Koula 8 - Mbede Lə Luba Kone Gə Sigi

¹ Be ɓa Sɔl njigi gə je go ꞌtɔl gə tɔl Etiyɛn le. Dɔ ndɔ-ɛ gə əng le nekəmandoo gə boy ja oso dɔ Mbo̰ naa lə njetakagəje gə d-isi Jerujalɛm ɗaa njeka̰ykulaje ja gə kar-je baa ꞌnay ngaa ꞌjejee tɔ̰y ja ꞌja̰rɛ̰ naa dɔ nangə gə Jude gə Samari.

² Dəwje gə d-ila kuji dɔ ne gə lə Luba ꞌdubu yo Etiyɛn ngaɓa ꞌtəl d-uwa ndoo tor-e gə to ɓəəl ya̰ be.

³ Ngaa Sɔl ɗaa sangə ɗəw mba tuji Mbo̰ naa lə njetakagəje, n-aw gə ta kəy kəy, n-tuwa jingawje gə jeneje n-aw n-um-je kəy kula gə.

⁴ Nje gə ꞌja̰rɛ̰ naa le d-aw gə lo-lo d-ila mbərə Tar gə May.

MBO̰ NAA LƏ NJETAKAGƏ GƏ JUDE, SAMARI GƏ SIRI Diyakərə Pilibi aw Samari, tar lə Simo gə njembɛ̰

⁵ Pilibi aw mə ɓebo gə Samari kara be ila mbərə Tar gə May lə Kirisi.

⁶ Bula bo dəwje d-um mə-je naa gə kara baa njigi go tar gə Pilibi pa le, ngaɓa d-o nemisije gə n-ɗa gə mbi-je gə kəm-je.

⁷ Mba dəwje bula gə njilje gə kṵra̰y ɗa ɓe mə-je, njilje nee le ꞌce gə ꞌkuwi gə boy ta-je gə nəm ngaɓa dəwje bula gə dəbə rɔ-je uy gə nje nja məndəje kara d-aji nəm tɔ.

⁸ Be ɓa rɔləl gə boy ja to mə ɓebo gə nee le.

⁹ Dəw kara ri-a na Simo, ga̰ mə ɓebo gə nee le kede nam, n-ɗa mbɛ̰ n-ar lo tar igi ne dəw mə ɓeje gə Samari sɛl, n-pa na n-to dəw gə to ɓəəl ya̰.

¹⁰ Tɔ̰y ja, un kud-e dɔ nje gə na gə ce ne dɔ nje gə tɔgə gə ja d-um mə-je dɔ tar gə lə-a ɗaa ꞌpa na: ꞌNe ja n-to singamongə lə Luba, ye gə ꞌɓar-ɛ singamongə gə boy.

¹¹ D-um mə-je dɔ tar gə lə-a mba ləw baa ja lo tar igi-je sɛl dɔ neɗa mbɛ̰je gə lə-a.

¹² Ngaa logə ꞌtaje kagə Pilibi gə ila mbərə Tar gə May gə ɔji dɔ ɓeko̰ lə Luba gə ri Jeju Kirisi ar-je ɗaa, jingawje gə jeneje d-ar ꞌɗa-je batɛm.

¹³ Simo le ja kara ta kagə tɔ, go batɛm gə ꞌɗ-ɛ ɗaa n-ciya̰ go Pilibi gə, ngaɓa n-unda kəm-e n-o netɔjije gə nemisije gə boy-boy gə aw ce ɗaa lo tar igi-e sɛl.

¹⁴ Logə njeka̰ykulaje gə d-isi Jerujalɛm d-o tar lə dəwje gə Samari gə ꞌta tar lə Luba ɗaa d-ula Piyɛr je gə Ja̰ ɓə lə-je.

¹⁵ ꞌJeeje nee le, d-aw ɓə lə-je, ꞌdəji Luba mba je kar d-inga ne Njil Njerɔsangə.

¹⁶ Mba n-ɗe dɔ dəw gə kara horo-je gə ang ɓi, ꞌɗa-je batɛm gə ri Mbayɓe Jeju baa ɓi.

¹⁷ Be ɓa Piyɛr je gə Ja̰ d-ila ji-je dɔ-je gə ɗaa Njil Njerɔsangə ɗe dɔ-je gə.

¹⁸ Logə Simo o to gə gə go kila ji dɔ gə lə njeka̰ykulaje ɓa d-ar ne Njil ɗaa, ɗe gə lar ar-je ngaɓa pa na:

¹⁹ Ar-mje singa gə nee le tɔ mba kar dəw gə m-a kila ji-m dɔ-ɛ gə nama inga ne Njil Njerɔsangə.

²⁰ Ngaa Piyɛr pa ar-ɛ na: May kar-i ꞌdugulu gə lar lə-i naa gə, mba əji mba ndogo nekarə baa lə Luba gə lar.

