Lugu 7 - Mbede Lə Luba Kone Gə Sigi

Jeju aji ngon njekula lə njekun dɔ njeɗɔje

¹ Jeju ɗunga tarje gə pa ar bula dəwje ɗaa ɔdə aw mə ɓe gə Kapɛrənom.

² Ngon njekula lə njekun dɔ njeɗɔje gə tɔl kara gə njigi-e ya̰ ja, rɔ-ɛ to-e asə yo.

³ Logə njekun dɔ njeɗɔje le o no Jeju ɗaa, ula buba ɓeje gə kɛm gə horo Jiibije mba kar d-aw d-inga Jeju d-ar-ɛ ɗe aji ngon njekula lə-a le.

⁴ Buba ɓeje le d-aw d-inga Jeju, d-oso kul no-ɛ gə gə mong-e na: Dəw nee le, n-asə kar-i ꞌla sə-a.

⁵ N-njigi gəl kuji lə-sijee ngaɓa n-unda kəy nendo n-ar-si tɔ.

⁶ Be ɓa, Jeju ɔdə aw gə je, ce dəb gə ta kəy ɗaa, njekun dɔ njeɗɔje gə tɔl le ula njekuraje lə-a ar pa d-ar-ɛ na: Mbayɓe, ꞌjɔgə rɔ-i ang, ꞌma m-asə kar-i andə mə kəy gə lə-m ang.

⁷ Gəl-e nee ɓa m-asə kaw rɔ-i gə ang. Ngaa ꞌpa tar ta-i kara baa ja, ɗaa ngon njekula lə-m a kaji.

⁸ Mba, ꞌma kara njeko̰ dɔ-mje ꞌga̰ ja, ngaɓa ꞌma kara, m-o̰ dɔ njeɗɔje tɔ. To gə m-pa na: ꞋI gə nee aw be, nama nj-ɛ aw, ngaɓa m-pa na: ꞋI gə nee ꞌɗe ne, nama nj-ɛ ɗe ja tɔ, ngaɓa ɓo m-ula ngon njekula lə-m na: ꞌƊa ne gə be nama n-ɗa ja tɔ.

⁹ Logə Jeju o tar nee le, ɗaa rɔ-ɛ ləl-e dɔ njekun dɔ njeɗɔje gə tɔl gə nee le, cibi ɓa n-təl pa n-ar bula dəwje gə ꞌndole go-e na: M-pa m-ar-si to gə horo dəw mə ɓeje gə Ijirayɛl nee tɔ̰y ja kara m-o takagə gə bo to gə be ang.

¹⁰ Logə nje gə n-ula-je ꞌtəl d-aw kəy ɗaa, d-inga ngon njekula le aji kəbərə.

Jeju ndol ngon lə jene nduba gə Nayin

¹¹ Cibi, ndɔ kara go-e gə ɗaa, Jeju aw mə ɓe gə Nayin. Ngan njenendoje lə-a je gə bula dəwje d-aw sə-a.

¹² Logə Jeju unda dɔ ɓe dəb ɗaa, ꞌɗe gə yo mba dubu, to ngon kara lə jene nduba. Bula dəwje ꞌdan jene nee le.

¹³ Logə Mbayɓe un kəm-e ila dɔ-ɛ gə ɗaa, o kəmtondoo lə-a ngaɓa pa ar-ɛ na: ꞌNo ang!

¹⁴ N-ɔdə n-uwa ta tuwa ɗaa nje gə d-un nin le d-ar nangə. Ɗaa n-pa na: Ngon basa̰, m-pa m-ar-i, ḭ taar!

¹⁵ Be ɓa, ngon basa̰ gə uy le uba nangə ḭ taar pa tar. Jeju uwa-a ula-a ji ko̰-ɛje gə.

¹⁶ Dəwje tɔ̰y ꞌɓəəl, d-ɔsə gaji Luba ngaɓa ꞌpa na: D-ar pajambərə gə bɔy ɗe horo-sijee gə! Cibi, Luba ila kəm-e dɔ dəwje gə lə-a!

¹⁷ Tar neje gə Jeju ɗa nee le, dəwje to̰ tam-e d-ar ta lo dɔ nangə gə Jude gə dɔ nangəje gə mbɔr-ɛ gə tɔ̰y.

