Marəke 15 - Mbede Lə Luba Kone Gə Sigi

Jeju ar no ngɔ gangə tar gə lə Jiibije

¹ Gə ndɔɔ-sḭ ja baa, Buba njekapoloje, gə buba ɓeje, gə njekɔr gəl toronduje gə nje gə no ngɔ gangə tar gə lə Jiibije tɔ̰y d-uwa dɔ naa d-unda ndu-je naa gə. Logə ꞌtɔ Jeju ɗɔdə ɗaa, d-aw sə-a d-aw d-ula-a ji Pilad gə.

Jeju ar no Pilad gə

² Pilad dəji-e tar na: ꞌTo mbay lə Jiibije wa? Jeju ila-a kəne na: ꞌI ja ꞌpa.

³ Buba njekapoloje gangə tarje bula d-um ta Jeju gə.

⁴ Pilad dəji-e to gə ɗangə na: Tar neje tɔ̰y gə ꞌgangə d-um ta-i gə nee le, a kila kəne kara ang wa?

⁵ Ngaa Jeju ar t-ɛ munduru, ar lo tar igi Pilad sɛl.

⁶ Ndɔ ɗa nay ja taar nama, Pilad ɔr dəw kara gə dəwje ꞌdəji-e horo nje gə ꞌto kəy kula gə, ila-a taar-taar.

⁷ Dəw kara ri-a na Barabas je gə njekuraje lə-a d-umje kəy kula gə gə nje gə ꞌɗa dɔ ngang gə njeko̰ ɓeje ꞌtɔl ne dəw.

⁸ Bula dəwje d-aw ꞌdəji-e to to gə n-ɗa ne gə je kede-kede le.

⁹ Pilad ila-je kəne na: ꞌNjigi-je kar m-ɔr mbay lə Jiibije ɓa m-ila taar m-ar-si wa?

¹⁰ Mba n-gərə to gə nər mə ɓa buba njekapoloje d-uwa ne Jeju d-ula-a ji-a gə.

¹¹ Ngaa buba njekapoloje ꞌsula dəwje kar ꞌdəji Pilad d-ar-ɛ ɔr Barabas ɓa ila-a taar.

¹² Pilad təl pa to gə ɗangə na: Ɗi ɓa ꞌnjigije kar-m ɗa gə dəw gə ꞌɓar-ɛje mbay le Jiibije le wa?

¹³ ꞌTəl d-uru ꞌkuwi na: ꞌƁər-e kagə dəsə gə ja!

¹⁴ Pilad pa ar-je na: Ngaa ɗi ɓa to ne gə kṵra̰y gə n-ɗa wa? Ɗaa ꞌtəl d-uru ꞌkuwi gə singa-je ja cibi na: ꞌƁər-e kagə dəsə gə!

¹⁵ Pilad njigi mba may ta kəm bula dəwje gə le ɗaa, ɔr Barabas ila-a taar ɗaa, ar-je ꞌlabə Jeju gə ndəy abəlay ɗaa ula-a ji-je gə mba kar-je ꞌɓər-e kagə dəsə gə.

¹⁶ Njeɗɔje d-aw gə Jeju kəy mbay gə, nadə gangə tar gə ngaɓa ꞌɓar njeɗɔje gə kɛm tɔ̰y.

¹⁷ D-ula-a kubu gə boy gə kasə rog-rog, d-uji kun gə jɔgə d-ula dɔ-ɛ gə.

¹⁸ Cibi ɓa, d-odo ji-je d-o-e na: J-o si ɓa ɓo, mbay lə Jiibije!

¹⁹ Ngaɓa d-unda dɔ-ɛ gə ndəy kɔb, ꞌcibi yoro dɔ-ɛ gə ngaɓa d-um məkəji, ꞌdəbə no-je nangə no-ɛ gə.

²⁰ Go kogo gə kogo-e ɗaa ꞌtəl d-ɔr kubu gə boy gə kasə rog-rog gə ꞌdəb-e ne le, ngaɓa ꞌtəl d-ula-a kubuje lə-a ɗaa d-aw sə-a mba kaw ɓər-e kagə dəsə gə.

Njeɗɔje ꞌɓərə Jeju kagə dəsə gə

²¹ Dəw kara ḭ ndɔɔ ɗaa, d-uwa-a gə singa d-ar-ɛ odo kagə dəsə lə Jeju, ri-a na Simo gə ɓe lə-a Sirɛn, bɔ Alɛgəjandərə-je je gə Rupus;

²² ɗaa d-aw gə Jeju lo gə ri-a na Gɔləgota, gə kɔr m-e na: Lo Ka dɔ.

²³ D-ar-ɛ man bḭyə̰ gə ꞌpolo gə no kagə gə ꞌɓar-ɛ mirə kar-ɛ n-ay ɗaa n-mbadə kɔ̰y.

²⁴ Logə ꞌɓər-e kagə dəsə gə ɗɔdə ɗaa ꞌɗa ꞌya̰a̰ ꞌkay ne naa kubuje lə-a mba gərə ne ꞌye gə na-na kara a ta.

