Marəke 12 - Mbede Lə Luba Kone Gə Sigi

Gusutar lə nje ɗa kula bḭyə̰

¹ Jeju un kudu pa tar kar dəwje gə gusutarje na: Ndɔ kara be, dəw kara maa kagə gə ri-a na bḭyə̰. N-ula kinga n-ay ne ngang-ɛje mbugu, n-uru buwa kar ndəy man bḭyə̰, cibi n-ɗa kəy lo t-ɛ gə; ngaɓa n-ḭya̰ ji njeɗa kula bḭyə̰je gə ɗaa n-ɔdə n-aw mba gə.

² Logə nay kunja kandə bḭyə̰ le asə ɗaa n-ula ngon njekula kara ɓə lə njeɗa kula bḭyə̰je gə mba kar ꞌta bḭyə̰ k-ɛ le ji-je gə.

³ D-uwa-a, ꞌkunda-a ngaɓa tɔb-ɛ ji-a dɔrɔ baa.

⁴ N-təl n-ula ngon njekula gə ɗangə ɓə lə-je ja cibi; ɗaa ꞌkunda dɔ-ɛ wɔg-wɔg ngaɓa ꞌtaj-ɛ.

⁵ N-təl n-ula njekum gə munda ɗaa ꞌtɔl-ɛ; ngaɓa nje gə kɛm bula gə ꞌkunda-je ose ꞌtɔl-je.

⁶ Ngon njigi lə-a gə nay kara baa ji-a gə ja n-ula-a ɓə lə-je gə bo̰ ɗaa n-əji m-e gə na: Ɓo to ngon-m nama d-a ɓəəl-e.

⁷ Ngaa njeɗa kula bḭyə̰je nee le ꞌpa tar horo naa gə na: Nje kuwa nenduba le ja ɓa nee, ꞌɗeje ar-si j-a tɔl-ɛje, ɗaa nenduba le a to kar-si.

⁸ Be ɓa d-uwa-a, ꞌndɔr-ɛ mə ndɔ bḭyə̰ gə d-aw sə-a gir kinga gə ɗaga ɗaa ꞌtɔl-ɛ d-ila-a kɔrɔ.

⁹ Ɗi ɓa njendɔ le a ɗa wa? N-a ɗe kar ꞌtɔl nje ɗa kula mə ndɔ gə je, ɗaa n-a kun ndɔ bḭyə̰ le kar nje gə ɗangə.

¹⁰ ꞌTuraje tar gə nee mə mbede gə ang wa: Ər gə njekunda kəyje ꞌmbadə le təl to ər gə mongə, gə kil kəy gə;

¹¹ Ne nee le ḭ rɔ Mbayɓe gə, ɗaa to ne gə to ɓəəl ya̰.

¹² ꞌJeje ꞌgərə to gə Jeju pa gusutar nee ɔji dɔ-je ɗaa, ꞌsangə ɗəw mba kuwa-a, ngaa ꞌɓəəl bula dəwje, ɗaa d-ḭya̰-a d-ɔdə d-aw.

Lar gədə ɓe lə Sejar

¹³ D-ula Parijiyɛ̰je gə kɛm gə nje koso gəl Erɔdə gə je ɓə lə Jeju mba kar d-iya kula d-uba ne gə go tar paje lə-a.

¹⁴ ꞌƊe ꞌpa d-ar-ɛ na: Njenetɔji, j-a gərə to gə ꞌto nje pa tar gə tɔgərɔ nəm, ꞌɓəəl ne kəm dəw ang; mba ꞌi o pa kun darɔ lə dəwje gə ɗaga baa ang nəm, ꞌtɔji dəwje pa nja gə ta kəm Luba nəm tɔ. Ɗəw to kar dəw uga lar gədə ɓe lə Sejar wa? J-a kuga ose j-a kuga ang wa?

¹⁵ Jeju gərə tar mula lə-je som, ɗaa ila-je kəne na: Mba ɗi ɓa ꞌna-mje ne wa? ꞌƊeje gə sulay kara ar-mje m-o.

