Koula 9 - Mbede Lə Luba Kone Gə Sigi

Mbəl kəji lə Sɔl

¹ Dɔ ndɔ-ɛje gə nee le ɗaa kəji sangə ɗəw mba tɔl ngan njenendoje lə Mbayɓe uwa mə Sɔl ɓi. Be ɓa n-aw n-inga buba njekapolo,

² n-dəj-e mba kar ɗa mbede un ne ɗəw kar n-aw ne kəy nendo gə Damasə, mba kinga nje gə kɛm, jingawje gə jeneje, gə d-un ɗəw gə əng le, ɓo ꞌga̰ nama tuwa-je tɔ-je ɗe gə je Jerujalɛm.

³ Logə n-aw n-nja ɗəw boo be, gə nay əw ang mba kandə Damasə ɗaa ndogo ḭ dara bus baa ɗe uru dɔ-ɛ gə ɗaa gugu-e mbugu.

⁴ N-ce n-oso nangə ɗaa n-o ndu dəw pa ar-ɛ na: Sɔl, Sɔl, mba ɗi ɓa ula kəm-m ndoo wa?

⁵ Ɗaa n-pa na: Mbayɓe, ꞌi ꞌto na wa? Cibi Mbayɓe pa na: ꞌMa m-to Jeju gə ula kəm-m ndoo.

⁶ Ngaa ḭ taar ɓo andə mə ɓebo gə ɗaa d-a kula-i ne gə a ɗa.

⁷ Dəwje gə d-aw sə-a le ɓəəl unda-je gangə-je ar d-ar nangə ta-je munduru ngaɓa d-o ndu dəw gə pa tar le ngaa d-o darɔ-ɛ ang.

⁸ Be ɓa Sɔl uba nangə ḭ taar ɗaa kəm-e to tagəra ja ngaa o ne kara ang ɗaa d-uwa ji-a gə kuwa ɓa d-aw sə-a Damasə.

⁹ N-ɗa ndɔ munda lal ko lo ngaɓa n-usa ne ang nəm n-ay man ang nəm tɔ.

¹⁰ Ngon njenendo kara ri-a na Ananiyas ga̰ Damasə. Mbayɓe ce dɔ-ɛ gə ar-ɛ o ne lokiya gə na: Ananiyas, ɗaa n-njigi na: Mbayɓe, m-ar nee.

¹¹ Ɗaa Mbayɓe pa ar-ɛ na: Ḭ taar, aw ɗəw gə d-unda ri-a na to ndərəng, aw kəy lə Judas, ꞌdəji dəw kara ri-a na Sɔl gə Tarəsə.

¹² Mba n-aw n-dəji Luba ngaɓa n-o dəw kara mə ne gə n-o lokiya gə ri-a na Ananiyas andə kəy ngaɓa ila ji-a dɔ-ɛ gə mba kar n-təl n-o lo.

¹³ Ananiyas ila kəne na: Mbayɓe, dəw gə nee le m-o tar lə-a ta dəwje gə bula to gə n-ula kəm njerɔsangəje gə Jerujalɛm ndoo ya̰.

¹⁴ Ngaɓa buba njekapoloje d-un ndu d-ar-ɛ n-ɗe nee mba kar n-tuwa ne dəwje tɔ̰y gə ꞌɓar ri-i.

¹⁵ Ngaa Mbayɓe təl pa ar-ɛ na: Aw, mba dəw nee le ꞌma ja m-mbər-e gə neɗa kula lə-m, mba kar n-un ri-m n-aw ne no dəwje gə ꞌgərə Luba ang gə, gə no mbayje gə, ɓa no ngan Ijirayɛlje gə;

¹⁶ ɗaa m-a tɔj-ɛ ne ꞌməsərə gə ɗa-ɗa gə n-a ko mba ri-m.

¹⁷ Be ɓa Ananiyas ɔdə aw ngaɓa logə ce mə kəy gə le ɗaa ila ji-a dɔ Sɔl gə le ngaɓa pa na: Ngon ko̰-m Sɔl, ɗe lə-i le Mbayɓe Jeju ce dɔ-i gə dɔ ɗəw gə aw ɗe ne gə le, n-ula-m mba kar kəm-i təl o lo ngaɓa kar Njil Njerɔsangə ɗusu mə-i tɔ.

¹⁸ Dɔ kar-ɛ gə nee ja ne ce kəm-e gə to to gə nguway kənji be gə̰y nangə ɗaa n-təl n-o lo. Be ɓa n-ḭ taar ɗaa ꞌɗ-ɛ batɛm,

¹⁹ ngaɓa logə n-usa ne ɗaa n-təl n-inga singa gugu. Cibi n-ɗa ndɔ ɓəəl gə ngan njenendoje gə Damasə,

²⁰ ɗaa gə tɔg-ɛ baa ja n-aw n-pa tar lə Jeju mə kəy nendoje gə to gə Jeju nee le to ngon lə Luba.

²¹ Dəwje tɔ̰y gə d-o ndu-e le lo tar igi-je sɛl ar ꞌdəji rɔ-je tar na: ꞌNe ja ɓa n-ula kəm nje gə ɓar ri gə nee le ndoo Jerujalɛm gə ang wa? Ngaɓa n-ɗe nee mba tuwa-je tɔ-je kaw gə je no buba njekapoloje gə ang wa?

