Marəke 6 - Mbede Lə Luba Kone Gə Sigi

Jeju aw Najarɛd

¹ Jeju ɔdə lo-e gə nee aw ɓe gə tɔgə kəne, ɗaa ngan njenendoje lə-a ꞌndole go-e.

² Logə ndɔ kuwa kɔr asə ɗaa, n-aw n-tɔji ne kəy nendo gə. Dəwje bula gə d-o netɔji lə-a le lo tar igi-je sɛl ar ꞌpa na: ꞌYe gə nee n-ḭ neɗa cibi ngaa nee wa? Na ja ar-ɛ kəm karə gə to gə be wa? Ngaɓa na ja ar-ɛ singamongə n-ɗa nemisije gə to gə be wa?

³ ꞌNe le ɓa n-to njekunja kagə, gə ngon lə Məri, gə n-to ngon ko̰ Jagə, gə Jose, gə Jude gə Simo le ang wa? Ngaɓa ko̰ nan-ɛje kara ꞌga̰ horo-si gə nee ang wa? Ɗaa n-təl n-to jigi tuga koso no-je gə.

⁴ Ngaa Jeju pa ar-je na: Pajambərə le, mə ɓe kuj-e gə, horo njenujije gə gə mə kəy gə lə-a ja ɓa ꞌdab-ɛ kəne dasəra.

⁵ Ngaɓa Jeju asə ɗa nemisi kəne kara be ang, ngaa njerɔko̰je gə kɛm ja baa n-ila ji-a dɔ-je gə n-aji-je ne.

⁶ Lo tar igi-e sɛl mba məkədərə lə-je. Jeju nja gə ngan ɓeje gə mbɔr ɓe kuj-e gə tɔji ne.

Jeju ula njeka̰y kulaje gə dɔg gə gir-e gə joo

⁷ Be ɓa Jeju ɓar ngan njenendoje gə dɔg gə gir-je gə joo le ɗaa ula-je joo-joo, ar-je singamongə dɔ njilje gə kṵra̰y gə.

⁸ N-un ndu n-ar-je mba kar d-un kagə tɔsə ja baa, ɓo d-un mbə ang nəm, ɓɔl kaw mba ang nəm, lar mə ji ngira gə ang nəm tɔ,

⁹ ngaa kar d-ula sabɔgɔ baa ɓa d-ula, ɓo d-ula kubu gə taar dɔ naa gə joo ang.

¹⁰ Jeju pa ar-je na: Kəy gə ɗa-ɗa gə andəje kəne nama isije kəne saar ndɔ gə a kɔdəje ne lo-e gə.

¹¹ Ngaɓa lo gə d-uwa si mba kəne ang nəm d-o tar gə ta-si gə kəne ang nəm ɓa ɓo a kaw kɔdəje nama, ꞌkundaje kuru gə gɔl si gə mba kar to tar naji gə ila tar dɔ-je gə.

¹² Be ɓa d-aw ɗaa d-ila mbərə turu kəji.

¹³ ꞌTɔbə njilje gə kṵra̰y bula, d-um ubu dɔ njerɔko̰je gə bula ngaɓa d-aji-je tɔ.

Kuy lə Ja̰ Njeɗabatɛm

¹⁴ Mbay Erɔdə o tar gə ɔji dɔ Jeju, mba ri-a ɓar ya̰. ꞌPa na: Ja̰ Njeɗabatɛm gə uy le ɓa ndol ɗaa ye ɓa inga ne singa ɗa ne nemisije.

¹⁵ Nje gə kɛm na: To Eli; ɗaa nje gə ɗangə na: To gə pajambərə gə to kara lə pajambərəje.

¹⁶ Ngaa lo gə Erɔdə o tar-ɛ ɗaa pa na: To Ja̰ gə m-ar-je ꞌgangə dɔ-ɛ le ja təl ndol.

¹⁷ Erɔdə pa to gə be mba ꞌne ja n-ar-je d-uwa Ja̰ kede nam, ngaɓa tɔ-ɛ gə kula lar, d-ila-a kəy kula gə mba tar lə Erɔdiyadə gə to jene lə ngon ko̰-ɛ Pilibi, gə n-t-ɛ le.

¹⁸ Mba Ja̰ pa ar Erɔdə na: D-un ɗəw d-ar-i kar ꞌta jene lə ngon ko̰-i ang baa.

