Marəke 1 - Mbede Lə Luba Kone Gə Sigi

JEJU ƊA KULA DƆ NANGƏ GƏ GALILE Mbərə kila lə Ja̰ Njeɗabatɛm

¹ Tar gə May lə Kirisi Jeju, Ngon lə Luba le uma kud-e to gə be.

² To gə mbede lə pajambərə Ejay pa nena: A o, m-a kula njekula lə-m no-i gə Mba gɔl ɗew kar-i a nja kəne;

³ ꞌGɔlje ɗew lə Mbayɓe, ꞌNdujije kila ɗəwje lə-a ar-je to rad. Ye ɓa to ndu ꞌkuwi lə dəw gə ɓar ndag lo gə.

⁴ Ja̰ ce ɗa batɛm ndag lo gə, ngaɓa ila mbərə batɛm kar turu kəji mba kar ɔr tar neɗa gə kṵra̰y dɔ dəwje gə.

⁵ Dəwje gə dɔ nangə gə Jude tɔ̰y, ngaɓa dəw mə ɓeje gə Jerujalɛm ɗe rɔ-ɛ gə, ɗaa ꞌce gəl rɔ-je dɔ neɗa gə kṵra̰y gə lə-je gə ɗaga, ngaɓa Ja̰ ɗa-je batɛm mə babo gə Jurədɛ̰.

⁶ Ja̰ ula kubu gə to bḭ jambal, gagəra tɔ ur-e to ndaar. ꞌKulije gə ubu təji ɓa to nekusa t-ɛ

⁷ N-ila mbərə n-ar dewje na: Dəw gə aw ɗe go-m gə əng le to ɓəəl ya̰ unda-m ꞌma, m-asə ɗugu nangə mba tudu kula sabɔgɔ lə-a ang.

⁸ ꞌMa, m-ɗa-si batɛm mə man gə, ngaa ꞌne le ɗaa n-a ɗa si batɛm lə Njil Njerɔsangə.

Ja̰ a ɗa Jeju batɛm. ꞌSu na Jeju

⁹ Dɔ ndɔ-ɛje gə əng le, Jeju ḭ Najarɛd, ngon ɓe gə Galile, ɗaa Ja̰ ɗ-ɛ batɛm mə babo gə Jurədɛ̰.

¹⁰ Logə Jeju aw ce mə man gə gə ɗaga ɗaa, kəm dara cɛ̰ bərərə ar n-o Njil Luba ɗisi to to gə dər kuul be ɗe isi dɔ-ɛ gə.

¹¹ Cibi, ndu ḭ dara pa tar na: ꞋI to Ngon njigi lə-m, ngira rɔləl lə-m.

¹² Go-e gə ɗaa, Njil lə Luba ɔsə Jeju aw sə-a ndag lo gə.

¹³ Jeju ɗa ndɔ dɔg sɔɔ ndag lo, ɗaa ꞌSu n-ɛ. N-ga̰ horo daje gə muu, ngaɓa anjije ɗe la sə-a.

Jeju ɓar mbawje sɔɔ mə ɓe gə Kapɛrənom

¹⁴ Logə d-uwa Ja̰ d-ila kəy kula gə ɗaa, Jeju aw dɔ nangə gə Galile; n-aw n-ila mbərə Tar gə May lə Luba.

¹⁵ N-pa na: Dɔ kar asə nam, ɓeko̰ lə Luba le nay əw ang baa. ꞌTuruje kəji lə-si, ɓo ꞌtaje kagə Tar gə May.

¹⁶ Logə Jeju aw nja mbo kar babo gə Galile, ɗaa o Simo je gə ngon ko̰-ɛ Andəre gə d-aw d-ila bura man mba ꞌto mbawje.

¹⁷ Jeju pa ar-je na: ꞌUwaje go-m, m-a turu-si kar a toje njendo̰ dəwje.

¹⁸ Lo-e gə nee ja, ꞌtusu buraje lə-je d-ḭya̰ ɗaa d-uwa go Jeju.

¹⁹ Logə Jeju ɔdə nja gə kede njɛ̰ ɗaa, o Jagə je gə Ja̰, ngan lə Jebede d-isi mə to gə d-aw gɔl kəm buraje.

²⁰ Lo-e gə nee ja, Jeju ɓar-je ɗaa, d-ḭya̰ bɔ-jeje Jebede gə ngan njekulaje lə-a mə to gə, d-uwa go Jeju.

Jeju aji dəwje bula

²¹ Jeju je gə ngan njenendoje lə-a ꞌce mə ɓe gə Kapɛrənom. Logə Jeju andə mə kəy nendo gə, gə ndɔ kuwa kɔr ɗaa, tɔji dewje tar lə Luba.

²² Netɔji lə-a uwa-je gə singa mba n-tɔji ne gə dəw gə inga singamongə ɓo to gə njekɔr gəl toronduje be ang.