Ja̰ Njeɗabatɛm dəji rɔ-ɛ tar uji dɔ Jeju

¹⁸ Ngan njenendoje lə Ja̰ d-ɔr gəl neje tɔ̰y gə Jeju ɗa le d-ar-ɛ o. Ja̰ ɓar ngan njenendoje lə-a joo,

¹⁹ ula-je rɔ Mbayɓe gə mba kar ꞌdəji-e: Se ꞌi ja ꞌto dəw gə a ɗe le ose j-a ngəbə dəw gə ɗangə wa?

²⁰ Logə ngan njenendoje lə Ja̰ ɗe d-inga Jeju ɗaa, ꞌpa d-ar-ɛ na: Ja̰ Njeɗabatɛm ula si ɓə lə-i kar j-a dəji j-o: Se ꞌi ja ꞌto dəw gə a ɗe le, ose j-a ngəbə dəw gə ɗangə wa?

²¹ Lo-e gə nee ja, Jeju aji dəwje gə njerɔtoje bula, gə njeməndəje, gə n-tɔbə njilje gə kṵra̰y dɔ dəwje gə, ngaɓa nje kəm tɔje bula kara n-ar-je d-o lo.

²² Cibi, n-ila nje gə d-ula-je kəne na: Neje gə oje gə kəm-si, gə mbi-si nəm le, aw ꞌpaje tar-ɛ ar-je Ja̰ to gə be: Nje kəm tɔje d-o lo, njeməndəje ꞌnja, gə rɔ njebənjije arə ngadə nəm, mbigije kara d-o tar nəm, dəwje gə d-uy kara təl ndol nəm ɓa, d-ila mbərə Tar gə May d-ar njendooje nəm.

²³ Nokarə a to mba dəw gə m-a to jigi tuga koso lə-a ang.

²⁴ Logə dəwje gə Ja̰ ula-je ꞌtəl d-aw ɗaa, Jeju un kudu pa tar ar bula dəwje ɔji dɔ Ja̰ na: Se ɗi ɓa aw oje ndag lo gə wa? Tuwa tɔgə gə ləl uwa bil wa?

²⁵ Ngaa, ɗi ɓa aw oje wa? Dəw gə ula kubu gə bḭ may wa? Oje, nje gə d-ula kubu gə bḭ may ngaɓa d-isi dan may gə le, d-isi kəy mbayje gə.

²⁶ Se ɗi ja ɓa aw oje wa? Pajambərə wa? Tɔgərɔ ja, m-pa m-ar-si, to dəw gə nday pajambərə ja ɓi.

²⁷ ꞌNe le ɓa Mbede pa ɔji dɔ-ɛ na: A o, m-a kula njekula lə-m no-i gə. Mba gɔl ɗew kar-i a nja kəne.

²⁸ M-pa m-ar-si, horo dəwje gə jeneje d-uji-je le, dəw gə to ɓəəl ya̰ unda Ja̰ godo. Be ja kara, dəw gə to gə ne ang mə ɓeko̰ gə lə Luba ɗaa to ɓəəl ya̰ unda-a.

²⁹ Dəw mə ɓeje tɔ̰y gə njembo̰ lar gədə ɓeje ꞌtunga mbi-je d-o ne tar gə Jeju pa ɔji dɔ Ja̰, ꞌgərəje ne to gə ɗəw lə Luba to gadə-gadə, ɓa ꞌɗa neje batɛm lə Ja̰.

³⁰ Parijiyɛ̰je je gə njekɔr gəl toronduje ꞌmbadə ne gə Luba njigi ɗa mba tar lə-je, ɗaa njigi kar Ja̰ ɗa-je batɛm ang.

³¹ Na ja ɓa m-a kuwa dəwje gə gəl kuji gə nee kɔj-e ne wa? Na ɓa ꞌta sə-a naa wa?

³² ꞌTa naa gə nganje gə d-isi nada, ꞌɓar naa gə yo gə nee ngaɓa ꞌpa na: J-ɛm bula j-ar-si, ɗaa ꞌmbadəje laje ne; Ja no mangə, ɗaa ꞌmbadəje noje ne.

³³ Mba Ja̰ Njeɗabatɛm ɗe, usa mbə ang ngaɓa ay kodo ang, ɗaa ꞌpaje na: Njil gə kṵra̰y ɗa ɓe m-e gə.

