Lugu 11 - Mbede Lə Luba Kone Gə Sigi

Jeju tɔji ngan njenendoje ɗəw dəji Luba

¹ Ndɔ kara, Jeju aw lo gə kara be aw dəji Luba. Logə n-ila dəji lə-a nangə ɗaa, dəw kara horo ngan njenendoje gə lə-a pa ar-ɛ na: Ja̰ tɔji ngan njenendoje lə-a ɗəw dəji Luba, ꞌI kara, Mbayɓe, ꞌndo-si ɗəw dəji Luba.

² Jeju pa ar-je na: Logə ꞌdəji-je Luba ɗaa, ꞌpaje na: Bɔy! May kar ri-i to ɓədə gə losang-ɛ; May kar ɗe o̰ ɓe dɔ si gə

³ Ar-si nekusa ta-si gə ndɔ-ndɔ,

⁴ Kɔgərɔ ja ɔr tar neɗa gə kṵra̰y dɔ si gə, to gə sijee kara j-ɔr ne tar-ɛ dɔ nje gə ꞌɗa gə si kṵra̰y be tɔ. Ɓo ḭya̰ si ar j-oso dan nekərə gə ang.

⁵ Jeju təl pa ja cibi na: Na ɓa horo-si gə nee, njekura lə-a ce dɔ-ɛ dan lo gə dana bab pa ar-ɛ na: Njekura, ar-m m-tona-i mbə munda,

⁶ mba njekura lə-m kara gə aw gə mba gə ce dɔ-m gə, ngaa ne kara gə m-a kar-ɛ usa godo.

⁷ To gə ɓo njekura lə-a le ar gə mə kəy gə ɓa ila kəne na: ꞌJɔgə-m ang, m-udu ta kəy ɗɔdə, ngaɓa je gə ngan-m gə gɔ-gɔ j-a to nangə nam, m-asə kḭ kar-i ne kara ang.

⁸ Be ɓa, m-pa m-ar-si, n-a kḭ taar mba to gə n-to njekura lə-a baa ang, n-a kḭ kar-ɛ ne gə n-aw ndoo-e mba dəji gə n-dəj-e ndoro̰ro̰-ndoro̰ro̰.

⁹ ꞌMa ɗaa, m-pa m-ar-si: ꞌDəji-je ne nama d-a kar-si, ꞌsangəje ne nama a kinga-je, unda-je ta kəy nama d-a kɔr kar-si.

¹⁰ Mba dəw gə ɗa-ɗa ɓa gə dəji ne ɗaa d-ar-ɛ, dəw gə sangə ne ɗaa inga, ngaɓa dəw unda ta kəy ja ɓa d-a kɔr kar-ɛ.

¹¹ Bɔ ngon je gə ɗa ja ɓa horo-si gə ɓo ngon-e dəji-e mbə nama a kun kɔr ər kar-ɛ wa? Ose dəji-e kənji ɗaa a kar-ɛ li tor-e gə wa?

¹² Ose bɔ ngon je gə ɗa ɓa ngon-e dəji-e kaw ɗaa a kar-ɛ yḭ wa?

¹³ To gə ɓo sisəy gə ꞌtoje dəwje gə kṵra̰y baa ja, ꞌgərəje kar-je ngan si neje gə may-may ngaa ɓədə ɓa Bɔ-sijee Luba gə isi dara a kar Njil Njerɔsangə dəwje gə ꞌdəji-e ang wa?

Jeju tɔbə njilje gə kṵra̰y

¹⁴ Jeju tɔbə njil gə kṵra̰y gə ɗa ɓe mə dəw gə ar təl gɔdə ngaɓa ɔg-ɛ pa tar. Logə njil gə kṵra̰y le ce ɗaa, gɔdə le pa tar, ar lo tar igi bula dəwje le sɛl.

¹⁵ Ngaa dəwje gə kɛm ꞌpa na: Bɛləjebul, mbay lə njilje gə kṵra̰y ɓa ar-ɛ singa n-tɔbə ne njilje gə kṵra̰y.

¹⁶ Nje gə kɛm ꞌdəji-e netɔji gə ḭ dara mba n-ɛ ne.

¹⁷ Ngaa, Jeju gərə kəji lə-je le ɗaa pa ar-je na: Ɓeko̰ gə ɗa-ɗa ɓa ɓo kay rɔ-ɛ dana nama a tuji, ɗaa kəyje unda nangə dɔ naa gə mburugu.

¹⁸ To gə ɓo ꞌSu ja cibi kay rɔ-ɛ cila kəm darɔ-ɛ ye ja, bənəng ɗaa ɓeko̰ lə-a a to gə maj-ɛ to gə ban wa? Mba sisəy ꞌpaje na ɗəw gə lə Bɛləjebul ɓa m-tɔbə ne njilje gə kṵra̰y.

