Marəke 14 - Mbede Lə Luba Kone Gə Sigi

D-ula njuma dɔ Jeju gə

¹ Ndɔ ɗa Pagə je gə ndɔ ɗa nay mbə gə guway kodo godo kəne nay joo gə kede ɓi. Ɗaa buba njekapoloje gə njekɔr gəl toronduje ꞌsangə gusu gə d-a kuwa ne Jeju tɔl-ɛ.

² Mba ꞌpa na: May kuwa-a gə ndɔ ɗa nay gə ang na dəw mə ɓeje d-a kḭ ɗa ne wungu.

Jene kara um ba̰y kəndə mambo̰ dɔ Jeju gə

³ Logə Jeju aw Ɓetani ɗaa, isi ta ka nekusa gə mə kəy gə lə Simo gə njebənji, jene kara ɗe gə ubu gə ꞌɗa gə no kagə gə ꞌɓar-ɛ na nar gə gə kəm-e ja, gə əndə mbo̰ gə lar-ɛ ya̰ ja, mə ngon ku gə ꞌɓar-ɛ aləbadə. N-ɔr ta ku ɗaa n-um ubu le dɔ Jeju gə.

⁴ Nje gə kɛm kəji lə-je jɔgəje ɗaa ꞌyṵrṵ tar horo naa gə na: Mba ɗi ja n-tuji ba̰yi kəndə mambo̰ gə nee baa wa?

⁵ To kəm ɗabə ba̰yi kəndə mambo̰ ta ne mbɛl gə nday kula tɔl munda mba la ne gə njendooje. Wungu to-je dɔ jene gə nee le.

⁶ Ngaa Jeju pa na: Ḭya̰-je ɗɛgɛgɛ. Mba ɗi ɓa ꞌjɔg-ɛje ne wa? N-ɗa sə-m ne gə may ja;

⁷ mba njendooje le ꞌga̰ gə si nee gə ndɔje tɔ̰y, ɗaa ndɔ gə mə-si njigi ja asəje mba ɗa gə je may, ngaa ꞌma le m-a ga̰ gə si gə ndɔje tɔ̰y ang baa.

⁸ N-ɗa ne gə asə kar-ɛ; n-um ubu dɔ-m gə kede nam ɓa kar ndɔ kila-m mə buwa gə asə ɓi.

⁹ Tɔgərɔ ja, m-pa m-ar-si to gə, loje tɔ̰y gə d-a kila mbərə Tar gə May dɔ nangə nee le, dəwje d-a pa tar ne gə jene ɗa nee le mba kole ne mə-je dɔ-ɛ gə.

Judas un dɔ Jeju

¹⁰ Judas Isikariyɔdə gə to kara lə nje gə dɔg gə gir-je gə joo, aw inga buba njekapoloje mba kila Jeju mə ji-je gə.

¹¹ ꞌTuga mbi-je d-o ne tar lə-a gə rɔləl ɗaa, d-un ndu-je gə mba kar-ɛ lar. Be ɓa Judas sangə mba kinga ɗəw gə gə maj-ɛ ɓa gə mba kila ne Jeju mə ji-je gə.

Jeju unda kudu mə kara

¹² Dɔngɔr ndɔ ɗa nay mbə gə guway kodo godo kəne le, ndɔ gə kar dəwje ꞌtɔl ne ngon badəm mba ndɔ ɗa nay Pagə nay joo gə kede ɓi ɗaa, ngan njenendoje lə Jeju ꞌpa d-ar-ɛ na: Lo gə ɗa ɓa ꞌnjigi kar j-aw gɔl nekusa Pagə le kəne wa?

¹³ Be ɓa Jeju un ndu ar ngan njenendoje lə-a joo, ngaɓa pa ar-je na: Awje mə ɓebo gə, a ɓo ingaje dəw gə jingaw kara odo jo man dɔ-ɛ gə nama uwaje go-e;

¹⁴ logə n-a kandə kəne nama, ꞌpaje ar-je njekəy gə nee le na: Njenetɔji na: Lo gə ɗa ɓa m-a kusa Pagə kəne gə ngan njenendoje lə-m wa?

¹⁵ Ɗaa n-a tɔji-si mə kəy gə dɔ mar-ɛ gə taar, gə ꞌgɔl kede nam ngaa: Lo-e gə nee le ɓa a gɔl-je nekusa Pagə kəne.

