Lugu 10 - Mbede Lə Luba Kone Gə Sigi

Jeju ula ngan njenendoje dɔg siri gə gir-je gə joo

¹ Go-e gə ɗaa, Mbayɓe tɔr ngan njenendoje gə ɗangə dɔg siri gə gir-je gə joo, ula-je joo-joo kede mə ɓeje gə tɔ̰y gə loje tɔ̰y gə ꞌne ja n-a kaw kəne.

² N-pa n-ar-je na: Ko gə asə kunja le bo ya̰, ngaa njekunja-aje ꞌnjɛbərɛ baa. May kar-si ꞌdəjije Mbayɓe ar-ɛje ula njekunja koje mə ndɔɔ gə.

³ Awje, m-ula-si to gə ngan badəmje horo njagəmanjɛrje gə.

⁴ Umje lar ji ngira gə ang, unje ɓɔl kaw mba ang, ulaje sabɔgɔ ang ngaɓa arje nangə gə ɗəw ꞌɗa-je dəw m-o-i ɓa ang nəm tɔ.

⁵ Mə kəy gə ɗa-ɗa gə andəje kəne nama, dɔngɔr kede ɗaa, ꞌpaje na: May kar ɗɛgɛgɛ to mə kəy gə nee.

⁶ To gə ɓo dəw gə to ngira ɗɛgɛgɛ isi kəne nama, ɗɛgɛgɛ lə-si nay sə-a, a ɓo be ang nama, ɗɛgɛgɛ lə-si a təl ɗe kinga-si.

⁷ Kəy mba gə d-ar-si le ꞌtoje kəne, usaje ne gə ayje ne gə d-ar-si, mba njekula inga kuga lə-a. Awje gə ta kəy kəy ang.

⁸ Logə andəje mə ɓe gə, a ɓo d-a kuwa-si gə rɔ-je nama, usaje ne gə d-a kar-si.

⁹ Ajije njerɔko̰je gə ꞌga̰ kəne ngaɓa ꞌpaje ar-jeje na: Ɓeko̰ lə Luba ce dɔ si gə nam ngaa.

¹⁰ Ngaa logə andəje mə ɓe gə, a ɓo dəwje ꞌmbadə kuwa-si mba nama, awje nada ɗaa ꞌpaje na:

¹¹ J-unda kuru gə ɓe lə-si gə uwa gɔl sijee kod-kod j-um dɔ si gə. Ngaa, ꞌgərəje sɔm to gə ɓeko̰ lə Luba le ce dɔ si gə nam ngaa.

¹² M-pa m-ar-si: Dɔ ndɔ-ɛ gə əng le, tar gə d-a gangə dɔ ɓe gə nee le a kədərə ya̰ kunda kar ɓe gə Sɔdom.

¹³ Nekəmandoo to kar ꞌi ɓe gə Korajɛ̰! Nekəmandoo to kar ꞌi ɓe gə Bɛdəsayida! Mba nemisije gə ꞌɗa horo-si gə le, to gə ɓo neje nee le ꞌɗa mə gə ɓe gə Tir gə mə ɓe gə Sido̰ nama, ləw baa nee le, d-a turu kəji lə-je, kula kubu ndoo gə d-uji gə bḭ gum, gə rɔgə rɔ-je bu gə.

¹⁴ Gəl-e gə nee ɓa, ndɔ gangə tar le, tar gə d-a gangə dɔ-si gə le, a kədərə ya̰ kunda kar ɓe gə Tir gə ɓe gə Sido̰.

¹⁵ Cibi, ꞌi ɓe gə Kapɛrənom, se a kḭ taar gə bag-i wa? Bənəng ang baa, d-a kula-i nangə kar-i aw ɓe lə nje gə jabaw.

¹⁶ Jeju təl pa na: Dəw gə o tar lə-si nama, ꞌma ja nj-ɛ o tar ta-m gə əng; dəw gə mbadə si nama, ꞌma ja nj-ɛ mbadə-m, ngaɓa dəw gə mbadə-m nama, nj-ɛ mbadə dəw gə ula-m tɔ.

¹⁷ Ngan njenendoje gə dɔg siri ꞌtəl gə rɔləl d-inga Jeju ɗaa pa d-ar-ɛ na: Mbayɓe, njilje gə kṵra̰y ja kara d-ula dɔ-je d-ar-si gə ri-i.

¹⁸ Jeju pa ar-je na: Oje gə maj-ɛ ɓa! M-o ꞌSu ce pir to gə təl lə nji be dɔ-ɛ gə nangə əng.

¹⁹ Oje, m-ar-si singa mba kar ꞌnjaje dɔ lije je gə gə ḭje, ngaɓa a dumje singamongə lə njeba̰a̰, cibi ne kara kara a ɗa si ang.

²⁰ Be ja kara, ɗaje rɔləl mba njilje gə d-ula dɔ-je d-ar-si ang, ngaa ꞌɗaje rɔləl mba Luba ɗa ri-si mə mbede gə dara.

Rɔ Jeju ləl-e

²¹ Dɔ kar-ɛ gə əng le, Njil Njerɔsangə ar kogo ɗusu mə Jeju ɗaa, Jeju un tar pa na: M-pidi-i, Bɔy, Mbayɓe gə dɔ dara gə dɔ nangə nee, mba neje gə nee gə iya njekəm karəje gə njenegərəje, ngaa ꞌkila gəl-e ar nganje d-o. Oyo, Bɔy, mba ꞌnjigi kar neje to to gə be gə go mə njigi lə-i.

