Marəke 3 - Mbede Lə Luba Kone Gə Sigi

¹ Jeju təl andə mə kəy nendo gə to gə ɗangə. Dəw kara gə ji-a uy ga̰ kəne.

² D-isi d-aw d-a Jeju mba ko se n-a kaji dəw nee le ndɔ kuwa kɔr gə wa, ɓa gə mba kila ne tar dɔ-ɛ gə.

³ Jeju pa ar dəw gə ji-a uy le na: Ḭ ar horo-je gə dana nee.

⁴ Cibi n-pa n-ar-je na: Ndɔ kuwa kɔr le ɗəw to kəm kar dəw ɗa ne gə may ose ɗa ne gə kṵra̰y, gə kaji dəw ose tɔl-ɛ gə tɔl wa? Ngaa d-isi ta-je munduru.

⁵ Be ɓa n-a-je lɛdɛdɛ gə wungu, ngaɓa m-e ləl-e ang mba məkədərə lə-je, ɗaa n-pa n-ar dəw le na: ꞌNduji ji-i. N-nduji ji-a, ɗaa ji-a le təl to gə maj-ɛ.

⁶ Parijiyɛ̰je ꞌce ɗaga ngaɓa d-um njuma mə naa gə gə nje koso gəl Erɔdə gə je mba sangə ɗəw tɔl-ɛ.

Jeju mbərə njeka̰y kulaje lə-a dɔg gə gir-je gə joo

⁷ Jeju ɔdə aw gə ngan njenendoje lə-a gə mbo kar babo gə. Bula bo dəwje gə d-ḭ dɔ nangə gə Galile gə gə nje gə dɔ nangə gə Jude ꞌndole go-e,

⁸ gə Jerujalɛm, gə dɔ nangə gə Idume, gə tura baa Jurədɛ̰ gə ɓeje gə mbɔr ɓe gə Tir gə Sido̰ gə. Logə bula bo dəwje d-o tar neje tɔ̰y gə n-ɗa ɗaa, ꞌɗe gə ɓə lə-a baa yaw-yaw.

⁹ Jeju ula ngan njenendoje lə-a kar d-uwa to d-ar-ɛ al ar kəne mba kar dəwje d-or-e wɔgɔgɔ ang.

¹⁰ Mba n-aji dəwje ya̰ ɗaa njerɔko̰je ꞌto kəgəgə gə mba kɔr-ɛ gə ji-je.

¹¹ Logə nje gə njilje gə kṵra̰y ɗa ɓe mə-je gə d-o Jeju ɗaa, d-oso nangə no gɔl-ɛ gə ngaɓa d-uru ꞌkuwi na: ꞌI to Ngon lə Luba.

¹² Ngaa n-un ndu gə mong-e n-ar-je mba kar ꞌɗa d-ar dəw gər-e ang.

¹³ Go-e gə ɗaa, Jeju uba dɔ ər aw taar, ngaɓa ɓar nje gə m-e njigi-je ɗaa ꞌɗe d-inga.

¹⁴ N-mbərə-je dɔg gə gir-je gə joo n-unda-je gə njeka̰ykulaje nəm, mba kar ꞌga̰ sə-a ngaɓa mba kula-je kar d-aw d-ila mbərə,

¹⁵ ngaɓa n-ar-je singamongə mba kar ꞌtɔbə ne njilje gə kṵra̰y nəm tɔ.

¹⁶ N-mbərə-je dɔg gə gir-je gə joo: Simo gə n-təl n-unda ri ndɔr dɔ-ɛ gə na Piyɛr,

¹⁷ Jagə, Ja̰ je gə Jagə gə ngan lə Jebede, gə təl n-unda ri ndɔr dɔ-je gə na Bohanɛrəgɛs, kɔr m-e na ngan lə bangərang;

¹⁸ Andəre, Pilibi, Batələmi, Matiye, Toma, Jagə gə ngon lə Aləpe, Tade, Simo gə Kana gə tar ɓe lə-a o̰-ɛ

¹⁹ ngaɓa Judas Isikariyɔdə, dəw gə a kun dɔ Jeju le.

