Koula 7 - Mbede Lə Luba Kone Gə Sigi

Tarje gə Etiyɛn pa

¹ Buba njekapolo pa na: To gə be ja wa?

² Etiyɛn ila kəne na: Sisəy ngan ko̰-mje gə bɔ-sijee, oje tar gə nee! Logə ka sijee Abəraham isi ne dɔ nangə gə Mejopotami nam ɓa kar-ɛ aw ɗa ɓe Hara̰ le, Luba gə njerɔnduba kila rɔ-ɛ ar Abəraham,

³ cibi n-pa n-ar-ɛ na: Ɔdə dɔ nangə gə lə-i gə horo njenujije gə lə-i ɓo aw mə ɓe gə m-a tɔji.

⁴ Be ɓa n-ɔdə dɔ nangə gə lə nje gə Kaləde n-aw n-ɗa ɓe gə Hara̰. Lo-e gə nee le ɓa logə bɔb-ɛje uy ɗaa Luba un ɗəw ar-ɛ n-ɗe mə ɓe gə isije kəne ɓisine nee le.

⁵ Dɔ kar-ɛ gə nee le Luba ar-ɛ nenduba kəne kara ang nəm dəbə lo ja njɛ̰ ang nəm tɔ. Ngaa Luba uwa dɔ gɔl ɓe gə mba kar-ɛ ngaɓa mba kar gəl kuji lə-a tor-e gə nəm, ngaa n-uji ngon ang.

⁶ Luba pa to gə be na: Gəl kuji lə-i a kaw ɗa ɓe gə ɗangə, d-a kuwa ɓərə gə ngaɓa d-a kula kəm-e ndoo ɓal tɔl-tɔl sɔɔ.

⁷ Ngaa Luba pa na: ꞌMa ja m-a gangə tar dɔ ɓe gə njekuwa-je ɓərə gə le, go-e gə ɗaa d-a ce-je ɓe ɓərə gə le mba ɗe polo-m lo gə nee gə.

⁸ Cibi Luba riya sə-a kone ɗəw kunja bərə gə, be ɓa logə d-uji Ijagə ɗa ndɔ ji nay joo ɗaa Abəraham unja bər-e, Ijagə kara unja bərə Jakobo ngaɓa Jakobo kara unja bərə ngan-ɛ gə dɔg gə gir-je gə joo, gə to ka-sijee le.

⁹ Ka-sijee le ꞌɗa mə gə Jəjəb, d-uwa ndog-e d-ar d-aw sə-a mə ɓe gə Ejipətə. Ngaa Luba nay sə-a.

¹⁰ Ɗaa ɔr-ɛ dan neməko̰je gə tɔ̰y, ɗaa ar-ɛ mənuji gə kəm karə ar-ɛ n-ta kəm Parawo̰ gə to mbay gə Ejipətə, ar Parawo̰ unda dɔ ɓeko̰ gə Ejipətə gə dɔ kəy gə lə-a tɔ̰y.

¹¹ Ɓo bo oso mə ɓeko̰ gə Ejipətə ja tɔ̰y ngaɓa dɔ nangə gə Kana tɔ. Ne ur ti gə boy oso ngaɓa ka ka-sijee d-inga ne gə d-a kusa ang.

¹² Be ɓa Jakobo o tar nekusa gə to Ejipətə ɗaa ula ka-sijee gə dɔngɔr-ɛ kar d-aw ndogo.

¹³ Logə ꞌtəl d-aw gɔl joo lə-a ɗaa Jəjəb tɔji rɔ-ɛ ar ngan ko̰-ɛje ꞌgərə ngaɓa mbay Parawo̰ gərə ne gəl Jəjəb.

¹⁴ Be ɓa Jəjəb ula ɗe gə bɔ-ɛje Jakobo gə njeməkəyje lə-a tɔ̰y gə kɔr-je to dɔg gə siri gir-je gə mi.

¹⁵ Jakobo aw Ejipətə ɗaa uy kəne ngaɓa ka ka-sijee kara d-uy nəm tɔ.

¹⁶ D-odo nin-je d-aw ne d-aw dubu Sisɛm, lo gə Abəraham ndogo gə lar ji ngan lə Amɔr, gə to bɔ Sisɛm-je.

¹⁷ Mba dɔ kar ne gə Luba uwa dɔ gɔl-ɛ gə naji ar Abəraham le aw asə ɗaa nje gə d-isi Ejipətə le kɔr-je to ɓəəl ngaɓa d-ɔsə dɔ mar-ɛ gə kede-kede,

¹⁸ saar kar mbay gə ɗangə gə gərə Jəjəb ang ɗe o̰ ne ɓe gə Ejipətə.

¹⁹ Mbay nee le unda buguru ɗa ne gəl kuji-si məyɛr cibi ɓa n-uwa ka ka-sijee gə singa mba kar ꞌmbadə nganje d-ar d-uy.

²⁰ Dɔ ndɔ-ɛ gə le ja d-uji Moyiji, gə May ngaw kəm Luba gə. D-od-e nay munda mə kəy gə lə bɔ-ɛje.