¹⁶ ꞌƊe gə sulay kara; ɗaa Jeju dəji-je na: Se dɔ dəw, gə nekunja gə nee to kar na wa? D-ila-a kəne na, to kar Sejar.

¹⁷ Be ɓa, Jeju pa ar-je na: Ne lə Sejar nama ar-je Sejar, a to gə ɓo ne lə Luba nama ar-je Luba, ɗaa lo tar igi-je sɛl.

Sadusiyɛ̰je gə tar gə ɔji dɔ ndol lə nje gə d-uy

¹⁸ Sadusiyɛ̰je ꞌpa na dəw uy ɓa ndol ang, ꞌɗe d-inga Jeju gə ꞌdəji-e na:

¹⁹ Njenetɔji, o tar gə Moyiji pa ar-si ɓa nee: To gə ɓo dəw ta jene ɓa uji ne ang ɓa bo uy nama, ngon ko̰-ɛ a ta jene lə-a, ɗaa a kunda ne ko ngon ko̰-ɛ.

²⁰ To gə be ɓa, ngan ko̰ naaje d-ḭ siri ɗaa, dəw gə dɔngɔr ta jene lal kunda ne ko-e baa ja uy.

²¹ Ye gə njekum gə joo ta jene nduba le ɗaa unda ne ko-e ang baa ja tɔ ɗaa uy. Njekum gə munda kara to gə bənəng nəm,

²² ɗaa dəw kara ja kara horo nje gə siri nee le uji ngon ang magə. Go-je gə tɔ̰y ɗaa, jene le kara uy tɔ.

²³ Ngaa ndɔ gə dəwje gə d-uy d-a ndol le se, na ɓa horo ngan ko̰ naaje siri nee le n-a to jene lə-a wa? Mba ꞌt-ɛje gə ta ja gə kəm-je gə siri tɔ̰y.

²⁴ Jeju pa ar-je na: O-je gəl ne gə ꞌndəəmje ne le ɓa nee: ꞌGərəje Mbede lə Luba ang nəm, gə singamongə lə Luba ang nəm tɔ.

²⁵ Be ɓa, logə nje gə d-uy d-a ndol le, jingawje gə jeneje d-a ta naa ang, ngaa d-a kaw to gə anjije gə dara be.

²⁶ Tar gə ɔji dɔ nje gə d-uy gə d-a ndol, gə Luba pa ar Moyiji mə ko bul gə, gə to mə mbede gə le ꞌturaje ang wa? Luba pa ar Moyiji na: M-to Luba lə Abəraham, Luba lə Ijagə gə Luba lə Jakobo?

²⁷ Luba to Luba lə nje gə d-uy ang, ngaa n-to Luba lə dəwje gə d-isi kəm baa. Ndəəm-je igi-je paa.

Ndu gə al dɔ nduje tɔ̰y

²⁸ Dəw kara horo njekɔr gəl toronduje gə tuga mbi-a o ndu-je lo ma̰y tar gə ɗaa, o to gə Jeju ila Sadusiyɛ̰je kəne gə maj-ɛ ɗaa, n-gɛsə gə mbɔr Jeju gə ngaɓa dəji-e na: Ndu gə ɗa ɓa to ɓəəl unda mar-ɛje tɔ̰y wa?

²⁹ Jeju ila kəne na: Ye gə dɔngɔr ɓa nee: ꞌTuga mbi o, Ijirayɛl! Mbayɓe Luba lə-si to Mbayɓe gə kara baa ɗəgədə

³⁰ ɗaa ꞌi a njigi Mbayɓe, Luba lə-i, gə ngaw ur-i tɔ̰y, gə kəm lə-i tɔ̰y, gə kəji negərə lə-i tɔ̰y ngaɓa gə singa-i tɔ̰y.

