Lugu 12 - Mbede Lə Luba Kone Gə Sigi

Jeju mbusu ngan njenendoje lə-a

¹ Dɔ ndɔ-ɛ gə əng le, dəwje bula ya̰ mbo̰ naa rɔ Jeju gə, ꞌnja dɔ gɔl naa gə puduru-puduru mba ꞌbula ya̰ baa be, ɗaa Jeju pa tar dɔngɔr ar ngan njenendoje lə-a na: Aje rɔ-si dɔ guway kodo gə lə Parijiyɛ̰je gə to tar mula.

² Be ɓa ne kara gə iya rɔ-ɛ gə d-a kila gə ɗaga ang le godo, ngaɓa ne kara gə ꞌdəbə dɔ-ɛ gə d-a kḭya̰ dɔ-ɛ ngaw kar gadə gə ang le godo

³ Gəl-e gə nee le ɓa, tar gə ɗa-ɗa gə ꞌpaje londul gə le, d-a ko dan kara, nəm tar gə ꞌwɛdəje mbi naa gə mə kəy gə le, d-a kila ne mbərə dɔ kəy gə taar tɔ.

⁴ Sisəy njekuraje lə-m le, m-pa m-ar-si: Nje gə tɔl darɔ baa ɓo d-asə tɔl kəm ang le, ꞌɓəəlje-je ang.

⁵ M-a tɔji-si dəw gə a ꞌɓəəl-eje. ꞌƁəəlje Luba gə tɔl si nama a kaw singa mba kila-si kəm pər gə. Tɔgərɔ, m-pa m-ar-si, ꞌne ɓa kəm kar-si ꞌɓəəl-eje.

⁶ Se ꞌɗabə mabəraje mi kəm sulay joo ang wa? Be ja kara, mə Luba uy dɔ mar-ɛ kara horo-je gə ang.

⁷ Ngaɓa, bḭ dɔ-si ja kara Luba tura tɔ̰y. Be ɗaa, ꞌɓəəlje-je ang: mba ꞌtoje ɓəəl undaje mabəraje gə bula.

⁸ M-pa m-ar-si, dəw gə ɗa-ɗa gə tɔji rɔ-ɛ gə ɗaga no dəwje gə to gə n-to nje kar ꞌma nama, ꞌma gə Ngon lə dəw m-a tɔj-ɛ gə ɗaga no anjije gə lə Luba to gə n-to nje kar ꞌma tɔ.

⁹ Ngaa dəw gə ma̰y tar lə-m no dəwje gə to gə n-gərə-m ang nama, ꞌma kara m-a ma̰y tar lə-a no anjije gə lə Luba to gə m-gər-e ang tɔ.

¹⁰ Dəw gə ɗa-ɗa gə pa tar gə kṵra̰y dɔ-m ꞌma gə Ngon lə dəw nama, Luba a kɔr tar-ɛ dɔ-ɛ gə, ngaa dəw gə taji Njil Njerɔsangə nama, Luba a kɔr tar-ɛ dɔ-ɛ gə ang ja saar.

¹¹ Logə d-a kuwa-si kaw gə si mə kəy nendo gə, no nje gangə tar gə ose no njeko̰ ɓeje nama, ꞌnoje rɔ-si mba gusu gə a paje ne tar ang, ɓa ɔji dɔ tar gə a paje ang nəm tɔ;

¹² mba Njil Njerɔsangə a tɔji-si tar gə a paje dɔ kar-ɛ gə əng.

Jeju pa tar gə ɔji dɔ mbə gə to njenekinga

¹³ Dəw kara horo bula dəwje gə pa ar Jeju na: Njenetɔji, ꞌpa ar ngon ko̰-m ar-si j-a kay naa nenduba lə bɔ-sijee.

¹⁴ Jeju ila dəw le kəne na: Se na ɓa unda-m mba kar m-to nje gangə tar dɔ ne gə lə-si, ose njekay si nenduba le wa?

¹⁵ ꞌNgom-je rɔ-si dɔ mal nekinga gə, mba təbə lə dəw to ɔji dɔ neje gə inga ang baa.

¹⁶ Jeju pa gusutar kara ar-je na: Baw kara unja ko ya̰ mə ndɔ gə lə-a.

¹⁷ N-əji tar m-e gə ɗaa n-pa na: Ɗi ngaa m-a ɗa wa? Mba lo asə kar-m m-um ko lə-m kəne ang.

¹⁸ Ɗaa n-ila rɔ-ɛ kəne na: May boy, ne gə m-a ɗa ɓa nee: M-a tḭ damje lə-m tɔ̰y, m-a kuji damje gə boy-boy mba kum ko gə nekingaje lə-m gə kɛm kəne.

¹⁹ Cibi, m-a pa kar kəm lə-m na: Kəm lə-m, uwa kɔr-i, usa ɓo ay ngaɓa ꞌɗa rɔləl, mba ꞌi aw gə nekingaje gə a ɗa sə-i ɓal bula.

