Matiye 11 - Mbede Lə Luba Kone Gə Sigi

¹ Logə Jeju unda ngangə kun ndu kar ngan njenendoje gə dɔg gə gir-je gə joo tɔ̰y ɗaa ɔdə kəne, aw mə ɓeboje gə aw tɔji dəwje ne nəm ɓa ila mbərə Tar gə May nəm tɔ.

NƏR MƏ GƏ ƆJI DƆ KULA LƏ JEJU Ja̰ Njeɗabatɛm dəji tar ɔji dɔ Jeju

² Logə Ja̰ Njeɗabatɛm to kəy kula gə le, o tar kulaje gə Kirisi aw ɗa. Be ɓa Ja̰ ula ngan njenendoje lə-a gə kɛm ar-je d-aw ꞌdəji Jeju tar na:

³ Se ꞌi ja ꞌto dəw gə a ɗe le ose j-a ngəbə dəw gə ɗangə wa?

⁴ Jeju ila-je kəne na: Neje gə oje gə mbi-si, gə kəm-si nəm le, aw ꞌpaje tar-ɛ ar-je Ja̰ to gə be:

⁵ Nje kəm tɔje d-o lo, njeməndəje ꞌnja, gə rɔ njebənjije arə ngadə nəm, mbigije kara d-o tar nəm, dəwje gə d-uy kara ꞌtəl ndol nəm ɓa, d-ila mbərə Tar gə May d-ar njendooje nəm.

⁶ Nokarə a to mba dəw gə m-a to jigi tuga koso lə-a ang. Logə d-ɔdə d-aw ɗaa,

⁷ Jeju pa ar bula dəwje na: Ɔji dɔ Ja̰ le, se ɗi ɓa aw oje ndag lo gə wa? Tuwa tɔgə gə ləl uwa bil wa?

⁸ Ngaa, ɗi ɓa aw oje wa? Dəw gə ula kubu gə bḭ may wa? Ngaa nje gə d-ula kubu gə bḭ may le d-isi kəy lə mbayje.

⁹ Se ɗi ja ɓa aw oje wa? Pajambərə wa? Tɔgərɔ ja, m-pa m-ar-si, to dəw gə nday pajambərə ja ɓi.

¹⁰ Mba to dəw gə Luba pa tar lə-a mə gə mbede gə na: A o, m-a kula njekula lə-m no-i gə, mba gɔl ɗəw kar-i a nja kəne.

¹¹ Tɔgərɔ ja, m-pa m-ar-si, horo dəwje gə jeneje d-uji-je le, dəw gə to ɓəəl ya̰ unda Ja̰ Njeɗabatɛm godo. Be ja kara dəw gə to gə ne ang mə ɓeko̰ gə dara ɗaa to ɓəəl ya̰ unda-a.

¹² Un kud-e dɔ ndɔje gə lə Ja̰ Njeɗabatɛm saar ce ne dɔ kar gə j-ar kəne nee ja, dəwje ꞌcila kəm tar ɓeko̰ gə dara gə singa, ɗaa njesingaje ɓa ꞌnar ꞌta.

¹³ Mba pajambərəje lə Luba, gə torondu lə Moyiji ꞌpa tar-ɛ kede saar ce ne dɔ Ja̰ gə.

¹⁴ Ngaa to gə ɓo ar-je pɛrɛrɛ mba takagə Ja̰ le nama, ꞌma, m-pa m-ar-si to gə Ja̰ ja ɓa to Eli gə a ɗe le.

¹⁵ May kar dəw gə mbi-a ga̰ nama o ne.

¹⁶ Na ɓa m-a kuwa gəl kuji gə nee kɔj-e ne wa? ꞌTa naa gə nganje gə d-isi nada, gə ꞌɓar ngan marəje-je na:

¹⁷ J-ɛm bula, Ɗaa ꞌmbadəje la-je ne. Ja no mangə Ɗaa ꞌmbadəje ɗaje ne rɔ-si gə ndoo.