²¹ ꞌI le, dəbə ne lə-i godo nəm ɓa ne kara kara ɔji dɔ-i mə kula gə nee ang mba mə-i to gadə-gadə no Luba gə ang.

²² ꞌTuru kəji lə-i dɔ kəji gə kṵra̰y gə to mə-i gə ɓo ꞌdəji Mbayɓe mba kar ɗəw to nama ɔr tar ne gə ꞌgɔl mə-i gə le dɔ-i gə.

²³ Mba m-o to gə məkadə gə ɓo neje oso ur-i ngaɓa neɗa gə dɔ buguru uba-i gə kula.

²⁴ Simo təl ila kəne na: Sisəy ja ꞌdəjije Mbayɓe mba-m mba kar neje gə ꞌpaje nee le ce dɔ-m gə ang.

²⁵ ꞌPa tar naji gə d-ila mbərə tar lə Mbayɓe d-ar dəwje bula mə ngan ɓeje gə Samari nam ɓa ꞌtəl d-aw Jerujalɛm ɓi.

Diyakərə Pilibi je gə ꞌmbakudu gə Etiyopi

²⁶ Anji lə Mbayɓe kara pa tar ar Pilibi na: Uba nangə ḭ ɓo aw dɔ-i gə dɔ ji kɔl, ɗəw gə ḭ Jerujalɛm aw gə gə Gaja, gə dəw godo kəne. N-ḭ n-aw

²⁷ Ɗaa n-inga ngon njeɓe gə Etiyopi kara to ꞌmbakudu, gə to ngon njekula gə boy, lə Kandas mbay jene gə Etiyopi. N-to njengom nekingaje lə mbay le, ɗaa n-ɗe Jerujalɛm mba polo Luba,

²⁸ ngaɓa n-ḭ kəne n-aw n-təl gugu ɗaa n-isi mə pusu kunda gə lə-a n-aw n-tura mbede lə pajambərə Ejay.

²⁹ Njil pa ar Pilibi na: Aw gə kede mbɔr pusu kunda gə kən.

³⁰ Logə Pilibi a̰y aw ɗaa o ndu dəw gə Etiyopi le aw tura mbede lə pajambərə Ejay. Ɗaa n-dəj-e na: ꞌGərə mə mbede gə aw tura nee ja wa?

³¹ Dəw le ila kəne na: Dəw ɔr m-e ar-m ang ngaa m-a kasə gərə to gə ban wa? Be ɓa n-ɓar Pilibi n-ar-ɛ al isi sə-a mə pusu kunda gə le.

³² Tar gə mə mbede gə n-tura le ɓa nee: D-aw sə-a to to gə badəm gə d-aw sə-a gə lo tɔl daje gə be; Ngaɓa to to gə ngon badəm gə ar t-ɛ munduru no njekunja bḭ-e gə be, N-pa tar ang.

³³ N-ula dɔ-ɛ ngulum ja ngaa ꞌgangə tar lə-a gə dɔ gɔl-ɛ ang, Na ɓa a pa tar gə ɔji dɔ gəl kuji lə-a wa? Mba ꞌtuji təbə lə-a dɔ nangə nee gə gugu.

³⁴ Be ɓa ꞌmbakudu le un tar pa ar Pilibi na: M-ɗa-i kɔgərɔ, tar gə pajambərə pa nee le ɔji dɔ na wa? N-pa ɔji dɔ darɔ-ɛ ꞌne ja ose ɔji dɔ dəw gə ɗangə wa?

³⁵ Be ɓa Pilibi un tar pa, un ne kud-e dɔ lo tura-a gə nee le, ila ne mbərə Tar gə May lə Jeju ar-ɛ.

³⁶ Logə d-aw dɔ-je gə kede ɗaa ꞌce ta man dangə gə ɗaa ꞌmbakudu le na: Man a to nee ngaa ɗi ɓa a kɔgə-m kar-i ꞌɗa-m batɛm wa?

³⁷ Pilibi pa na: To gə ɓo ꞌta kagə gə dɔ ɓəngər-i tɔ̰y tɔgərɔ nama ɗəw to ja. ꞌMbakudu le ila kəne na: M-ta kagə to gə Jeju Kirisi to gə ngon lə Luba ja.

³⁸ N-un ɗəw n-ar njekuwa ta pusu kunda lə-a ar nangə ngaɓa ꞌJejee joo kɛm d-uru mə man gə, Pilibi nəm ɓa ꞌmbakudu le nəm ɗaa n-ɗ-ɛ batɛm.

³⁹ Logə d-osə lo man ꞌce ɗaga ɗaa Njil Mbayɓe ɔr Pilibi ɔdə sə-a ar ꞌmbakudu o-e ang magə ngaa ɔdə un ɗəw lə-a gə rɔləl dɔ-ɛ gə kede.

⁴⁰ Ngaa Pilibi ɗaa, aw ce Ajod, cibi ngaɓa ila mbərə Tar gə May le gə mə ɓeboje tɔ̰y gə n-nday kəne saar ce ne Sejare.