¹⁹ Ngaɓa to gə ɓo, ꞌma m-tɔbə njilje gə kṵra̰y gə singa Bɛləjebul ɗaa, ngan sisəy le ꞌtɔbə njilje gə singa na ngaa wa? Gəl-e gə nee ɓa, d-a to nje gangə tarje dɔ sisəy gə ja.

²⁰ Ngaa to gə ɓo Luba ɓa ar-m singa m-tɔbə ne njilje gə kṵra̰y nama, ɓeko̰ lə Luba ce ɓə lə-si nam ngaa.

²¹ Logə dəw gə njesinga uwa nekadə ji-a gə, ngom ne ta kəy lə-a nama, nemayje lə-a to mɔgɔgɔ.

²² Ngaa, dəw gə uba singa unda-a ce dɔ-ɛ gə, cɛd-ɛ ɗɔ ngaɓa uwa-a nekadəje lə-a gə n-unda m-e kəne car ta ɗaa, odo nekingaje lə-a tɔ̰y kay dəwje.

²³ Dəw gə oso gəl-m gə ang nama to nje kəm tar lə-m. Ngaɓa, dəw gə la sə-m ar-m m-uwa neje dɔ naa gə ang nama, to dəw gə nje ja̰rɛ̰ neje.

²⁴ Logə njil gə kṵra̰y ce mə dəw gə, ɗaa n-aw ndag lo gə, n-sangə lo kuwa kɔr pi n-inga ang, ɗaa n-pa na: M-a təl kaw kəy gə m-ce kəne.

²⁵ Logə n-təl n-ɗe ɗaa, d-odo mə kəy le ngaɓa ꞌgɔl gə maj-ɛ nəm tɔ.

²⁶ N-təl n-aw ɓar njilje gə ɗangə siri gə kṵra̰y d-unda-a, ngaɓa d-andə mə kəy gə le ꞌɗa ɓe kəne, ɗaa dəw nee le təl kṵra̰y unda kisi lə-a gə kede.

²⁷ Logə Jeju aw pa tar be ɗaa, ndu jene kara ɓar wəəl horo bula dəwje na: Jene gə odo kɛm lə-i m-e gə ngaɓa il mb-ɛ to njenokarə.

²⁸ Ngaa Jeju ila kəne na: Nje gə d-o tar lə Luba gə ngom le, ꞌto njenokarəje!

Ne kɔji mar-ɛ lə Jonas

²⁹ Bula dəwje ɗe ɗusu naa dɔ Jeju gə ɗaa, Jeju un kudu tar pa na: Gəl kuji gə nee gə to gəl kuji gə kṵra̰y ja baa aw dəji netɔji, d-a kar-ɛ netɔji gə ɗangə kara unda dɔ kar Jonas gə ang.

³⁰ Mba ɗəw kara baa to gə Jonas to netɔji ar dəw mə ɓeje gə Ninibə, ꞌma gə Ngon lə dəw kara, m-a to netɔji lə gəl kuji dəwje gə dɔ ndɔ gə lə-si nee tɔ.

³¹ Mbay jene gə go ɓe gə dɔ kɔl a kuba nangə kḭ ndɔ gangə tar gə naa gə gə dəwje gə gəl kuji gə nee ngaɓa a kila tar dɔ-je gə mba n-ḭ ko̰ nangə gə ja n-ɗe mba ko kəm karə lə mbay Salomo ngaa oje dəw gə to ɓəəl unda Salomo ja ar nee.

³² Ndɔ gangə tar nama, dəw mə ɓeje gə Ninibə d-a kuba nangə kḭ naa gə kara baa gə gəl kuji nee, ngaɓa tar a təl kuwa dɔ gəl kuji gə nee le, mba dəwje gə Ninibə ꞌturu kəji lə-je gə go tar lə Luba gə Jonas pa ar-je, ngaɓa oje, dəw gə nday Jonas ja ar nee.

Gusutar gə ɔji dɔ lambe

³³ Dəw a kunda pər lambe gə mba təl kun ne dəbə ne ang, ngaa d-a kunda dɔ ne gə taar mba kar dəwje tɔ̰y gə d-andə mə kəy gə d-o ne lo.

³⁴ Kəm-i to lambe lə darɔ-i. Logə kəm-i to gə maj-ɛ nama darɔ-i a nja dan lokarə gə tɔ, ngaa ɓo kəm-i ja tuji nam ɗaa darɔ-i tɔ̰y a kisi dan cil ciməri gə.

³⁵ O gə maj-ɛ. Unda kəm karə dɔ rɔ-i, may kar ndogo lə-i təl to cil ciməri ang.