¹⁹ Be ɓa mə Erɔdiyadə o̰-ɛ dɔ Ja̰ gə, ɗaa sangə ɗəw mba kar ꞌtɔl-ɛ, ngaa n-asə ang,

²⁰ mba Erɔdə gərə to gə Ja̰ to dəw gə gadə-gadə ngaɓa to gə losang-ɛ ɗaa ɓəəl-e gə ɓəəl; n-ngom-e gə ngom ngaɓa logə n-o tar gə Ja̰ pa ɗaa jɔg-ɛ ja, ngaa n-o tar le gə rɔləl.

²¹ To gə be ɓa, ndɔ gə tudu bina a cɛdə koso ne kəm ngəm gə ɗe. Logə ndɔ ɗa nay kuji Erɔdə asə ɗaa, ar-je ꞌkoro muru gadə d-ar ɓar ne dəwje lə-a gə bo-bo, gə njekɔr no njeɗɔje, gə buba ɓeje gə dɔ nangə gə Galile.

²² Ngon lə Erɔdiyadə gə jene andə pədə ɗaa la; ar la lə-a le ləl Erɔdə je gə dəwje gə ꞌɓar-je le. Be ɓa mbay pa ar ngon mandə le na: ꞌDəji-m ne gə ꞌnjigi ja ɗaa m-a kar-i.

²³ Cibi ɓa n-ugu rɔ-ɛ n-ar-ɛ na: Ne gə a dəji-m ja nama m-a kar-i, le to gə dəbə ɓeko̰ lə-m ja kara nəm.

²⁴ N-ce n-aw n-pa n-ar ko̰-ɛje na: Ɗi ɓa m-a dəji wa? Ko̰-ɛje ila kəne na: Dɔ Ja̰ Njeɗabatɛm.

²⁵ N-təl wajəra gə ngɔdə n-aw n-pa n-ar mbay le na: M-njigi kar ila dɔ Ja̰ Njeɗabatɛm ja mə ka gə gə tɔg-ɛ ar-m.

²⁶ Rɔ mbay ləl-e ang, ngaa mba n-un ndu-e ɗɔdə no bula dəwje gə ꞌɓar-je nəm tɔ ɗaa, ɗəw gə n-a mbadə ne godo.

²⁷ Be ɓa mbay un ndu ar nje ka dɔ-ɛ aw gangə dɔ Ja̰ mə kəy kula gə ɗe ne.

²⁸ Ɗaa nje ka dɔ-ɛ le ɔdə aw go Ja̰ gə gə to kəy kula gə, gangə dɔ-ɛ ila mə ka gə ɗe ne. N-ar ngon mandə le ɗaa, ngon mandə le ta aw ne ar ko̰-ɛje.

²⁹ Logə ngan njenendoje lə Ja̰ d-o tar-ɛ ɗaa, ꞌɗe d-un nin-e ꞌdubu.

Dɔngɔr ɗa mbə kar-ɛ təl bula

³⁰ Njeka̰ykulaje ꞌɗe mbo̰ naa gə Jeju, d-ɔr gəl neje tɔ̰y gə ꞌɗa gə neje gə ꞌtɔji dəwje d-ar-ɛ o.

³¹ N-pa n-ar-je na: Sisəy ja kara ꞌɗe-je gə nganga̰ ndag lo gə ɓo uwa-je kɔr-si njɛ̰. Mba dəwje bula d-aw ɗaa ꞌtəl, d-aw ɗaa ꞌtəl, ar lo kusa ne lə-je ja kara godo.

³² D-ɔdə d-al to gə mba kaw gə ndag lo gə ngərəng.

³³ Dəwje d-o-je lo kaw-je gə ngaɓa gərə nəm tɔ. Dəwje d-ḭ gə mə ɓeboje tɔ̰y d-a̰y gə gɔl-je d-aw kede no-je gə.

³⁴ Logə Jeju ḭ mə to gə uru nangə, ɗaa o bula dəwje ɗaa o kəmtondoo lə-je, mba ꞌnja to gə badəmje gə njekuul-je godo be; ɗaa n-tɔji-je ne kor-e əw ya̰.

³⁵ Mba kar nday ya̰ ngaa ɗaa, ngan njenendoje ꞌɗəm gə rɔ-ɛ gə ꞌpa d-ar-ɛ na: Lo gə nee le to ndag lo, ngaɓa kar kara nday ya̰ nəm tɔ ɗaa,

³⁶ ꞌtɔbə bula dəwje le ar-je d-aw dɔ ndɔje gə gə mə ɓeje gə to mbɔr lo gə nee d-aw ꞌndogo neje d-usa.

