Lugu 3 - Mbede Lə Luba Kone Gə Sigi

Ja̰ Njeɗabatɛm ila mbərə

¹ Mə ɓal gə dɔg gə gir-e gə mi gə Tibɛr Sejar o̰ ne dɔ nangə gə Rɔm, dɔ ndɔ gə Po̰s Pilad to ne njeko̰ ɓe gə dɔ nangə gə Jude. Erɔdə kara to mbay gə dɔ nangə gə Galile, ngaɓa Pilibi, gə to ngon bɔ Erɔdə le, o̰ dɔ nangə gə Iture gə dɔ nangə gə Tərakonid. Lisaniyas kara to ne mbay gə Abilɛn.

² Ɗəw kara baa, dɔ ndɔ-ɛ gə le Ana je gə Kayip ꞌto ne buba njekapoloje, ye ɓa Luba um ne tar lə-a ta Ja̰ gə, ngon lə Jakari, mə ndag lo gə.

³ Ja̰ aw dɔ nangə gə Jurədɛ̰ gə tɔ̰y. N-ila mbərə batɛm kar turu kəji mba kar ɔr tar neɗa gə kṵra̰y dɔ dəwje gə.

⁴ Ye ɓa gə mba kar tar gə Pajambərə Ejay pa mə mbede le aw ne lo-e gə: Ye ɓa to ndu ꞌkuwi lə dəw gə ɓar ndag lo gə: ꞌGɔl-je ɗəw lə Mbayɓe, ꞌNduji-je kila ɗəwje lə-a ar-ɛje to rad.

⁵ D-a kudu kəm buwa gə horo ər gə kar-ɛ asə naa tɛrɛrɛ, D-a Gɔl dɔ ərje tɔ̰y gə dɔ wurije tɔ̰y kar d-asə naa ray-ray, Ɗəwje gə ɗugu a to dana njururu, Kila ɗəwje gə to gode le d-a kum nangə kəne kar asə naa.

⁶ Gəl-e gə nee ɓa, dəwje kara kara tɔ̰y d-a ko kaji gə Luba ula ne le.

⁷ Bula dəwje ꞌɗe rɔ Ja̰ gə mba kar ɗa-je batɛm. Ja̰ pa gə je na: Sisəy gə ꞌtoje to gə kondɔtɔlje be, na ɓa tɔji-si pa ka̰y wungu lə Luba gə aw ɗe le wa?

⁸ ꞌƊaje kulaje gə may-may ꞌtɔjije ne to gə ꞌturuje kəji lə-si tɔgərɔ ja. Ɓo əwje rɔ-si kunda mə-si na: Abəraham to bɔ-sijee! To gə be ɓa m-a kula-si to gə ərje gə to nee ja kara Luba asə mba təl-je gə nganje kar Abəraham

⁹ Tina to gəl kagəje gə nam ngaa: kagə gə ɗa-ɗa gə andə ɓa kand-e may ang nama d-a tuga gangə kila pədə.

¹⁰ Bula dəwje ꞌdəji Ja̰ na: Se ɗi ngaa j-a ɗa wa?

¹¹ N-ila-je kəne na: Na-na ɓa horo-si gə nee ɓo kubu lə-a gə taar ḭ joo nama ar dəw gə k-ɛ godo kara, ngaɓa dəw gə horo-si gə nee gə nekusa lə-a ga̰ nama ar dəw gə k-ɛ godo.

¹² Cibi njembo̰ lar gədə ɓeje ꞌɗe mba kar Ja̰ ɗa-je batɛm, ngaɓa ꞌpa d-ar-ɛ na: Njenetɔji, ɗi ngaa j-a ɗa wa?

¹³ Ja̰ ila-je kəne na: Əwje rɔ-si kila ne dɔ ye gə d-ɔji d-ar-si mba kar mbo̰-je.

¹⁴ Ɗaa, njeɗɔje kara ꞌdəji Ja̰ na: Ɗaa sijee le, j-a ɗa ban ngaa wa? N-ila-je kəne na: ꞌTaje ne lə dəw gə singa ang, nəm ɓa, ꞌɗa-je singa dɔ dəw baa-baa ang, ngaa unda-je mə-si dɔ nekuga dɔ ji si gə.

¹⁵ Mba dəw mə ɓeje d-aw ꞌngina ne gə a ɗe le ɗaa ꞌdəji rɔ-je tar na Ja̰ le to Kirisi ang ja wa?

