Lugu 13 - Mbede Lə Luba Kone Gə Sigi

Pilad rəndə dəwje gə dɔ nangə gə Galile

¹ Dɔ ndɔ-ɛ gə əng le, dəwje gə kɛm ꞌɗe pa d-ar Jeju to gə Pilad ar rəndə dəwje gə Galile, d-ar məsə-je polo naa gə məsə daje gə d-un nepolo d-ar Luba.

² Jeju ila-je kəne na: Se, əjije to gə dəwje gə Galile nee le ꞌɗa neɗa gə kṵra̰y d-unda dəwje gə Galile gə kɛm, ɓa ꞌrəndə neje to gə be wa?

³ Bənəng ang baa, m-pa m-ar-si, ngaa to gə ɓo ꞌturuje kəji lə-si ang nama, a kuyje to gə bənəng ja tɔ.

⁴ Ose dəwje gə dɔg gə gir-je gə ji nay joo gə ndogo kəy gə Silohe cɛdə unda-je tɔl-je nee le, se ꞌto njeneɗaje gə kṵra̰y d-unda dəw mə ɓeje gə Jerujalɛm wa?

⁵ Bənəng ang baa, m-pa m-ar-si, ngaa to gə ɓo ꞌturuje kəji lə-si ang nama, a kuyje to gə bənəng ja tɔ.

⁶ Jeju pa gusutar ja cibi na: Jingaw kara ꞌmaa kagə tungu mə ndɔ gə lə-a. Logə n-ɗe mba ko se kand-e to wa? Ɗaa n-inga ang.

⁷ Be ɓa, n-pa n-ar njengəm ndɔ na: As ɓal munda gə m-ɗe mba kunja kandə tungu nee ɗaa kand-e godo. ꞌTunga-a gə ɗangə mba n-ta lo baa ja.

⁸ Njengəm ndɔ təl ila-a kəne na: ꞌƁəə-mje, ḭya̰-a kəm ɓal kara arə si j-o, m-a kuru gəl-e gugu mbugu, ɗaa m-a kum kad kəne.

⁹ A ɓo may boy nama, n-a kandə ɓal gə ɗangə, a ɓo be ang nama a tuga-a kila-a kɔrɔ ɓi.

Jeju aji jene njeməndə

¹⁰ Ndɔ kara be to ndɔ kuwa kɔr, Jeju aw tɔji ne mə kəy nendo gə kara.

¹¹ Ɗaa jene kara gə to njerɔko̰ asə ɓal dɔg gir-e gə ji nay joo isi kəne əng tɔ. Njil gə kṵra̰y uwa-a ɗug-e, ɗaa n-asə nduji rɔ-ɛ rad ang.

¹² Logə Jeju a jene le jii ɗaa, ɓar-ɛ ngaɓa pa ar-ɛ na: Jene, rɔko̰ ɔr ji-a rɔ-i gə.

¹³ Ɗaa n-ila ji-a dɔ-ɛ gə. Lo-e gə nee ja, jene le nduji rɔ-ɛ ngaɓa ɔsə gaji Luba.

¹⁴ Ngaa, mə njeko̰ dɔ kəy nendo o̰-ɛ dɔ Jeju gə ɔji dɔ kaji gə aji jene gə ndɔ kuwa kɔr. Be ɓa, n-pa n-ar bula dəwje na: Ndɔ gə kar ꞌɗaje kula kəne ḭ misa̰, ꞌɗeje gə ndɔ-ɛ nee ar-je d-aji-si, ɓo gə ndɔ kuwa kɔr ang.

¹⁵ Jeju ila-a kəne na: Njetar mulaje, ndɔ kuwa kɔr ja ɓa, dəwje gə kɛm horo-si gə ꞌtudu mangə ose kororo ta bəgərə nekusa gə d-ar aw ay man ang wa?

¹⁶ Ngaɓa jene gə nee le, to ngon ka Abəraham, ꞌSu uwa ɗug-e asə ɓal dɔg gə gir-e gə ji nay joo ngaa nee ja, to may mba tud-e kila-a taar gə ndɔ kuwa kɔr ang wa?

¹⁷ Logə Jeju pa tar to gə be ɗaa, rɔ kul ɗa nje kəm tarje lə-a, ɗaa rɔ bula dəwje tɔ̰y ləl-je mba neje gə may gə Jeju ɗa.

Gusutar gə ɔji dɔ kandə mutarədə

¹⁸ Jeju pa ar-je na: Ɓeko̰ lə Luba ta naa gə ɗi wa? Se ɗi ɓa m-a kuwa kɔj-e ne wa?