³⁶ To gə ɓo darɔ-i to dan lokarə gə, lal kar dəbə rɔ-i to cil ciməri gə nama, darɔ-i a to lokarə gə tɔ̰y to gə ndogo lə lambe uru dɔ-i gə be.

Jeju ila tar dɔ Parijiyɛ̰je gə njekɔr gəl toronduje gə

³⁷ Logə Jeju pa tar ila nangə ɗaa, Parijiyɛ̰ kara ɓar-ɛ ar n-usa sə-a ne kəy lə-a. Jeju andə kəy, isi ta ka nekusa gə.

³⁸ Logə Parijiyɛ̰ o to gə Jeju togo ji-a ang baa ja usa ne ɗaa, lo tar igi-e sɛl.

³⁹ Ngaa Mbayɓe pa ar-ɛ na: Sisəy, Parijiyɛ̰je, ꞌtogoje gir ngo kay man gə gir ngo kusa ne ar-je arə ngadə, ngaa mə-sisəy ɗaa kəji bogo gə məndul ja ɗusu nji.

⁴⁰ Sisəy ɛbɛje! Luba gə ɗa gir ne le, ɗa mə ne ja tɔ!

⁴¹ May kar ar-je njendooje ne gə mə gə arə ngadə, ɗaa a karəje ngadə kəm Luba gə.

⁴² Nekəmandoo to kar-sisəy Parijiyɛ̰je! Ɔrəje ne ndu kara dan ne gə dɔg gə kɔr t-ɛ kara mə mbi kam uma gə, gə mbi kamje dang-dang. Ngaa oje neɗa gə gadə-gadə gə njigi lə Luba gə ne ang nəm tɔ. Ye ɓa to ne gə kəm kar-si ꞌɗaje lal kiya̰ kɛs-ɛ gə kɛm.

⁴³ Nekəmandoo to kar-sisəy, Parijiyɛ̰je! ꞌNjigi lokisi gə kede ja ɓa mba kisi kəne mə kəy nendo gə, kar d-unda ji-je go naa ɓa d-uwa ne ji-si ta nada.

⁴⁴ Nekəmandoo to kar-sisəy, mba ꞌtoje to gə dɔbarə gə dəw gərə ang ɗaa nja kəne.

⁴⁵ Njekɔr gəl torondu kara un tar pa na: Njenetɔji, tar gə ꞌpa nee le, ꞌtaji-si gə taji ɓa nee ang wa!

⁴⁶ Jeju ila kəne na: Nekəmandoo to kar-sisəy tɔ, njekɔr gəl toronduje, mba ꞌtɔje nekodo gə dəw asə kodo ang, undaje dɔ dəwje gə, ɗaa ngon ji-si gə njɛ̰ ja baa kara ɔrəje ne ang.

⁴⁷ Nekəmandoo to kar-sisəy! Mba undaje dɔbarə pajambərəje gə ka-sijee ꞌtila-je gə kɔr ər.

⁴⁸ Be ɓa, sisəy ja ꞌtoje njetar najije ngaɓa ꞌnjigije dɔ neje gə ka-sijee ꞌɗa, ꞌjeje gə ꞌto nje tɔl pajambərəje, ɗaa sisəy ngaa ꞌtoje njekunda dɔbarə-jeje!

⁴⁹ Gəl-e gə nee ɓa Luba pa gə kəm karə na: M-a kula pajambərəje gə njeka̰ykulaje kar-je, ɗaa d-a tɔl-je nje gə kɛm ngaɓa d-a kula kəm nje gə kɛm ndoo tɔ,

⁵⁰ mba kar d-a dəji məsə pajambərəje tɔ̰y gə um nangə ji gəl kuji gə ɓogəne, uma kud-e lo kunda gəl dɔ nangə.

⁵¹ Un kud-e dɔ məsə Abɛl gə ce ne dɔ məsə Jakari gə ꞌtɔl-ɛ horo no kɔgə gə mə kəy gə lə Luba; tɔgərɔ, m-pa m-ar-si, Luba a dəji məsə-je ji gəl kuji gə nee.

⁵² Nekəmandoo to kar-sisəy, njekɔr gəl toronduje mba udu-je ɗəw gərə Luba, ngaɓa sisəy ja kara ꞌgərə-je ang nəm, cibi ꞌɔgəje ɗəw nje gə ꞌnjigi gər-e.

⁵³ Logə Jeju ɔsə lo ce ɗaa, mə njekɔr gəl toronduje gə Parijiyɛ̰je ti ndoyḭ dɔ-ɛ gə, ngaɓa ꞌdəji-e tar bula.

⁵⁴ ꞌSangə ɗəw mba kinga tar t-ɛ gə ɓa gə mba kila ne tar dɔ-ɛ gə tɔ.