Lugu 9 - Mbede Lə Luba Kone Gə Sigi

Jeju ula njeka̰y kulaje gə dɔg gə gir-je gə joo

¹ Jeju ɓar ngan njenendoje gə dɔg gə gir-je gə joo, ɗaa ar-je singamongə gə to gə mbangə dɔ njilje gə kṵra̰y gə nəm, gə kar d-aji ne njerɔko̰je nəm tɔ.

² N-ula-je mba kar d-ila mbərə ɔji dɔ ɓeko̰ lə Luba ngaɓa d-aji ne njerɔko̰je.

³ N-pa n-ar-je na: Unje ne kaw mba ang, ose kagə tɔsə ang, ose ɓɔl kaw mba ang, ose mbə, ose lar, ngaa ulaje sabɔgɔ gɔl si gə, ngaɓa ulaje kubu gə taar dɔ naa gə joo ang.

⁴ Kəy gə ɗa-ɗa gə andəje kəne nama isije kəne saar ndɔ gə a kɔdəje kawje gə kede.

⁵ Ngaɓa loje tɔ̰y gə dəwje ꞌmbadə mba kuwa-si mba kəne le, ꞌkundaje kuru gə gɔl si gə mba kar to tar naji gə ɔji dɔ-je.

⁶ Be ɓa, ngan njenendoje le d-ɔdə d-aw gə ɓe-ɓe, d-ila mbərə Tar gə May d-ar dəwje ngaɓa d-aji njerɔko̰je tɔ.

Kəji jɔgə Erɔdə ɔji dɔ Jeju

⁷ Neje tɔ̰y gə aw nday le, Erɔdə Antipas gə to njeko̰ ɓe gə Galile o tar-ɛ, ɗaa kəji jɔg-ɛ ya̰. Mba nje gə kɛm ꞌpa to gə Ja̰ gə uy le təl ndol;

⁸ nje gə kɛm pa na to Eli ɓa təl ce, gɛsə nje gə kɛm ꞌpa na dəw kara horo pajambərəje gə ləw gə uy ɓa təl ndol.

⁹ Erɔdə pa na: Ja̰ le ɓa, ꞌma ja, m-ar ꞌgangə dɔ-ɛ, ngaa na cibi ɓa m-o tar gə ɔji dɔ-ɛ bula bənəng wa? Be ɓa n-sangə mba ko Jeju.

Jeju ar dəwje bula mbə d-usa

¹⁰ Njeka̰ykulaje gə Jeju ula-je le ꞌtəl ꞌɗe d-inga-a ngaɓa d-ɔr gəl neje tɔ̰y gə ꞌɗa d-ar-ɛ. Ɗaa n-um-je dɔ-ɛ gə, n-aw gə je ngərəng mbɔr ɓe gə Bɛdəsayida.

¹¹ Logə bula dəwje d-o tar-ɛ ɗaa, d-ɔr go-je d-aw d-inga-a. Jeju uwa-je gə rɔ-ɛ gə ngaɓa pa tar ɓeko̰ lə Luba ar-je nəm, gə aji njerɔko̰je nəm tɔ.

¹² Logə kar um ji-a dɔ baa gə ɗaa, njekulaje gə dɔg gə gir-je gə joo ꞌɗəm gə rɔ-ɛ gə ꞌpa d-ar-ɛ na: ꞌTɔbə bula dəwje le ar-je d-aw mə ɓeje gə gə dɔ ndɔje gə to mbɔr lo gə nee mba sangə lo to kəne ngaɓa mba sangə nekusa; mba lo gə j-ar kəne nee le to ndag lo baa.

¹³ Jeju pa ar-je na: Sisəy ja ar-jeje ne d-usa. Ngaa d-ila kəne na: Mbə mi gə kənji joo ja baa ga̰ ji-si gə nee, be ang nama, sijee ja j-a kaw ndogo nekusa mba dəw mə ɓeje nee le.

¹⁴ Jingawje gə ꞌga̰ lo-e gə əng d-asə tɔl-tɔl dɔg lo mi. Jeju pa ar ngan njenendoje lə-a na: Ar-je d-isi dɔ naa gə dol-dol dɔg mi dɔg mi je əng be.

