Marəke 11 - Mbede Lə Luba Kone Gə Sigi

MƏ ƁE GƏ JERUJALƐM. KUY GƏ NDOL LƏ JEJU Jeju andə mə ɓe gə Jerujalɛm

¹ Logə Jeju je gə ngan njenendoje lə-a d-unda dɔ ɓe gə Jerujalɛm dəb, əw ang gə ɓe gə Ɓɛdəpaje, gə ɓe gə Ɓetani əər gə dɔ wuri gə kagə Olibiyeje d-ar kəne, n-ula ngan njenendoje lə-a joo ɗaa n-pa n-ar-je na:

² Awje mə ɓe gə to no-si gə kən, logə a kandə-je mə ɓe gə le nama a kingaje ngon kororo gə dəw al-ɛ ang ɓi gə ꞌtɔ-ɛ nangə; ꞌtud-eje ɗaa ꞌɗe-je sə-a.

³ To gə ɓo dəw dəji si na: Mba ɗi ɓa ꞌtud-eje ne wa? Ila-je kəne na: Mbayɓe ɓa aw ndoo-e, ɗaa d-a kḭya̰-a gə tɔg-ɛ baa kar-si ꞌɗeje sə-a.

⁴ D-ɔdə d-aw ɗaa d-inga ngon kororo gə ꞌtɔ-ɛ nangə ɗaga ta kəy gə mbɔr ɗəw gə, ɗaa ꞌtud-eje.

⁵ Nje gə kɛm gə d-ar kəne ꞌdəji na: Ɗi ɓa aw ɗaje be wa? Mba ɗi ɓa ꞌtuduje ngon kororo gə nee le wa?

⁶ D-ila kəne to gə Jeju pa ar-je le, ɗaa d-ḭya̰-a d-ar d-aw sə-a.

⁷ ꞌƊe gə ngon kororo le ɗaa, ꞌtɔrəje kubuje lə-je d-um dɔ-ɛ gə ngaɓa Jeju al isi dɔ-ɛ gə ɓi.

⁸ Dəwje bula ꞌlabə kubuje lə-je nangə ɗəw boo, ngaɓa nje gə kɛm ꞌci kam kagəje gə mə ndɔ gə.

⁹ Nje gə d-ɔr no-ɛ gə nje nja go-e gə ꞌnjil ta-je gə, ꞌta ji naa gə miya̰ pa̰y-pa̰y na: Ojana! Ndu tɔr to dɔ dəw gə ɗe gə ri Mbayɓe!

¹⁰ Ndu tɔr lə Luba to dɔ ɓeko̰ gə lə ka-sijee Mbay Dabidi gə aw ɗe! Ojana gə mə sam dara gə.

Kagə tungu gə kugu uwa-a

¹¹ Jeju andə mə ɓe gə Jerujalɛm, mə kəy gə lə Luba. Lo gə Jeju ila kəm-e o neje tɔ̰y ɗaa, n-o to gə kar nday ya̰, n-ɔdə n-aw mə ɓe gə Ɓetani gə nje gə dɔg gə gir-je gə joo.

¹² Ndɔ gə nje kɔr-e go-e, logə ꞌce mə gə Ɓetani gə ɗaga ɗaa, ɓo ɔr Jeju.

¹³ Logə n-o kagə tungu kara əw, gə kam-ɛ to pɔ-pɔ ɗaa, n-aw n-tən n-o se n-a kinga kand-e kəne kusa wa? Ngaa logə n-ɗe kəne ɗaa, n-inga kam-ɛ le ja baa, mba to nay kandə lə-a ang.

¹⁴ Be ɓa ne n-un tar n-pa na: Ndɔ gə ɗangə dəw a kusa kand-i ang gə dɔbo̰! Ɗaa ngan njenendoje lə-a d-o ndu-e.

¹⁵ Logə ꞌce Jerujalɛm ɗaa, Jeju andə mə kəy gə lə Luba. N-tɔbə njeɗabə neje gə nje ndogo neje lo-e gə nee; n-kunda bəgərə lə njembəl larje gə dɔ nekisi lə nje ɗabə dərje n-tila.

¹⁶ N-ḭya̰ dəw kara be kara n-ar nja gə ne mə kəy gə lə Luba ang.

