Lugu 14 - Mbede Lə Luba Kone Gə Sigi

Jeju aji njerɔko̰ gə ndɔ kuwa kɔr

¹ Ndɔ kara be, gə ndɔ kuwa kɔr, Jeju aw kəy lə mbay lə Parijiyɛ̰ kara mba kusa ne, ɗaa dəwje gə ꞌga̰ lo-e gə le d-a Jeju ji.

² Ɗaa oje, dəw kara gə ne andə m-e gə ar no-ɛ gə.

³ Ɗaa Jeju dəji njekɔr gəl toronduje gə Parijiyɛ̰je na: Se ɗəw to kar d-aji dəw gə njerɔko̰ gə ndɔ kuwa kɔr, ose ɗəw to ang wa?

⁴ Ngaa d-isi ta-je munduru. Logə Jeju uwa ji njerɔko̰ le ɗaa, aji-ɛ ngaɓa ḭya̰-a ar-ɛ aw.

⁵ Cibi, n-pa n-ar-je na: Na ja horo-si gə nee, to gə ɓo ngon-e ose mangə lə-a oso buwa man gə ndɔ kuwa kɔr gə nama a kɔr-ɛ gə tɔg-ɛ baa ang wa?

⁶ D-asə mba kila tar gə le ang.

Nje gə ꞌsangə lo kisi gə kede

⁷ Jeju pa tar gə gusutar ar dəwje gə ꞌɓar-je lo nekusa gə mba n-o to gə d-aw sangə lo kisi gə kede, ɗaa n-pa n-ar-je na:

⁸ Logə ɓo dəw ɓar-i lo nekusa ta naa gə nama, əw rɔ-i kaw kisi lo gə ꞌgɔl mba kar dəwje gə ꞌbo d-unda-i, bayɛ̰ njekəy a ɓar dəw gə to ɓəəl unda-i.

⁹ Ngaa ɓo, dəw gə ɓar-sisəy joo kɛm le, ɗe pa ar-i na: Ḭ, ḭya̰ lo ar-ɛ, lo gə a kḭ kaw kisi gugu nama rɔ kul a kuwa-i.

¹⁰ Ngaa logə dəw ɓar-i ɗaa, aw isi lo gə to gugu, mba kar logə njekəy a ɗe nam ɗaa, a pa kar-i na: Njekura, ꞌɗe gə kede nee. Be ɓa, nje gə isi sə-i ta ka nekusa gə kara d-a ɓəəl-i nee.

¹¹ Dəw gə ɗa-ɗa gə unda dɔ-ɛ taar gəgəgə nama, Luba a kuwa dɔ-ɛ kula nangə, ngaa dəw gə ula dɔ-ɛ ngulum ɓa Luba a kun-e kunda-a taar.

¹² Cibi, Jeju pa ar njekəy le na: Logə ꞌgɔl nekusa gə bo gə ndɔɔ-sḭ ose kar kumatagə nama, əw rɔ-i ɓar njekuraje lə-i, ose ngan ko̰-i, ose njenujije lə-i, ose Njembɔr kəyje lə-i gə to njenekingaje mba d-a təl ɓar-i kar aw usa ne kəy lə-je, ɗaa nay to gə d-uga dɔ ji-i nam be.

¹³ Ngaa logə ꞌgɔl nekusa gə bo nama, ꞌɓar njendooje, gə njeməndəje, gə njenja məndəje, gə nje kəm tɔje.

¹⁴ A to njenokarə mba dəwje nee le d-a kasə kuga dɔ ji-i ang, ngaa Luba ja ɓa a kuga dɔ ji-i ndɔ gə dəwje gə gadə-gadə gə d-uy d-a ndol ne.

Gusutar gə ɔji dɔ dəwje gə ꞌɓar-je

¹⁵ Go tarje gə nee ɗaa, dəw kara horo nje gə d-isi ta ka nekusa pa ar Jeju na: Nokarə to kar gə dəw gə a kusa mbə mə ɓeko̰ gə lə Luba!

¹⁶ Ngaa, Jeju pa ar-ɛ na: Dəw kara gɔl muru bula ngaɓa ɓar dəwje bula.

¹⁷ Logə kar nekusa le asə ɗaa, n-ula ngon njekula lə-a n-ar-ɛ ɓar dəwje gə ꞌɓar-je lo ta naa gə nee le na: ꞌƊe-je ngaa, neje tɔ̰y asə naa.

