Koula 27 - Mbede Lə Luba Kone Gə Sigi

Pɔl aw Rɔm

¹ Logə d-un ɗəw kar-si j-al to j-aw Itali ɗaa d-um Pɔl je gə dəwje gə kɛm gə ꞌtuwa-je mə ji njekun dɔ njeɗɔje gə tɔl gə, njeɗɔje lə Ogusəd, ri-a na Juliyus.

² J-al mə to gə d-unda ri-a na Adəramid, a nday mbo kar dɔ nangə gə Aji, mbo kar man gə, dəw gə Masedowan gə ɓe la Tesaloniki kara, ri-a na Arisətarəkə aw gə si tɔ.

³ Ndɔ gə nje kore go-e ɗaa j-uru nangə Sido̰, ɗaa Juliyus ɗa gə Pɔl məmay ar-ɛ aw ɓe lə njekuraje lə-a mba kar je ꞌla sə-a.

⁴ J-ɔdə kəne əng ɗaa j-uwa mbo kar lo gə Sipərə mba ləl ula cila kəm-si.

⁵ Logə j-unda babo kadə gə Silisi gə Paməpili gangə ɗaa j-a ce Mira, ɓeko̰ gə Lisi.

⁶ Lo-e gə nee ɗaa njekun dɔ njeɗɔje gə tɔl le inga to gə ḭ Alɛgəjandəri aw gə Itali ɗaa ar-si j-al.

⁷ Asə ndɔ bula ja to aw jan-jan baa ngaɓa j-ula rɔ-si ndubu ya̰ ɓa j-a ce ne dəbə Nidə, mba ləl ɔgə ɗəw ce kəne ɗaa j-uwa mbo kar Kərɛd dɔ-si gə mə mbo gə Saləmone.

⁸ J-a ɗa ya̰ ɓa j-uwa mbo kar ɓe nee le j-a ce nee lo gə ꞌɓar-ɛ Kəm kay gə may gə to əw ang gə Laje.

⁹ Kar nday dɔ-si gə asə mbagə ngaɓa kaw mba gə to təl to ɓəəl ya̰ ngaɓa ndɔ tɔl mə ɓo kara nday ɗɔdə be ɓa Pɔl ar-je tar ndəji na:

¹⁰ Njekuraje lə-m, m-o to gə kaw mbaa gə to le a lal tuji ang ngaɓa tuji gə ɔji dɔ nekodoje gə to baa ang ngaa ɔji dɔ dəwje lə-si ja kara nəm.

¹¹ Ngaa njekun dɔ njeɗɔje gə tɔl um m-e dɔ njeləl to gə je njeko̰ dɔ to gə, ɓoo tar lə Pɔl le ang.

¹² Ngaɓa kəm kay le to gə maj-ɛ kəm kar kəne nay kuli ang ɗaa nje gə kɛm bula ja na kəm kar-si j-aw dɔ-si gə Penisi, kəm kay gə Kərɛd kəm-si gə dɔ kɔl gə əər lo kuru nangə gə lə kar ngaɓa dɔ gəl gə lo kuru nangə gə lə mba kar nay kul nday dɔ-si gə kəne.

¹³ Logə ləl ḭ dɔ kɔl ula piyaa be ɗaa d-o to gə d-asə mba tɔl ta ne gə ꞌgɔl le gə maj-ɛ. Be ɓa ꞌtudu to d-ila taar ɗaa d-uwa mbo kar lo gə Kərɛd.

¹⁴ Ngaa waga baa ja go-e gə ɗaa ləl bo gə ꞌɓar-ɛ Ərakilo̰ ḭ dɔ ngo gore gə ula gə singa cila kəm-je.

¹⁵ Lo-e gə nee ɗaa j-ḭya̰ rɔ-si yag ja j-aw gə lo tuji gə mba to asə kar gədərə no ləl gə le ang mba ləl le ndɔr-ɛ.

¹⁶ J-a nday gə ɗəw gə dɔ kɔl ngon gore gə njɛ̰ gə ꞌɓar-ɛ na Kawda ɗaa j-a ɗa gaa ɓa j-uwa ngaw to gə kar nar rɔ.

¹⁷ Logə njeləl toje d-al ngaw to le ɗaa d-uwa kul-ɛ, ꞌtɔ to le mba ꞌɓəəl to gə to le a kḭ kaw saar ɓe gə Sirətə ɗaa d-um kagə mbi to dɔ man gə d-ar ləl ja baa ndɔr si.

¹⁸ Lo kar-ɛ ɗaa d-um nekodoje gə kɛm kɔrɔ mba ləl bo le bil si ya̰,

¹⁹ ngaɓa ndɔ gə njekum gə munda ɗaa d-odo ne ɗa kula mə to gə gə ji-je ja d-um kɔrɔ.

²⁰ Asə ndɔ bula ja kar ɔsə ang nəm, ndɛ̰ndərɛ̰ndɛ̰je kara ꞌndogo ang nəm ngaɓa ləl bo le kara ula gə singa singa ɗaa sijee j-unda mə-si to gə j-a ce ang ngaa.

²¹ Ləw baa ja j-usa ne ang. Be ɓa Pɔl ar taar horo-je gə pa ar-je na: Əy ngan ko̰-mje to gə oje tar ta-m gə ɓa ar-si j-ɔdəje Kərɛd ang nama tuji gə nee le a ce be ang.

