Marəke 5 - Mbede Lə Luba Kone Gə Sigi

Jeju aji dəw gə njilje gə kṵra̰y ɗa ɓe m-e gə

¹ ꞌCe tura babo gə ər kara gə, dɔ nangə gə Geraja.

² Logə Jeju ḭ mə to gə uru nangə be ja ɗaa, dəw kara gə njil gə kṵra̰y ɗa ɓe m-e gə ce horo dɔbarəje gə tila kəm-e.

³ N-ɗa dɔbarə gə kəy lə-a, ngaɓa dəw kara gə asə tɔ-ɛ gə kula lar kara godo.

⁴ Mba logə d-ila-a jaa ngaɓa ꞌtɔ ji-a gə gɔl-ɛ gə kula lar, ngaa n-ti kula lar le mbidi-mbidi, ɗaa dəw gə singa-a asə kuwa-a tɔ-ɛ godo.

⁵ N-nja gə horo dɔbarəje gə ja jaga-jaga, cil gə kar ngaɓa dɔ ərje gə, n-uru ꞌkuwi ɓəgəgə-ɓəgəgə ngaɓa n-njɛrɛ rɔ-ɛ gə kɔr ər paw-paw.

⁶ Logə n-o Jeju nay əw ɓi ɗaa, n-a̰y ngɔdə, n-um takəj-e nangə no-ɛ gə,

⁷ ngaɓa n-uru ꞌkuwi ɓolong na: Se ɗi ɓa ꞌnjigi rɔ-m gə wa? Jeju, Ngon lə Luba gə sam dara gə. M-pa m-ar-i, no-gɔl Luba gə ja, əw rɔ-i kula kəm-m ndoo.

⁸ Mba Jeju pa ar-ɛ kede na: Njil gə kṵra̰y, ꞌce mə dəw gə nee le gə ɗangə.

⁹ Ngaɓa n-təl n-dəj-e na: Ri-i na-na wa? N-ila-a kəne na: Njeɗɔje gə bula ɓa to ri-m mba j-a bula ya̰.

¹⁰ Ngaɓa d-oso kul, ꞌɗa Jeju kɔgərɔ mba kar tɔbə-je um-je ɗaga ang.

¹¹ Dɔ kar-ɛ gə nee le, kuduɓe bərəje gə ꞌbula ya̰ d-ar d-aw d-usa ne kar ər gə.

¹² Ɗaa njilje gə kṵra̰y ꞌɗa Jeju kɔgərɔ na: Um-si horo bərəje gə nee, mba kar-si j-andə mə-je gə.

¹³ Ɗaa n-iya̰ ɗəw n-ar-je tɔ, be ɓa njilje gə kṵra̰y ꞌce, d-andə mə bərəje gə le. Bərəje gə d-asə tɔl dɔg lo joo be le, d-ḭ kar ər gə taar gə ngɔdə ja d-um mə man bo gə ɗaa, man uwa-je kərəng.

¹⁴ Dəwje gə njekuul bərəje le d-a̰y d-aw ja̰rɛ̰ tar-ɛ pə-pə mə ɓebo gə, gə nje gə dɔ ndɔ nəm tɔ. Dəwje d-a̰y d-aw mba ko ne gə ce le.

¹⁵ ꞌƊe rɔ Jeju gə ɗaa d-inga dəw gə njilje gə kṵra̰y bula ce m-e gə le, isi nangə, ula kubu rɔ-ɛ gə, ngaɓa kəji lə-a to gə maj-ɛ, ɗaa ɓəəl unda-je badə gangə-je.

¹⁶ Nje gə d-o ne gə nday le, d-ɔr gəl ne gə ce dɔ dəw gə njilje ɗa ɓe m-e gə le, ngaɓa ne gə ɗa bərəje nəm d-ar-je.

¹⁷ Be ɓa ꞌtəl ꞌɗa Jeju kɔgərɔ mba kar ɔdə dɔ nangə gə lə-je.

¹⁸ Logə n-al to ɗaa, dəw gə njilje gə kṵra̰y ce m-e gə le, ɗ-ɛ kɔgərɔ ja, mba nay sə-a.

¹⁹ Jeju njigi ang, ngaa pa ar-ɛ na: Ɔdə aw kəy lə-i, ɓə lə nje ka-ije, ɓo ɔr gəl ne tɔ̰y gə Mbayɓe ɗa sə-i, ngaɓa ɗəw gə n-o nee kəmtondoo lə-i.

²⁰ N-ɔdə n-aw ɗaa n-ila mbərə mə ɓe mbo̰je gə dɔg gə ꞌɓar-ɛ Dekapɔl, n-orə ne gəl ne tɔ̰y gə Jeju ɗa sə-a le ɗaa, dəwje tɔ̰y ja lo tar igi-je sɛl.

Jeju ndol ngon lə Jayirus gə jene, ngaɓa aji jene gə uwa ta kubu lə-a

²¹ Jeju al to təl aw tura əər kara gə ɗaa, gɔl kara ja cibi, bula dəwje ꞌɗe gugu dɔ-ɛ. N-ar ta babo gə.

