Lugu 24 - Mbede Lə Luba Kone Gə Sigi

Jeju ndol

¹ Dɔmasi ɗaa, jeneje ꞌɗe gə ndɔɔ-sḭ baa dɔbarə gə kam ba̰yi kəndə mambo̰je gə ꞌgɔl dɔ-ɛ le ji-je gə.

² D-o to gə pil ər gə d-ila ta buwa gə le, ꞌnduburu d-ila mbɔr kara.

³ Logə d-andə mə buwa yo gə ɗaa, d-inga nin Mbayɓe Jeju le ang.

⁴ To gə be ɓa, lo tar igi-je sɛl ɔji dɔ nee le, ngaa a oje, gə lo-e gə əng ja dəwje joo d-ula kubu gə ndo̰y mələg-mələg ꞌce dɔ-je gə təsərə.

⁵ Ɓəəl unda-je bad gangə-je ar ꞌdəbə kəm-je nangə ɗaa, dəwje nee le pa ar-je na: Mba ɗi ɓa ꞌsangəje dəw gə aw kəm baa horo nje gə d-uy gə wa?

⁶ N-ga̰ lo gə nee gə ang, ngaa ꞌndol-e nam. Ar-je mə-si ole dɔ tar gə n-pa n-ar-si lo gə n-ga̰ ne dɔ nangə gə Galile baa ɓi;

⁷ n-pa na: May kar ꞌma Ngon lə dəw le, d-ila-m mə ji njeneɗaje gə kṵra̰y gə d-ar ɓərə-m kagə dəsə gə, ngaɓa ndɔ gə njekum gə munda, ɗaa m-ndol.

⁸ Be ɓa, mə-je ole dɔ tarje gə Jeju pa.

⁹ D-ɔdə ta buwa yo gə d-aw ꞌpa tar gə nee le d-ar ngan njenendoje gə dɔg gə gir-je gə kara gə nje gə kɛm gə ɗangə tɔ̰y.

¹⁰ To gə Məri gə Magədala gə Jəni ngaɓa Məri gə ko̰ Jagə je; ngaɓa jene mar-jeje gə kɛm kara ꞌpa d-ar njeka̰ykulaje tɔ.

¹¹ Njeka̰ykulaje d-o tarje nee le gə tar mbə baa, ɗaa ꞌta kagə jeneje nee ang.

¹² Ngaa Piyɛr ḭ kəy gə ngɔdə aw dɔbarə gə; n-ɗugu nangə ɗaa, ta kubuje baa n-o. Ne gə nday nee le ɗa ar lo tar igi-e sɛl, ɗaa n-ɔdə n-aw kəy lə-a.

Ngan njenendoje gə d-un ɗəw gə ɓe gə Emayus

¹³ Mə ndɔ-ɛ gə əng ja, a o, dəwje joo horo ngan njenendoje gə d-aw gə ɓe gə kara be, ri-a na Emayus, ewu asə kula mɛdərɛ dɔg gə ɓe gə Jerujalɛm.

¹⁴ ꞌTo̰ tam neje tɔ̰y gə nday le.

¹⁵ Logə d-aw to̰ tam gə d-aw ma̰y naa tar ɗaa, Jeju gə darɔ-ɛ ce inga-je uwa gə je baa ɗəw.

¹⁶ Ngaa kəm-je unja dɔ-ɛ gə ang.

¹⁷ N-pa n-ar-je na: Tar ɗi ɓa ꞌma̰yje naa aw nja-je ne wa? Be ɓa ꞌtəl d-ar nangə, ꞌɗa rɔ-je gə ndoo.

¹⁸ Dəw gə kara horo-je gə ri-a na Kelopas ila kəne na: Se ꞌi ja gə kar-i baa ꞌto dəw gə ꞌga̰ mə ɓe gə Jerujalɛm nee, gə o tar ne gə ɗa ne dɔ ndɔje gə nday nee le ang wa?

