Matiye 10 - Mbede Lə Luba Kone Gə Sigi

¹ Cibi Jeju ɓar ngan njenendoje lə-a gə dɔg gə gir-je gə joo, ar-je singamongə mba kar ꞌtɔbə ne njilje gə kṵra̰y gə d-aji ne njerɔko̰je gə njeməndəje nəm tɔ.

² Ri njeka̰ykulaje gə dɔg gə gir-je gə joo le ɓa to nee. Dəw gə dɔngɔr, to Simo gə ꞌɓar-ɛ Piyɛr, ngon ko̰-ɛ Andəre, Jagə gə ngon lə Jebede, gə ngon ko̰-ɛ Ja̰.

³ Pilibi je gə Batələmi; Toma je gə Matiye gə to njembo̰ lar gədə ɓe; Jagə gə ngon lə Aləpe, gə Tade;

⁴ Simo gə Kana gə tar ɓe lə-a o̰-ɛ, gə Judas Isikariyɔdə gə a kun dɔ Jeju le.

Jeju um kula ji ngan njekulaje gə dɔg gə gir-je gə joo

⁵ Nje gə dɔg gə gir-je gə joo nee le ɓa, Jeju ula-je ɗaa un ndu ar-je na: Dəwje gə to Jiibije ang le, awje ɓe lə-je ang, ɓa andə-je mə ɓeboje gə lə nje gə Samari ang.

⁶ Awje gə ɓe lə badəmje gə d-igi gə ɓe lə dəw mə ɓeje gə Ijirayɛl.

⁷ Aw awje ɗəw boo ɗaa, ila-je mbərə to gə ɓeko̰ gə dara nay əw ang baa,

⁸ Ajije njerɔko̰je nəm, ꞌndolje nje gə d-uy nəm ɓa ar-je rɔ njebənjije arə ngadə, ngaɓa ꞌtɔbə-je njilje gə kṵra̰y nəm tɔ. Ingaje baa ɗaa sisəy kara ar-je baa tɔ.

⁹ Unje maa ose lar nda, ose mbɛl ulaje ji ngira gə lə-si ang,

¹⁰ ngaɓa unje ɓɔl kaw mba ang, kubu gə taar gəl joo ang, ulaje sabɔgɔ ang, kagə tɔsə ang, mba njekula le a kinga nekusa t-ɛ ja.

¹¹ Mə ɓebo ose ngon ɓe gə andəje kəne nama, ꞌdəjije tar a ɓo dəw gə asə kuwa-si mba ga̰ kəne nama ꞌtoje kəy lə-a saar ndɔ gə a kɔdəje ne.

¹² Logə andəje mə kəy gə nama, unje ji-si oje ne njeməkəyje ɓa,

¹³ to gə ɓo mə kəy le asə kinga ɗɛgɛgɛ nama a kinga, a ɓo n-asə ang nama ɗɛgɛgɛ lə-si a təl ɗe kinga-si.

¹⁴ Cibi logə ɓo dəw uwa-si mba ang nəm ngaɓa o tar lə-si ang nəm ɗaa ꞌceje mə kəy gə ose mə ɓebo gə nee le ɗaa, ꞌkundaje kuru gə gɔl si gə

¹⁵ Tar gə tɔgərɔ ja m-pa m-ar-si: Ndɔ gangə tar nama, tar gə d-a gangə dɔ ɓebo gə nee le, a kədərə ya̰ kunda kar ɓe gə Sɔdom gə Gɔmɔr.

Kula kəm naa ndoo gə aw ɗe

¹⁶ Oje: M-ula-si to gə badəmje horo njagəmanjɛrje gə. Undaje kəm karə dɔ rɔ-si gə to to gə li be, ꞌkulje yururu to to gə dər kuul be.

¹⁷ Aje rɔ-si rɔ dəwje gə, mba d-a kaw gə si no ngɔ gangə tar gə lə Jiibije nəm ɓa d-a kunda-si gə abəlay kəy nendo gə lə-je.

¹⁸ D-a kaw gə si no njeko̰ ɓeje gə, gə no mbayje gə mba tar lə-m, mba kar to tar naji lə-m no-je gə nəm ɓa no dəwje gə ꞌgərə Luba ang gə tɔ.

¹⁹ Ngaa logə d-a kaw gə si le, ꞌnoje rɔ-si mba gusu gə a paje ne tar ang, ɓa ɔji dɔ tar gə a paje ang; tar gə a paje le d-a kar-si dɔ kar-ɛ gə əng ja;

²⁰ Mba to sisəy ɓa a paje tar ang, ngaa Njil Bɔ-sijee Luba ɓa a kuwa ta-si pa ne tar.

²¹ Dəw a kun dɔ ngon ko̰-ɛ kar d-a tɔl-ɛ, bɔ ngon-je a kun dɔ ngon-e, nganje d-a təl nje kəm tarje lə nje kuji-jeje, ngaɓa d-a ɗa kar d-a tɔl-je.

²² Dəwje tɔ̰y d-a njigi-si ang gə kɔrɔ ja mba tar lə-m; ngaa dəw gə uwa gədərə saar ce ɗud-e gə ɓa a kinga kaji.