²² Njeko̰ dɔ kəy nendo, gə ri-a na Jayirus o-e ɗaa, ɗe uwa nangə no gɔl-ɛ rib,

²³ ngaɓa ɗ-ɛ kɔgərɔ na: Ngon-m gə jene to gə yo ja; ꞌɗe ila ji-i dɔ-ɛ gə mba kar n-aji ne ɓo n-aw ne kəm baa.

²⁴ Jeju ɔdə aw sə-a. Bula dəwje d-uwa go-e yug-yug ngaɓa d-or-e wɔgɔgɔ.

²⁵ Jene kara gə məsə ɗe rɔ-ɛ gə asə ɓal dɔg gə gir-e gə joo ja ga̰ horo-je gə.

²⁶ N-o ko̰ ne ji dɔgətoroje gə bula. N-tuji nekingaje lə-a tɔ̰y ja, ngaa lo ta kəm lə-a godo, rɔko̰ le aw sə-a gə kede-kede ja.

²⁷ Logə n-o tar lə Jeju ɗaa, n-ɗe horo bula dəwje gə, n-ngə̰y gugu n-uwa ta kubu lə Jeju.

²⁸ Mba n-pa na: To gə ɓo kubu lə-a ja baa m-ula ji-m m-ɔr ne kɛ̰rɛ̰ng be kara, m-a kaji.

²⁹ Ji naa gə nee ja, məsə le kara gangə njɛd, ngaɓa n-gərə rɔ-ɛ to gə rɔko̰ ɔr ji-a rɔ-ɛ gə ar n-aji ngaa.

³⁰ Jeju gərə gə tɔg-ɛ baa mba singa-a ɔr. N-turu kəm-e wuri dan bula dəwje ɗaa n-pa na: Na ɓa ula ji-a ɔr ne kubu lə-m wa?

³¹ Ngan njenendoje lə-a ꞌpa d-ar-ɛ na: ꞋI o bula dəwje gə d-or-i wɔgɔgɔ nee ja cibi ɓa ꞌpa na: Na ɓa ɔr rɔ-m wa na ban ngaa nee?

³² Be ɓa n-təl n-a lo mba ko jene gə ɗa ne nee le.

³³ Jene nee le isa gə ɓəəl mba gərə ne gə ɗa ne darɔ-ɛ gə som, ɗaa ɗe oso nangə no gɔl jeju gə, pa tar gə tɔgərɔ ja tɔ̰y ar-ɛ.

³⁴ Ngaa Jeju pa ar-ɛ na: Ngon-m, takagə lə-i aji-i. Aw gə ɗɛgɛgɛ ɗaa may kar rɔko̰ nee le ɔr rɔ-i gə.

³⁵ Logə Jeju aw pa tar baa ɓi ɗaa, dəwje d-ḭ kəy lə njeko̰ dɔ kəy nendo ꞌɗe ꞌpa na: Ngon-i le uy nam ngaa, a ɗi cibi ɓa aw jɔgə ne Njenetɔji wa?

³⁶ Ngaa tar gə d-aw pa le, kara ja oso Jeju kəne ang ɗaa, pa ar njeko̰ dɔ kəy nendo le na: ꞌƁəəl ang, ꞌta kagə ja baa!

³⁷ Ɗaa n-ḭya̰ ɗəw n-ar dəw gə ɗangə kara ja kara mba kar dan-ɛ ang, n-ar Piyɛr, gə Jagə gə Ja̰ gə ngon ko̰ Jagə ja baa.

³⁸ Logə ꞌɗe ꞌce kəy lə njeko̰ dɔ kəy nendo le ɗaa, Jeju o bangə gə ɓar, dəwje gə d-aw no gə nje gə d-uru ꞌkuwi gororo.

³⁹ N-ɗe n-andə kəy ɗaa n-pa n-ar-je na: Bangə ɓar ngaɓa ꞌnoje mba ɗi wa? Ngon le uy ang ɓi, ngaa n-aw cibi baa.

⁴⁰ Ɗaa ꞌkog-e gə kogo baa. Be ɓa n-ar-je ꞌce ɗaga tɔ̰y, n-ḭya̰ bɔ ngon-je gə ko̰ ngon-je gə nje gə dan-ɛ ja baa, n-andə lo gə ngon le to kəne.

⁴¹ N-uwa ji ngon le ngaɓa pa n-ar-ɛ na: Talita kumi, gə m-e na: Ngon mandə, ḭ taar, a m-pa m-ar-i nee.

⁴² Ji naa gə nee ja, ngon mandə le uba nangə ḭ taar, ngaɓa ɔdə nja, mba ɓal-ɛ asə dɔg gə gir-e gə joo ngaa. Mə dəwje uy dɔ rɔ-je ngaɓa lo tar igi-je sɛl.

⁴³ Jeju un ndu ar-je mba kar ꞌpa tar gə nee le d-ar dəw gərə ang, ngaɓa n-pa na d-ar ngon mandə le ne usa.