Matiye 1 - Mbede Lə Luba Kone Gə Sigi

ꞌGƆL KULA GƏ JEJU A ƊA Gəl kuji lə Jeju

¹ Mbede gəl kuji Jeju Kirisi, ngon ka Dabidi, ngon ka Abəraham.

² Abəraham uji Ijagə; Ijagə uji Jakobo; Jakobo uji Juda je gə ngan ko̰-ɛje;

³ Juda ta jene gə ri-a na Tamar uji ne Peret je gə Jera; Peret uji Ɛsərom; Ɛsərom uji Aram;

⁴ Aram uji Aminadabə; Aminadabə uji Naso̰; Naso̰ uji Saləmo;

⁵ Saləmo ta Rahabə uji ne Booj; Booj ta Rudu uji ne Obɛd; Obɛd uji Jese;

⁶ Jese uji Dabidi. Mbay Dabidi ta jene lə Uri uji ne Salomo

⁷ Salomo uji Roboham; Roboham uji Abiya; Abiya uji Asa;

⁸ Asa uji Jojapa; Jojapa uji Yoram; Yoram uji Ojiyas;

⁹ Ojiyas uji Yotam; Yotam uji Ahas; Ahas uji Ejekiyas;

¹⁰ Ejekiyas uji Manase; Manase uji Amo; Amo uji Jojiyas;

¹¹ Jojiyas uji Yekoniyas je gə ngan ko̰-ɛje. Dɔ ɓal gə d-uwa ne ngan Ijirayɛlje gə ɓərə d-aw gə je mə ɓe gə Babilon.

¹² Go ɓərə gə d-uwa-je kəne mə ɓe gə Babilon le, Yekoniyas uji Səyalətiyɛl, Səyalətiyɛl uji Jorobabɛl;

¹³ Jorobabɛl uji Abihud; Abihud uji Eliyakim; Eliyakim uji Ajɔr;

¹⁴ Ajɔr uji Sadɔk; Sadɔk uji Ahim; Ahim uji Eliyud;

¹⁵ Eliyud uji Eleyajar; Eleyajar uji Mata̰; Mata̰ uji Jakobo;

¹⁶ Jakobo uji Jəjəb gə ngaw Məri-je, Ngaɓa Məri uji Jeju, gə ꞌɓar-ɛ Kirisi.

¹⁷ Un kud-e dɔ Abəraham gə saar ce ne dɔ Dabidi gə le gəl kuji ḭ dɔg gə gir-e gə sɔɔ; ḭ dɔ Dabidi gə saar ce ne ɓal gə d-uwa ne Ijirayɛlje ɓərə gə Babilon le tura gəl kuji dɔg gə gir-e gə sɔɔ; ngaɓa un kud-e dɔ ɓal-ɛ gə əng saar ce ne dɔ Kirisi kara tura gəl kuji dɔg gə gir-e gə sɔɔ tɔ.

Kuji Jeju Kirisi

¹⁸ Oje kuji Jeju Kirisi le ɗe to to gə be; Məri gə ko̰-ɛje le to njemɔrə lə Jəjəb; ngaa nam ɓa kar-ɛ n-aw kəy ngaw gə ɓe lə Jəjəb ja n-ḭ kɛm ɗəw gə lə Njil Njerɔsangə.

¹⁹ Jəjəb gə to njemɔrə lə-a le to dəw gə gadə-gadə ɗaa, njigi mba kila rɔ kul dɔ-ɛ gə kəm dəwje gə ang, njigi mba mbad-ɛ gə go ngə̰y baa.

²⁰ Logə n-aw n-əji m-e gə to gə be ɓi ɗaa, Anji lə Mbayɓe ɗe uru dɔ-ɛ gə gə ni, pa ar-ɛ na: Jəjəb, ngon ka Dabidi, ꞌɓəəl ang ɓo, uwa Məri le gə rɔ-i gə to gə jene lə-i, mba ngon gə to m-e gə əng le ɗe ɗəw gə lə Njil Njerɔsangə,

²¹ N-a kuji ngon gə jingaw ɗaa, a kunda ri-a na Jeju mba ꞌne ja ɓa n-a kaji dəwje lə-a dɔ neɗa gə kṵra̰y gə.

²² Neje nee tɔ̰y ɗa to gə be mba kar tar gə Mbayɓe pa gə ndu Pajambərə lə Luba le aw ne lo-e gə yɛrɛrɛ na:

²³ Oje ꞌmbakum a kḭ kɛm ɗaa, a kuji ngon gə jingaw Ngaɓa d-a kunda ri-a na Emanuyɛl, Kɔr gəl-e na: Luba ga̰ gə si.

²⁴ Logə Jəjəb ndol ɗaa, ɗa neje tɔ̰y gə Anji lə Mbayɓe pa ar-ɛ le, n-uwa Məri gə rɔ-ɛ gə.

²⁵ Ngaa n-gər-e gə jene ang ja saar uji ne ngon gə jingaw le ɗaa n-unda ri-a na Jeju.