Lugu 18 - Mbede Lə Luba Kone Gə Sigi

Gusutar lə nje gangə tar je gə Jene nduba

¹ Jeju pa gusutar kara ar-je mba tɔji neje kar ꞌdəji Luba gə ndɔ-ndɔ ngaɓa d-ḭya̰ go-e ang.

² N-pa n-ar-je na: Mə ɓe kara be ɗaa, nje gangə tar kara ɓəəl Luba ang, ngaɓa ɔs-ɛ dɔ dəwje gə ang ga̰ kəne əng.

³ Ngaa jene nduba kara ga̰ mə ɓe gə nee le ɗaa ɗe pa ar-ɛ na: Ila kagə dɔ tar gə to horo-je gə nje kəm tar gə lə-m ne ar-m.

⁴ Kuru lo əw, n-mbadə mba ɗa tar nee le. Go-e gə ɗaa, n-təl n-pa tar m-e gə na: Le m-ɓəəl Luba ang nəm osə-m dɔ dəwje gə ang ja kara,

⁵ jene gə nee ɗa jɔgə-m ya̰ ɗaa m-a kila kagə dɔ tar gə lə-a kar-ɛ mba kar n-təl n-ɗe n-jɔgə-m gə ang.

⁶ Mbayɓe pa dɔ mar-ɛ gə ja cibi na: ꞌTugaje mbi-si maj-ɛ oje ne tar gə nje gangə tar gə gə mbɔr-ɛ nee pa.

⁷ Ɗaa Luba a pa tar dɔ dəwje gə lə-a gə n-mbərə-je, gə no no gɔl-ɛ gə kar gə cil ang wa? N-a kar-je ꞌngɔb-ɛ wa?

⁸ M-pa m-ar-si, n-a pa tar dɔ-je gə ngɔdə ja baa kar-je. Ngaa lo gə Ngon lə dəw a ɗe le se a kinga dəwje gə nje ta kag-ɛje dɔ nangə ne ja wa?

Parijiyɛ̰ gə njembo̰ lar gədə ɓe

⁹ N-pa gusutar gə ɗangə cibi n-ar nje gə kɛm gə d-o rɔ-je gə dəwje gə dana gadə-gadə ɗaa ꞌdaɓə ne nje gə kɛm dasəra le na:

¹⁰ Jingawje joo d-aw mə kəy gə lə Luba gə mba dəji Luba. Ye gə kara to Parijiyɛ̰, ɗaa ye gə ɗangə to njembo̰ lar gədə ɓe tɔ.

¹¹ Parijiyɛ̰ le ar gə ngal-ɛ taar ɗaa dəji ɔji dɔ-ɛ ye ja pa na: Əy Luba, m-ar-i oyo mba ꞌma le, m-unda rɔ-m to gə dəwje gə kɛm gə ꞌto gə nje ɓogoje, njeneɗa dɔ buguruje, nje ɓogo lo toje ose m-asə naa gə njembo̰ lar gədə ɓe gə ar nee ang nəm tɔ.

¹² M-tɔl mə-m ɓo gɔl joo mə dɔmasi kara ngaɓa, m-uga ta ne gə dɔg lə nekingaje lə-m tɔ̰y.

¹³ Njembo̰ lar gədə ɓe, ye ar ngərəng ngaɓa dɔ-ɛ kara ɔr gə taar ang nəm, ngaa unda kar-ɛ jab-jab na: Luba lə-m, o kəmtondoo lə-m ꞌma gə m-to gə njeneɗa gə kṵra̰y.

¹⁴ Jeju pa dɔ mar-ɛ gə cibi na: M-pa m-ar-si, njembo̰ lar gədə be nee le aw kəy lə-a gə maj-ɛ, tar ɔr dɔ-ɛ gə, ngaa ye gə kara ɗa bənəng ang baa, mba dəw gə ɗa-ɗa gə unda dɔ-ɛ taar gəgəgə nama, Luba a kuwa dɔ-ɛ kula nangə, ngaa dəw gə ula dɔ-ɛ ɓa Luba a kun-e kunda-a taar.

Jeju je gə nganje gə gɔgɔ

¹⁵ Dəwje ꞌɗe gə nganje gə gɔgɔ ja kara kar Jeju ila ji-a dɔ-je gə, ngaa ngan njenendoje d-o ɗaa, d-ḭ gə je.

¹⁶ Ngaa Jeju ar ɗe gə nganje gə gɔgɔ le rɔ-ɛ gə ɗa pa na: Ḭya̰-je nganje ar-je ꞌɗe rɔ-m gə ɓo ɔgəje-je ang mba ɓeko̰ lə Luba le to mba nje gə to to gə nganje be.

¹⁷ Tar gə tɔgərɔ ja m-pa m-ar-si, dəw gə ɓo uwa Luba gə rɔ-ɛ gə Mbay lə-a to gə ngon gə njɛ̰ be ang nama a kandə ɓeko̰ lə-a ang magə.

Jeju gə njenekinga

¹⁸ Jiibi kara gə to buba ɓe dəji Jeju na: Njenetɔji gə may, ɗi ɓa m-a ɗa mba kinga ne təbə gə gə ndɔ gə ndɔ wa?

¹⁹ Jeju pa ar-ɛ na: Mba ɗi ɓa ꞌɓar-m dəw gə may wa? Dəw gə may kara be kara godo, ngaa Luba ja gə kar-ɛ baa.

