰y, ngaa logə tɔgə ɗaa təl to kagə kam nay gə bo, mba kar əlje gə dara ɗa kəy ba-ɛ̰je gə.

³³ Jeju pa gusutar gə ɗangə ja cibi ar-je na: Ɓeko̰ gə dara ta naa gə guway kodo gə jene un um mə nduji gə d-ɔji ngo munda mba mbo̰y ne saar kar ḭ tɔ̰y.

³⁴ Jeju pa tarje nee tɔ̰y ar bula dəwje gə gusutar, ngaɓa n-pa gə je tar lal gusutar ang.

³⁵ Mba kar tar gə pajambərə ila mbər-e le to ne lo-e gə: M-a pa gə je tar gə gusutar, M-a kila mbərə neje gə to lokiya gə logə Luba ɗa ne dara gə dɔ nangə .

Jeju ɔr gəl gusutar gə ɔji dɔ waa da̰w

³⁶ Jeju iya̰ bula dəwje ngaɓa ɔdə aw andə kəy. Ngan njenendoje ꞌɗe ꞌdəji-e na: Ɔr gəl gusutar gə ɔji dɔ waa da̰w gə to mə ndɔ gə le ar-si j-o.

³⁷ Jeju ila-je kəne na: Dəw gə dubu ko gə may le to ꞌMa gə Ngon lə dəw;

³⁸ ndɔ le to dɔ nangə, kandə ko gə may to nganje gə ɓeko̰ to ɔji dɔ-je; waa da̰w to ngan lə njekundagusu;

³⁹ njeba̰a̰ gə dubu waa da̰w lə to ꞌSɛ̰ngərɛ̰; nay kunja ko le to ɗudu ndɔ gə dɔ nangə nee; njekunja koje le to anjije.

⁴⁰ Ɗəw kara baa to gə d-a mbo̰ ne waa da̰w dɔ nangə mba ro le, a to to gə be ja tɔ a dɔ ɗudu ndɔ gə.

⁴¹ ꞌMa gə Ngon lə dəw m-a kula anjije lə-m kar ꞌtɔr nje gə to jigi tuga gɔl marəje-je gə nje ɗa ne dɔ buguruje mə ɓeko̰ gə lə-m

⁴² mba kum-je dan pər gə a ko̰ bilim-bilim; lo gə d-a kusa ngangəje kəne mɔr-mɔr gə man no kəm-je gə.

⁴³ Be ɓa njeneɗaje gə gadə-gadə d-a ndogo to gə kar be mə ɓeko̰ gə le Bɔ-jeje. May kar dəw gə mbi-a ga̰ nama o ne.

Gusutar gə ɔji dɔ nekinga gə to lo kiya gə

⁴⁴ Ɓeko̰ gə dara le to asə naa gə nekinga gə iya rɔ-ɛ mə ndɔ gə. Dəw gə inga ne le ɗaa un iya to gə ɗangə, rɔ-ɛ ləl-e ya̰ ar n-ɔdə n-aw n-uwa neje lə-a tɔ̰y n-ndogo ngaɓa n-ta lar-ɛ n-aw n-ndogo ne ndɔ nee le.

⁴⁵ Ɓeko̰ gə dara gɔl kara ɓi to asə naa gə dəw gə nje ɗabə ne ndogo gə aw sangə mərje gə mandə ya̰.

⁴⁶ Logə n-inga mər gə lar-ɛ to ɓəəl ya̰ ɗaa n-ɔdə n-aw n-ɗabə neje lə-a tɔ̰y ngaɓa n-təl n-aw n-ndogo ne mər nee le.

⁴⁷ Ɓeko̰ gə dara to to gə bura gə d-ila baa ɗaa ɔr kəm kənjije ang.

⁴⁸ Logə kənjije le ɗusu mə bura ɗaa, mbawje ꞌndɔr d-aw ne kar mbalaa, d-isi nangə ꞌmbərə kənji gə may d-um mə karɛ gə, nje gə may ang ɗaa d-um kɔrɔ.

⁴⁹ Dɔbo̰ ndɔ a to to gə be: anjije d-a ɗe kɔr kəm njeməngo̰yje horo nje ɗa neje gə gadə-gadə gə

⁵⁰ mba kum-je dan pər gə a ko̰ bilim-bilim; lo gə d-a kusa ngangəje kəne mɔr-mɔr gə man no kəm-je gə.

⁵¹ Se ꞌgərəje neje ne tɔ̰y ja wa? D-ila kəne na: Oyo.

⁵² Jeju pa ar-je na: Ye ɓa, njekɔr gəl torondu gə ɗa-ɗa gə ndo ne gə ɔji dɔ ɓeko̰ gə dara to to gə njekəy gə ɔr kəm ne gə sigi, gə ne gə ləw mə nekinga gə lə-a be.

JEJU UNDA NGANGƏ KULA LƏ-A DƆ NANGƏ GƏ GALILE Jeju aw mə ɓe gə Najarɛd

⁵³ Logə Jeju ɗunga gusutarje ɗaa ɔdə lo-e gə nee,

⁵⁴ aw ɓe gə tɔgə kəne. N-tɔji dəwje ne mə kəy nendo n-ar lo tar igi-je sɛl, ngaɓa ꞌpa na: Kəmkarə gə nemisije nee le n-ḭ neɗa wa?

⁵⁵ N-to ngon lə njekunja kagə nee ang wa? Ri ko̰-ɛje na Məri ang wa? Ngaɓa, Jagə gə Jəjəb gə Simo gə Jude ꞌto ngan ko̰-ɛ ang wa?

⁵⁶ Ko̰ nan-ɛje tɔ̰y ꞌga̰ horo-si gə nee ang wa? Na ɓa ar-ɛ singamongə gə kəm karə nee wa?

⁵⁷ Ɗaa n-təl n-to jigi tuga koso no-je gə. Jeju pa ar-je na: Pajambərə lə Luba le mə ɓe kuj-e gə mə kəy gə lə-a ja ɓa ꞌdab-ɛ kəne dasəra.

⁵⁸ Ngaɓa Jeju ɗa nemisije ang mba məkədərə lə-je.