²² Ngaa Sɔl inga singa gə kede-kede m-e gə ngaɓa logə tɔji to gə Jeju to Kirisi ɗaa lo tar igi Jiibije gə ɗa ɓe Damasə le sɛl.

²³ Logə kur-e əw ya̰ go-e gə ɗaa, Jiibije d-um njuma mə naa gə mba tɔl-ɛ,

²⁴ ngaa Sɔl gərə kum njuma mə naa gə lə-je le. ꞌNgəmje ta kəyje cil gə mba tɔl-ɛ.

²⁵ Ngaa lo ndul ɗaa ngan njenendoje d-ila-a mə karɛ gə, ꞌtɔ kula kəne ꞌɗisi-e gə ɗəw gə dɔ ndogo bɔrɔ gə.

²⁶ Ndɔ gə Sɔl ɗe ce Jerujalɛm ɗaa sangə ɗəw mba koso go ngan njenendoje gə ngaa tɔ̰y ja ꞌɓəəl-e mba ꞌta kag-ɛ to gə n-to ngon njenendo ang.

²⁷ Be ɓa Barənabas ɔr no-ɛ aw sə-a ɓə lə njeka̰ykulaje ngaɓa ɔr gəl ne gə ce dɔ-ɛ gə ɗəw boo le ar-je to gə Sɔl le o Mbayɓe, inga-a pa sə-a tar ngaɓa pa gə n-pa ne tar wəsəng Damasə gə ri Jeju.

²⁸ Sɔl nja gə je naa gə Jerujalɛm gə yo gə nee ngaɓa pa tar wəsəng gə ri Mbayɓe.

²⁹ Jiibije gə nje pa tar Gərɛgəje kara n-ma̰y gə je tar nəm ngaa ꞌjejee nee ꞌsangə ɗəw mba kar ꞌtɔl-ɛ.

³⁰ Logə ngan ko̰ naaje d-o tar-ɛ ɗaa d-ɔr-ɛ d-aw sə-a Sejare ngaɓa d-ar-ɛ n-aw Tarəsə.

Ene aji, Tabita uy ɓa ndol

³¹ Mbo̰ naa lə njetakagəje gə Jude tɔ̰y, gə Galile gə Samari le dɔ-ɛ to ləl pɛ, inga singa, gə n-nja dan ɓəəl Mbayɓe gə ngaɓa uji mar-ɛ gə kede-kede ɗəw gə lə Njil Njerɔsangə.

³² Piyɛr nja gə dɔɓe dɔɓe ngaɓa aw ɓə lə njerɔsangəje gə d-isi Lida.

³³ N-inga dəw kara ri-a na Ene kəne dəbə rɔ-ɛ uy ar to tuwa gə kur-e əw ɓal ji nay joo.

³⁴ Piyɛr pa ar-ɛ na: Ene, Jeju Kirisi aji-i, ḭ tar ɓo ꞌi ja ꞌkə ndag lə-i, ɗaa n-uba nangə warang n-ḭ tɔ.

³⁵ Logə nje gə d-isi Lida tɔ̰y gə nje gə mə mbo gə Saro̰ d-o-e ɗaa ꞌmbəl kəji lə-je d-ar Mbayɓe.

³⁶ Ngon njenendo gə jene kara ri-a na Tabita, gə ꞌɓar-ɛ Dɔrəkas gə tar gərɛk isi mə ɓe gə Jope. Jene nee le, ɗa neɗa gə may ya̰ ngaɓa ar njenekɔyje ne nəm.

³⁷ Ndɔ kara rɔ-ɛ to-e ɗaa n-uy. Logə ꞌndogo-e man yo ɗaa d-un nin-e d-unda mə kəy gə to dɔ mar-ɛ gə taar.

³⁸ Ngan njenendoje d-o tar lə Piyɛr gə ga̰ mə ɓe gə Lida ɗaa d-ula dəwje joo d-ar d-aw ꞌɓar-ɛ mba Lida le to əw ang gə ɓe gə Jope. Dəwje gə d-aw le ꞌpa d-ar Piyɛr na: Ḭ gə tɔg-ɛ aw gə si.

³⁹ Piyɛr uba nangə ḭ aw gə je ja tɔ. Logə ꞌce ɗaa d-aw gə Piyɛr mə kəy gə taar gə le. Jene ndubaje tɔ̰y ja ꞌɗe gə rɔ-ɛ gə gə man no kəm-je gə ngaɓa ꞌtɔj-ɛ ne kubuje gə Dɔrəkas uji ar-je.

⁴⁰ Be ɓa Piyɛr ar dəwje tɔ̰y ꞌce ɗaga ngaɓa um kəj-e nangə dəji Luba, cibi turu kəm-e gə dɔ nin Tabita gə le ɗaa pa na: Ḭ taar. Dɔ kar-ɛ gə nee ja Tabita cɛ̰ kəm-e o ne Piyɛr ɗaa ḭ isi taar.

⁴¹ Go-e gə ɗaa Piyɛr uwa ji-a ar-ɛ n-uba nangə n-ḭ taar. Be ɓa n-ɓar njerɔsangəje gə jene ndubaje je n-ula-a ji-je gə kəm baa.

⁴² Ne gə nee le dəwje gə Jope tɔ̰y ꞌgərə ngaɓa dəwje bula ꞌta kagə Mbayɓe.

⁴³ Piyɛr ɗa ndɔ ɓəl mə ɓe gə Jope mə kəy gə lə Simo gə njekunda ndaar.