²³ Dəw kara gə njil gə kṵra̰y ɗa ɓe m-e gə ga̰ kəy nendo gə le tɔ. Dəw le uru ꞌkuwi na:

²⁴ Jeju gə Najarɛd, ɗi ɓa ꞋI njigi wa? Se ꞌi ɗe mba tuji-si ngaa wa? M-gərə to gə ꞌto Njerɔsangə lə Luba.

²⁵ Jeju ndang-ɛ na: Udu ta-i ɓo ꞌce mə dəw gə nee le!

²⁶ Njil gə kṵra̰y le sore dəw le ar-ɛ isa pig-pig, ngaɓa ɔsə lo ce gə ꞌkuwi t-ɛ gə ɓolong.

²⁷ Dəwje tɔ̰y ja njil-je ce ar-je ꞌdəji naa tar gə yo gə nee na: Ne gə ban ɓa to gə be wa? To netɔji gə sigi gə gə singamong-ɛ wa? N-un ndu n-ar njilje gə kṵra̰y ja kara, d-ila kuji kəne səmə!

²⁸ To gə be ɓa, ri-a ɓar ula lo wur-wur gə tɔg-ɛ baa ja dɔ nangə gə Galile gə tɔ̰y.

²⁹ Logə Jeju ɔsə lo ce mə kəy nendo gə ɗaa, aw kəy lə Simo je gə Andəre, Jagə je gə Ja̰ d-aw gə je tɔ.

³⁰ Mum Simo-je gə jene to nangə, ngaɓa rɔ-ɛ ta pər lam-lam; ɗaa ꞌpa tar lə-a gə tɔg-ɛ baa d-ar Jeju.

³¹ Jeju uwa ji-a uru-e taar, ɗaa rɔ-ɛ le təl kul mbɔ̰y, ar n-ar-je nekusa.

³² Kar kumatagə, logə kar andə sɔlɔgə ɗaa, ꞌɗe gə njerɔtoje tɔ̰y ngaɓa nje gə njilje gə kṵra̰y ꞌɗa ɓe mə-je gə d-ar Jeju.

³³ Dəwje gə mə ɓe gə tɔ̰y ja ꞌmbo̰ naa ta ɗəw gə.

³⁴ Jeju aji dəwje bula gə rɔko̰je dang-dang ɗa-je, ngaɓa n-tɔbə njilje gə kṵra̰y bula ja ngaa n-ḭya̰ ɗəw n-ar ꞌpa tar ang mba ꞌgər-e som.

³⁵ Gə ndɔɔ-sḭ baa ja, logə lo to pi baa ɓi ja, Jeju ḭ taar ngaɓa ce aw ndag lo gə mba dəji Luba kəne.

³⁶ Simo je gə njeba-ɛje lə-a d-ɔdə ꞌsang-ɛ pḭ-pḭ,

³⁷ logə d-inga-a ɗaa, ꞌpa d-ar-ɛ na: Dəwje tɔ̰y ja d-aw sang-i.

³⁸ N-ila-je kəne na: J-awje gə ɗangə, gə ɓeje gə to mbɔr ye gə nee gə, mba kar m-aw m-ila mbərə tar lə Luba kəne tɔ ɓa na ye ja m-ce mb-ɛ.

³⁹ Be ɓa, n-ula dɔ nangə gə Galile wur-wur, n-ila mbərə tar lə Luba mə kəy nendoje gə ngaɓa n-tɔbə ne njilje gə kṵra̰y nəm tɔ.

Jeju aji njebənji

⁴⁰ Dəw gə njebənji kara ɗe inga Jeju, um məkəji-e no-ɛ gə, ngaɓa ɗ-ɛ kɔgərɔ na: To gə ɓo mə-i njigi nama ar rɔ-m arə ngadə.

⁴¹ Jeju o kəmtondoo lə-a, ula ji-a ɔr ne rɔ-ɛ ngaɓa pa na: M-njigi ja, may kar rɔ-i arə ngadə!

⁴² Ji naa gə nee ja, bənji le ɔr ndəs ar n-arə ngadə.

⁴³ Jeju un ndu gə lo-e gə əng ja gə mong-e ar-ɛ,

⁴⁴ ngaɓa pa ar-ɛ na: ꞌNgom ta-i ɓo ꞌpa ar dəw ang, ɗaa ɔdə aw ar njekapolo o-i, ngaɓa aw gə ne gə Moyiji un ndu kəne le, mba kar to tar naji ar-je ꞌgərə to gə rɔ-i arə ngadə.

⁴⁵ Ngaa, dəw nee le, logə ɔdə aw ɗaa, ila mbərə tar le gadəmagay gə ɓolong-ɓolong ngaɓa aw ne gə kede-kede, ar logə Jeju a kandə ne mə ɓe gə nda̰-nda̰ godo. Be ɓa Jeju ar gir ɓe gə ɗaga, ndag lo gə, d-ḭ gə loje dang-dang ꞌɗe d-inga-a.