²² Bɔy ḭya̰ neje tɔ̰y ja mə ji-m gə, ngaɓa dəw kara gə gərə-m ꞌma gə Ngon ang, Bɔy ja ɓa, ngaɓa dəw kara gərə Bɔy godo, ɗaa ꞌma gə Ngon ja ɓa m-a kila gəl-e gə ɗaga kar dəw gər-e.

²³ Cibi, Jeju turu kəm-e gə dɔ ngan njenendoje gə, ɗaa pa ar-je gə kar-je baa na: Nokarə to kar-sisəy gə kəm-si o ne gə oje nee.

²⁴ Be ɓa, m-pa m-ar-si to gə pajambərəje bula gə mbayje bula ꞌnjigi mba ko ne gə oje nee gə kəm-je ngaa d-o ang baa, ꞌnjigi ko tar neje nee gə mbi-je ngaa oso mbi-je gə ang baa.

Gusutar gə ɔji dɔ dəw gə Samari gə to nje ko kəmtondoo

²⁵ Be ɓa, dəw kara horo njekɔr gəl toronduje gə ḭ taar pa tar mba na ne Jeju na: Njenetɔji, ɗi ɓa m-a ɗa mba kinga ne təbə gə gə ndɔ gə ndɔ wa?

²⁶ Jeju pa ar-ɛ na: Se tar ɗi ɓa ɗa mə torondu gə lə Moyiji wa? Se ɗi ɓa ꞌtura wa?

²⁷ Dəw le ila kəne na: ꞋI a njigi Mbayɓe, Luba lə-i gə mə tɔ̰y, gə kəm lə-i tɔ̰y, gə singa-i tɔ̰y, gə kəji lə-i tɔ̰y; ngaɓa a njigi njemar-i to gə ꞌnjigi ne darɔ-i be.

²⁸ Jeju pa ar-ɛ na: Ila kəne may boy. ꞌƊa ne gə kən ɗaa, a kinga təbə gə ndɔ gə ndɔ.

²⁹ Ngaa dəw le sangə kar kudu tar lə-a ar, ɗaa pa ar Jeju na: Se naa ɓa to njemar-m wa?

³⁰ Jeju təl un tar pa na: Jingaw kara ḭ Jerujalɛm aw dɔ-ɛ gə Jeriko. N-uru horo gayimje gə, ꞌta neje tɔ̰y ji-a gə, ngaɓa kunda-a asə kəm yo ɗaa d-ḭya̰-a, d-ɔdə.

³¹ Njekapolo kara un ɗəw gə nee ja tɔ, o-e ɗaa nday mbɔr kara.

³² Dəw gə gəl Lebi gə kara ɗe gə ɗəw gə nee le ja tɔ, logə o-e ɗaa n-nday taar dɔ ngɔdə gə.

³³ Ngaa dəw gə Samari kara gə aw gə mba gə ɗe gə ɗəw gə kara nee le ja tɔ, ce dɔ dəw gə nee le. N-o-ɛ ɗaa n-o kəmtondoo lə-a.

³⁴ N-ɔdə ɗe rɔ-ɛ gə, n-um ubu gə kodo n-togo ne kəm do lə-a ngaɓa n-tɔ gə ta kubu; cibi, n-un-e n-unda-a dɔ kororo gə lə-a, n-aw sə-a kəy kuwa mbaaje gə ngaɓa n-tɔsə kəm-e dɔ-ɛ gə.

³⁵ Lo arə gə ndɔɔ-sḭ ɗaa, dəw gə Samari le ce gə mbɛl kula joo ar njekəy kuwa mbaaje, ngaɓa pa ar-ɛ na: ꞌTɔsə kəm-i dɔ-ɛ gə gə maj-ɛ. Neje tɔ̰y gə ꞌi a ɗa dɔ mar-ɛ gə ɔji dɔ-ɛ le, logə m-a təl ɗe ɗaa m-a kuga-i.

³⁶ Ɗaa Jeju dəji njekɔr gəl torondu le na: Horo dəwje gə munda nee le se naa ɓa to njemar dəw gə oso ji gayimje gə le wa?

³⁷ Ngaa, n-ila kəne na: Dəw gə o kəmtondoo lə-a. Jeju pa ar-ɛ na: Aw, ɗaa ꞌi kara ɗa to gə bənəng tɔ.

Jeju aw ɓe lə Məri je gə Madə

³⁸ Jeju je gə ngan njenendoje d-aw ꞌnja ɗəw boo, n-andə mə ɓe gə, ɗaa jene kara ri-a na Madə uwa-a mba kəy lə-a.

³⁹ Ngon ko̰ Madə gə jene kara ri-a na Məri, isi mbɔr Jeju gə, tuga mbi-a o nee tar gə Jeju pa.

⁴⁰ Kula kuwa mba Jeju le al dɔ Madə, ɗaa ɔdə aw inga Jeju pa ar-ɛ na: Mbayɓe, Kula gə ngon ko̰-m ḭya̰-m kəne gə kar-m baa nee le, tar-ɛ jɔg-i ang wa? Ula-a ar-ɛ n-ɗe n-la sə-m.

⁴¹ Mbayɓe ila-a kəne na: Madə, Madə, ꞌno rɔ-i ngaɓa ꞌjɔgə rɔ-i dɔ neje gə ya̰.

⁴² Ngaa ne gə dəwje d-aw sangə le, Məri un dəbe gə may, gə dəw a ta ji-a gə ang.