²⁵ To kar gə ji nay kara gə gə ndɔɔ siḭ ɓa ɓər-e nee kagə dəsə gə.

²⁶ D-unja ne bəgərə gə ꞌtɔji ne gəl tar gə d-ila dɔ-ɛ gə na: Mbay le Jiibije.

²⁷ ꞌƁər-e kagə dəsə gə gə gayimje joo mbɔr-ɛ gə, dəw gə kara dɔ ji kɔl-ɛ gə, ꞌye gə kara dɔ ji gəl-e gə tɔ.

²⁸ Be ɓa mba kar tar gə mbede pa aw ne lo-e gə: ꞌTura-a horo njeneɗaje gə kṵra̰y.

²⁹ Nje nday ɗəw booje ꞌtaj-ɛ ꞌtuga ne dɔ-je, ꞌpa na: ꞌI gə na a cḭ kəy lə Luba, ɗaa ndɔ munda baa ja a təl kunda gugu le,

³⁰ aji darɔ-i ngaa ləma! To gə ɓo ꞌto ngon lə Luba ja nama, ḭ kagə dəsə gə ꞌɗisi nangə!

³¹ Ɗəw kara baa, buba njekapoloje gə njekɔr gəl toronduje d-unda-a ꞌkogo ne horo-je gə ngaɓa ꞌpa na: N-aji dəwje gə ɗangə, ɗaa n-asə kaji darɔ-ɛ ang!

³² May kar Kirisi, mbay lə Ijirayɛlje le, ḭ kagə dəsə gə uru nangə ngaa, mba kar-si j-o ɓo j-a ta ne kagə. Nje gə ꞌɓərə-je sə-a kagə dəsə gə le kara ꞌtaj-ɛ tɔ.

³³ Logə kar ar lum dɔ gə saar ce ne kar gə ila mbɔr-ɛ gə ja cil ciməri oso dɔ nangə nee tɔ̰y.

³⁴ Ngaɓa dɔ kar munda gə dɔ lokul le, Jeju uru ꞌkuwi gə singa to gə boy na: Eli, Eli, lama sabakətani, gə m-e na: Luba lə-m, Luba lə-m, mba ɗi ɓa mbadə-m wa?

³⁵ Nje gə kɛm horo dəwje gə d-ar lo-e gə le d-o ndu-e ɗaa ꞌpa na: Oje, n-aw n-ɓar Eli.

³⁶ Dəw kara a̰y ngɔdə aw ula nekibi man mə man bḭyə̰ gə masə gə, ɔsə ta kɔb gə ɗe ula ta Jeju gə mba kar ibi, ɗaa pa na: Ar-je bənəng, j-a koje, se Eli a ɗe kun-e kur-e nangə wa?

³⁷ Jeju ila ndu-e nangə ɓolong ɗaa kəm lə-a ce.

³⁸ Bal dɔ kubu gə ꞌgangə ne mə kəy lə Luba dana ḭ taar ja cir njarara uru nangə.

³⁹ Njekun dɔ njeɗɔje gə tɔl gə ar no Jeju gə le, o pa ce gə kəm lə-a ce, ɗaa pa na: Dəw gə nee le to Ngon lə Luba ja tɔgərɔ.

⁴⁰ Jeneje kara d-ar dɔ ji ndə̰w̰ ɓa d-a lo. Horo-je gə le Məri gə Magədala, gə Məri gə ko̰ Jagə gə ngon, gə Jose, gə Salome,

⁴¹ gə ꞌjeje nee le ɓa logə Jeju ga̰ ne Galile ɓi le, ꞌnja sə-a ngaɓa ꞌla sə-a nəm tɔ, cibi nje gə kɛm bula gə d-aw sə-a Jerujalɛm.

ꞌDubu Jeju

⁴² Kar kumatagə gə to ndɔ gɔl rɔ, mba kar lo kar-ɛ nama a to ndɔ kuwa kɔr le, asə ɗɔdə ɗaa,

⁴³ Jəjəb gə Arimate, gə to dəw gə d-ila kuji dɔ-ɛ gə, ngaɓa n-to kara lə nje gə no ngɔ gangə tar gə lə Jiibije, gə ye ja kara aw ngina ɓeko̰ lə Luba tɔ le ɗe. N-aw n-inga Pilad, n-dəj-e nin Jeju le.

⁴⁴ Lo tar igi Pilad sɛl mba kuy gə n-uy gə tɔg-ɛ baa nam, ɗaa ula ɓar njekun dɔ njeɗɔje ngaɓa dəji-e se n-uy ləw baa wa?

⁴⁵ Logə njekun dɔ njeɗɔje le ɗe pa ar-ɛ ɗaa n-un ɗəw n-ar Jəjəb n-ar un nin le.

⁴⁶ Jəjəb aw ndogo ta kubu gə nda, ɗaa ɔr nin Jeju le, ɓiri gə ta kubu ngaɓa aw dubu-e buwa gə ꞌsɔɔ mə ər gə, ɗaa n-nduburu pil ər n-ila t-ɛ gə.

⁴⁷ Məri gə Magədala je gə Məri ko̰ Jose-je d-ar d-o lo gə d-ila-a kəne.