¹⁶ Ngan njenendoje d-aw, ce mə ɓebo gə, d-inga neje to gə n-pa ne n-ar-je le ja, ɗaa d-uwa dɔ gɔl Pagə le naa gə jəbə.

¹⁷ Kar kumatagə ɗaa, n-ɗe gə ngan njenendoje gə dɔg gə gir-je gə joo.

¹⁸ Logə d-isi ta ka nekusa gə d-aw d-usa ne ɗaa, Jeju pa na: Tar gə tɔgərɔ ja, m-pa m-ar-si to gə, dəw kara horo-si gə nee gə usa sə-m ne ja a kun dɔ-m.

¹⁹ Kəm-je un kudu ɗa ndoo, ɗaa ꞌpaje tar horo naa gə yo gə nee na: To ꞌma wa?

²⁰ Jeju ila-je kəne na: Dəw kara horo-sisəy gə dɔg gə gir-si gə joo, gə ula ji-a sə-m naa gə kara baa mə ka gə nee ja.

²¹ Tɔgərɔ ja, ꞌma gə Ngon lə dəw m-a kuy to to gə Mbede lə Luba pa. Ngaa tuji a kuba dəw gə a kun dɔ-m! May kar kuji ja kara d-uji-e ang.

²² Logə d-aw d-usa ne be ɗaa, Jeju un mbə kara, tɔr ndu-e kəne ɗaa, uwa cɛdə dana ngaɓa ula ar-je pa ne tar t-ɛ gə na: ꞌTaje, ye gə nee le to darɔ-m.

²³ Go-e gə, n-un nekay, logə n-ɗa Luba oyo ɗaa n-ar-je d-ay tɔ̰y.

²⁴ Ɗaa n-pa n-ar-je na: ꞌYe gə nee le to məsə-m, məsə kone, gə kay nangə mba dəwje bula.

²⁵ Tar gə tɔgərɔ ja, m-pa m-ar-si, m-a kay gə si man bḭyə̰ nee gugu ang, saar ndɔ gə m-a təl kay gə si ꞌye gə sigi mə ɓeko̰ gə lə Luba.

²⁶ Logə d-ɔsə pa d-ɔsə ne gaji Luba d-ila nangə ɗaa d-ɔdə d-aw dɔ wuri gə kagə Olibiyeje d-ar kəne.

²⁷ Jeju pa ar-je na: A kosoje tɔ̰y, mba ꞌɗa mə mbede gə na: M-a tɔl njekuul badəmje kar badəmje d-a jɛ̰rɛ̰ naa.

²⁸ Ngaa, logə m-a kuy ɓa m-a ndol ɗaa m-a kaw dɔ nangə gə Galile kede no-si gə.

²⁹ Piyɛr pa ar-ɛ na: Le ꞌto jigi tuga koso lə-je tɔ̰y ja kara, a to kar-m ꞌma ang.

³⁰ Ngaa Jeju ila-a kəne na: Tar gə tɔgərɔ, m-pa m-ar-i to gə ɓogəne, mə cil gə nee ja, nam ɓa kar kura̰ ila mbərə gɔl joo le, ꞌi a ma̰y tar gɔl munda na ꞌgərə-m ang.

³¹ Ngaa Piyɛr ar dɔ gɔl-ɛ gə njang pa na: Kəm kuy kara kuy ja m-a kuy sə-i ɓo ɗɔg ɓa m-a ma̰y tar mbadə-i ne ang. ꞌJeje tɔ̰y ja kara ꞌpa to gə be tɔ.

Jeju aw Gɛɗəsəmane

³² Cibi d-ɔdə d-aw lo gə ri-a na Gɛɗəsəmane, ɗaa Jeju pa ar ngan njenendoje lə-a na: Isije nangə nee lo gə m-a kaw mba dəji Luba.

³³ N-ar Piyɛr, gə Ja̰ gə Jagə d-aw sə-a. Njil-e un kudu ce kərəng, ngaɓa ɓəəl gə boy ja unda-a gang-ɛ.

³⁴ N-pa n-ar-je na: Mə-m gangə man saar ce kəm gə lə-m ar m-əndə ba̰y yo; isije nee, ɓo ɔgəje kəm-si ɓi.

³⁵ Cibi n-ɔdə gə kede njɛ̰, n-dəbə no-ɛ nangə ɗaa n-dəji Luba kar ɓo ɗəw to nama ɔsə nekay ꞌməsərə nee le t-ɛ gə ngərəng gə ɗangə.

