Marəke 13 - Mbede Lə Luba Kone Gə Sigi

Jeju ila mbərə kəy gə lə Luba gə d-a tɔ

¹ Jeju ɔsə lo ce mə kəy gə lə Luba ɗaa, ngon njenendo lə-a kara horo mar-ɛje gə pa ar-ɛ na: Njenetɔji, a o, ər gə may al dɔ lo nee! Kəy gə d-unda may al dɔ lo nee!

² Jeju ila-a kəne na: ꞌI o kəy gə boy nee wa? Kɔr ər kara baa ja kara a nay dɔ mar-ɛ gə ang: d-a rundu neje tɔ̰y nangə pulug-pulug.

³ Jeju isi dɔ wuri gə kagəje gə ꞌɓar-ɛ Olibiyeje d-ar kəne, gə a kəm kəy lə Luba ɗaa, Piyɛr je gə Jagə, gə Ja̰, gə Andəre ꞌdəji-e tar lokiya gə na:

⁴ ꞌPa ar-si j-o, ndɔ gə ɗa ɓa neje nee le a ɗe ne wa? Ngaɓa ɗi ɓa gə netɔji gə a tɔji ngangə neje tɔ̰y nee le wa?

⁵ Jeju ḭ pa ar-je na: Undaje kəm karə dɔ rɔ-si gə ɓo ar-je dəw ərə si ang.

⁶ Mba dəwje bula d-a ɗe gə ri-m ngaɓa d-a pa na: To ꞌma ja. Ngaɓa d-a kərə ne dəwje bula.

⁷ Logə a koje tar ɗɔje gə tam ɗɔje gə a koso nama, ar-je mə-si gangə man ang, mba to ne gə a ɗe. Ngaa to gə ɗud-e ang ɓi.

⁸ Gəl kuji dəwje d-a ɗɔ naa, gə ɓeko̰je d-a ɗɔ naa, gə loje ɓədə-ɓədə le, dɔ nangə a yəgə ngaɓa ɓo kara a ko̰ nəm tɔ. Ngaa a to to gə kuma kudu ndo gə aw to jene be baa ɓi.

⁹ Unda-je kəm karə dɔ darɔ-sisəy gə ja; D-a kaw gə si no ngɔ gangə tarje gə, ngaɓa d-a kunda-si gə kɔb mə kəy nendo gə, d-a kaw gə si no njeko̰ ɓeje gə, no mbayje gə mba tar lə-m kar to tar naji no-je gə.

¹⁰ Dɔngɔr-ɛ ja ɗaa may kar d-ila mbərə Tar gə May nee le d-ar gəl kuji dəwje tɔ̰y ɓa.

¹¹ Logə d-a kaw gə si no ngɔ gangə tar gə nama, ꞌnoje rɔ-si mba tar gə a kaw paje ang, ngaa ye gə d-a kum ta-si gə dɔ kar-ɛ gə əng ja ɓa ꞌpaje, mba to sisəy ɓa a paje tar ang, ngaa to Njil Njerɔsangə.

¹² Dəw a kun dɔ ngon ko̰-ɛ kar-je d-a tɔl-ɛ, bɔ ngon je a kun dɔ ngon-e, nganje d-a təl nje kəm tarje lə nje kuji-jeje, ngaɓa d-a ɗa kar d-a tɔl-je.

¹³ Dəwje tɔ̰y d-a njigi-si ang gə kɔrɔ ja mba tar lə-m; ngaa dəw gə uwa gədərə saar ce ɗud-e gə ɓa a kinga kaji.

Ne ur ti gə boy

¹⁴ Logə a koje njeneɗa gə ngabula gə to nje tuji lo a ɗe kisi lo gə to ɔji dɔ-ɛ ang gə ɗaa, may kar nje tura mbede o gə maj-ɛ ɓa! Nje gə d-a kisi dɔ nangə gə Jude nama may kar d-a̰y gə dɔ ərje gə.

¹⁵ Dəw gə isi dɔ kəy gə a ɗisi kandə kəy mba kun ne kara ang nəm;

¹⁶ ngaɓa dəw gə ar aw ɗa kula ndɔɔ nama, a təl mba kaw kun kubu lə-a ang.

¹⁷ Nekəmandoo a to kar jeneje gə d-a kaw gə kɛ̰m gə nje gə nganje d-aw d-il mba dɔ ndɔ-ɛje gə əng le.

¹⁸ ꞌDəjije Luba mba kar ne gə nee le ce nay ɓara ang.