²⁰ Ngaa Luba pa ar-ɛ na: Ɛbɛ dəw! Mə cil gə nee ja Luba a kɔr kəm lə-i. Ɗaa neje tɔ̰y gə ꞌgɔl le, na ngaa a to nj-ɛ wa?

²¹ Jeju təl pa ja cibi na: Ye ɓa to ne gə ce dɔ dəw gə mbo̰ nekinga ɔji dɔ-ɛ ye ja baa, ɓo to njenekinga gə ɔji dɔ Luba ang.

No rɔ. Nebaw gə tɔgərɔ

²² Jeju pa ar ngan njenendoje lə-a na: ꞌNoje rɔ-si mba kisi kəm baa ɔji dɔ nekusa ta-si ang nəm ɓa, mba kubuje gə a kulaje rɔ-si gə ang tɔ.

²³ Kaw gə təbə nday nekusa nəm, darɔ dəw kara nday kubu nəm tɔ.

²⁴ Oje ꞌga̰a̰je: ꞌdubu ne ang nəm, ngaɓa d-unja ne ang nəm tɔ; ꞌɗa kəy ngom ne ang nəm ngaɓa d-uji dam ang nəm tɔ; ngaa Luba uul-je. Sisəy ꞌmayje undaje əlje ang wa?

²⁵ Na ɓa horo-si gə əng asə no rɔ-ɛ kar ndɔ-ɛ oso dɔ mar-ɛ gə njɛ̰ be wa?

²⁶ To gə ɓo, asəje mba ɗa ne kara ang nama, əwje mba no-je rɔ-si mba kɛsə neje gə na-si.

²⁷ Aje lo oje pudu kiro gə aw uba mə ndɔ gə, ɗa kula ang nəm, uji kubu ang nəm; ngaa m-a pa kar-si to gə Salomo gə riɓar lə-a tɔ̰y ja kara ula kubu to gə ꞌjeje be ang.

²⁸ To gə ɓo mu gə to ne gə ce mə ndɔ gə ɓogəne baa ngaɓa bara nama pər a ko̰, ɓa ɓo Luba ula-a kubu le se, Luba asə kula sisəy kubu ang wa? Njeməkəngəje!

²⁹ Arje kəji lə-si jɔgə si ɔji dɔ ne gə a kusaje gə ne gə a kayje ang.

³⁰ Mba neje gə to gə be le, dəwje gə ꞌgərə Luba ang ɓa ꞌsangə. Bɔ-sijee gərə neje gə awje ndoo-e.

³¹ ꞌSangəje Ɓeko̰ lə Luba ɓa, Luba a kar-si neje gə kɛm dɔ mar-ɛ gə.

³² Sisəy gə ꞌtoje nekuulje gə njɛ̰, ar-je mə-si ila kasə ang, mba rɔ Bɔ-sijee ləl-e mba kar-si ɓeko̰ le.

³³ ꞌƊabəje nekingaje lə-si, ɔrəje ne kəne ꞌkayje njendooje. ꞌSangəje gɛmɛ̰ kum lar gə a tuji ang, iyaje nekingaje lə-si rɔ Luba gə dara, lo gə nje ɓogo a ce kəne ang nəm, ngaɓa sɔlɔlɔ kara unda ne kəne ang nəm tɔ.

³⁴ Mba lo gə nekinga lə-si to kəne ja ɓa mə-si a to kəne.

Kunda kəm karə dɔ rɔ gə

³⁵ Jeju pa ar ngan njenendoje lə-a na: Uwaje ur-si gə gagəra, ngaɓa undaje pər lambe gə lə-si ar-je ndogo gə maj-ɛ.

³⁶ Sisəy le, ꞌɗaje ne to gə ngan njekulaje gə d-aw ꞌngina ꞌɓəə-jeje gə aw lo ɗa nay ta naa gə, mba kar lo gə n-a təl ɓa n-unda ta kəy nama, a kɔrəje gə tɔg-ɛ baa.

³⁷ Nokarə to kar ngan njekulaje gə ꞌɓəə-jeje ɗe inga-je kəm baa. Tar gə tɔgərɔ, m-pa m-ar-si, njekəy a təl rɔ-ɛ gə ngon njekula, n-a kar-je d-isi nangə gə maj-ɛ ɓa, n-a ɗe gə nekusa kar-je ɓi.

³⁸ To gə ɓo njekəy ɗe inga-je kəm baa dan lo gə ose ji dɔɔɓe gə nama, d-a to njenokarəje!

³⁹ Oje tar gə nee gə maj-ɛ, to gə ɓo njekəy gərə kar gə nje ɓogo a ɗe ne nama, a kisi kəm baa ja mba kɔg-ɛ lo cɛdə ta kəy lə-a.

⁴⁰ Sisəy kara, ar-je kɛgɛgɛ dɔ gɔl si gə, mba ꞌma gə Ngon lə dəw m-a ɗe gə dɔ kar gə a kəjije kəne ang.

