Koula 28 - Mbede Lə Luba Kone Gə Sigi

Pɔl ar Malətə

¹ Logə j-a ce ɗaga gə rɔ-si gə ta-si təb ɗaa ꞌpa d-ar-si na lo gə nee le to ngon gore gə ꞌɓar-ɛ Malətə.

² Nje gə pa ndo̰ tar gərɛk ang, d-uwa-si mbaa gə gar-ɛ godo, mba nji ər le ɗaa ꞌɗa pər gə boy ja d-ar j-isi t-ɛ gə mba kul o̰.

³ Pɔl aw odo takir ɗe um pədə, logə takir le ta pər ɗaa kondɔtɔl ce kəne kə ji-a gə.

⁴ Logə njeɓeje d-o li le ji-a gə ɗaa ꞌpa tar horo naa gə na: Dəw nee ɗaa tɔgərɔ ja to nje tɔl dəwje, mba n-ce ta yo gə mə babo kadə gə njororo nee ja ngaa tuji ore go-e ndəng gə no.

⁵ Ngaa Pɔl bil li le ila pədə ngaɓa njɛ̰ ja kara to-e ang.

⁶ Dəwje nee le d-ar ngina mba ko ji-a gə a ci ose koso gə n-a koso wadə kuy ngaa logə kur-e əw ɗaa ne kara kara ɗ-ɛ ang ngaɓa ꞌtəl turu kəji lə-je ꞌpa na dəw nee ɗaa to magə.

⁷ Lo lə dɔngɔr buba ɓe gə dɔ ngon gore gə nee, ri-a na Pubiliyus, to mbɔr-si gə baa ɗaa n-uwa si mba kəne gə məkura ndɔ munda.

⁸ Rɔ bɔ Pubiliyus-je to-e, n-njɛgə məsə ngaɓa rɔ-ɛ ta pər baa lam-lam ngaa Pɔl andə dɔ-ɛ gə, dəji Luba, ila ji-a dɔ-ɛ gə ɗaa aji-ɛ.

⁹ Be ɓa njerɔko̰je gə kɛm gə dɔ ngon gore gə nee le ꞌɗe ɗaa d-aji ja tɔ.

¹⁰ D-ila kuji dɔ-si gə gə maj-ɛ ja ngaɓa kaw lə-si kara d-ar-si neje gə j-aw ndoo-e nəm.

Pɔl ce Rɔm

¹¹ Nay munda go-e gə ɓa j-aw gə to gə Alɛgəjandəri gə nay kul nday dɔ-ɛ gə dɔ ngon gore gə le. To le d-unja ndəji magəje gə ri-a na Diyosəkur kar-ɛ gə.

¹² Logə j-a ce Sirakus ɗaa j-a ɗa ndɔ munda kəne.

¹³ J-ḭ kəne j-uwa mbo kar mbo j-a ce Rejiyo, lo kar-ɛ ɗaa ləl ḭ dɔ kɔl ula ar j-a ɗa ndɔ joo ɓa j-a ce Pusol,

¹⁴ mə ɓebo gə nee le j-inga ngan ko̰ naaje kəne ɗaa ꞌdəji si kar j-isi gə je ndɔ siri ɓa. Be ngaɓa j-aw ne gə Rɔm.

¹⁵ Logə ngan ko̰ naaje d-o no-si ɗaa d-aw saar d-inga-si mə ɓe gə ꞌɓar-ɛ nadə ne ndogo lə Apiyus ngaɓa ɓe gə ꞌɓar-ɛ Kəy to mbaaje gə Munda. Logə Pɔl oje ɗaa ɗa Luba oyo ngaɓa uba singa nəm.

¹⁶ Logə j-a ce Rɔm ɗaa d-ḭya̰ Pɔl d-ar uwa kəy to-e dang ngaɓa gə njeɗɔ gə to nje ka dɔ-ɛ tɔ.

¹⁷ Ndɔ munda nday ɗaa Pɔl ɓar buba ɓeje lə Jiibije ngaɓa logə ꞌmbo̰ naa ɗaa n-pa tarje gə nee n-ar-je na: Ngan ko̰ naaje, m-ɗa ne kara gə kṵra̰y gə dəw mə ɓeje ang nəm, ɔji dɔ nejiɓe lə bɔ-sijee-je ang nəm ja d-uwa-m d-ila-m kəy kula gə Jerujalɛm ngaɓa d-ila mə ji nje gə Rɔm gə.