³¹ Njekum gə joo ɓa nee: A njigi njemar-i to to gə darɔ-i be. Ndu gə ɗangə gə to ɓəəl ya̰ unda nje gə nee le godo.

³² Njekɔr gəl torondu le pa na: May boy, Njenetɔji, tar gə ꞌpa le to tar gə tɔgərɔ ja. Mbayɓe le to Luba gə kara baa ɗəgədə ngaɓa Ye gə nje kunda-a kəne gə ɗangə godo;

³³ ngaɓa njigi-e gə ngaw ur-i tɔ̰y, gə tar kənji lə-i tɔ̰y, gə singa-i tɔ̰y, ngaɓa njigi njemar-i to gə darɔ-i be le, neje nee le to ɓəəl unda nepoloje gə ꞌro gə pər d-ar Luba, gə nepoloje tɔ̰y.

³⁴ Logə Jeju o to gə n-ila kəne gə go negərə ɗaa, ila-a kəne na: ꞌI le nay əw ang baa gə Ɓeko̰ lə Luba, ɗaa dəw kara kara asə dəji-e tar ang ngaa.

Kirisi to ngon lə Dabidi wa?

³⁵ Jeju un tar pa aw tɔji ne mə kəy gə lə Luba. N-dəji-je na: Na ban ɓa njekɔr gəl toronduje ꞌpa na Kirisi to gə gəl kuji gə lə Dabidi ɓi wa?

³⁶ Dabidi gə darɔ-ɛ ja pa gə ɗəw gə lə Njil Njerɔsangə ɔji dɔ Kirisi na: Mbayɓe Luba pa ar Mbayɓe lə-m: Isi dɔ ji kɔl-m gə, Saar gə mba kar-m m-təl ne njeba̰a̰je lə-i mba kar ꞌnja dɔ-je gə.

³⁷ Dabidi gə darɔ-ɛ ja ɓar-ɛ Mbayɓe; ngaa n-a to ngon-e to gə ban cibi wa? Ɗaa bula dəwje d-o tar lə-a le gə rɔləl.

Jeju ila tar dɔ njekɔr gəl toronduje gə

³⁸ Jeju pa tar tɔji ne nena: Aje rɔ-si rɔ njekɔr gəl toronduje gə; ꞌnjigi mba nja gə kubu gə ngal yududu-yududu, ngaɓa kar d-unda ji-je go naa gə ɓa d-uwa ne ji-je ta nada;

³⁹ a ɓo kəy nendo gə nama, lokisi gə kede ja ɓa ꞌnjigi kisi kəne, cibi ꞌnjigi lo kisi riɓar lo muru bula gə.

⁴⁰ D-o̰ mə kəy lə jene ndubaje ləm-ləm d-ore dɔ-ɛ nangə ndəng ꞌdəji Luba ngɔɔgɔ-ngɔɔgɔ d-ar kuru-je əwu mba kar dəwje d-o-je ne. Be ɓa d-a gangə tar gə to ɓəəl ya̰ dɔ-je gə.

Nenuji lə jene njekəy kinga

⁴¹ Jeju isi nangə mbɔr ka nebaw gə d-ila nenuji kəne, o nee ɗəw gə bula dəwje d-aw d-ila ne nenuji. Bawje bula d-ila ya̰.

⁴² Jene nduba kara to dangə gə, ɗe gə sulay joo um kəne tɔ.

⁴³ Be ɓa Jeju ɓar ngan njenendoje lə-a ɗaa, pa ar-je na: Tar gə tɔgərɔ, m-pa m-ar-si, jene njekəy kinga nee le ila ne unda dəwje tɔ̰y gə d-um ne mə ka nebaw gə nee;

⁴⁴ mba dəwje tɔ̰y d-ila kɛsə neje lə-je gə to baa, ngaa ꞌne ɗaa, n-un nebaw lə-a ɗɔdə n-ar gə nenuji; ne gə ye ja baa to ji-a gə ngaɓa n-um m-e kəne mba gədə ne rɔ-ɛ.