⁴¹ Piyɛr pa ar Jeju na: Mbayɓe, se gusutar nee le, ꞌpa ar-sije ja baa, ose ꞌi pa ar dəwje tɔ̰y tɔ wa?

⁴² Ɗaa Mbayɓe ila kəne na: Na ɓa to njengom ne gə to ngon kuji gə unda kəm karə dɔ rɔ-ɛ gə, ɓa ꞌɓəə-eje um kula ji-a gə, mba kar-ɛ n-ar dəwje gə mə kəy gə nekusa gə dɔ kar-ɛ kar-ɛ wa?

⁴³ Nokarə a to mba ngon njekula gə to gə be mba ꞌɓəə-eje a təl ɗe kinga-a dɔ kula ɗ-ɛ gə may gə.

⁴⁴ Tɔgərɔ ja, m-pa m-ar-si, ꞌɓəə-eje a kun-e kunda-a dɔ nekingaje gə lə-a tɔ̰y.

⁴⁵ Ngaa, to gə ɓo ngon njekula nee le pa m-e gə na: ꞌƁəə-mje a ɗe gə tɔg-ɛ ang, ɗaa n-uru dɔ ngan njekulaje gə, n-kunda-je, ngaɓa n-təl n-usa ne gə n-ay ne n-ar tɔl-ɛ,

⁴⁶ ꞌɓəə ngon njekula-je nee le a ɗe gə ndɔ gə n-unda m-e kəne ang ngaɓa gə dɔ kar gə n-a gərə ang ja, ɗaa n-a tɔb-ɛ, ngaɓa n-a ɗa sə-a ne gə d-a ɗa gə nje gə d-ila kuji ang.

⁴⁷ Ngaa ngon njekula gə gərə ne gə ꞌɓəə-eje njigi, ɗaa n-gɔl ne kara ang, ngaɓa n-ɗa ne gə mə ɓəə-eje njigi ang nəm le, ꞌɓəə-eje a kunda-a sḭ tɔl-ɛ.

⁴⁸ Ngaa, ngon njekula gə gərə ne gə ꞌɓəə-jeje njigi ang baa, ɓa ɗa kṵra̰y nama, a kinga kunda njɛ̰ baa. Na-na ɓa d-ar-ɛ ne ya̰ nama d-a dəji-e ya̰ ja tɔ, ngaɓa dəw gə d-um ne ya̰ ji-a gə kar ngom le, d-a dəji-e ya̰ ja tɔ.

⁴⁹ M-ɗe m-ila pər dɔ nangə nee, ləw baa ja m-njigi kar-ɛ o̰ kəm-e gə kede!

⁵⁰ M-a kinga batɛm gə m-aw ngina mba kar ɗe tɔg-ɛ!

⁵¹ Se əji to gə m-ɗe mba kar ɗɛgɛgɛ to dɔ nangə nee wa? Bənəng ang baa, ngaa m-pa m-ar-si, m-ɗe gə kay naa ɓa horo-si gə.

⁵² Be ɓa, mə kəy kara gə dəwje mi d-isi kəne le, d-a kay dana, dəwje munda d-a kum naa gə mba ɗa tar gə dəwje gə joo, ose nje gə joo d-a kaw gə dəwje gə munda gə tar;

⁵³ bɔ ngon je a kaw gə ngon-e gə jingaw gə tar, ngaɓa ngon gə jingaw aw gə bɔ-ɛje gə tar, ko̰ ngon je aw gə ngon-e gə jene gə tar ngaɓa ngon gə jene a kaw gə ko̰-ɛje gə tar, ko̰ jingaw-je aw gə mum-eje gə jene gə tar ngaɓa mum gə jene a kaw gə ko̰ ngab-ɛje gə tar tɔ.

⁵⁴ Jeju pa tar gə bula dəwje ja cibi na: Logə oje nji il lo kuru nangə gə lə kar, nama ꞌpaje gə tɔg-ɛ baa na: Nji aw ɗe. Ɗaa nji ər ja tɔ.

⁵⁵ Ngaɓa logə oje ləl ḭ dɔ kɔl ɓa ula, nama ꞌpaje na: Lo a nunga. Ɗaa lo nunga ja tɔ.

⁵⁶ Njetar mulaje, logə aje dɔ nangə ose dɔ dara nama ꞌgərəje ne gə a ɗe; ngaa mba ɗi ɓa asə gərəje ne gə nday no-si gə nee ang wa?

⁵⁷ Mba ɗi ɓa ꞌgangəje tar dɔ ro si gə ja ɔji dɔ ne gə gadə-gadə ang wa?

⁵⁸ Logə ꞌi aw gə nje kəm tar lə-i no nje gangə tar gə nama, may kar-i gɔl sə-a tar ɗəw boo mba ce t-ɛ, ɓo be ang nama, n-a kar nje gangə tar uwa-i ar njengəm lo, ɗaa njengəm lo a kila-i kəy kula gə.

⁵⁹ M-pa m-ar-i to gə a kuga saar kunda bum lar lə-i kərəng-kərəng ja ɓa d-a kɔr-i kila-i taar ɓi.