¹⁹ Mba a to ndɔ ne ur tije gə ce ndɔ kara ang, neməko̰je gə gar-ɛ godo, logə Luba un kudu ɗa ne dɔ nangə nee ja saar ce ɓogəne, ngaɓa neməko̰ gə be le a təl ce ang magə ja gə dɔbo̰.

²⁰ Ngaɓa, to gə ɓo Mbayɓe ɔsə ta ndɔje nee le gangə ang nama, dəw kara kara a kinga kaji ang, ngaa n-gangə ndɔje nee le mba dəwje lə-a gə n-mbərə-je.

²¹ To gə ɓo dəw pa ar-si na: Kirisi a ar nee, ose ye n-ar nu kən, nama ꞌtaje kag-ɛ ang.

²² Mba kirisije gə gə mbɔr-ɛ baa gə pajambərəje gə gə mbɔr-ɛ baa d-a ɗe ɗa netɔjije gə neje dang-dang gə kəm dəw o ndɔ kara ang, mba kar ɗəw to nama kərə ne dəwje gə ꞌmbərə-je.

²³ Undaje kəm karə dɔ rɔ-si gə, m-pa tar-ɛ tɔ̰y m-ar-si kede nam.

²⁴ Ngaa dɔ ndɔ-ɛje gə əng le, go ne ur ti gə to ɓəəl gə a ɗa dəwje le ɗaa, kar a kɔsə ang, nay kara a nda ang

²⁵ ndɛ̰ndərɛ̰ndɛ̰je d-a kḭ dara toso nangə, neje gə to ɓəəl to ɓəəl gə dara kara d-a yəgə nəm tɔ.

²⁶ Be ɓa, d-a ko-m ꞌma gə Ngon lə dəw gə m-a ɗe mə kil gə lə nji gə singamongə gə boy ngaɓa dan rɔnduba gə.

²⁷ Ngaɓa m-a kula anjije lə-m kar d-a mbo̰ dəwje gə m-mbərə-je kil nangə gə sɔɔ gə, ko̰ nangə gə saar ce ne ko̰ dara gə.

²⁸ Oje ne gə kagə tungu tɔji-si gə gusutar nee: Logə ba̰a̰ kag-ɛ iri gə kam-ɛje unji nama ꞌgərə-je to gə nay ɓar nay njɛ̰ baa ngaa.

²⁹ Ɗəw kara baa, to gə sisəy kara, logə a koje neje gə əng le ɗaa, may kar-si ꞌgərəje to gə ꞌma gə Ngon lə dəw m-ar ta ɗəw gə kɛgɛgɛ ngaa.

³⁰ Tɔgərɔ ja m-pa m-ar-si to gə gəl kuji dəwje gə ɓogəne d-a kuy ɗunga ang ja neje tɔ̰y nee le a ɗe.

³¹ Dara je gə nangə d-a nday ngaa tarje lə-m d-a nday ang.

³² Tar gə ɔji dɔ ndɔ-ɛ ose dɔ kar-ɛ le, dəw kara kara gərə ang, anjije gə dara ang nəm, ɓa ꞌma gə Ngon ja kara m-gərə ang nəm, ngaa Bɔ dəwje ja gə kar-ɛ baa ɓa gərə.

³³ Undaje kəm karə dɔ rɔ-si gə, ꞌɔgəje kəm-si ɓi ɓo ꞌdəjije Luba, mba ꞌgərəje ndɔ gə dɔ kar-ɛ a kasə ne ang.

³⁴ Ɓeko̰ lə Luba le to ɗəw kara baa to gə dəw gə aw gə mba gə be, ɗaa ḭya̰ neje tɔ̰y mə ji ngan njekulaje gə lə-a, na-na kara gə kula lə-a kula lə-a, ngaɓa n-un ndu n-ar njegəm ta ɗəw kəy kar ngom gə maj-ɛ.

³⁵ Ar-je kɛgɛgɛ, mba ꞌgərəje kar gə njekəy a ɗe ne ang, n-a ɗe kar kumatagə, ose dan lo gə, ose gə kura̰ gə ila mbərə, ose gə ndɔɔ-sḭ baa.

³⁶ May kar isaje ɗɛgə-ɗɛgə gə ɓəəl mba n-a kḭ ce dɔ-si gə bus baa ngaɓa n-a kḭ kuwa-si dɔ ɓi gə.

³⁷ Tar gə m-pa m-ar-si le, m-pa m-ar-si tɔ̰y ja: Isije dɔ gɔl si gə.