³⁴ ꞌMa gə Ngon lə dəw le m-ɗe, m-usa gə m-ay ɗaa, sisəy ꞌpaje na: Dəw gə nee le, n-to ka guru gə n-to ka mbəl-e, n-to njekura lə njembo̰ lar gədə ɓeje gə njeneɗaje gə kṵra̰y.

³⁵ Ngaa kəm karə lə Luba le to gadə-gadə ta kəm ngan-ɛ gə tɔ̰y.

Jeju ɔr tar neɗa gə kṵra̰y dɔ jene gə

³⁶ Ndɔ kara be, Parijiyɛ̰ kara dəji Jeju kar-ɛ aw usa sə-a ne. Jeju andə kəy lə Parijiyɛ̰ le ɗaa, isi ta ka nekusa gə.

³⁷ Oje, kaya jene kara ga̰ mə ɓe gə nee le tɔ. Logə n-o to gə Jeju isi ta ka nekusa gə kəy lə Parijiyɛ̰ le ɗaa, n-ɗe gə ngon ku gə ꞌɓar-ɛ aləbadə gə d-um ubu gə əndə kəne sɛrɛrɛ,

³⁸ ngaɓa n-aw n-isi lo gə gɔl Jeju to gə kəne. N-no n-ar man kəm-e yom gɔl Jeju, cibi n-uwa bḭ dɔ-ɛ n-bɔr ne, n-təl n-to pu-pu ngaɓa n-um ubu gə əndə le kəne, n-uwa ne yududu.

³⁹ Logə Parijiyɛ̰ gə ɓar Jeju le o be ɗaa, əji tar m-e gə na: To gə ɓo dəw nee le to pajambərə nama a gərə to gə jene gə ɔr rɔ-ɛ le to kaya jene.

⁴⁰ Be ɓa, Jeju un tar pa ar-ɛ na: Simo, m-njigi pa tar kara kar-i o. Simo ila kəne na: Njenetɔji, pa ar-m m-o.

⁴¹ Dəw kara aw gə dəwje joo gə ꞌtuna-a lar; ye gə kara tuna mbɛl kula tɔl mi, ye gə ɗangə mbɛl kula dɔg mi.

⁴² Jeje joo kɛm d-asə kuga ɓangə le ang, ɗaa n-ḭya̰ go ɓangə le n-ar-je joo kɛm. Horo-je gə joo nee le na ɓa a n-njig-e ya̰ wa?

⁴³ Simo pa na: M-o ɗaa, dəw gə ɓangə lə-a bo ya̰. Jeju pa ar-ɛ na: ꞌI unja kəm tar le may boy.

⁴⁴ Cibi, n-turu kəm-e gə dɔ jene gə ngaɓa n-pa n-ar Simo na: O ne gə jene nee ɗa le ang wa? Logə m-andə kəy lə-i le, ꞌtogo gɔl-m ang, ngaa ꞌne ɓa n-togo gɔl-m gə man kəm-e ngaɓa n-bɔr gə bḭ dɔ-ɛ.

⁴⁵ ꞌI uwa-m kar-i gə ang, ngaa jene nee le, kɔr-ɛ gə m-andə ne kəy nee ja n-odo gɔl-m n-uwa kar-ɛ baa ja dɔro ɓi.

⁴⁶ ꞌI um ubu dɔ-m gə ang, ngaa jene nee le um ba̰y kəndə mambo̰ gɔl-m gə.

⁴⁷ Gəl-e gə nee ɓa, m-pa m-ar-i, neɗaje gə kṵra̰y lə-a gə bula le Luba ɔr tar-ɛ dɔ-ɛ gə, mba n-tɔji njigi gə to m-e gə. Ngaa to gə ɓo Luba ɔr tar neɗa gə kṵra̰y dɔ dəw gə njɛ̰ baa nama dəbe nee le tɔji njigi gə to m-e gə njɛ̰ baa ja tɔ.

⁴⁸ Ɗaa, Jeju pa ar jene le na: Luba ɔr tar neɗa gə kṵra̰y dɔ-i gə.

⁴⁹ Nje gə d-isi sə-a ta ka nekusa gə ꞌdəji rɔ-je tar na: Se dəw gə nee to na ja ɓa ɔr tar neɗa gə kṵra̰y dɔ dəwje gə wa?

⁵⁰ Cibi, n-pa n-ar jene na: Takagə lə-i aji-i, aw gə ɗɛgɛgɛ.