³⁶ N-pa na: Bɔy, Bɔy, neje tɔ̰y to tar lə-i ja, ɔsə ngo kay ne nee ta-m gə ngərəng gə ɗangə. Be ja kara, to gə mə-i ja njigi, ɓo ꞌma ang.

³⁷ N-təl n-ɗe n-inga ngan njenendoje lə-a dɔ ɓi gə, ngaɓa n-pa n-ar Piyɛr na: Simo, ꞌcibi wa! Asə gə mba kɔgə kəm-i ɓi kar kara baa ja kara nəm ang wa!

³⁸ ꞌCibije dɔ rɔ-si gə ang ɓo ꞌdəjije Luba mba kar-si osoje dan nena gə ang, kəji lə-si a njigi to njang ja ngaa darɔ mbɔr-ɛ gə mbɔr-ɛ.

³⁹ Jeju təl ɔdə aw nganga̰ to gə ɗangə ɗaa, dəji Luba to gə mar-ɛ gə kede le ja cibi.

⁴⁰ N-təl n-ɗe to gə ɗangə ɗaa, n-inga-je dɔ ɓi gə le ja cibi; mba kəm-je uway njing-njing. D-o tar kara gə d-a kila kəne ang.

⁴¹ N-təl n-ɗe gɔl munda lə-a ɗaa, n-pa n-ar-je na: Aw ꞌCibije gə ꞌuwaje kɔr-si ja dɔro ɓi əng mə! Ɓɛlɛ ngaa! Kar asə ngaa; oje ꞌma gə Ngon lə dəw le d-a kila-m mə ji njeneɗaje gə kṵra̰y gə.

⁴² Ḭje taar ar-si j-awje, na nje kun dɔ-m le aw ɗe.

D-uwa Jeju

⁴³ Gə tɔg-ɛ baa, logə n-aw n-pa tar t-ɛ gə baa ɓi ja ɗaa, Judas gə to kara lə ngan njenendoje gə dɔg gə gir-je gə joo, ce pɔɔ gə bula dəwje gə d-uwa kiya bay gə ngal gə guruje ji-je gə. Buba njekapoloje gə njekɔr gəl toronduje gə buba ɓeje ɓa d-ula-je.

⁴⁴ ꞌNe gə njekun dɔ-ɛ le n-tɔji-je kede n-pa na: Dəw gə ɓo m-to mbi-a nama to ꞌne ja əng, ɗaa uwa-aje, undaje kəm-si dɔ-ɛ gə gə maj-ɛ awje sə-a.

⁴⁵ Gə tɔg-ɛ baa, logə n-ɗe n-inga Jeju ɗaa, n-pa na: Njenetɔji, ɗaa n-uwa-a n-to mbi-a.

⁴⁶ Be ɓa bula dəwje nee le d-ila Jeju d-uwa-a.

⁴⁷ Dəw kara gə ar horo nje gə d-ar kəne ɔr kiya bay lə-a, tuga ne mbi ngon njekula lə buba njekapolo bad gangə.

⁴⁸ Jeju un tar pa ar-je na: ꞌƊeje gə kiya bayje gə guruje ɓa uwa-mje ne to gə d-uwa ne gayim be.

⁴⁹ ꞌMa le m-ga̰ gə si gə ndɔje tɔ̰y mə kəy gə lə Luba, m-tɔji ne kəne ja ngaa uwa-mje ang. Ngaa ɗa to gə be gə mba kar tar gə Luba pa le to ne lo-e gə.

⁵⁰ Ngan njenendoje lə-a tɔ̰y ja d-a̰y d-iya̰-a.

⁵¹ Ngon basa̰ kara gə rɔ-ɛ gə ta kubu ja baa uwa go Jeju. ꞌSangə ɗəw mba kuwa-a,

⁵² ꞌne n-iya̰ ta kubu le ji-je gə ɗaa n-ɔdə n-ay kud-e dum baa.

Jeju ar nadə tar gə

⁵³ D-aw gə Jeju ɓə lə buba njekapolo, logə buba njekapoloje, buba ɓeje gə njekɔr gəl toronduje tɔ̰y ꞌmbo̰ naa kəne.

⁵⁴ Piyɛr uwa go Jeju dɔ ji ndə̰w̰, saar ce ne mə ndogo gə lə buba njekapolo ja kɔrɔgə. N-isi gə njengəm loje n-njibi gə je pər.