¹⁵ ꞌƊa to gə bənəng tɔ ɗaa d-ar d-isi nangə tɔ̰y.

¹⁶ Jeju odo mbə gə mi gə kənji gə joo, un kəm-e gə dara ɗaa tɔr ndu-e kəne. Cibi n-cɛdə mbə le ngaɓa n-ar ngan njenendoje mba kar ꞌkay bula dəwje le.

¹⁷ Dəwje tɔ̰y d-usa d-ar mə-je ci, ɗaa d-odo dɔ dum-e gə nay karɛ dɔg gə gir-e gə joo.

Piyɛr gərə Jeju gə Kirisi

¹⁸ Ndɔ kara, Jeju aw dəji Luba gə kar-ɛ baa, ngan njenendoje lə-a ꞌɗe d-inga-a, ɗaa n-dəji-je tar na: Dəwje pa na m-to na ja wa?

¹⁹ D-ila kəne na: ꞌTo Ja̰ Njeɗabatɛm, nje gə kɛm na ꞌto Eli; nje gə ɗangə na ꞌto kara lə pajambərəje gə ləw gə uy ɓa təl ndol.

²⁰ Jeju təl dəji-je na: Ngaa ɗaa sisəy ja le ꞌpaje na m-to na wa? Piyɛr ila kəne na: ꞌI ꞌto Kirisi lə Luba.

²¹ Jeju un ndu gə mong-e ar-je mba kar ꞌpa d-ar dəw o ang.

²² Be ɓa, Jeju təl pa ja cibi: To may kar ꞌma gə Ngon lə dəw, m-o ꞌməsərə ya̰. Buba ɓeje, buba njekapoloje je gə njekɔr gəl toronduje d-a mbadə-m, ngaɓa d-a tɔl-m ɗaa ndɔ gə njekum gə munda m-a təl ndol.

²³ Cibi, n-pa n-ar-je tɔ̰y ja na: To gə dəw gə njigi kuwa go-m nama, to may kar mbadə darɔ-ɛ, odo kagə dəsə lə-a gə ndɔ-ndɔ, ɗaa uwa ne go-m.

²⁴ Dəw gə njigi ngom təbə lə-a nama a kila-a kɔrɔ, ngaa dəw gə ila təbə lə-a kɔrɔ mba-m nama a kaj-ɛ.

²⁵ To gə dəw inga neje tɔ̰y gə dɔ nangə nee ja, ngaa ila rɔ-ɛ kɔrɔ ose tuji rɔ-ɛ le, may lə-a a to ɗi cibi wa?

²⁶ Mba, dəw gə ɗa rɔ kul mba ꞌma, ngaɓa gə mba tar lə-m nama, logə ꞌMa gə Ngon lə dəw m-a ɗe dan rɔnduba gə lə-m, gə dan rɔnduba gə lə Bɔ dəwje gə ngaɓa gə anjije gə njerɔsangəje ɗaa, m-a kila rɔ kul dɔ-ɛ gə.

²⁷ Tɔgərɔ, m-pa m-ar-si, nje gə kɛm gə d-ar horo-si gə nee d-a kuy ang saar d-a ko ɓeko̰ lə Luba gə kəm-je.

Jeju mbəl rɔ-ɛ

²⁸ Ndɔ kara be, ndɔ siri go tar gə Jeju pa ar-je ɗaa, Jeju ɔr Piyɛr, je gə Ja̰, gə Jagə, ɗaa n-aw dɔ ər mba kaw dəji Luba.

²⁹ Logə Jeju aw dəji Luba ɗaa, kəm-e mbəl ngaɓa kubu lə-a təl nda kələw-kələw.

³⁰ Dəwje gə jingaw joo ꞌɗe to̰ sə-a tam: to Moyiji je gə Eli.

³¹ Logə ꞌɗe d-inga-a ɗaa, ndogo lə Luba gugu dɔ-je mbugu. ꞌPa ne tar tɔl gə d-a tɔl Jeju mə ɓe gə Jerujalɛm oso ne kəne paragə.