³⁷ Jeju ila-je kəne na: Sisəy ja ar-jeje ne d-usa. Ngaa ꞌtəl ꞌpa d-ar-ɛ na: J-a kaw ndogo mbə kəm mbɛl ka tɔl joo ɓa j-a kar-je d-usa wa?

³⁸ N-təl n-dəji na: Mbə kandə ɓa to ji-si gə wa? Aw oje. D-aw d-o ɗaa ꞌpa d-ar-ɛ na: Mbə mi gə kənji joo.

³⁹ Be ɓa, n-un ndu n-ar-je mba kar d-ar d-isi nangə tɔ̰y dɔ mu gə d-uwa naa dol-dol,

⁴⁰ ɗaa d-isi go naa gə gə bar-ɛ bar-ɛ dəwje tɔl-tɔl ngaɓa dɔg mi dɔg mi tɔ.

⁴¹ N-odo mbə gə mi gə kənji gə joo le, ɗaa n-un kəm-e gə dara ɗaa n-tɔr ndu-e kəne. Cibi n-cɛdə mbə le ngaɓa n-ar ngan njenendoje mba kar ꞌkay bula dəwje. Tɔ̰y ja, n-kay-je kənji gə joo le tɔ.

⁴² Dəwje tɔ̰y d-usa d-ar mə-je ti,

⁴³ ngaɓa d-odo dɔ dum mbə gə kənji gə nay karɛ dɔg gə gir-e gə joo.

⁴⁴ Dəwje tɔ̰y gə d-usa mbə le d-asə jingawje tɔl dɔg lo mi.

Jeju nja dɔ man gə

⁴⁵ Waga baa go-e gə ɗaa, Jeju ɔsə ngan njenendoje lə-a ar d-al to mba kar d-aw tura əər kara gə kede, dɔ-je gə Bɛdəsayida, logə ꞌne ja n-a nay mba tɔbə bula dəwje kar-je d-aw.

⁴⁶ Logə Jeju ḭya̰-je ɗaa, aw dɔ ər gə mba dəji Luba.

⁴⁷ Kar kumatagə ɗaa, to aw dan babo gə ɗaa Jeju nay nangə gə kar-ɛ baa.

⁴⁸ N-o to gə ngan njenendoje lə-a d-uma pḭ gə ləl to mba ləl ula tila kəm-je. Aw gə ji dɔɔɓe gə ɗaa, n-nja dɔ man gə, n-aw dɔ-ɛ gə ɓə lə-je. N-njigi mba nday-je.

⁴⁹ Logə d-o-e n-aw n-nja dɔ man gə ɗaa d-əji to gə to uma, ɗaa d-uru ꞌkuwi;

⁵⁰ mba ꞌjeje tɔ̰y ja d-o-e ɗaa kəji lə-je turu buguju. Ngaa n-pa gə je tar gə tɔg-ɛ baa na: Isije ɗɛgɛgɛ, to ꞌma ja, ꞌɓəəlje ang.

⁵¹ Cibi n-al gə je to ɗaa, ləl gangə njɛd. Darɔ ꞌjeje ja kara lo tar igi-je sɛl;

⁵² mba nemisi gə ɔji dɔ mbə le d-o pi baa mba mə-je kədərə.

⁵³ Logə ꞌgangə man tɔ̰y ɗaa, ꞌce dɔ nangə gə Jenejarɛd. ꞌTɔ to lə-je kar mbalaa.

⁵⁴ Logə d-ḭ mə to gə d-uru nangə ɗaa, dəwje ꞌgərə Jeju gə tɔg-ɛ baa,

⁵⁵ d-a̰y d-ula lo wur-wur ngaɓa d-odo njerɔko̰je gə tuwa tuwa, ꞌɗe gə je, lo gə ɗa-ɗa gə d-o tar-ɛ to gə n-isi kəne.

⁵⁶ Lo tɔ̰y gə n-aw kəne, ɓeboje, gə ngan ɓeje ose dɔ ndɔje, d-um njerɔko̰je nada ngaɓa ꞌɗ-ɛ kɔgərɔ kar n-ḭya̰ ɗəw n-ar d-uwa ta kubu lə-a ja baa. Be ɓa dəwje tɔ̰y gə d-ɔr rɔ-ɛ le d-aji kəbərə.