Tar ɔji dɔ taji Njil Njerɔsangə

²⁰ Cibi, Jeju je gə ngan njenendoje lə-a ꞌtəl ꞌɗe kəy, ɗaa bula dəwje mbo̰ naa to gə ɗangə, ꞌɗa d-ar ɗəw gə Jeju je gə ngan njenendoje lə-a d-a kusa ne ne ja kara godo.

²¹ Logə tar gə nee le oso mbi njenujije gə lə-a ɗaa, ꞌɗe mba kuwa kaw sə-a mba ꞌpa na: Dɔ-ɛ turu gə turu ngaa.

²² Njekɔr gəl toronduje gə d-ḭ Jerujalɛm ꞌpa na: Bɛləjebul ɗa ɓe m-e gə; mbay lə njilje gə kṵra̰y ɓa ar-ɛ singa n-tɔbə ne njilje gə kṵra̰y.

²³ Jeju ɓar-je ngaɓa pa ar-je gə gusutar na: ꞌSu asə tɔbə ꞌsu to gə ban wa?

²⁴ To gə ɓo dəwje gə ɓeko̰ gə kara baa tɔl naa nama, ɓeko̰ nee le a kɔsə ko̰.

²⁵ Ngaɓa, to gə ɓo njenujije ꞌkay naa nama nuji nee le a tḭ kad tɔ.

²⁶ Be ɓa, to gə ɓo ꞌSu ḭ ɗɔ gə darɔ-ɛ, ose kay rɔ-ɛ dana ngaɓa unda ndɔlɛ ɗaa, n-ɔsə ko̰ ngaa.

²⁷ Ngaa dəw asə kandə kəy lə dəw gə njesinga, kodo nemayje lə-a lal kuwa-a tɔ-ɛ kede wa? N-tɔ-ɛ ɓa n-a kodo nemayje lə-a gə mə kəy gə ɓi.

²⁸ Tɔgərɔ, m-pa m-ar-si, to gə neɗaje gə kṵra̰y tɔ̰y ja d-a kɔr tar-ɛ dɔ dəwje gə ngaɓa tar taji gə ꞌtaji Luba kara nəm;

²⁹ ngaa dəw gə ɗa-ɗa ɓa taji Njil Njerɔsangə nama d-a kɔr tar dɔ-ɛ ang ja saar, mba tar neɗa gə kṵra̰y uwa dɔ-ɛ gə dɔbo̰ ja.

³⁰ Jeju pa to gə be mba tar gə ꞌpa na: Njil gə kṵra̰y ɗa ɓe m-e gə le.

Ko̰ Jeju-je je gə ngan ko̰ Jeju

³¹ Ko̰ Jeju-je gə ngan ko̰ Jeju ꞌɗe d-ar ɗaga, d-ula ꞌɓar-ɛ.

³² Bula dəwje d-isi ꞌgugu dɔ-ɛ mbugu ngaɓa ꞌpa d-ar-ɛ na: O ɓa na ko̰-ije je gə ngan ko̰-ije gə ko̰ nan-ije d-ar ɗaga əng, d-aw sang-i.

³³ Ɗaa n-ila-je kəne na: Na ɓa to ko̰-mje ngaɓa nje gə ɗa ɓa ꞌto ngan ko̰-m wa?

³⁴ Cibi n-təl n-un kəm-e n-a ne nje gə d-isi ꞌgugu dɔ-ɛ le ɗaa, n-pa na: Oje, ko̰-mje je gə ngan ko̰-m ɓa d-isi nee.

³⁵ Dəw gə ɗa-ɗa gə ɗa mə njigi lə Luba ɗaa, nj-ɛ əng le ɓa to ngon ko̰-m, ko̰ nan-m gə ko̰-mje.