²¹ Ngaɓa logə ko̰-ɛje uba ḭya̰ gə go ji-a ngaa ngon lə Parawo̰ gə jene aw un-e ɗaa od-e gə ngon-e.

²² ꞌSiri Moyiji ɗəw kəm karə lə dəwje gə Ejipətə ja tɔ̰y, n-pa tar gə n-ɗa kula gə singa nəm.

²³ Logə ɓal-ɛ udu dɔg sɔɔ ja bugum ɗaa kəji nja ko ngan ko̰-ɛ gə to ngan Ijirayɛlje le uwa m-e.

²⁴ N-a lo n-o mar-ɛ kara gə d-aw ꞌɗ-ɛ məyɛr ɗaa n-ɗe n-ta dɔ-ɛ ngaɓa n-uwa dəw Ejipətə le n-unda n-ndal ne ba̰a̰ lə ye gə ɗ-ɛ məyɛr le.

²⁵ N-əji to gə Luba a kar ngan ko̰-ɛ kaji ɗəw gə lə ꞌne ngaa gərə ɓa ꞌgərə-je ang.

²⁶ Ndɔ gə ɗangə cibi dəwje joo horo nje gə kɛm gə d-aw kunda naa ɗaa n-sangə mba gɔl-je kar ɗɛgɛgɛ to horo-je gə ngaɓa təl n-pa na: Sisəy, ꞌtoje ngan ko̰ naa ngaa mba ɗi ɓa ꞌɗa-je naa məyɛr wa?

²⁷ Ngaa dəw gə nje ɗa njemar-ɛ məyɛr le təl ɔs-ɛ gə tar na: Na ɓa unda-i mbay gə nje gangə tar dɔ si gə wa?

²⁸ Njigi mba tɔl-m to gə ꞌtɔl ne dəw gə Ejipətə tagəne be tɔ wa?

²⁹ Gə go tar gə nee le Moyiji a̰y ne ngaɓa aw isi ne ɓe mba gə Madiya̰, gə uji nganje gə jingaw joo kəne.

³⁰ Ɓal dɔg sɔɔ nday go-e gə ɗaa anji kara ce dɔ-ɛ gə mə ndag lo gə dɔ ər gə Sinayi, mə pər gə o̰ mə ko bul gə.

³¹ Logə Moyiji o ɗaa lo tar ig-e sɛl ɗaa ɗəm gə kede mba tən ko ngaa ndu Mbayɓe ce mə pər gə nee le ar-ɛ n-o na:

³² To ꞌma Luba lə ka-sijee, Luba lə Abəraham, Luba lə Ijagə, gə Luba lə Jakobo. Moyiji isa ɗɛgə-ɗɛgə ɗaa asə mba tən ko ang.

³³ Mbayɓe pa ar-ɛ na: ꞌTɔr sabɔgɔ lə-i gɔl-i gə mba lo gə ar kəne nee le to dɔ nangə gə to gə losang-ɛ.

³⁴ M-o nekəmandoo gə ɗa dəwje nəm mə ɓe gə Ejipətə le gə maj-ɛ ja. M-o ndu suum lə-je ɗaa m-ɗisi mba ta-je. Ɗaa ɓisine ꞌɗe ar-m m-ula-i ɓe gə Ejipətə.

³⁵ Moyiji gə nee le ja ɓa ꞌmbad-ɛje ꞌpa-je ne tar na: Na ɓa unda-i mbay gə nje gangə tar dɔ-si gə wa? ꞌNe ja Luba ula gə mbay gə njekɔr-je kila-je tar ɗəw gə lə anji gə ce bus mə ko bul gə.

³⁶ ꞌNe ja n-ɗa neje dang-dang gə kəm dəw o ndɔ kara ang gə netɔjije ɓa n-ar ꞌce ne Ejipətə, gə nday ne mə babo kadə gə kasə gə, gə mə ndag lo gə ɓal dɔg sɔɔ.

³⁷ Moyiji gə nee le ja pa ar ngan Ijirayɛlje na: Luba a kɔr pajambərə gə to gə ꞌma be kara horo ngan ko̰-si gə.

³⁸ Logə ꞌmbo̰ naa mə ndag lo gə le, ꞌne nee ja anji pa sə-a tar dɔ ər gə Sinayi, ngaɓa gə ka ka-sijee, ꞌne gə n-ta tarje uji dɔ təbə n-ar-si.

³⁹ Ka ka-sijee njigi kila kuji dɔ-ɛ gə ang ngaa d-ɔs-ɛ ngərəng ɗaa mə-je təl to gə Ejipətə,

⁴⁰ ɗaa ꞌpa-je d-ar Aro̰ na: ꞌɗa magəje gə d-a nja no-si gə, mba Moyiji gə nee gə nje kar j-a ce dɔ nangə gə Ejipətə le j-a gərə ne gə ce dɔ-ɛ gə ang.

⁴¹ Ɗaa dɔ kar-ɛ gə əng le d-uba-je ngon mangə ngaɓa d-un-je nepolo d-ar-je magəje le cibi ꞌtəl-je ꞌɗa-je rɔləl no ne gə sijee ja ꞌɗa gə ji-je le.