¹⁸ Mba, Ja̰ ɗe, n-usa ne ang nəm n-ay ne nəm ɗaa, ꞌpa na: Njil gə kṵra̰y ɗa ɓe m-e gə.

¹⁹ ꞌMa gə Ngon lə dəw le, m-ɗe, m-usa gə m-ay ɗaa, ꞌpa na: Dəw gə nee le, n-to ka guru gə n-to ka mbəl-e, n-to njekura lə njembo̰ lar gədə ɓeje gə njeneɗaje gə kṵra̰y. Ngaa kəm karə lə Luba le to gadə-gadə gə go kula ɗ-ɛje.

Ɓeboje gə mbadə mbəl kəji

²⁰ Ɗaa Jeju təl pa tar gə mong-e ndangə ne ɓeboje gə ɗa nemisi kəne bula ja ngaa, dəwje gə kəne ꞌmbadə turu kəji lə-je.

²¹ Nekəmandoo to kar ꞌi ɓe gə Korajɛ̰! Nekəmandoo to kar ꞌi gə ɓe gə Bɛdəsayida! Mba nemisije gə ꞌɗa horo-si gə to gə ɓo neje nee le ꞌɗa mə ɓe gə Sido̰ gə mə ɓe gə Tir nama, ləw baa nee le, d-a turu kəji ɗəw kula kubu ndoo gə d-uji gə bḭ gum, d-a rɔgə rɔ-je bu gə.

²² Gəl-e gə nee ɓa, m-pa m-ar-si to gə ndɔ gangə tar nama, tar gə d-a gangə dɔ-si gə le, a kədərə ya̰ kunda kar ɓe gə Tir gə ɓe gə Sido̰.

²³ Cibi, ꞌi ɓe gə Kapɛrənom, se a kḭ taar gə bag-i wa? Bənəng ang baa, d-a kula-i nangə kar-i aw ɓe lə nje gə jabaw, mba nemisije gə ɗa ɓe lə-i nee le, to to gə ye gə ɓe gə Sɔdom be nama, a to saar ce ɓogəne.

²⁴ Gəl-e gə nee ɓa, m-pa m-ar-si to gə ndɔ gangə tar nama, tar gə d-a gangə dɔ ɓebo gə nee le, a kədərə ya̰ kunda kar ɓe gə Sɔdom.

Jeju pidi Luba

²⁵ Dɔ kar-ɛ gə əng le, Jeju un tar pa na: M-pidi-i, Bɔy, Mbayɓe gə dɔ dara gə dɔ nangə nee, mba neje gə nee gə iya njekəm karəje gə njenegərəje ngaa ꞌkila gəl-e ar nganje d-o.

²⁶ Oyo, Bɔy, mba ꞌnjigi kar neje to to gə be gə go məmay lə-i.

²⁷ Neje tɔ̰y ja Bɔy iya̰ mə ji-m gə, ngaɓa dəw gərə-m ꞌma gə Ngon ang, ɗaa Bɔy ja gə kar-ɛ baa, ngaɓa Bɔy ja kara dəw gər-e ang, ɗaa ꞌma gə Ngon ja ɓa m-a kila gəl-e gə ɗaga kar dəw gər-e.

²⁸ ꞌƊeje gə rɔ-m gə nee, sisəy tɔ̰y gə ɔrəje gə nekodo uway-si le, ɗaa m-a kar-si uwaje kɔr-si.

²⁹ ꞌTaje jugu lə-m ɓo ar-mje tɔji-si ne mba m-to nje məmay gə kula dɔ to mə-m gə, ngaɓa a kingaje lo kuwa kɔr lə kəm lə-si.

³⁰ Mba jugu lə-m jɔgə njekun-e ang ngaɓa nekodo lə-m ɔlɛ pɛl-pɛl.