³² Ɓi tɔl Piyɛr je gə njeba-ɛje lə-a, ꞌləngə ɓi ngaa d-isi kəm baa ɗaa d-o Jeju gə jingawje gə joo gə ndogo gugu dɔ-je.

³³ Logə dəwje d-ḭya̰-a d-ɔdə d-aw ɗaa, Piyɛr pa ar Jeju na: ꞌƁəə-mje, to may ya̰ kar j-isije lo gə nee gə. To gə ɓo ꞌi njigi nama j-a ɗa kəy lo munda, kara a to kar-i, kara a to kar Moyiji, ngaɓa kara a to kar Eli tɔ. Piyɛr gərə mə gə tar gə pa nee le ang.

³⁴ Logə Piyɛr aw pa tar be ja ɓi ɗaa, kil lə nji ɗe dəbə dɔ-je gə rigim ar ɓəəl unda ngan njenendoje bad gangə-je,

³⁵ ɗaa ndu dəw ɓar mə kil lə nji gə le na: Dəw gə ar nee le to Ngon-m, m-njig-e, m-mbər-e, oje tar t-ɛ gə.

³⁶ Logə ndu dəw le ɓar ɗaa, Jeju ar gə kar-ɛ baa. Neje tɔ̰y gə ngan njenendoje d-o gə kəm-je nee le, ꞌpa tar-ɛ d-ar dəw o ang, ta-je to gə bandə gə to gə lo ɓiri-e.

Jeju aji ngon gə njil gə kṵra̰y ɗa ɓe m-e gə

³⁷ Lo kar-ɛ, logə Jeju je gə ngan njenendoje lə-a d-ḭ dɔ ər ꞌɗisi nangə gə ɗaa, bula dəwje ꞌtila kəm-je.

³⁸ Jingaw kara uru ꞌkuwi horo bula dəwje gə na: Njenetɔji, kɔgərɔ, ila kəm-i dɔ ngon kara gə lə-m.

³⁹ Njil le uwa-a nama ar-ɛ n-uru ꞌkuwi, ngaɓa n-isa baa mir-mir, hug-hug t-ɛ uwa t-ɛ ndor-ndor. Njil le ula kəm-e ndoo ya̰ ɓa ḭya̰-a ɓi.

⁴⁰ M-oso kul no ngan njenendoje gə lə-i kar ꞌtɔb-ɛ, ngaa d-asə ang.

⁴¹ Jeju ila kəne na: ꞌToje dəwje gə nje məkədərəje, gə njetula pa nja-je naa gə je, m-a ga̰ gə si saar ndɔ gə ɗa gə ja ɓi wa? Ose m-a kore uru-m dɔ si gə saar ndɔ gə ɗa gə wa? ꞌƊeje gə ngon le ar-mje.

⁴² Logə ngon le unda dɔ Jeju dəb ɗaa, njil le uwa-a gə singa ila-a nangə, ngaɓa mbir-e ar-ɛ n-to rəgədə to gə dəw gə uy be. Ngaa Jeju ndangə njil gə kṵra̰y le ɗaa, aji ngon le, ngaɓa təl ula-a ji bɔ-ɛje gə.

⁴³ Dəwje tɔ̰y ja lo tar igi-je sɛl ɗaa ꞌpa na: Luba to njesingamongə ja. Ne gə Jeju ɗa le ta kəm dəwje tɔ̰y ja. N-pa n-ar ngan njenendoje na:

Jeju pa tar kuy lə-a gə tar ndol lə-a

⁴⁴ Sisəy le, ꞌtugaje mbi-si gə maj-ɛ oje ne tar nee: ꞌMa gə Ngon lə dəw le, d-a kuwa-m kula-m ji dəwje gə.

⁴⁵ Ngaa ngan njenendoje ꞌgərə mə tar nee le ang, ɗaa tar le iya rɔ-ɛ kəm-je gə gə kiya, mba kar ꞌgərə gəl-e ang; ɗaa ꞌɓəəl mba dəji-e gəl-e.