¹⁸ Ɗaa dəwje gə ꞌɓar-je lo ta naa gə tɔ̰y ja d-unda kudu naa gə ꞌdəji kɔgərɔ. Dəw gə dɔngɔr pa na: M-ndogo ndɔ ɓisine ɓi, m-aw gə kəne mba ko, m-ɗa-i kɔgərɔ ja.

¹⁹ Ye gə kara pa na: M-ndogo mangəje dɔg, m-a kaw na-je ko se d-a kasə ndɔ wa, kɔgərɔ.

²⁰ Ye gə ɗangə ja cibi pa na: M-ta jene sigi ɓi, ɗaa m-asə kaw ang.

²¹ Ngon njekula le təl aw inga ꞌɓəə-eje, ɗaa ndaji ndu-je le tɔ̰y ar-ɛ. Mə njekəy le o̰-ɛ, ɗaa pa ar ngon njekula lə-a na: Ɔdə aw gə tɔg-ɛ nada gə ɗəw booje gə, gə mə ɓe gə, ꞌɗe gə njendooje, gə njeməndəje, gə nje kəm tɔje je gə nje nja məndəje.

²² Ngon njekula le pa na: ꞌƁəə-mje, ndu gə un ar-m le m-ɗa tɔ̰y ngaa kɛsə lo nay baa.

²³ Njekəy le pa ar ngon njekula le na: Un kila ɗəwje gə mə ndɔje gə, ɔsə dəwje ꞌɗe gə je mba kar mə ndogo lə-m ɗusu tubu.

²⁴ Be ɓa, m-pa m-ar-si, dəwje gə m-ɓar-je kede ɓa ꞌmbadə nee le, dəw kara baa ja kara nekusa lə-m a kɔr t-ɛ ang.

Ɗəw kuwa go Jeju

²⁵ Bula dəwje d-uwa go Jeju yug-yug, ɗaa n-kəl go-e ngaɓa n-pa n-ar-je na:

²⁶ To gə ɓo dəw ɗe rɔ-m gə, ngaɓa ɓo njigi bɔb-ɛje, ose ko̰-ɛje, ose jene lə-a, ose ngan-ɛ, ose ngan ko̰-ɛ gə ko̰ nan-ɛ ose təbə lə-a ja ang gə kɔrɔ, nama to ngon njenendo lə-m ang.

²⁷ Dəw gə odo kagə dəsə lə-a ɓa uwa ne go-m ang nama asə to ngon njenendo lə-m ang tɔ.

²⁸ To gə ɓo dəw kara horo-si gə njigi kunda kəy gə boy nama, nj-ɛ isi nangə tura kɔr lar gə ji-a gə o, to gə a kasə tɔl kəy le ja wa?

²⁹ Ɓo be ang nama, logə n-ɔsə gɔl kəy ɓa nay dana baa ɗaa, dəwje gə d-a ko le d-a kunda kogo ne.

³⁰ D-a pa na: Dəw nee le uma kudu kunda kəy, ngaa asə ɗunga ang səmə!

³¹ Ɗəw kara baa, to gə mbay gə njigi kila ɗɔ dɔ mbay mar-ɛ gə nama, a kəji ko se njeɗɔje tɔl-tɔl dɔg lo dɔg asə mba ɗɔ gə mbay mar-ɛ gə aw gə njeɗɔje tɔl-tɔl dɔg lo dɔg joo wa?

³² To gə ɓo n-asə kila ɗɔ ang nama, logə mbay mar-ɛ nay əw ja baa ɓi ɗaa, n-ula dəwje n-ar d-aw d-inga-a mba gɔl ɗəw ɗɛgɛgɛ.

³³ Be ɓa, Jeju təl pa na: Dəw gə ɗa-ɗa ɓa horo-sisəy gə nee ɓo ḭya̰ go nekingaje lə-a ang nama, a to ngon njenendo lə-m ang baa.

³⁴ Kadə to ne gə may ja; ngaa to gə ɓo kadə do̰o̰ ang le, se d-a ɗa ban ɓa kar təl do̰o̰ wa?

³⁵ May kar d-um mə ndɔ gə ang nəm, ꞌɗa ne kula gə ɗangə ang nəm ɗaa, d-um kɔrɔgə kum ja. May kar dəw gə mbi-a to mbi ko tar nama o!