¹⁹ N-dəji-je na: Ɗi ngaa əng wa? D-ila-a kəne na: Ne gə ce dɔ Jeju gə, gə to dəw gə ɓe gə Najarɛd; n-to pajambərə gə kula ɗ-ɛ gə tar p-ɛ mii ya̰ no gɔl Luba gə no gɔl dəw mə ɓeje gə tɔ̰y.

²⁰ Buba njekapoloje gə njekɔr no dəw mə ɓeje lə-si, d-un dɔ-ɛ d-ar-je ꞌgangə tar yo dɔ-ɛ gə, ngaɓa ꞌɓər-e kagə dəsə gə.

²¹ Ɗaa sijee, j-unda mə-si to gə ꞌne ɓa n-to gə dəw gə n-a ta dɔ ngan Ijirayɛlje. Ngaa ne gə unda neje tɔ̰y, ɗa ndɔ gə njekum gə munda ngaa ɓogəne a neje nee le nday.

²² Cibi ngaɓa, Jeneje gə kɛm horo-si gə nee, ꞌpa tar d-ar mə-si ila ne kasə baragə na: D-aw gə ndɔɔ-sḭ baa dɔbarə gə

²³ ɗaa, d-inga nin Jeju ang. ꞌTəl ꞌɗe ꞌpa cibi to gə d-o anjije gə ꞌpa na n-aw kəm baa.

²⁴ Njebanjaje lə-si gə kɛm d-aw dɔbarə gə ɗaa, neje gə d-o le, aw go tar gə jeneje ꞌpa le yɛrɛrɛ; ngaa ꞌne ɗaa, d-o-e ang.

²⁵ Ɗaa, Jeju pa ar-je na: Ɓəy! Sisəy ɛbɛ dəwje gə ꞌtoje gə dəwje gə mə-si kədərə, gə lo takagə neje tɔ̰y gə pajambərəje lə Luba ꞌpa le o̰ gə si ya̰!

²⁶ To may kar Kirisi, dəw gə d-uwa dɔ-ɛ gə ubu le, o ꞌməsərə gə nee, ngaɓa a kandə dan riɓar gə lə-a le ang wa?

²⁷ Ngaɓa, un kud-e dɔ Moyiji gə, ce ne dɔ pajambərəje gə tɔ̰y le, Jeju ɔr gəl neje gə mbede lə Luba pa tar-ɛ ɔji dɔ-ɛ, ar-je.

²⁸ ꞌCe dəb gə ɓe gə d-aw gə kəne ɗaa, Jeju ɗa rɔ-ɛ to gə ne gə a nday kaw əw.

²⁹ Ɗaa, ngan njenendoje gə joo le ꞌgang-ɛ nangə ꞌpa na: Isi gə si nee mba kar a kaw kandə, ngaɓa lo a kaw ndul ngaa. Be ɓa n-gangə n-aw gə je, mba kisi gə je.

³⁰ Logə n-isi gə je ta ka nekusa gə ɗaa, n-un mbə ngaɓa ꞌɗa oyo Luba ɗaa, n-cɛdə dana n-kay-je.

³¹ Lo-e gə nee ngaɓa kəm-je unja yərərə ar-je ꞌgər-e, cibi ɗaa, n-təl n-igi sərərə.

³² Ɗaa paje tar horo-je gə, gə yo gə nee na: Ɗa to gə ne gə kar-si ɔr wud-wud, logə n-aw pa gə si tar ɗəw boo, ngaɓa n-ɔr gəl tar gə mə Mbede n-ar-si le ang wa?

³³ D-ar gə lo-e gə əng ja ꞌtəl dɔ gɔl-je gə d-aw Jerujalɛm; d-inga ngan njenendoje gə dɔg gə gir-e gə kara gə njeba-ɛje lə-je gə d-isi dɔ naa gə lo kara baa,

³⁴ ɗaa, nje gə dɔg gə gir-je gə kara nee le pa ar-je gə joo le na: Tɔgərɔ ja, Mbayɓe le ꞌndol-e ja, n-tɔji rɔ-ɛ n-ar Simo.