²² Ɓisine ɗaa m-ndəji-si mba kar uwaje gədərə mba dəw kara ja a kinga tuji horo-si ang ngaa to le ja baa ɓa a tuji.

²³ Anji lə Luba gə m-to njeka-ɛ gə m-aw m-pol-e ɗe ce dɔ-m gə cil nee,

²⁴ pa ar-m na: Pɔl, ꞌɓəəl ang, may kar a kaw no Sejar gə ngaɓa Luba gə njemənuji a ngom-i gə dəwje tɔ̰y gə d-isi sə-i mə to gə.

²⁵ Gəl-e gə nee ɓa, njekuraje lə-m, uwaje jingaw mə-si gə, mba m-unda mə-m dɔ Luba gə to gə a ɗa to to gə n-pa ne n-ar-m ja.

²⁶ Ngaa j-a da mbo kar ngon gore gə ban wə̰y ja ɓi.

²⁷ Cil gə njekum gə dɔg gir-e sɔɔ asə ɗaa ləl ndɔr si gə dɔ babo kadə gə ꞌɓar-ɛ Adiriyatik, dan lo gə dana ɗaa njeləl toje d-o to gə j-aw mbɔbə kar mbal.

²⁸ Logə d-ila ne ꞌna ne kuru lə man ɗaa d-inga mɛdərɛ dɔg mundaje gir-e siri, d-aw əw njɛ̰ ɗaa ꞌtəl ꞌna cibi ɗaa d-inga mɛdərɛ dɔg joo gir-e ji nay joo.

²⁹ Be ɓa ꞌɓəəl na to lə-si a kḭ dar ər ɗaa ꞌɓərə ngaw lar gə ɔy lo sɔɔ, ꞌtɔ ne bong to nangə ngaɓa ꞌngina ne lokarə.

³⁰ Ngaa njeləl toje le ꞌsangə mba ce mə to gə ka̰y ɗaa d-ḭya̰ ngaw to nar rɔ le d-ar-ɛ lɔ uru man ɗaa ꞌpaje na n-a kaw ɓərəje ngaw lar gə ɔy nangə no to gə kede.

³¹ Pɔl pa ar njekun dɔ njeɗɔje gə tɔl le na: To gə ɓo dəwje nee le d-isi mə to gə ang nama a kasə kajije ang.

³² Be ɓa njeɗɔje d-unja kula ngaw to nar rɔ le ꞌgangə d-ḭya̰ d-ar oso man.

³³ Logə d-aw ngina lokarə ɓi ɗaa Pɔl ndəji-je mba kar d-usa ne, n-pa na: Ɓogəne to ndɔ gə njekum gə dɔg gir-e gə sɔɔ ngaa aw nginaje ngaɓa isije mə-si ɓo baa lal kusa ne kara.

³⁴ M-dəji-si kar-si usa-je ne, mba to may lə darɔ-si ngaɓa bḭ dɔ dəw kara horo-si gə ja a koso nangə ɓɛdə ang.

³⁵ Logə n-pa to gə be ɗaa n-un mbə, n-ɗa oyo Luba kəm-je gə tɔ̰y ngaɓa n-cɛdə n-usa.

³⁶ Be ɓa tɔ̰y ja d-inga singa d-usa ne tɔ.

³⁷ Tɔ̰y lə-si gə j-isi mə to gə le kɔr-si to dəwje tɔl-tɔl joo gə dɔg siri gə gir-je misa̰.

³⁸ Logə d-usa ne mə-je ci ɗaa d-odo ɓɔl nekusa d-um man d-ḭya̰ to d-ar ɔlɛ pɛl.

³⁹ Logə lo arə ɗaa ꞌgərə lo le ang ngaa d-o dɔ dam lo gə ꞌnangəra̰ kəne dan man gə ɗaa pa na ɗəw to nama kar d-ɔsə to le d-aw ꞌda kəne.

⁴⁰ Be ɓa ꞌtudu ngaw lar gə ɔy le d-ḭya̰ d-ar aw mə babo kadə gə ngaɓa ngaw to gə d-aw ꞌləl nee le kara d-ḭya̰ taar nəm cibi d-ila kagə mbi to kara no to gə ɓa d-ḭya̰ d-ar ləl ja ndɔr-je dɔ-ɛ gə kar mbalaa.

⁴¹ Ngaa d-ar dɔ ꞌnangəra̰ gə horo kəm man gə joo ɗaa d-ḭya̰ to le d-ar-ɛ da. Dɔ to gə kede da ꞌnangəra̰ ɗaa ar lo kara ngaa ɓong-e ɓa ꞌpagəm man unda guru.

⁴² Njeɗɔje d-əji mba tɔl dəwje gə d-uwa-je le na dəw kara horo-je gə a kḭ koso man kalɛ ka̰y kaw.

⁴³ Ngaa njekun dɔ njeɗɔje gə tɔl le njigi kaji Pɔl ɗaa ɔgə-je dɔ-ɛ gə. N-un ɗəw n-ar nje gə d-asə kalɛ man n-ar d-um man d-alɛ ꞌce ɗaga kede,

⁴⁴ ngaɓa n-ar nje gə kɛm kar ꞌnar rɔ-je, nje gə kɛm dɔ dum bəgərəje ngaɓa nje gə kɛm tɔ ɗaa gə dəbə to gə riya. Be ɓa tɔ̰y ja ꞌce ɗaga gə rɔ-je gə ta-je təb.