⁴² Be ɓa Luba turu gir-e ar-je ngaɓa uba-je ḭya̰-je ar-je ꞌpolo nekundaje gə ndogo mə dara gə to to gə pajambərəje pa ne mə mbede na: Ngan Ijirayɛlje, logə nja-je ɓal dɔg sɔɔ mə ndag lo gə le Unjaje ne məsə ose unje nepolo gə ɗangə ar-mje wa?

⁴³ Odo-je kəy lo lə magə gə ꞌɓar-ɛ Molok Ngaɓa ndɛ̰ndərɛ̰ndɛ̰ gə ndogo mə dara gə lə magə gə ꞌɓar-ɛ Roməpa. To neje gə ꞌɗa-je mba ꞌpolo-je Gəl-e gə nee ɓa ꞌma kara m-a kuwa-si ngon njekula kaw gə si əw nday ne Babilon ja tɔ.

⁴⁴ Ka-sijee le kəy lo tar naji ɓa to kar-jeje mə ndag lo gə. To gə dəw gə nje pa tar gə Moyiji pa le ɗaa Moyiji kara ɗa gə go nekɔji mar-ɛ gə o le ja tɔ.

⁴⁵ Logə je ka-sijee ꞌta ɗaa d-ar Josuye ɔr ne no-je aw ne gə je mə ɓe gə ꞌta ji gəl kujije gə Luba tɔbə-je no-je gə, nay gə kəne əng saar ce ne dɔ ndɔje gə lə Dabidi,

⁴⁶ gə inga mənuji lə Luba, dəji mba kar gəl kuji Jakobo inga lo ula dɔ-ɛ kəne.

⁴⁷ Ngaa Salomo ɓa ɗa kəy kara ar-ɛ.

⁴⁸ Be ja kara Nje kisi sam dara gə le a kisi mə kəy gə dəw ɗa gə ji-a ang, to to gə pajambərə pa nena:

⁴⁹ Dara to ngəndəng mbay lə-m, Ngaɓa nangə to lo kum gɔl-m Kəy gə ban ɓa a kundaje kar-mje wa? Mbayɓe pa be. Ose lo gə ɗa ɓa a to lo kuwa kɔr lə-m wa?

⁵⁰ Se ji-m ꞌma ja ɓa ɗa neje nee tɔ̰y ang wa?

⁵¹ Etiyɛn təl pa ar nje gə no ngɔ gangə tar le na: ꞌtoje dəwje gə nje dɔ ngangəje, mə-si kədərə nəm ɓa mbi-si kara uduje jigi dɔ tar gə lə Luba. Ngaɓa ilaje karəw gə Njil Njerɔsangə ja jaga-jaga to to gə ka ka-sijee le ja ɓi.

⁵² Pajambərə lə Luba gə ɗa ɓa ka-sijee d-ula kəm-e ndoo ang wa? ꞌTɔlje nje gə d-ila mbərə ɗe lə dəw gə gadə-gadə kede nam ngaɓa sisəy gə ɓogəne ilaje tar dɔ-ɛ gə ɓa ar-je ꞌtɔl-ɛ le.

⁵³ Luba ar-si torondu ɗəw gə lə anji ngaa ilaje kuji kəne ang.

ꞌTila Etiyɛn ꞌtɔl-ɛ

⁵⁴ Logə d-o tar gə Etiyɛn pa le ɗaa mə-je o̰-je ar d-usa ngangə-je mɔr-mɔr dɔ-ɛ gə.

⁵⁵ Ngaa Njil Njerɔsangə ɗusu mə Etiyɛn ɗaa un kəm-e a lo gə dara, o rɔnduba lə Luba cibi o Jeju ar taar dɔ ji kɔl Luba gə.

⁵⁶ N-təl pa na: O-je, m-o kəm dara cɛ̰ ɗaa m-a lo m-o, Ngon lə dəw ar taar dɔ ji kɔl Luba gə.

⁵⁷ Dəwje tɔ̰y gə d-o tar gə nee le d-udu mbi-je jigi ngaɓa d-uru ꞌkuwi gə singa-je cibi ɓa d-ɔdə ꞌɓugu naa dɔ-ɛ gə tɔ̰y,

⁵⁸ d-ɔs-ɛ d-ila gir ɓe gə ɗaga ngaɓa ꞌtila-a gə kɔr ər. Njetar naj-ɛje le ꞌtɔr kubuje lə-je d-um ngira gɔl ngon basa̰ kara gə ri-a na Sɔl.

⁵⁹ Logə d-aw ɗɔ Etiyɛn gə kɔr ər ɗaa, dəji Luba na: Mbayɓe Jeju ꞌta njil-im.

⁶⁰ Cibi, n-um məkəji ngaɓa n-uru ꞌkuwi gə ndu-a gə boy ɓolong na: Mbayɓe, ila tar neɗa gə kṵra̰y nee le dɔ-je gə ang. Logə n-pa to gə be ɗaa n-uy tɔ.