²⁰ ꞌGərə ndu gə na: ꞌƁogo lo to ang, ꞌtɔl dəw ang, ꞌɓogo ang, ꞌgangə tar unda ta dəw gə ang, ila ngon kuji dɔ bɔ-ije gə ko̰-ije gə.

²¹ Buba ɓe le ila-a kəne na: Neje gə tɔ̰y nee le, m-ila kuji kəne gə kasə-m baa ja.

²² Go tar lə-a gə Jeju o ɗaa, təl pa ar-ɛ na: Ne kara nay ɓi; aw odo neje lə-i tɔ̰y ꞌɗabə n-ndogo ɓo ḭya̰ lar-ɛ aw ꞌkay njendooje, ɗaa a kinga nebaw mə dara gə, ɓo ꞌɗe uwa go-m.

²³ Ngaa lo gə n-tuga mbi-a n-o tar nee le ɗaa, rɔ-ɛ ləl-e ang mba n-to njenekinga gə bo.

²⁴ Jeju o to gə m-e ila kasə ɗaa, pa na: To ngangə ya̰ kar dəwje gə njenekingaje d-andə mə ɓeko̰ gə lə Luba!

²⁵ Be ɓa, to ngangə ya̰ kar da gə ɓar-ɛ jambal nday kəm ɗəw libi gə, ngaa njenekinga kar andə ɓeko̰ gə lə Luba le, to ngangə ya̰ ja cibi.

²⁶ Nje gə ꞌtuga mbi-je d-o tar lə-a le ꞌpa na: Be nama na ja ɓa a kasə kinga kaji wa?

²⁷ Ɗaa n-ila kəne na: To ne gə dum dɔ dəwje ngaa Luba le ne gə dum dɔ-ɛ godo.

²⁸ Piyɛr pa na: A o, sijee j-uba neje lə-si tɔ̰y j-ḭya̰ ɓa j-uwa go-i nee.

²⁹ Jeju pa ar-je na: Tar gə tɔgərɔ ja, m-pa m-ar-si, to gə ɓo dəw ḭya̰ kəy lə-a, gə ngan ko̰-ɛje, gə ko̰ nan-ɛje, gə ko̰-ɛje, gə bɔ-ɛje, gə ngan-ɛ ose ndɔje mba ɓeko̰ lə Luba nama,

³⁰ a kinga mar-ɛ bula dɔ-ɛ gə mə ndɔ gə ɓogəne ngaɓa a kinga təbə gə a to gə ndɔ gə ndɔ mə ndɔ gə bara.

Jeju pa tar kuy lə-a gə tar ndol lə-a

³¹ Jeju ar ngan njenendoje lə-a gə dɔg gə gir-je gə joo ꞌɗe d-inga-a nganga̰, ɗaa pa ar-je na: Oje, j-aw gə ɓe gə Jerujalɛm ɓa nee. Ɗaa neje tɔ̰y gə pajambərəje ɗa tar-ɛ mə mbede gə ɔji dɔ ꞌma gə Ngon lə dəw le, neje nee le a ɗe.

³² Be ɓa, d-a kila-m mə ji dəwje gə ꞌgərə Luba ang gə kar d-unda-m kogo ne, gə d-a kula kəm-m ndoo, gə d-a cibi yiro dɔ-m gə.

³³ D-a labə-m gə ndəy abəlay, ngaɓa go-e gə ɗaa, d-a tɔl-m. Ngaɓa ndɔ gə njekum gə munda ɗaa m-a ndol.

³⁴ Ngaa ngan njenendoje lə-a ꞌgərə ne kara kara kəne ang. Tar nee le iya rɔ-ɛ sərərə ta kəm-je gə ɗaa ꞌgərə mə tar gə Jeju njigi pa le ang.

Jeju aji nje kəm tɔ

³⁵ Logə Jeju aw mba kandə mə ɓe gə Jeriko ɗaa, nje kəm tɔ kara isi mbɔr ɗəw gə aw kɔy ne.

³⁶ N-o Kɔr gɔl bula dəwje gə d-aw nday ɓar ɗaa, n-dəji na se to ɗi wa?

³⁷ Dəwje d-ila-a kəne na: To Jeju gə Najarɛd ɓa aw nday.

³⁸ Ɗaa n-uru ꞌkuwi na: Jeju, Ngon ka mbay Dabidi, kɔgərɔ ja, o kəmtondoo lə-m.

³⁹ Dəwje gə ꞌnja no-ɛ gə kede d-ḭ sə-a mba kar n-əw rɔ-ɛ; ngaa n-uru ꞌkuwi le gə dɔ mar-ɛ gə ja cibi: Ngon ka Dabidi, o kəmtondoo lə-m!

⁴⁰ Jeju ar nangə ɗaa, un ndu ar-je mba kar ꞌɗe sə-a d-ar-ɛ. Lo gə nje kəm tɔ ɗe mbɔr-ɛ gə dəb ɗaa, n-dəj-e na:

⁴¹ Ɗi ɓa ꞌnjigi kar-m m-ɗa m-ar-i wa? N-ila kəne na: Mbayɓe, m-njigi ko lo.

⁴² Jeju pa ar-ɛ na: Ar kəm-i təl o lo; takagə lə-i aji-i.

⁴³ Ɗaa, lo-e gə əng ja n-o lo, ɗaa n-ɔdə n-uwa go Jeju, n-ɔsə gaji Luba taar-taar. Dəw mə ɓeje tɔ̰y d-o ne gə əng le ɗaa, ꞌpidi ne Luba.