³⁵ Ɗaa, ꞌjejee d-ɔr gəl neje gə nday dɔ-je gə ɗəw boo ngaɓa gə kəm-je gə unja dɔ-ɛ gə lo gə n-cɛdə mbə dana n-kay-je tɔ.

Jeju ce dɔ ngan njenendoje gə lə-a

³⁶ Logə d-aw pa tar gə ta-je ja baa ɓi ɗaa, Jeju ce dɔ-je gə hɔy, ɗaa pa ar-je na: Ɗɛgɛgɛ nay gə si.

³⁷ Njil-je ce, ɗaa ɓəəl unda-je bad gangə-je, dəji na to gə njil ɓa d-o-e.

³⁸ Ngaɓa Jeju pa ar-je na: Mba ɗi ɓa ꞌjɔgəje rɔ-si, ngaɓa tar ma̰y ɗusu dɔ ɓəngərə si wa?

³⁹ Aje ji-m gə gɔl-m: To gə ꞌma ja. Ɔrəje rɔ-m oje; njil le taal-ɛ gə singa rɔ-ɛ godo to gə aw o-mje ne nee.

⁴⁰ N-pa to gə be ɗaa, n-tɔji-je ji-a gə gɔl-ɛ.

⁴¹ D-al ɓad-ɓad gə rɔləl ɗaa, ꞌtəl d-isi dəji gə kəji baa, ꞌta kag-ɛ ang dɔro ɓi. N-pa n-ar-je na: Nekusa lə-si ga̰ kəne əng wa?

⁴² D-ar-ɛ mbida kənji gə nunga.

⁴³ N-ta n-usa ta kəm-je gə ja.

⁴⁴ Ngaɓa n-pa n-ar-je na: Oje tar gə m-pa m-ar-si lo gə m-ga̰ gə si baa ɓi le: May kar ne gə ꞌɗa tar-ɛ ɔji dɔ-m mə torondu gə lə Moyiji, gə Pajambərəje, gə pa no mangə gə nee le ɗa ne ɓa.

⁴⁵ Be ɓa n-cɛ̰ kəji negərə lə-je borong mba kar ꞌgərə ne Mbede lə Luba.

⁴⁶ Ngaɓa n-pa n-ar-je na: To gə ꞌɗa mə mbede na: Kirisi le, a ko ꞌməsərə ngaɓa ndɔ gə njekum gə munda lə-a ɗaa, n-a ndol horo nje gə d-uy gə.

⁴⁷ Ɗaa, d-a kila mbərə turu kəji gə kar kɔr tar neɗa gə kṵra̰y gə ri-a dɔ gəl kuji dəwje gə tɔ̰y, a kun kud-e mə ɓe gə Jerujalɛm gə.

⁴⁸ Sisəy ja ꞌtoje gə nje pa tar naj-ɛje.

⁴⁹ Ɗaa, oje, ne gə Bɔy uwa dɔ gɔl-ɛ ɔji dɔ-si le, m-a kula-a dɔ-si gə. Sisəy ɗaa, isije mə ɓe gə nee saar mba kar singamongə gə ḭ taar dəbə dɔ-si gə.

Kaw lə Jeju gə dara

⁵⁰ Cibi n-ce gə je n-aw gə je ɗaga əər ɓe gə Ɓetani ɗaa, n-odo ji-a gə taar, n-tɔr ne ndu dɔ-je gə.

⁵¹ Logə n-aw n-tɔr ndu dɔ-je gə bənəng ɗaa, n-uba-je n-ḭya̰-je, ngaɓa ne un-e aw sə-a dara.

⁵² Logə polo-eje nam ngaɓa, ꞌtəl d-aw Jerujalɛm gə rɔləl.

⁵³ D-aw mə kəy gə lə Luba taar-taar d-ɔsə gaji Luba.