¹⁹ Ɓeko̰ lə Luba ta naa gə kandə kam nay gə ri-a na mutarədə gə dəw un aw dubu mə ndɔ gə lə-a; tɔgə ɗaa təl to kagə kam nay gə bo, ɗaa əlje gə dara ɗa kəy ba̰-ɛ̰je gə.

²⁰ Jeju təl pa ar-je ja cibi: Se ɗi ɓa m-a kuwa kɔji ne ɓeko̰ lə Luba wa?

²¹ Ɓeko̰ lə Luba ta naa gə guway kodo gə jene un um mə nduji gə d-ɔji ngo munda mba mbo̰y ne saar kar ḭ tɔ̰y.

Ta ɗəw gə njondəro̰

²² Jeju nday mə ɓeboje gə, gə ngan ɓeje ngaɓa tɔji ne dəwje gə ɗəw-ɗəw dɔ-ɛ gə Jerujalɛm.

²³ Dəw kara dəji Jeju na: Se Luba a kaji dəwje njɛɓərɛ baa wa? Jeju ila-je kəne:

²⁴ Uwaje rɔ-si kɔgərɔ andəje gə ta ɗəw kəy gə njondəro̰. M-pa m-ar-si, dəwje bula d-a sangə ɗəw mba kandə, ngaa d-a kasə ang.

²⁵ Logə njekəy ḭ taar udu ta kəy, ɗaa sisəy gə a karje ɗaga, a kundaje ta kəy ngaɓa a Paje na: Mbayɓe! Ɔr ta kəy ar-si, ɗaa n-a kila-si kəne na: Sisəy le, m-gərə-si ang.

²⁶ Be ɓa, a paje na: Sijee le, j-usa sə-i ne gə j-ay sə-i ne naa gə; ngaɓa ꞌi ja kara tɔji-si ne nadə ɓeje gə lə-si nəm tɔ.

²⁷ Cibi, n-a təl kila-je kəne na: M-gərə-si ang, ꞌtoje gə ɗa wa? Ɔdəje ta-m gə gə ɗangə, sisəy tɔ̰y ꞌtoje nje ɗa neje gə dɔ buguru.

²⁸ Lo-e gə nee le, a noje ngaɓa a kusaje ngangə si kəne pəgərə-pəgərə. Ɗaa, a koje Abəraham je gə Ijagə gə Jakobo, gə pajambərəje mə ɓeko̰ gə lə Luba. Ngaa sisəy le, Luba a tɔbə-si kum-si ɗaga.

²⁹ Dəwje d-a kḭ lo ce gə lə kar gə lo kuru nangə gə lə kar; d-a kḭ dɔ gəl gə dɔ kɔl d-a ɗe kisi ta ka nekusa gə mə ɓeko̰ gə le Luba.

³⁰ A oje, dəwje gə dɔ gugu le d-a təl to dəwje gə dɔngɔr ngaɓa nje gə dɔngɔr le d-a təl to dəwje gə dɔ gugu.

Jeju aw dɔ-ɛ gə Jerujalɛm

³¹ Dɔ ndɔ-ɛ gə əng ja, parijiyɛ̰je gə kɛm ɗe d-inga Jeju pa d-ar-ɛ na: Ɔdə lo gə nee gə gə ɗangə mba mbay Erɔdə njigi tɔl-i.

³² Jeju pa ar-je na: M-ula-si kar aw paje ar-je dəw gə nje ɗa gusu to gə nja nee le na: O, m-tɔbə njilje gə kṵra̰y, m-ɔr rɔko̰ rɔ dəwje gə ɓogəne gə bara, ndɔ gə njekum gə munda ɗaa m-a kunda ngang-ɛ.

³³ Ngaa, may kar-m m-nja kəm gə kede ɓogəne, bara gə ndɔ gə aw ɗe go-e gə; mba may kar pajambərə uy mə ɓe gə Jerujalɛm ja ɓa.

³⁴ Dəwje gə Jerujalɛm, dəwje gə Jerujalɛm, sisəy gə ꞌtoje nje tɔl pajambərəje ngaɓa nje gə Luba ula-je kara ꞌcilaje-je gə kɔr ər ꞌtɔlje-je, gɔl kandə gə m-njigi dəbə bagə-m dɔ-si gə to gə ko̰ kunja ula ne bəl jam dɔ ngan-ɛ gə be, ngaa ꞌnjigije ang.

³⁵ Be ɓa, oje: Luba mbadə ne kəy lə-si ar-ɛ uwa ngɔ mɔgɔgɔ, mba m-pa m-ar-si to gə aw gə kede əng a ko-mje ang saar kar ndɔ gə a paje na: Luba tɔr ndu-e dɔ dəw gə ɗe gə ri Mbayɓe.