¹⁸ Logə ꞌjejee nee ꞌdəji-m go tarje le ɗaa ꞌnjigi mba kḭya̰-m mba m-ɗa ne kara gə asə kar ꞌgangə ne tar yo dɔ-m gə ang.

¹⁹ Ngaa Jiibije ila-je kagə ngaɓa ꞌɗa d-ar-m m-dəji ɗe no Sejar gə lal kar m-aw gə kəji kila tar dɔ gəl kuji-m gə.

²⁰ Gəl-e gə nee ɓa m-dəji ne ɗəw gə mba ko ne si ngaɓa gə mba pa kar-si to gə ɔji dɔ nekunda mə lə Ijirayɛl ɓa ɓogəne d-uwa-m ne gə kula lar.

²¹ Be ɓa ꞌtəl d-ila-a kəne na: J-inga mbede kara gə ḭ dɔ nangə gə Jude ɗe pa tar gə ɔji dɔ-i ang ngaɓa dəw kara horo ngan ko̰-si gə gə un tar lə-i ɗe ne ose pa tar gə kṵra̰y dɔ-ɛ gə ang baa.

²² Ngaa j-a njigi ko tar gə ɔji dɔ kəji lə-i, mba j-a gərə to gə mbo̰ naa lə njekunda rɔ-je gangə-je gə nee le d-ila kagə no-ɛ gə gə lo tɔ̰y ja.

²³ Go-e gə ɗaa d-ila ndɔ d-ar-ɛ ngaɓa ꞌɗe bula d-inga-a lo to-e gə. Logə n-ɔr gəl tar lə-a le ɗaa n-ɗa tar naji gə ɔji ɓeko̰ lə Luba ngaɓa n-sangə ɗəw torondu gə lə Moyiji ngaɓa gə mbede lə Pajambərəje, mba cɛdə ne singa-je ɔji dɔ Jeju, un kud-e gə ndɔɔ ja saar ce kar kumatagə.

²⁴ Nje gə kɛm ꞌnjigi go tar lə-a ngaa nje gə d-isi gə məkədərə tɔ.

²⁵ Be ɓa d-aw d-ɔdə gə kəji lə-je gə um naa gə tɔ̰y ang le ɗaa, Pɔl ila tar dɔ mar-ɛ gə na: Tar gə Njil Njerɔsangə pa ar ka-sijee gə ndu Pajambərə Ejay le tɔgərɔ ja, tar gə na:

²⁶ Aw gə rɔ dəw mə ɓeje gə nee ngaɓa pa na: A koje tar gə mbi-si gə maj-ɛ ja ngaa a gərəje gəl-e ang magə. A kaje ne gə maj-ɛ ja ngaa a koje ang magə.

²⁷ Mba mə dəw mə ɓeje nee le təl kədərə; D-udu mbi-je jigi ngaɓa ꞌɓiri kəm-je mbḭ, Na d-a ko ne gə kəm-je ngaɓa gə mbi-je nəm tɔ. Na mə-je a gərə gəl ne Ngaɓa mba mbəl kəji lə-je kar m-aji-je.

²⁸ May kar-si ꞌgərəje kaji lə Luba gə nee le ula ne ar dəwje gə ꞌgərə Luba ang, ɗaa ꞌjeje le d-a ko gə mbi-je ja.

²⁹ Logə n-pa tar gə nee le ɗaa Jiibije d-ɔdə ꞌma̰y naa tar taar-taar gə singa horo naa gə.

³⁰ Be ɓa Pɔl ɗa ɓal joo ja dɔngɔ mə kəy nay gə uwa gə. Dəwje tɔ̰y gə ꞌɗe d-o-e le, n-uwa-je gə maj-ɛ gə rɔ-ɛ gə,

³¹ n-ila mbərə tar ɓeko̰ lə Luba ngaɓa n-tɔji ne ɔji dɔ Mbayɓe Jeju Kirisi gə ɓəəl kara ang ngaɓa d-ɔg-ɛ ang tɔ.