²³ Logə d-a kula kəm-si ndoo mə ɓebo gə nee gə nama a̰yje awje ye gə ɗangə gə. Tɔgərɔ ja m-pa m-ar-si, a kɔrəje sṵra̰ ɓeboje gə Ijirayɛl tɔ̰y ang ja, ꞌma gə Ngon lə dəw m-a ɗe.

Tar ndəji gə ɔji dɔ ɓəəl yo

²⁴ Ngon njenendo nday njenetɔji ang, ngon njekula nday ɓəə-eje ang.

²⁵ Ne gə kəm kar ngon njenendo ɗa, ɗaa ndəji kəm njenetɔji, ngaɓa ngon njekula ɗaa ndəji kəm ɓəə-eje tɔ. D-unda ri njekəy na to Bɛləjebul, gə to mbay lə njilje gə kṵra̰y ngaa kandə ɓa nje gə kəy lə-a d-a kunda ri-je to gə be ang wa?

²⁶ Be ɓa, ꞌɓəəlje-je ang, mba ne kara gə iya rɔ-ɛ gə d-a kila gə ɗaga ang le godo,

²⁷ ngaɓa ne kara gə ꞌdəbə dɔ-ɛ gə d-a kḭya̰ dɔ-ɛ ngaw kar gadə gə ang le godo. Tar gə m-pa londul gə m-ar-si nama, ꞌpaje dan kara, ngaɓa ye gə m-wɛdə mbi-si gə nama, ubaje dɔ kəy ɓa ilaje ne mbərə.

²⁸ Nje gə tɔl darɔ baa ɓo d-asə tɔl kəm ang le, ꞌɓəəlje-je ang. May kar-si ꞌɓəəlje Luba gə asə mba tuji darɔ gə kəm joo tɔ̰y kəm pər gə.

²⁹ Se ꞌlabə mabəraje joo kəm sulay kara ang wa? Be ja kara, kara horo-je gə a koso nangə lal mə njigi lə Luba ang baa.

³⁰ Ngaɓa, bḭ dɔ-si ja kara Luba tura tɔ̰y.

³¹ Be ɗaa, ꞌɓəəlje ang: Mba ꞌtoje ɓəəl undaje mabəraje gə bula.

³² Gəl-e gə nee ɓa, dəw gə ɗa-ɗa gə tɔji rɔ-ɛ gə ɗaga no dəwje gə to gə n-to nje kar ꞌma nama ꞌma kara m-a pa gə ɗaga no Bɔ-mje Luba gə isi dara to gə nj-ɛ to nje kar ꞌma tɔ.

³³ Ngaa dəw gə ɗa-ɗa gə ma̰y tar lə-m no dəwje gə to gə n-gərə-m ang nama, ꞌma kara m-a ma̰y tar lə-a no Bɔ-mje Luba gə dara to gə m-gər-e ang tɔ.

Ngon njenendo je gə Njenujije lə-a

³⁴ Se əjije to gə m-ɗe mba kar ɗɛgɛgɛ to dɔ nangə nee wa? M-ɗe kar lo to ɗɛgɛgɛ ang ngaa m-ɗe gə ɗɔ ɓa m-ila horo-si gə.

³⁵ Mba m-ɗe gə cḭ naa m-ila horo ngon gə jingaw gə je gə bɔb-ɛje, horo ngon gə jene je gə ko̰-ɛje gə, horo ngon gə jene je gə mom-eje gə jene gə.

³⁶ Ngaɓa dəw gə ɗa-ɗa kara nje gə kəy lə-a ja d-a təl to njeba̰a̰je lə-a.

³⁷ Dəw gə njigi bɔb-ɛje ose ko̰-ɛje ya̰ unda-m nama asə to nje kar ꞌma ang, ngaɓa dəw gə njigi ngon-e gə jingaw ose ye gə jene unda-m nama asə to nje kar ꞌma ang tɔ,

³⁸ dəw gə un kagə dəsə lə-a ɓa uwa ne go-m ang nama asə to nje kar ꞌma ang tɔ.

³⁹ Dəw gə ngom təbə lə-a nama a kila-a kɔrɔ, ngaa dəw gə ila təbə lə-a kɔrɔ mba-m nama a təl kinga-a.

⁴⁰ Dəw gə uwa-si gə rɔ-ɛ gə nama ꞌma ja uwa-m gə rɔ-ɛ gə əng, a ɓo dəw gə uwa-m gə rɔ-ɛ gə nama uwa Luba gə njekula-m gə rɔ-ɛ gə tɔ.

⁴¹ Dəw gə uwa pajambərə gə rɔ-ɛ gə mba n-to njekula lə Luba nama nj-ɛ a kinga kuga to gə pajambərə tɔ, ngaɓa dəw gə uwa njeneɗa gə gadə-gadə gə rɔ-ɛ gə mba to dəw gə gadə-gadə nama a kinga kuga to gə njeneɗa gə gadə-gadə be tɔ.

⁴² Dəw gə ɗa-ɗa ja ɓa ɔr man gə kul gə ngon ngo ar ngon kara horo nganje gə nee ay mba to ngon njenendo lə-m nama, tar gə tɔgərɔ ja m-pa m-ar-si, nekuga dɔ ji lə-a a koso nangə ɓɛdə ang.