¹⁶ Ja̰ ila-je kəne na: ꞌMa, m-ɗa-si batɛm mə man gə, ngaa dəw gə aw ɗe le to ɓəəl ya̰ unda-m, ngaɓa n-to dəw gə m-asə tudu kula sabɔgɔ lə-a ang. Be ɓa, ꞌne le, n-a ɗa si batɛm gə Njil Njerɔsangə gə pər.

¹⁷ N-ar ta ɓalaa gə gir lə-a ji-a gə, n-to ne waa mba kodo kum mə dam gə lə-a, ngaɓa n-a təl kula pər gə a kuy ang tisa gə.

¹⁸ Be ɓa, Ja̰ ar tar ndəji bula dəwje ya̰, cibi n-ila mbərə Tar gə May n-ar-je.

¹⁹ Ngaa, Ja̰ ndangə Mbay Erɔdə gə ta Erɔdiyadə, jene lə ngon ko̰-ɛ nəm, ngaɓa n-ndang-ɛ ɔji dɔ neɗa-ɛje gə kɛm gə kṵra̰y.

²⁰ Cibi, Erɔdə ɗa ne gə kṵra̰y unda mar-ɛje tɔ̰y: N-uwa Ja̰ n-ila kəy kula gə.

Ja̰ ɗa Jeju batɛm

²¹ To gə Ja̰ ɗa dəwje tɔ̰y batɛm le, Jeju kara n-ɗ-ɛ batɛm tɔ. Logə Jeju aw dəji Luba ɗaa, kəm dara cɛ̰,

²² Njil Njerɔsangə un darɔ gə ta naa gə dər kuul be ɗe isi dɔ-ɛ gə. Cibi, ndu ḭ dara ɓar na: ꞋI to Ngon njigi lə-m, ngira rɔləl lə-m.

Gəl kuji lə Jeju

²³ Jeju ɗa gə ɓal dɔg mundaje əng be, logə uma kudu kila mbərə Tar gə May. Dəwje d-o-e gə ngon lə Jəjəb, gə to ngon lə Eli,

²⁴ gə to ngon lə Matad, gə to ngon lə Lebi, gə to ngon lə Mɛləki, gə to ngon lə Janay, gə to ngon lə Jəjəb,

²⁵ gə to ngon lə Matatiyas, gə to ngon lə Amos, gə to ngon lə Nahum, gə to ngon lə Ɛsəli, gə to ngon lə Nagay,

²⁶ gə to ngon lə Maad, gə to ngon lə Matatiyas, gə to ngon lə Semeyin, gə to ngon lə Yoseh, gə to ngon lə Yoda,

²⁷ gə to ngon lə Yohanan, gə to ngon lə Resa, gə to ngon lə Jorobabɛl, gə to ngon lə Səyalətiyɛl, gə to ngon lə Neri,

²⁸ gə to ngon lə Mɛləki, gə to ngon lə Adi, gə to ngon lə Kosam, gə to ngon lə Ɛləmadam, gə to ngon lə Ər,

²⁹ gə to ngon lə Jeju, gə to ngon lə Eliyejər, gə to ngon lə Yorim, gə to ngon Matad, gə to ngon lə Lebi,

³⁰ gə to ngon lə Simiyo̰, gə to ngon lə Juda, gə to ngon lə Jəjəb, gə to ngon lə Yonam, gə to ngon lə Eliyakim,

³¹ gə to ngon lə Meleya, gə to ngon lə Mena, gə to ngon lə Matata, gə to ngon lə Natan, gə to ngon lə Dabidi,

³² gə to ngon lə Jese, gə to ngon lə Obɛd, gə to ngon lə Booj, gə to ngon lə Saləmo, gə to ngon lə Naso̰,

³³ gə to ngon lə Aminadabə, gə to ngon lə Adəmin, gə to ngon lə Arəni, gə to ngon lə Esəron, gə to ngon lə Peres, gə to ngon lə Juda,

³⁴ gə to ngon lə Jakobo, gə to ngon lə Ijagə, gə to ngon lə Abəraham, gə to ngon lə Tera, gə to ngon lə Nahɔr,

³⁵ gə to ngon lə Serug, gə to ngon lə Rehu, gə to ngon lə Pelɛg, gə to ngon lə Ebɛr, gə to ngon lə Sila,

³⁶ gə to ngon lə Kayinam, gə to ngon lə Arəpasad, gə to ngon Sɛm, gə to ngon lə Nowe, gə to ngon lə Lemək,

³⁷ gə to ngon lə Matusalɛm, gə to ngon lə Enɔgə, gə to ngon lə Yerəd, gə to ngon lə Maleyəl, gə to ngon lə Kenam,

³⁸ gə to ngon lə Enos, gə to ngon lə Sɛt, gə to ngon lə Adam, gə to ngon lə Luba.