⁵⁵ Buba njekapoloje gə nje gə no ngɔ gangə tar gə lə Jiibije tɔ̰y ꞌsangə mba kinga tar naji gə a kila tar dɔ Jeju gə gə mba kar ꞌtɔl-ɛ ne, ɗaa d-inga ang;

⁵⁶ mba dəwje bula ꞌgangə tar gə ɗəgərə d-unda t-ɛ gə, ngaa tar najije lə-je tila kəm naa.

⁵⁷ Nje gə kɛm d-ḭ taar ꞌgangə tar gə ɗəgərə d-unda t-ɛ gə na:

⁵⁸ J-o tar t-ɛ gə n-pa na: M-a tuji kəy gə lə Luba gə dəwje ɗa nee ɗaa ndɔ munda ja m-a kunda ye gə ɗangə gə ji dəw a ɗa ang.

⁵⁹ Ɔji dɔ tar-ɛ gə kən nja kara, tar najije lə-je aw naa gə ang.

⁶⁰ Buba njekapolo ḭ taar dan bula dəwje gə, pa ar Jeju na: Tar gə d-ila dɔ-i gə nee le a kila kəne ang wa?

⁶¹ Jeju ar t-ɛ munduru, ila tar gə ang. Buba njekapolo dəji-e tar to gə ɗangə na: ꞌTo Kirisi, Ngon lə Luba gə ndu tɔr to dɔ-ɛ gə le wa?

⁶² Jeju ila kəne na: To ꞌma ja. Ɗaa a ko-mje ꞌma gə Ngon lə dəw gə m-isi dɔ ji kɔl Njesingamongə gə, m-a ɗe dan kil lə nji gə dara.

⁶³ Be ɓa buba njekapolo uwa kubuje gə rɔ-ɛ ye gə ja cir ngaɓa pa na: J-a sangə njetar najije gə mba ɗi cibi wa?

⁶⁴ Oje tar kɔb le gə mbi-si ngaa. Əjije na ɗi cibi wa? Ɗaa ꞌjeje tɔ̰y ja d-um tar dɔ-ɛ gə gə mba tɔl-ɛ.

⁶⁵ Ɗaa nje gə kɛm ꞌcibi yoro kəm-e gə, ꞌtɔ kəm-e gə ta ne ngaɓa ꞌɓiri ji-je ꞌkunda ne ɗaa ꞌpa na: ꞌGərə ɓo ꞌpa ar-si j-o. Cibi njengəm loje ꞌkunda kɔj-ɛ.

Piyɛr ma̰y tar dɔ Jeju gə

⁶⁶ Logə Piyɛr isi mə ndogo gə be ɗaa, ngon njekula gə jene lə buba njekapolo kara horo mar-ɛje gə ɗe.

⁶⁷ N-o Piyɛr isi aw njibi pər, n-a-ɛ jii ɗaa n-pa na: ꞌI kara ꞌga̰ gə Jeju gə Najarɛd tɔ lə ma!

⁶⁸ Piyɛr ma̰y na: M-gərə mə tar lə-i gə ꞌnjigi pa le ang. Ngaɓa n-ce n-aw ɗaga ta ndogo gə ɗaa kura̰ ila mbərə.

⁶⁹ Ngon njekula gə jene o-e ɗa təl un tar pa to gə ɗangə ar nje gə ga̰ kəne na: ꞌNe gə n-ar nee le n-to kara lə-je. Piyɛr ma̰y to gə ɗangə ja cibi.

⁷⁰ Waga ɗaa, nje gə d-ar lo-e gə ꞌpa d-ar Piyɛr na: Tɔgərɔ ja, ꞌi kara, ꞌto kara lə dəwje gə nee le tɔ; mba ꞌi to dəw gə dɔ nangə gə Galile.

⁷¹ Be ɓa Piyɛr un kudu kuwa naji kum dɔ rɔ-ɛ gə na: Dəw gə aw paje tar lə-a əng le, m-gər-e ang ja.

⁷² Gə ngɔdə baa kura̰ ila mbərə gə gɔl joo lə-a, ɗaa mə Piyɛr ole dɔ tar gə Jeju pa kede ar-ɛ na: Nam ɓa kar kura̰ ila mbərə gɔl joo ɗaa, a ma̰y tar gɔl munda na ꞌgərə-m ang. Be ɓa Piyɛr oso dɔ no gə no.