Dəw gə to ɓəəl ya̰

⁴⁶ Ngan njenendoje ꞌma̰y naa tar gə mba gərə se na ɓa to dəw gə to ɓəəl ya̰ horo-je gə wa?

⁴⁷ Be ɓa, Jeju o tar kəji to mə-je gə ɗaa un ngon gə njɛ̰ ur-e mbɔr-ɛ gə,

⁴⁸ ngaɓa pa ar-je na: Dəw gə uwa ngon gə njɛ̰ gə rɔ-ɛ gə gə ri-m, nama ꞌma ja nj-ɛ uwa-m gə rɔ-ɛ gə əng; ngaa ɓo dəw gə uwa-m gə rɔ-ɛ gə nama, uwa dəw gə njekula-m gə rɔ-ɛ gə tɔ. Mba dəw gə o-eje gə ne ang horo-si gə tɔ̰y nee le, nj-ɛ əng ja to dəw gə to ɓəəl.

⁴⁹ Ɗaa Ja̰ ila kəne na: ꞌƁəə-mje, j-o dəw kara tɔbə njil gə kṵra̰y gə ri-i; ngaa jɔg-ɛ mba n-uwa gə si go-i ang.

⁵⁰ Jeju pa ar-ɛ na: Ɔg-ɛje ang; mba dəw gə to njeba̰a̰ lə-si ang nama nj-ɛ nee le to dəw lə-si.

KḬ GALILE KAW JERUJALƐM Dəwje gə ɓe gə Samari ꞌmbadə kuwa Jeju gə rɔ-je gə

⁵¹ Logə kar gə Jeju a kuba ne dɔ nangə nee kḭya̰ nay dəb ɗaa, Jeju un kəm-e tim-tim mba kaw mə ɓe gə Jerujalɛm.

⁵² N-ula ngan njenendoje kede. Ngaɓa Nje gə n-ula-je le d-aw ce mə ɓe lə dəwje gə Samari, mba gɔl neje ngina-a.

⁵³ Njeɓeje ꞌmbadə kuwa-a mba, mba n-aw kəm-e gə ɓe gə Jerujalɛm.

⁵⁴ Logə ngan njenendoje, Jagə je gə Ja̰ d-o be ɗaa, ꞌpa na: Mbayɓe, se njigi kar j-a pa j-ar pər ḭ dara ɗe ro-je wa?

⁵⁵ Jeju turu kəm-e gə dɔ-je gə ngaɓa ndangə-je.

⁵⁶ Ɗaa d-ɔdə d-aw ɓe gə ɗangə gə.

Ɗəw kuwa go Jeju

⁵⁷ Jeju je gə ngan njenendoje d-aw nja ɗəw boo ɗaa, dəw kara ɗe pa ar-ɛ na: Aw gə ɗa ja kara m-a kaw sə-i.

⁵⁸ Jeju ila-a kəne na: Njaje gə ꞌto daje baa kara buja lə-je ga̰, ngaɓa əlje gə d-aw dara əng kara kinga lə-je ga̰, ngaa ꞌma gə Ngon lə dəw ja baa ɓa lo kula dɔ-m godo.

⁵⁹ Jeju pa ar dəw ɗangə na: Uwa go-m. Dəw nee le ila kəne na: Mbayɓe, iya̰ ɗəw ar-m m-aw m-dubu bɔy ɓa m-təl m-ɗe ɓi.

⁶⁰ Ngaa Jeju ila-a kəne na: Ḭya̰ nje gə d-uy ar-je ꞌdubu yo lə-je, ɗaa ꞌi le aw ila mbərə ɓeko̰ lə Luba.

⁶¹ Dəw gə ɗangə kara pa na: M-a kuwa go-i, Mbayɓe iya̰-m ar-m m-aw m-ndəji nje gə kəy lə-m ɓa.

⁶² Jeju pa ar-ɛ na: Na-na ɓa gə uwa kɔsə mangə le tən go-e ang, dəw gə to gə be asə ɗa kula mba ɓeko̰ lə Luba ang.