¹⁷ N-tɔji-je ne ngaɓa n-pa na: ꞌƊa mə mbede gə na: Kəy lə-m le d-a ɓar-ɛ kəy dəji Luba ɔji dɔ gəl kuji dəwje tɔ̰y. Ngaa sisəy ꞌɗaje gə buja lə nje ɓogoje.

¹⁸ Buba njekapoloje gə njekɔr gəl toronduje d-o ndu-e ɗaa, ꞌsangə ɗəw gə mba tɔl-ɛ; ngaa ꞌɓəəl mba netɔji lə-a dum dɔ bula dəwje.

¹⁹ Kar kumatagə ɗaa Jeju gə ngan njenendoje lə-a d-ɔdə mə ɓebo gə.

²⁰ Lo gə d-aw nday gə ndɔɔ ɗaa, ngan njenendoje d-o kagə tungu gə uy wɔ ce ngira-a gə.

²¹ Lo gə mə Piyɛr ole dɔ ne gə nday gə ɗaa, pa ar Jeju na: Njenetɔji, o kagə tungu gə ugu ne ar-ɛ le uy wɔ.

²² Jeju un tar pa ar-je na: ꞌTaje kagə Luba.

²³ Tar gə tɔgərɔ ja, m-pa m-ar-si, to gə ɓo dəw pa ar dɔ ər gə nee na: Ɔdə lo gə nee gə aw oso mə babo gə, a to gə ɓo n-ma̰y tar dɔ ɓəngər-e gə ang, ngaa n-ta kagə to gə tar gə n-pa a ɗa ne nama, Luba a ɗa ne kar-ɛ.

²⁴ To gə be ɓa, m-pa m-ar-si: Ne tɔ̰y gə ꞌdəjije Luba le ꞌtaje kagə to gə ingaje nam ɗaa, Luba a ɗa kar-si.

²⁵ Logə ar-je taar gə mba dəji, ngaa ɓo ne kara tɔsə um-si naa gə gə dəw kara nama, ꞌɔrje tar dɔ-ɛ gə, mba kar Bɔ-sijee gə isi dara kara ɔr tar kal tar dɔ-si gə tɔ.

²⁶ Ngaa to gə ɓo ɔrəje tar dɔ-ɛ ang nama, Bɔ-sijee gə isi dara a kɔr tar kal tar dɔ-si gə ang tɔ.

Jiibije ꞌdəji Jeju na-na ɓa ar-ɛ ndu le wa?

²⁷ Jeju je gə ngan njenendoje lə-a ꞌtəl d-aw to gə ɗangə mə ɓe gə Jerujalɛm, logə Jeju aw nja mə kəy gə lə Luba bənəng ɗaa, buba njekapoloje, gə njekɔr gəl toronduje gə buba ɓeje ꞌɗe d-inga-a

²⁸ ꞌdəji-e na: Inga ndu nee ta na gə ɓa aw ꞌɗa ne ne gə nee le wa? Ose na ɓa ar-i ndu mba kar-i ꞌɗa ne wa?

²⁹ Jeju ila-je kəne na: M-a dəji si tar kara baa ja, ila-mje kəne ɗaa, m-a pa gəl singamongə lə-m kar-si.

³⁰ Batɛm gə Ja̰ ɗa le ḭ dara ose ḭ rɔ dəwje gə wa? Ila-mje kəne.

³¹ Ngaa ꞌwɛdə tar horo naa gə na: To gə ɓo j-ila kəne na: Ḭ dara nama, n-a pa na: Mba ɗi ɓa sisəy ꞌtaje kag-ɛ ang wa?

³² To gə ɓo j-ila kəne na: Ḭ rɔ dəwje gə nama, ꞌɓəəl dəw mə ɓeje, mba dəwje tɔ̰y ja ꞌgərə to gə Ja̰ to pajambərə gə tɔgərɔ.

³³ Be ɓa d-ila Jeju kəne na: J-a gərə ang. Ɗaa Jeju pa ar-je na: ꞌMa ja kara dəw gə ar-m ndu ɓa m-ɗa ne ne gə kən le, m-a pa kar-si ang tɔ.